Graon i Seksek, Ol Profet Tok Blong Baebol, Mo Yu

BIFO we Jisas i ded, hem i talemaot plante samting we bambae oli hapen taem klosap “wol ya i finis.” Hem i talem se long taem ya, bambae i gat ol strong sik, hadtaem blong kasem kakae, mo ol bigbigfala faet. Hem i talem tu se “bambae graon i seksek bigwan” mo samting ya i mas hapen “olbaot long wol.” (Matiu 24:3, 7; Luk 21:10, 11) ?Jisas i stap tokbaot taem blong yumi?

Plante man oli ansa se ‘nogat.’ Oli talem se long ol yia we oli jes pas, graon i seksek sem mak olsem ol yia bifo. Nasnal Etkwek Infomesen Senta long Amerika i givim ripot ya se, long ol yia 1900, graon i seksek sem mak nomo (saes 7.0) “i no kam antap moa.”a

Profet tok blong Jisas i no minim se graon bambae i seksek moa, mo paoa blong ol seksek bambae oli bigwan moa. Jisas i bin talem nomo se olbaot long wol graon bambae i seksek bigwan. Mo tu, hem i talem se ol samting ya bambae i makem “stat” blong ol trabol. (Matiu 24:8) Yumi no makem trabol ya se i bigwan from hamas taem graon i seksek no from paoa blong hem folem rod we Richter i stanemap. Nogat. Yumi makem from samting we hem i mekem long ol man.

Tru ya, plante trabol i kamaot long taem blong yumi from we graon i seksek. Long ol yia 1900, plante milian man oli ded no oli lusum haos blong olgeta taem graon i seksek. Ol man blong hae save oli talem se i no nid blong plante man i ded olsemia. Nius blong BBC i talem se: “Long ol pua kantri, ol man oli nidim plante haos kwiktaem. Taswe, oli no tingbaot tumas blong bildim ol gudfala strong haos. Oli tingbaot fastaem blong bildim ol haos we oli no sas tumas mo blong wokem olgeta hareap.” Wan man we i save plante samting long saed blong ol disasta we oli kasem ol taon, nem blong hem Ben Wisner, i tokbaot tu disasta we oli kamaot i no longtaem i pas. Hem i se: “Ol man ya oli no ded from we graon i seksek. Oli ded from we samfala oli mestem, oli no kea, oli wok raf, mo oli wantem plante tumas samting.”

Yes, plante taem laef blong man i lus nomo from we samfala oli tingbaot olgeta nomo mo from we oli no mekem gud wok blong olgeta. Wan narafala profet tok blong Baebol long saed blong ‘lasdei’ i tokbaot ol fasin ya. Baebol i talem se klosap long lasdei, ol man bambae oli ‘tingbaot olgeta nomo, bambae oli wantem mane tumas, mo bambae oli no gat sore.’ (2 Timoti 3:1-5) Profet tok ya wetem ol tok blong Jisas long saed blong en blong wol, oli soemaot klia se yumi stap kam klosap nomo long taem ya we God bambae i finisim ol trabol we i stap mekem ol man oli safa mo harem nogud—hemia i minim tu, graon we i seksek bigwan.—Ol Sam 37:11.

?Yu yu wantem lanem moa long saed blong promes ya we Baebol i givim? Storian wetem ol Witnes blong Jeova long ples blong yu, no raet i kam long wan adres we i stap long pej 5.

[Futnot]