Winim Trabol We i Kamaot Biaen

“LONG MONING FINIS, MIFALA I STAP WOKBAOT. MIFALA I STAP RONWE BLONG SEVEM LAEF BLONG MIFALA. I NO MOA GAT KAKAE MO WOTA BLONG DRING. OLGETA HAOS EVRIWAN OLI FLAT.”—HARJIVAN WE I NO DED TAEM GRAON I SEKSEK BIGWAN (SAES 7.9) LONG INDIA.

TAEM graon i seksek bigwan, ol man oli fraet bitim mak. Wan woman we i no ded taem graon i seksek bigwan long Taiwan long 1999, hem i talem se: “I gat wan kabod klosap long bed blong mi we i hae olsem 2.5 meta. Taem graon i seksek, ol buk long kabod ya oli stat flae olbaot long rum.” Hem i gohed se: ‘I no longtaem i pas, mi pem wan strong hat we mi stap werem taem mi ron long moto. Hat ya i stap antap long kabod. Hem i flae i kam fas long bed blong mi, klosap nomo long hed blong mi. Tingbaot, hat ya i blong sevem laef blong mi, be klosap hem i kilim mi mi ded.’

Oli No Ded Taem Graon i Seksek

Ol man we oli laef tru long hadtaem ya we graon i seksek bigwan, oli fraet tumas. Be hemia i stat blong ol trabol nomo. Long ol aoa biaen, ol man oli traehad blong faenem mo givhan long olgeta we oli karem kil. Plante oli gohed blong wok wetem strong tingting, nating se graon i save seksek bakegen mo bakegen. I no longtaem i pas, graon i seksek bigwan long El Salvado nao wan hil i brobrok, i foldaon mo i berem wan vilej. Wan man i wantem statem wok blong seftem graon ya, be hem i talem se: “Mifala i mas lukaot gud. Sipos graon i seksek bakegen, narafala haf blong hil ya i save foldaon.”

Samfala oli rere blong mekem ol bigfala samting blong givhan long ol man we oli trabol. Samting ya i hapen long India taem graon i seksek bigwan long stat blong yia 2001. Wan olfala man, nem blong hem Manu, we hem i stap laef long Amerika, hem i girap i gobak long ples blong hem. Hem i talem se: “Mi mas go, i no jes blong givhan long famle blong mi, be blong halpem olgeta man we oli stap safa.” Taem Manu i kasem ples blong hem, hem i faenem se ol samting i nogud tumas. Nating se i olsem, hem i talem se: “Mi sapraes bigwan long strong tingting we plante man oli gat.” Wan man blong raetem niuspepa i talem se: “Olgeta man we oli stap long ol haos raonabaot long mi, evriwan oli givim samting we oli naf blong givim—maet pei blong olgeta blong wan dei, wan wik, wan manis, haf mane blong olgeta we i stap long bang, no wanem samting we oli save givim blong halpem narafala.”

Yes, i wan bigfala wok blong kliarem ol doti mo givhan long ol man we oli karem kil. Be i had moa blong mekem laef blong ol man i kam gud bakegen, afta we trabol ya we i stap blong sam menet nomo i spolem gud olgeta. I gat woman ya Delores long El Salvado we i lusum haos blong hem taem graon i seksek bigwan. Hem i talem se: “Hemia i moa nogud i bitim bigfala faet we i bin kamaot long kantri ya. Taem faet i gohed, mifala i gat wan haos blong stap long hem, be naoia, nogat.”

Olsem yumi tokbaot fastaem finis, plante oli nidim ol samting blong laef, be plante moa oli nidim blong harem tok we i leftemap tingting blong olgeta. Tingbaot wanem i hapen taem graon i seksek long wes Kolombia long stat blong yia 1999, mo i flatem gud taon ya Armenia. Bitim wan taosen man oli ded, mo plante oli seksek nogud no oli harem nogud bitim mak. Wan man long ples ya, Roberto Estefan, hem i wan dokta long saed blong tingting blong man. Taem haos we hem i rentem i foldaon evriwan, hem i se: “Nomata weples yu go long hem, ol man oli stap singaot yu blong yu givhan long olgeta. Mi go long stoa blong pem wan bred, mo klosap olgeta man we oli talem ‘gud moning’ oli stat tokbaot olsem wanem oli no slip gud mo olsem wanem oli harem nogud long tingting blong olgeta.”

Yes, Dokta Estefan i save gud olsem wanem man i harem nogud afta we graon i seksek bigwan. Mo tu, wan woman we i rere blong givhan blong wokem wan kamp blong ol man we oli lusum haos blong olgeta, i talem se samfala we oli gat wok oli no moa go long wok, from we oli bilif se bambae oli ded i no longtaem.

Leftemap Tingting We i Foldaon

Long taem blong bigfala trabol olsem, ol Witnes blong Jeova oli traehad blong givhan long ol man long saed blong bodi. Be, oli givhan long olgeta long saed blong tingting mo bilif tu. Blong soem samting ya, tingbaot wanem oli mekem long Kolombia afta we graon i seksek bigwan. Hed ofis blong ol Witnes blong Jeova long kantri ya, i putumap wan komiti we i lukaot long wok blong givhan long ol man we oli trabol. Plante taosen Witnes long olgeta ples long kantri ya oli givim kakae mo mane. Smoltaem biaen, komiti i sanem 70 tan kakae i go long ples we graon i bin seksek bigwan.

Plante taem, ol man oli nidim moa we narafala i givhan long olgeta long saed blong bilif. Afta we graon i seksek bigwan long Kolombia, ol haos long taon ya Armenia oli brobrok nogud. Wan moning, wan Witnes blong Jeova i luk wan woman we i stap wokbaot long rod. Woman ya i harem nogud tumas. Ale Witnes ya i go toktok wetem hem mo i givim wan smol pepa long hem we i tokbaot, ?Olsem Wanem Long Ol Fren Blong Yumi We Oli Ded?a

Woman ya i karem pepa ya i go long haos, mo i ridim. Biaen, wan narafala Witnes blong Jeova i kam luk hem, ale woman ya i storian long samting we i bin kamaot. Hem i talem se taem graon i seksek bigwan, plante haos blong hem long taon ya oli lus. Bifo, hem i stap rentem ol haos ya mo i kasem bigfala mane from. Naoia hem i pua. Be i no hemia nomo. Taem graon i seksek, haos we woman ya i bin stap long hem i foldaon, mo boe blong hem we i gat 25 yia, i ded. Woman ya i talem long Witnes ya se bifo, hem i neva intres long God mo ol skul. Be naoia, i gat plante kwestin i stap long tingting blong hem. Smol pepa ya i bin leftemap tingting blong hem bigwan. Ale kwiktaem nomo, Witnes i stat blong mekem Baebol stadi wetem woman ya.

Ol Witnes blong Jeova oli bilif fulwan se bambae i gat wan taem long fiuja we ol trabol olsem graon i seksek, i no moa save spolem laef mo olting blong ol man. Nekis stori bambae i eksplenem from wanem oli bilif olsem.

[Futnot]

[Bokis blong pija long pej 6]

!RERE GUD!

◼ Meksua se yu fasem gud ol bigfala tang blong hot wota, mo putum ol hevi samting i godaon long floa no long wan ples we i no antap tumas.

◼ Tijim olgeta memba blong famle olsem wanem blong ofem lektrik, gas mo wota.

◼ I gud we long haos blong yu i gat wan samting blong kilim faea (fire extinguisher) wetem sam meresin mo plasta tu.

◼ Holem wan radio mo sam niufala batri oltaem.

◼ Singaot famle i kam wanples blong lanem olsem wanem oli mas mekem taem graon i seksek. Makem gud se oli mas (1) stap kwaet, (2) kilim faea mo oven, (3) stanap long doa blong haos no haed aninit long wan tebol (4) oli no mas go klosap long ol windo, glas blong lukluk fes, mo paep we smok blong faea i kamaot long hem.

[Bokis/Foto blong pija long pej 7]

GRAON I SEKSEK LONG ISREL

Profesa Amos Nur i raetem se: “Stat long taem bifo kam kasem naoia, graon i seksek moa” long Isrel, “i winim ol narafala ples blong wol.” Hemia from we Gret Rif Vali i pastru long Isrel, stat long not i go long saot. Rif Vali ya, hemia ples we ‘plet’ aninit long graon blong Mediterenia i joen wetem ‘plet’ aninit long graon blong Arebia.

Sam man blong digim graon blong faenem ol samting blong bifo, oli bilif se ol man we oli bildim ol haos long taem bifo oli folem wan spesel fasin blong mekem se ol haos oli save stanap strong taem graon i seksek. Hemia i laenap wetem tok we Baebol i talem long saed blong ol haos we oli bildim long taem blong Solomon: “Wol we i goraon long bigfala yad blong king, mo wol we i goraon long smol yad blong haos blong Hae God, mo wol blong rum blong go insaed long haos blong Hae God, oli wokem evriwan long sem fasin nomo. Oli putum tri laen blong ston mo wan laen blong timba blong sida, gogo oli finisim.” (1 King 6:36; 7:12) Oli faenem plante samting we i soemaot se ol man bifo oli bin putum ol timba insaed long ol stonwol. Oli faenem samting ya long wan get long Megido tu, we oli ting se ol man oli wokem long taem blong Solomon no maet bifo long taem ya. Man ya David M. Rohl we i stadi long samting ya, hem i ting se oli yusum ol timba ya “blong mekem haos i stanap strong taem graon i seksek.”

[Foto]

Ol haos we oli brobrok nogud taem graon i seksek long Bet Sheʼan, Isrel

[Bokis blong pija long pej 8]

FRAET BITIM MAK BLONG TU MENET

Stori blong wan man we i no ded

Long Ahmadabad, India, famle blong mifala i stap mekem rere from mared blong kasen sista blong mi. Long Jenuware 26, 2001, klok i no krae blong wekemap mi long moning, be mi sek nomo taem ol samting oli stat mufmuv. Mi harem noes blong ol kabod we oli stap jamjam olbaot, nao mi save se wan samting i rong. Angkel blong mi i stap singaot se: “!Kamaot long haos!” Taem mifala i ron i go afsaed, mifala i luk we haos i stap lei i go long wan saed, afta long narasaed. I olsem we samting ya i gohed longtaem. Be i rili blong tu menet nomo we graon i seksek.

Ol trabol ya i kamaot kwik tumas, mekem se i winim tingting blong mifala. Fastaem, mifala i jekem ol memba blong famle blong luk sipos oli oraet. Telefon i no moa wok mo i no gat lektrik. Taswe, mifala i no save faenemaot sipos ol famle blong mifala long ol narafala taon oli oraet no nogat. Afta we mifala i wari blong wan aoa, mifala i kasem nius se oli oraet. Be i no olgeta man we oli kasem gud nius olsem. Long Ahmadabad, bitim wan taosen haos oli folfoldaon, mo bitim 500 man oli ded.

Blong plante wik, ol man oli fraet mo harem nogud. Evri naet, taem oli go slip, oli fraet se graon bambae i seksek bakegen, olsem ol man we oli gat save long bisnes ya oli bin talem. I tekem longtaem blong fiksimap ol samting, mo plante man oli no gat haos. Ol trabol ya i kamaot from we graon i seksek blong tu menet nomo. Be bambae trabol ya i stap olwe long tingting blong mifala.—Samir Saraiya i talem stori ya.

[Tok blong pija long pej 7]

Wan man we i no ded taem graon i seksek bigwan long India long Jenuware 2001, i holem wan pija blong mama blong hem, we i ded mo oli stap bonem bodi blong hem

[Credit Line]

© Randolph Langenbach/UNESCO (www.conservationtech.com)