?Olsem Wanem Sipos Pikinini i Filim Se Hem i Boring?

Pikinini blong yu i stak long hom, mo hem i no gat samting blong mekem. Ale hem i se: “!Mi boring!” Bifo we yu go onem TV o yu talem long hem blong i go plei long fevret video gem blong hem, tingbaot ol samting ya:

Sam samting we ol perens oli faenemaot long ol pikinini we oli filim se oli boring

• Maet i kamaot from we hem i spenem tumas taem long sam samting we hem i mekem blong pleplei mo spel. Wan papa we nem blong hem Robert, i se: “Sam pikinini oli komperem ol aktiviti blong evri dei wetem fasin ya blong wajem TV o plei video gem, ale oli se laef i boring. Oli luk se ol nomol aktiviti oli boring tumas.”

  Barbara we i waef blong hem, i agri, i se: “Long ril laef, sipos man i wantem mekem wan samting, hem i mas tingting plante mo traehad, mo frut blong wok ya i slo blong kamtru. Hemia i boring tumas long tingting blong ol pikinini we oli spenem plante taem long TV o video gem.”

• Fasin ya blong skrol tru long sosol media i save mekem hem i gat negatif tingting. Sipos wan yangfala i stap lukluk ol aktiviti blong ol fren blong hem tru long sosol media, bae hem i save ting se laef blong hem i ded we. Wan gel we nem blong hem Beth, i talem se: “I isi nomo blong tingting se: ‘Evriwan oli gat gudfala taem, be mi mi stap nomo long haos.”

  Mo tu, sipos pikinini i spenem plante aoa long sosol media, hem i save filim se laef blong hem i emti mo bae i stil filim se i boring. Wan yang man we nem blong hem Chris, i se :“Maet sosol media i kipim yu bisi, be taem yu aot long hem, yu no winim wan samting from.”

• Boring i save kam wan janis. Wan mama we nem blong hem Katherine, i talem se taem pikinini i filim se hem i boring, hemia i givim janis long hem blong i mekem sam gudfala samting. Hem i talem wan eksampol se: “Pikinini i save tekem wan smol katon mo storem sam samting blong hem long hem, o i save go insaed long katon ya mo mekem i kam olsem wan roket, o wan trak, wan bot, o wan spes sip. Mo hem i save kavremap tu jea o wan tebol long wan bigfala blangket, mo talem se hemia wan tent.”

  Taswe Sherry Turkle we i stadi long tingting blong ol man, i talem se taem man i filim se hem i boring, “hemia imajinesen blong hem we i stap kolem hem.”a Taswe filing ya blong boring i no rili wan nogud samting. Blong talem stret, buk ya Disconnected i talem se: “Ol masel blong yu oli kam strong taem yu leftemap ol hevi wet. Long sem fasin, taem yu boring, bren blong yu i wok blong faenem sam niu samting blong mekem.”

Samting we i impoten: Taem pikinini i boring, yu no luk se hemia i wan problem be wan janis blong halpem hem blong i mekem sam gudfala samting.

Samting we yu save mekem sipos pikinini i filim se i boring

• Sipos i posibol, letem hem i pleplei aotsaed. Barbara we yumi tokbaot finis, i talem se: “San mo fres win i save ronemaot filing ya blong boring, hemia i wan samting blong sapraes. !Taem pikinini i stat blong pleplei aotsaed, kwiktaem nomo imajinesen blong hem i tekova!”

  Advaes blong Baebol: ‘I gat wan stret taem blong evri samting, i gat taem blong laf, mo i gat taem blong resis olbaot.’—Prija 3:1, 4, futnot.

  Sam samting blong tingbaot: ?Mi save mekem wanem blong halpem ol pikinini blong oli pleplei moa aotsaed? Sipos hemia i no posibol, ?wanem aktiviti we oli save mekem insaed long haos?

• Halpem pikinini blong i tingbaot ol narafala. Wan mama we nem blong hem Lillian, i givim sam tingting se: “Katem gras blong wan olfala fren, o rekem ol lif long yad blong hem, o kukum wan kakae blong hem mo karem i go, blong talem halo long hem. Taem man i mekem samting blong ol narafala, hem i kasem trufala glad.”

  Advaes blong Baebol: “Man we i glad blong givim samting, bambae hem i gat plante samting, mo man we i stap mekem ol narafala oli harem gud, bambae ol narafala oli mekem hem tu i harem gud.”—Ol Proveb 11:25.

  Sam samting blong tingbaot: ?Yu save halpem pikinini blong yu olsem wanem, blong hem i kasem glad ya we i kamaot taem man i mekem samting blong ol narafala?

• Soem eksampol. Fasin blong yu blong tokbaot ol wok blong yu evri dei, i save afektem pikinini blong yu. Wan mama we nem blong hem Sarah, i se: “Sipos ol toktok blong yumi oli soem se laef blong yumi i no intresting, yumi stap tijim ol pikinini blong oli kam boring. Be sipos ol toktok blong yumi oli positif, yumi stap halpem olgeta blong oli mekem sem mak.”

  Advaes blong Baebol: “Man we hat blong hem i glad, i olsem we hem i stap lafet olwe nomo.”—Ol Proveb 15:15.

  Sam samting blong tingbaot: ?Ol pikinini oli harem se mi positif o mi negatif, taem mi stap tokbaot ol wok blong mi? ?Taem mi filim se mi boring, oli luk se mi handelem samting ya olsem wanem?

Advaes: Halpem pikinini blong yu blong i wokem wan lis blong sam samting we hem i save mekem. Wan mama we nem blong hem Allison, i talem se: “Mifala i gat wan boks, mo evriwan long famle oli save raetem sam tingting mo oli go putum long boks ya.”