!Bambae i No Moa Gat Ol Disasta From Rabis Weta!

“OL MAN tede oli no moa lukaot long wol ya, oli tingbaot nomo blong haremgud, blong mekem ol samting hareap, mo blong winim mane.” Hemia nao tok we i stap long fas pej blong buk ya 5000 Days to Save the Planet. Tede, yumi stap luk ol nogud frut blong griri fasin blong man. Mo nating sipos tok blong ol haeman i tru no i no tru long saed blong wol ya we i stap kam hot moa, be yumi save sua long wan samting​—⁠ol man oli stap spolem naesfala ples blong yumi, wol ya. I gat wan rod nomo blong stretem trabol ya, hemia se God i mas mekem promes blong hem long Baebol i kamtru, blong “spolem ol man ya we oli stap spolem wol.”​—⁠Revelesen 11⁠:18.

God bambae i spolem ol kruked rula blong wol ya, mo bambae i putumap wan niufala fasin blong rul. Bifo we yu sakemaot tingting ya olsem we i wan krangke tingting blong skul nomo, traem tingbaot: ?I gat wan man we i save ol samting we wol ya i nidim blong stapgud, i bitim Man we i Wokem wol? ?Yu ting se hem i no kea long samting we i hapen long wol ya? Baebol i soem klia se hem i kea. Aesea 45⁠:18 i talem se trufala God Jeova “i wokem wol ya, mo i mekem i strong, blong i save stap longtaem. Taem hem i mekem, hem i no mekem blong i ples nating nomo, hem i mekem blong man i save stap long hem.” God, hem i naf blong mekem tingting ya i kamtru, mo bambae hem i mekem.

God bambae i stanemap wan niufala gavman no kingdom blong rul long wol ya. Long Lodsprea, taem ol Kristin oli talem se “letem kingdom blong yu i kam,” oli stap askem long God blong i mekem niufala gavman ya i rul long wol ya. (Matiu 6⁠:​9, 10, NW ) Gavman ya, Kingdom blong God, bambae i soem se hem i gat save long ol samting we God i wokem mo samting we oli nidim. Taswe, Kingdom ya i naf blong mekemgud bakegen ol haf blong wol ya we man i spolem finis. Aesea 35⁠:​1, 6 i talem se: “Draeples . . . ol flaoa bambae oli stap gru long hem. . . . ol springwota bambae oli kamkamaot, nao i mekem we bambae i gat ol reva oli stap ron long hem.”

Go Kasem Taem We God i Tekem Aksin

Afta we bigfala wota i ron long yia 2002, Helmut Schmidt we bifo hem i hedgavman blong Wes Jemani, i raetem se: “I no gat wan man i save stopem ren we i brekem ol dam long reva. Ol disasta ya oli stap hapen.” Samting ya i tru. Taem weta i nogud, ol man oli no save jenisim, oli mas traem bes blong olgeta blong stap sef nomo. Be, nating se ol disasta ya oli mekem bigfala trabol mo wari, oli save mekem wan gudfala samting tu. Oli save pulum ol man blong soem lav mo givgivhan long olgeta. (Mak 12⁠:31) Sam man oli mekem olsem, taem bigfala wota i ron long Yurop. Wan niuspepa i talem se: “Fulap man we oli glad blong wok fri, oli aot long olgeta ples long Jemani oli kam blong givhan. Stat long Wol Wo Tu kasem naoia, i no gat wan disasta we i pulum fulap man olsem blong oli kam wanples blong wok.”

Plante long ol wokman ya, oli Witnes blong Jeova. Nekis stori i eksplenem bigfala wok we ol Witnes oli mekem long fo kantri, taem win mo ren i spolem ol ples ya. Wok blong ol Kristin ya i soemaot long smol fasin, samting we bambae i kamaot aninit long rul blong gavman blong God. Long taem ya, ol man bambae oli lavlavem olgeta mo givgivhan long olgeta olsem wan brata nomo, bambae oli no griri mo oli no tingbaot olgeta nomo.​—⁠Aesea 11⁠:9.a

Ol Kristin oli save haremgud long promes we God i mekem long ol man Isrel bifo, se: “Bambae [mi mi] save mekem ren i kam long graon blong yufala long stret taem blong hem, long taem blong mekem garen i rere blong planem, mo long taem blong mekem kakae i gru gud.” (Dutronome 11⁠:14) Promes ya bambae i kamtru long olgeta we oli laef long niufala wol​—⁠long taem ya we i no moa gat disasta from rabis weta.

[Futnot]

[Bokis/Image blong pija long pej 9]

Bosgud Long Weta

Long niufala wol we God i mekem, bambae ol man oli no moa fraet se bigfala hariken mo ren i save kam spolem haos mo garen blong olgeta. (2 Pita 3⁠:13) Baebol i soem klia se God mo Pikinini blong hem, Jisas Kraes, tufala i save bosgud long weta. Ridimgud ol vas ya:

◼ Jenesis 7⁠:4: “Naoia seven dei nomo i stap, nao bambae mi mekem bigfala ren i kam. Bambae i ren foti dei mo foti naet.”

◼ Eksodas 14⁠:21: “Hae God i mekem is win i blu strong, i kam seraot solwota ya long tu haf long naet ya, win ya i stap blu strong olsem gogo kasem delaet, nao i mekem we ples ya long medel blong tufala solwota ya i kam drae olgeta.”

◼ 1 Samuel 12⁠:18: “Nao [Samuel] i prea, mo long sem dei ya nomo, Hae God i sanem tanda mo ren i kam, nao ol man oli fraet tumas long hem, mo long profet ya blong hem.”

◼ Jona 1⁠:4: “Hae God i mekem bigfala win i blu, i mekem solwota i raf we i raf we klosap sip ya i brok.”

◼ Mak 4⁠:39: “Nao [long paoa blong God] Jisas i girap, i tok long win ya, i talem se, ‘!Yu kwaet!’ Mo i tok long wota ya we i raf tumas, i talem se, ‘!I naf! !Yu stap kwaet!’ Nao win ya i finis, mo olgeta samting i kwaet.”

[Tok blong pija long pej 9]

Long niufala wol, bambae yumi no moa fraet long rabis weta