Kristin Lav i Winim Wan Volkeno

MAN BLONG WEKAP! LONG KAMERUN I RAETEM STORI YA

LAS yia, long kantri ya Kamerun long Wes Afrika, wan bigbigfala volkeno i bosta. Maon Kamerun i wan volkeno we i hae olsem 4,070 mita antap long solwota. Hemia namba faef taem long laswan handred yia we volkeno ya i bosta, be hemia i bigwan moa i bitim ol narafala taem.

Trabol ya i stat long Sarede aftenun, Maj 27, 1999. Ol man we oli stap long taon ya Buea, long stamba blong volkeno ya, oli luk we ol stonwol, ol haos, mo ol tri oli seksek bigwan. Long tumora blong hem long naet, samples long haf pas eit, graon i seksek bigwan bitim fastaem. Ol man we oli stap long taon ya Douala, 70 kilometa longwe, oli harem graon i seksek. Long Tusde, Maj 30, 1999, niuspepa ya Le Messager i talem se: “Maon Kamerun i Bosta, 250,000 Man oli Fesem Faea.” Hem i gohed olsem: “Long tufala dei we i pas, graon i seksek 50 taem. I gat 4 niufala hol oli kamaot long volkeno ya. Hem i spolem plante handred haos finis, mo flas haos blong presiden long Buea i nogud evriwan.”

Long Buea, i gat samwe long 80 Witnes blong Jeova. Plante haos blong olgeta, oli brobrok we oli no moa save fiksimap olgeta. Wan long ol haos ya, oli bin yusum olsem wan Haos Kingdom. Be i no gat wan long olgeta ya i ded.

Kristin Lav i Wok

Wantaem nomo, Kristin lav i wok blong winim ol trabol we bigfala volkeno ya i mekem. Wan komiti i stanap blong givhan long olgeta we oli kasem trabol. Hed Kampani blong ol Witnes blong Jeova i givim sam mane from ol samting we oli hareap moa, mo lav i pusum plante handred Witnes blong givim paoa, mane mo taem blong olgeta.

Sam kongregesen blong ol Witnes blong Jeova oli sanem kakae i kam. Wan Witnes i givim 1,000 brikis we oli wokem long simen. Wan narafala Witnes i faenem rod blong pem kava we i no sas. Wan narafala bakegen i wokbaot 16 kilometa blong karem timba. Wan yangfala man we i bin sevem mane blong pem wan woman, i seftem dei blong mared blong hem, nao i yusum mane ya blong fiksimap jenso blong hem. Biaen, hem i go long bus blong tri wik, blong katem naf timba blong bildim wan haos. Nao sam strong Kristin brata oli karem timba ya long hed blong olgeta i go 5 kilometa long wan ples we trak i save kam karem.

Long Epril 24, i gat 60 man we oli rere blong wok fri, oli kam long taon we i kasem trabol ya blong oli wokem bakegen ol haos. Long ol wiken afta, namba blong olgeta i go antap kasem 200. Tri Witnes we oli wok blong wan masta, oli wok finis, nao oli kam givhan gogo medel naet i pas. Wan Witnes long Douala i wok blong masta blong hem long moning, nao biaen, hem i ron 70 kilometa long moto mo i wok kasem medel naet, nao hem i jes mekem trep i gobak long ples blong hem bakegen. Long tu manis oli wokem sikis haos. Long ol wik ya, kongregesen long Buea i mekem ol miting long haos blong wan brata, nating se namba blong olgeta we oli kam long miting i tu taem antap long namba blong ol man insaed long kongregesen.

Long taem ya, komiti we oli putumap blong givhan long ol man ya, oli givimaot 40,000 tablet olsem meresin blong putum long wota blong mekem i kam klin, mo oli lukaot long ten man long hospital we oli gat trabol blong pulum win from posen gas mo asis blong volkeno. ?Ol man we oli luk Kristin lav ya, oli tingting olsem wanem?

Kristin Lav i Win

Wan man blong Provinsel Delegesen Blong Agrikalja i luk wan haos we ol brata oli bildim, nao hem i talem se: “Haos ya hem wan i givim witnes . . . , hem i soem lav.” Wan tija i talem se: “Mi neva luk samting olsem long laef blong mi. . . . Hemia i rili fasin we i makem trufala Kristin skul.”

Olgeta we oli kasem help tu, oli talemaot toktok we i klosap sem mak. Timoti we i gat 65 yia blong hem mo hem i stap sik, i raetem se: “Evri taem mi luk niufala haos blong mi, wota i ron long ae blong mi from glad. Mifala i talem tangkiu long Jeova bakegen mo bakegen from samting ya we hem i mekem long mifala.” Wan wido we hem i no wan Witnes blong Jeova, i lusum haos blong hem. Nao hem i trabol tumas from we hem i gat fo pikinini blong lukaotem. Hem i pem sam man blong bildim wan narafala haos, be oli stilim ol kava blong hem. Ol Witnes oli givhan long hem. Woman ya i se: “Mi no save wanem blong talem blong soem tangkiu. Hat blong mi i fulap long glad.” Elizabeth, we hem i woman blong wan elda, i talem se: “Mi mi glad tumas se ol man blong Jeova oli gat lav. Samting ya i soemaot se yumi stap mekem wosip long God ya we i laef.”

Paoa blong volkeno ya i bigwan tumas, be hem i no save kilim lav blong ol Kristin brata. Hemia i stret long tok we tabu spirit i pulum aposol Pol blong raetem se: “Fasin ya we oltaem man i lavem man, bambae i no save finis samtaem.”—1 Korin 13:8.

[Tok blong pija long pej 22]

Faea blong volkeno we i ron olsem wan reva i spolem plante samting

[Tok blong pija long pej 23]

Ol wokman we oli no kasem pei oli wok strong blong bildim bakegen ol haos

[Tok blong pija long pej 23]

Maon Kamerun