Ol Pleplei We Oli Pulum Pikinini Blong Yusum Tingting Mo Han Blong Hem

Tok ya “ol pleplei we oli pulum pikinini blong yusum tingting mo han blong hem” i minim ol pleplei we oli mekem se pikinini i wantem faenemaot moa, mo yusum pleplei ya blong mekem wan samting. Ol pleplei olsem oli givhan long pikinini blong i gruap long tingting mo filing blong hem, mo blong i gat gudhan blong wokem sam samting.

Hemia sam long ol pleplei ya:

• Dro

• Kuk

• Pleplei wetem doli o trak

• Singsing

• Yusum Lego

• Pleplei wetem ol simpol samting (maet wan katon nomo we pikinini i mas tingbaot olsem wanem blong yusum)

Long plante kantri, ol pikinini oli no moa mekem ol pleplei we i pulum olgeta blong yusum tingting mo han blong olgeta, be oli wajem TV nomo o folem wan program blong ol pleplei we papa mo mama i mekem blong olgeta.

?Olsem wanem? ?Hemia wan samting blong wari from?

• Samting we yu mas save

• Samting we yu save mekem

Samting we yu mas save

• Pleplei we i pulum pikinini blong yusum tingting mo han blong hem i save givhan long hem blong i gru gud. Pleplei olsem i save mekem se pikinini i helti long bodi mo tingting, i yusum tingting mo han blong hem blong mekem samting, mo i joen gud wetem ol narafala. Mo tu, i save tijim pikinini blong i gat longfala tingting, i lanem blong mekem ol gudfala desisen, i kontrolem filing blong hem, mo i pleplei gud long grup. Wan narafala rod blong talem, se pleplei olsem i rerem pikinini from laef blong hem taem hem i kam bigwan.

• Tumas TV mo Intenet i save spolem hem. Sipos pikinini i spenem tumas taem blong wajem skrin, hem i save kam olsem we i wantem wajem oltaem, i kam fatfat, mo i agiu mo faet. Hemia wan woning long ol papa mo mama we oli letem pikinini we i no skul yet, i sidaon long fored blong skrin blong mekem hem i stap kwaet.

• Program blong pleplei i save mekem problem. Taem papa mo mama i mekem wan program blong ol pleplei blong pikinini, hem i no gat taem blong mekem ol samting we oli pulum hem blong yusum tingting blong hem, faenemaot moa, mo wokem samting wetem han blong hem. Hemia ol samting we pikinini i nidim.

Samting we yu save mekem

• Givim janis blong hem i mekem pleplei we i pulum hem blong yusum tingting mo han blong hem. I gud sipos yu letem pikinini i spenem taem afsaed, blong i save luk ol samting raonabaot long hem we God i wokem. Letem pikinini i mekem samting we hem i laekem, mo mekem ol pleplei we oli pulum hem blong yusum tingting mo han blong hem.a

  Blong tingbaot: ?Ol pleplei olsem oli save givhan long pikinini blong i gat wanem gudfala fasin mo gudhan blong mekem samting? ?Olsem wanem oli save givhan long hem taem hem i kam bigwan?

  Rul blong Baebol: “Fasin ya blong eksasaes, i save givhan long man.”—1 Timoti 4:8, futnot.

• Yu no letem pikinini i wajem skrin tumas. Tingting gud bifo we yu letem pikinini blong yu i sidaon wetem wan fon, tablet, o long fored blong TV, blong mekem hem i stap kwaet nomo. Ol dokta oli talem se ol pikinini we oli no gat tu yia yet, oli no mas wajem skrin nating, mo ol pikinini we oli gat tu kasem faef yia, oli no mas wajem bitim wan aoa evri dei.b

  Blong tingbaot: ?I gud mi putum wanem mak long saed blong taem we pikinini i spenem long fored blong skrin? ?I gud mi joen wetem hem blong wajem? ?Wanem sam nara gudfala samting we pikinini i save mekem, bitim we hem i wajem skrin nomo?

  Rul blong Baebol: “Yufala i mas lukaot gud olsem wanem yufala i wokbaot, yufala i no mas wokbaot olsem ol man we oli no waes, be olsem ol man we oli waes, yufala i yusum gud taem blong yufala.”—Efesas 5:15, 16.

• Tingting gud long eni program blong pleplei we yu mekem blong pikinini. I tru, wan program olsem i save givhan long pikinini blong i gat gudhan long wan samting o long wan spot. Be sipos yu ademap tumas samting long program ya, hemia i save mekem se pikinini i stres, mo yu tu yu stres from we yu mas tekem hem i go long ol ples we oli stap long program ya. Advaes long Efesas 5:15, 16 blong yusum gud taem blong yumi, i stret tu long saed ya.

  Blong tingbaot: ?I gat tumas pleplei long program blong pikinini blong mi? Sipos yes, ?wanem ol jenis we mi save mekem?

  Rul blong Baebol: “Yufala i save faenemaot ol samting we oli moa impoten.”—Filipae 1:10.