Ol Yangfala Oli Askem

?Mi Mas Save Wanem Long Saed Blong Fasin Blong Smok?

Yu traem luk ol tingting we oli kam biaen, mo yu putum wan mak olsem ✔ klosap long hemia we yu ting se i stret long fasin blong yu.

□ Mi wantem testem ol samting blong luk se oli olsem wanem

□ Mi wari bitim mak

□ Mi wantem we ol fren blong mi oli glad long mi

□ Mi wari from we mi ting se mi fatfat tumas

SIPOS yu putum wan mak long eniwan long ol bokis ya, ale, hemia i soemaot se yu gat wan fasin we i sem mak long ol fren blong yu we oli stap smok tabak, no we oli gat tingting blong smok tabak.a Yumi tekem ol fasin ya wanwan:

Mi wantem testem ol samting blong luk se oli olsem wanem. “Mi wantem save se smok i olsem wanem, ale, wan gel long skul i givim wan sigaret long mi, nao mi go haed mo mi smok.”—Tracy.

Mi wari bitim mak, mo mi wantem we ol fren blong mi oli glad long mi. “Ol yangfala long skul oli talem se, ‘Mi nidim wan sigaret,’ mo afta we oli smok oli talem se, ‘!Man, naoia mi harem gud, mi no moa wari!’ Hemia i mekem se taem mi mi wari, mi tu mi wantem smok.”—Nikki.

Mekem bodi i godaon. “Sam gel oli smok from we oli wantem stap bunbun. !I isi moa blong smok i bitim we oli katem kakae!”—Samantha.

Be bifo we yu laetem fas sigaret blong yu no nekiswan, i gud yu stop smol mo yu tingting. Yu no mas mekem olsem wan fis we i hareap blong kakae bet we i hang long huk. !Tru ya, maet fis i harem gud long bet ya blong smoltaem, be samting we i hapen biaen se hem i ded! I moa gud yu folem advaes blong Baebol, mo yu mekem ‘tingting blong yu i stret.’ (2 Pita 3:1) I gud yu ansa long ol kwestin ya.

?Yu Yu Save Wanem Samting Long Saed Blong Smok?

Yu save raetem tru no giaman klosap long ol tingting we i stap ya.

a. ․․․ Smok i daonem wari.

b. ․․․ Olgeta smok we mi pulum bambae i kamaot bakegen long maot blong mi.

c. ․․․ Taem mi mi kam olfala nomo, smok bambae i jes spolem helt blong mi.

d. ․․․ Sipos mi wan boe mo mi smok, samting ya bambae i pulum ol gel blong oli laekem mi.

e. ․․․ Sipos mi smok, mi no spolem wan man, be mi spolem mi wan nomo.

f. ․․․ God i no wantem save sipos mi smok no nogat.

Ol Ansa

a. Smok i daonem wari.—Giaman. Nating se smok i daonem wari blong smoltaem, be ol saentis oli faenemaot se nikotin i save mekem se ol homonb oli kam plante moa long blad, nao man i wari moa.

b. Olgeta smok we mi pulum bambae i kamaot bakegen long maot blong mi.—Giaman. Sam stadi we ol man oli mekem oli soemaot se bitim 80 pesen blong ol samting long smok blong sigaret i go stap insaed blong bodi blong yu.

c. Taem mi mi kam olfala nomo, smok bambae i jes spolem helt blong mi.—Giaman. Evri sigaret we man i pulum bambae i spolem moa bodi blong hem. Be sam trabol i save kasem hem kwiktaem nomo. Sam man we oli smok wan sigaret nomo, be hemia i naf blong mekem se oli wantem gohed blong smok. Smok bambae i mekem se waetleva blong yu i no moa naf blong pulum gud win, ale bambae yu stap kof oltaem. Skin blong yu bambae i kam slak we yu no olfala yet. Smok i save mekem se ol tabu haf blong bodi blong man mo woman i no moa wok gud, mo i save mekem se yu seksek krangke olsem man we i lusum hed, mo tingting blong yu i save foldaon bitim mak.

d. Sipos mi wan boe mo mi smok, samting ya bambae i pulum ol gel blong oli laekem mi.—Giaman. Man ya Lloyd Johnston, wan man we i stadi blong faenemaot ol niufala save, i talem se, “bighaf blong ol yangfala gel mo boe oli ting se ol yangfala we oli smok oli no naes tumas.”

e. Sipos mi smok, mi no spolem wan man, be mi spolem mi wan nomo.—Giaman. Plante taosen man oli ded evri yia from smok we i kamaot long sigaret blong ol narafala man. Smok i save spolem famle blong yu, ol fren blong yu, mo ol anamol blong yu tu.

f. God i no wantem save sipos mi smok no nogat.—Giaman. Olgeta we oli wantem mekem God i glad oli mas sakemaot ‘olgeta samting long bodi we i stap mekem olgeta oli doti.’ (2 Korin 7:1) I tru nomo se taem man i smok, bodi blong hem i doti. Sipos yu wantem se yu wan doti man, mo yu wantem spolem yu wan mo ol narafala from smok blong sigaret, yu no save stap olsem wan fren blong God.—Matiu 22:39; Galesia 5:19-21.

?Olsem Wanem Blong Talem No?

Taswe, ?bambae yu yu mekem wanem sipos wan fren i wantem givim wan sigaret long yu? Yu save talem wan sot ansa we i klia gud se, “No tangkiu, mi mi no smok.” Plante taem, ansa olsem i mekem se narafala i no fosem yu. Sipos fren blong yu i strong long yu blong yu tekem sigaret, no i jikim yu, yu mas tingbaot se desisen ya i blong yu. Maet yu talem se:

● “Mi faenemaot sam save long saed blong ol nogud samting we sigaret i save mekem long helt blong mi, nao mi mekem desisen se mi no wantem smok.”

● “Mi gat sam impoten plan long fiuja, be sipos mi wantem luk ol plan ya oli kamtru, mi mas stap laef.”

Olsem ol yangfala we yumi tokbaot finis oli talem, maet samting we i traem yu moa, hemia tingting blong yu nomo se yu wantem smok. Sipos i olsem, i gud yu tingbaot ol kwestin we oli kam biaen. Ol kwestin ya oli save halpem yu blong winim tingting ya blong wantem smok:

● ?Olsem wanem? ?Bambae mi kasem wan gud samting sipos mi smok? Maet bambae mi smok from we mi wantem se ol fren blong mi oli glad long mi. ?Be sipos ol narafala samting we mi laekem oli no sem mak long ol samting we ol fren blong mi oli laekem, bambae oli glad long mi yet? ?Mi mi wantem joen wetem ol man we oli glad se mi spolem helt blong mi?

● ?Fasin blong smok bambae i spolem hamas mane blong mi? ?Bambae hem i spolem helt blong mi olsem wanem? ?Mo bambae hem i spolem respek we ol narafala oli gat long mi?

● ?Mi mi glad blong lusum fasin fren blong mi wetem God, jes from we mi wantem smok?

?Be olsem wanem sipos yu lan finis blong smok? ?Yu save mekem wanem blong lego?

?Olsem Wanem Blong Lego Smok?

1. Yu mas gat strong tingting blong lego. I gud yu raetemdaon ol risen from wanem yu yu wantem lego smok, mo i gud we oltaem, yu lukluk bakegen ol samting ya we yu raetemdaon. Wan samting we i save givhan long yu blong yu lego smok, hemia sipos yu wantem tumas blong stap klin long fes blong God.—Rom 12:1; Efesas 4:17-19.

2. Yu mas askem long narafala blong i halpem yu. Sipos yu stap smok long fasin haed, naoia i taem blong yu askem long ol narafala blong oli halpem yu. Yu mas talem long olgeta we yu stap haed long olgeta, se bambae yu lego smok mo yu wantem we oli givhan long yu. Sipos yu wantem mekem wok blong God, i gud yu prea long Hem blong i halpem yu.—1 Jon 5:14.

3. Yu mas putum wan stret dei blong lego. Bifo we tu wik i pas, i gud yu makem long kalenda blong yu, wanem dei stret we yu wantem lego smok. Yu mas talemaot long famle blong yu mo ol fren blong yu se long dei ya nao, bambae yu lego smok.

4. Yu mas traem faenem ol sigaret we oli stap mo sakemaot olgeta. Bifo we yu kasem dei ya we yu makem blong lego smok, yu mas lukaot ol sigaret we maet oli stap long rum blong yu, long trak blong yu, long ol poket blong klos blong yu. Sipos yu faenem sam, yu mas spolem evriwan. Yu mas sakemaot ol bensin mases, mo ol plet blong putum doti blong sigaret long olgeta.

5. Taem yu harem tes blong sigaret i kambak long yu. Yu mas dring plante jus blong frut mo wota, mo yu mas slip plante. !Yu mas tingbaot se bambae yu harem nogud blong smoltaem nomo, be gudfala frut we yu kasem bambae i stap olwe!

6. Yu mas blokem eni samting we i save pulum yu blong smok bakegen. Yu no mas stap long ol ples we i gat ol samting we oli save pulum yu blong smok. Yu mas lukaot blong yu no joen wetem ol man we oli stap smok.—Ol Proveb 13:20.

7. Yu mas sakemaot tingting blong wantem smok smol nomo. Yu no mas giaman long yu wan mo talem se, “Bambae mi pulum wan taem nomo.” Plante taem, ol tingting olsem oli pulum man blong foldaon bakegen long fasin blong smok.—Jeremaea 17:9.

Yu no mas letem narafala i trikim yu

Evri yia, ol kampani we oli stap mekem sigaret oli spenem plante bilian vatu blong mekem ol toktok long televisin mo radio, blong pulum ol man blong oli pem sigaret. Ol kampani ya oli save gud se ol toktok mo pija blong olgeta bambae i pulum tingting blong plante yangfala. Ale, taem ol yangfala ya oli kam bigman, bambae oli fas long fasin ya blong smok.

Yu no mas letem ol man ya blong salem sigaret oli stilim mane blong yu. I no nid blong yu letem olgeta oli trikim yu. Yu mas tingbaot se ol kampani blong wokem sigaret mo ol narafala yangfala we oli smok, olgeta evriwan oli no wantem mekem i gud long yu. Taswe, i nogud yu lesin long olgeta, i moa gud yu lesin long ol advaes we i stap long Baebol. Ol advaes ya i ‘blong givhan long yu.’—Aesea 48:17.

[Ol futnot]

[Bokis/Foto blong pija long pej 27]

SAMTING WE OL NARAFALA YANGFALA OLI TALEM

“Sipos wan man i askem long mi se from wanem mi no smok, mi talem long hem se, ‘From we mi no wantem mekem waet leva blong mi i doti, mo mi no wantem ded kwik.’”

“Sipos wan man i wantem givim wan sigaret long mi, mi talem long hem se, ‘No, mi no wantem.’ Nao sipos hem i traem blong fosem mi, mi talem se, ‘?Yu yu no save se mi mi gat raet blong jusum samting we mi wantem? Tede, olgeta man oli save samting ya. !Mi mi sapraes long yu!’”

[Ol foto]

Benjamin

Heather

[Bokis blong pija long pej 28]

● ?YU YU SAVE?

I gat tabak we man i no smok long hem, be hem i kakae nomo. Tabak ya i putum moa nikotin i go long bodi blong man i bitim sigaret. Tabak we man i kakae, i gat bitim 25 defren samting long hem we oli save givim kansa blong trot mo maot.

[Bokis/Foto blong pija long pej 28]

I GUD YU ASKEM LONG PAPA MO MAMA BLONG YU

Sipos yu rerem gud ol ansa blong talem long ol yangfala, bambae i isi moa blong yu winim ol samting we oli mekem blong traem pulum yu blong smok. I gud yu askem long papa mo mama blong yu, blong yufala i rerem ol toktok we yu save talem blong ansa long narafala we i wantem givim wan sigaret long yu. Maet papa no mama blong yu i mekem olsem se hem i wan yangfala we i stap pulum yu blong smok. Blong givhan long yu, yu save yusum buk ya, Ol Yangfala Oli Askem—Ol Ansa We Oli Wok Gud, Buk 1, Japta 9. I gat sam save long pej 76 mo 77, aninit long smol stamba tok ya, “?Bambae Mi Mekem Wanem?” we i soemaot olsem wanem blong ansa long ol narafala we oli traem pulum yu blong yu mekem wan nogud samting.

[Tok blong pija long pej 28]

Olsem wan fis we i hareap blong kakae bet we i hang long huk, wan man blong smok i harem gud taem hem i smok, be samting we i hapen biaen i nogud olgeta