Ol Beswan Pleplei Blong Pikinini

?I gud mi pem wanem kaen pleplei blong pikinini blong mi? ?Mi mas spenem hamas mane long pleplei ya? Sipos yu yu wan papa no mama, ating yu bin askem tufala kwestin ya plante taem. Wan gud nius se, plante long ol beswan pleplei oli no sas.

Wan buk (Motivated Minds​—⁠Raising Children to Love Learning) i talem se: “Pleplei we i moa gud long pikinini, hemia pleplei we i mekem pikinini i wok smol, i no pleplei we i pulum pikinini blong lukluk mo lesin nomo. Taswe ol pleplei we oli pulum pikinini blong yusum tingting blong hem, oli moa gud i bitim ol trak we oli ron long batri no ol doli we oli toktok. Ol trak mo doli oli no openem tingting blong pikinini. Maet fastaem oli glad long ol pleplei olsem, be smoltaem biaen bambae oli ronwe long olgeta, from we ol pleplei ya oli no givim janis long olgeta blong traem sam niufala samting, faenemaot sam niufala save, mo wokem wan niufala samting.”

Long ol smosmol pikinini, sam pleplei we oli save pulum olgeta blong yusum tingting blong olgeta, hemia, ol smosmol brikis we oli wokem long wud no plastik, ol emti katon, pepa, ol pensel blong dro, mo sanbij wetem wota. Wan buk (Motivated Minds) i talem se: “Ol smosmol pleplei olsem ol anamol we oli wokem long plastik, oli gud from we oli tijim [pikinini] blong luksave ol anamol we oli sem mak, putum ol anamol we oli sem kaen long wan grup, luksave olsem wanem oli defdefren, mo i tijim olgeta blong kamgud moa long fasin blong toktok from we oli mekemap ol stori long saed blong ol anamol ya.” Buk ya i talem tu se i gud we pikinini i traem plei miusik, sipos yu yu rere blong lesin long plante noes. Ol samting ya blong plei miusik oli tijim pikinini blong lesingud long ol saon, mo oli tijim hem olsem wanem ol saon oli joen blong mekem miusik.

Ol pikinini oli naf blong mekemap ol gudfala stori long tingting blong olgeta, oli wantem lanem samting, mo oli laekem blong pleplei. Taswe, yu yu save halpem olgeta blong mekem trifala samting ya sipos yu jusumgud ol pleplei blong olgeta.