I Gat Plante Moa Taem Yet We Graon Bambae i Seksek Bigwan
TAEM graon i seksek, i gat ol masin we oli save makem paoa blong hem, blong luk se i strong olsem wanem. Stat long taem ya we ol saentis oli wokem ol masin ya, oli makem se graon i seksek bigwan plante handred taem finis. Taem graon i seksek bigwan long ol ples we i no gat man long olgeta, ol man oli no wari tumas mo ol niuspepa mo radio oli no tokbaot olgeta. Be taem graon i seksek stret long wan bigfala taon, samting ya i save mekem bigfala trabol. Taem i gat plante tumas man oli laef long wan taon mo ol man ya oli no rere, bambae fulap man oli save lusum laef blong olgeta mo olting blong olgeta tu.
Long 12 Jenuware, 2010, graon i seksek bigwan long Haiti. Taem ya i nogud moa i bitim ol narafala taem, from we plante man tumas oli lusum laef blong olgeta mo olting blong olgeta. Be hemia i no fastaem long yia ya we graon i seksek bigwan olsem, mo i no taem ya nomo we i seksek bigwan tu. Ol haf we oli kam biaen, oli tokbaot sam taem we graon i seksek bigwan long ol manis long stat blong yia 2010. Ol masin oli makem paoa blong olgeta, se oli sem mak no oli strong moa i bitim hemia we i spolem bigfala taon blong Haiti.
3 Jenuware: Etkwek we paoa blong hem i kasem 7.1, Solomon Aelan
Long taem ya we graon i seksek mo ol masin oli makem paoa blong hem fastaem se i strong moa bitim 7.1, i gat wan bigfala taetel wef we i hae olsem “2 kasem 3 meta.” Wan haeman we i wok long saed blong disasta, nem blong hem Loti Yates, i eksplenem se ol man we oli stap flae long plen, oli luk we “solwota i kavremap gud” wan vilej. Yates i talem se long vilej blong Bainara, long aelan blong Rendova, taetel wef ya i spolem gud 16 haos mo i brekem plante narafala haos.
Bifo we graon i seksek bigwan, hem i bin seksek smol, we paoa blong hem i kasem 6.6. Plante man oli fraet taem oli harem graon i seksek smol olsem, ale oli ronwe oli go antap long ol hil. Samting ya i sevem laef blong olgeta, from we tu aoa biaen, graon i seksek bigwan, mo bigfala taetel wef ya i kam kilim ol ples klosap long solwota.
26 Februari: Etkwek we paoa blong hem i kasem 7.0, Ryukyu Aelan, Japan
Long haf pas 5 long moning, graon i seksek bigwan long ol aelan ya. Mo stamba blong hem i stap 80 kilometa longwe long taon blong Naha long Okinawa, we i wan long ol aelan blong Ryukyu, long Japan. Ol man blong talemaot weta oli givim woning blong wan taetel wef, be biaen oli tekemaot woning ya bakegen. Wan woman we i stap long Okinawa blong bitim 90 yia, i talem se long taem ya, graon i seksek bigwan moa i bitim ol narafala taem long laef blong hem.
27 Februari: Etkwek we paoa blong hem i kasem 8.8, Jili
Stat long yia 1900 i kam, i gat 4 taem nomo we graon i seksek bigwan moa long hemia. Long ol faef taem ya, graon i seksek strong moa long yia 1960, hemia long Jili yet. Paoa blong hem i kasem 9.4. Wan narafala taem we graon i seksek bigwan, hemia long yia 1985, mo i spolemgud bigfala taon we i kaptel blong Jili, from we paoa blong hem i kasem 7.7. Bigfala trabol we i kamaot long tufala taem ya, i mekem se gavman i putum ol strong loa we ol man oli mas folem blong bildim ol haos we oli moa strong.
Samting ya i mekem se taem graon i seksek bigwan long yia ya, ol bigbigfala haos long Santiago mo long ol narafala taon, oli no foldaon. Nating se i olsem, plante taosen man oli kasem kil mo oli lusum graon mo haos blong olgeta, wetem olting blong olgeta tu. Tingting i stap se samwe long 500 man oli ded long taem ya. Klosap stret haf blong olgeta oli ded taem taetel wef i kasem Jili, long ol ples klosap long solwota.
4 Eprel: Etkwek we paoa blong hem i kasem 7.2, Baja California, Meksiko
Stamba blong etkwek ya i stap 18 kilometa longwe long taon blong Guadalupe Victoria, long Meksiko, mo 47 kilometa longwe long taon blong Mexicali. Eria ya i stap longwe long ol narafala ples, mo i no gat plante tumas man long hem. Be long plante bigfala taon long Meksiko mo long saot blong Yunaeted Stet, oli harem we graon i seksek we i seksek bigwan.
9 Mei: Etkwek we paoa blong hem i kasem 7.2, Not blong Sumatra, Indonesia
Long medel dei, graon i seksek aninit long solwota. Hemia samwe long 217 kilometa long taon blong Banda Aceh we i stap long not blong Indonesia. Plante man oli ron i go afsaed long haos blong olgeta, mo oli no wantem gobak insaed from we oli fraet tumas. Be i no gat ripot blong man we i ded long taem ya.
Graon Bambae i Seksek Moa Yet
Long ol yia we oli pas, plante taem graon i seksek bigwan, taswe yumi mas save se bambae i seksek yet long ol yia we oli stap kam. Wan grup long Yunaeted Stet we i stap stadi long ol samting aninit long graon, i talem se: “Bambae graon i gohed blong seksek bigwan, sem mak olsem we i stap hapen long ol yia bifo.”
I gud blong makem tok blong wan man blong raetem niuspepa, we i talem se: “Taem graon i seksek long ol yia we oli jes pas, . . . man i no naf blong stretem trabol ya, mo samting ya i mekem yumi tingbaot se man i no gat paoa. Be hemia i no min se yumi no mas mekem wan samting, sipos yumi naf blong mekem. . . . I min se, yumi mas save se bambae yumi kasem plante moa bigbigfala trabol yet, we yumi no save blokem olgeta.”
Ol man we oli stadi long Baebol, oli tingbaot ol profet tok blong Baebol we oli tokbaot klia, se taem graon i seksek bigwan, hemia haf blong saen blong ol las dei.—Matiu 24:3, 7; Mak 13:8; Luk 21:11.
[Map blong pija long pej 20, 21]
(Lukluk niuspepa)
Sam long ol etkwek we paoa blong olgeta i kasem 7.0, no i bigwan moa, stat long Jenuware kasem Mei
Meksiko
Haiti
Jili
Japan
Indonesia
Solomon Aelan