Ol Man Blong Ridim Wekap! Oli Talem

Graon i Seksek Mi mi ridim haf ya “Olgeta We Oli No Ded Taem Graon i Seksek Bigwan Oli Talem Stori Blong Olgeta.” (Oktoba-Disemba, 2002) Long haf ya, yufala i talem se “long ol yia 1900, graon i seksek sem mak nomo (saes 7.0) ‘i no kam antap moa.’” Be 1999 World Almanac i soem se long ol yia afta 1990, graon i seksek plante moa taem.

F. A., Itali

“Wekap!” i ansa se: Stori blong mifala i no tekem saed blong wan grup agensem narafala grup. Hem i talem nomo tok blong sam man we oli stadi long bisnes ya, mo we oli talem hamas taem graon i seksek afta long yia 1900. Stori i bin talem se nating sipos wan man i ting se namba ya “i no kam antap moa,” be profet tok blong Jisas long Matiu japta 24 i stap kamtru long taem blong yumi. Jisas i talem nomo se “bambae graon i seksek bigwan.”—Luk 21:11.

Lusum Pikinini Long Bel Taem mi luk stori ya “Mi Lusum Pikinini We i Stap Long Bel Blong Mi” (Oktoba-Disemba, 2002), wota i kam fulap long ae blong mi, from we mi tingbaot pikinini blong mitufala we mi lusum. Wantaem nomo, mi prea blong talem tangkiu long Jeova from ol save ya we mi mi nidim tumas mo we i leftemap tingting blong mi. Oltaem yumi haremgud blong save se long niufala wol we God bambae i mekem, samting ya bambae i neva hapen bakegen long wan pikinini.

J. S., Yunaeted Stet

Taem mi gat bel blong 30 wik, mi bonem pikinini blong mi, be hem i ded finis. Samting ya i moa nogud i bitim ol narafala samting we i hapen long laef blong mi. Stori ya long Wekap! i givhan long mi mo i leftemap tingting blong mi, from we i tokbaot wan samting we plante man oli ting se i tabu blong tokbaot, mo tu, from we i givim advaes we i wokgud.

K. W., Jemani

Mi tu mi lusum wan pikinini we i stap long bel blong mi. Mi mi mekem olsem we mi no kea. Be hat blong mi i trabol gud, mo evri dei, taem mi stap mi wan, mi krae. Ating soa ya bambae i stap long hat blong mi gogo olfala wol ya i finis. Be Wekap! ya i givhan bigwan long mi.

I. M., Japan

Samting we yufala i talem, i tru tumas, evri mama i kwik blong laekem pikinini we i stap long bel blong hem. I had blong narafala i kasem save long sore blong wan woman we i lusum pikinini long bel blong hem. Samting ya i hapen long mi 19 yia finis, mo sam samtaem mi krae yet from pikinini ya.

C. C., Inglan

Oltaem mi faenem i had blong toktok wetem wan woman we i jes lusum pikinini long bel blong hem. Taem mi bin harem nius se wan Kristin sista long kongregesen i lusum pikinini blong hem we i no bon yet, mi mi ridim bakegen stori ya long Wekap! nao mi raetem wan leta long hem mo long tufala olfala bubu blong pikinini ya, blong talemaot bigfala sore blong mi.

D. R., Jemani

Stori ya long Wekap! i ansa long prea blong mi. Tangkiu tumas we yufala i save long soasore mo trabol we woman i kasem taem hem i lusum pikinini we i stap long bel blong hem. Taem mi ridim stori ya, mi harem se Jeova i stap putum han blong hem i goraon long mi blong mekem mi mi harem gud.

C. P., Yunaeted Stet

Afta we mama blong mi i bonem mi, hem i lusum wan pikinini long bel blong hem. Biaen, hem i gat bel bakegen mo i karem smol sista blong mi. Mi save se mama blong mi i harem nogud tumas taem hem i lusum pikinini ya. Afta we mi ridim haf ya “?Olsem Wanem Ol Famle Mo Fren Oli Save Givhan?,” mi raetem wan leta long hem kwiktaem.

M. Y., Japan