OL YANGFALA OLI ASKEM
?Olsem Wanem Sipos Mi Harem Se Mi Boring?
Samfala oli no laekem taem oli mas stap nomo long haos from we oli no save go sam ples o i no gat samting blong mekem speseli long wan aftenun we i gat ren. Wan yangfala man we nem blong hem Robert i talem se: “Long taem olsem, mi jes sidaon nomo we mi no save wanem blong mekem.”
?Yu harem olsem tu samtaem? !Sipos yes, atikol ya i save givhan long yu!
Samting we yu mas save
Yusum teknoloji maet i no givhan.
Yu save yusum taem ya blong go long Intenet, be i no mekem se yu yusum tingting blong yu, nao i mekem we yu kam les moa. Yangfala Jeremy we i gat 21 yia i talem se: “Yu stap lukluk skrin be tingting i flae, i no rili stap long samting we yu stap lukluk.”
Wan yangfala woman we nem blong hem Elena i agri, i se: “I gat plante samting we yu save mekem wetem ol teknoloji, be hem i pulum yu i gowe long ol ril samting long laef. !Mo taem yu no moa yusum, yu harem se yu boring moa bitim bifo!
Stret tingting i save givhan.
?Sipos yu gat plante samting blong mekem bambae yu no moa boring? Hemia i dipen sipos yu intres long samting we yu stap mekem. Eksampol, wan yangfala woman we nem blong hem Karen i talem se: “Mi no intres long skul, nating se mi gat ol samting we mi mas mekem evri dei. Yu mas intres long samting we yu mekem blong yu no harem se yu boring.”
?Yu yu save? Tingting ya se i “No gat samting blong mekem” hem i no sud blokem yu be hem i wan janis—janis blong yusum taem ya blong mekem ol niufala samting.
Taem we yu gat i olsem wan gudfala graon we yu save mekem ol niufala samting oli gru long hem
Samting we yu save mekem
Tingbaot sam narafala samting moa blong mekem. Faenem ol niufala fren. Stat mekem wan niufala samting we yu yu laekem. Mekem risej long sam niufala topik. !Ol man we oli intres blong mekem ol defren samting, oli no harem se oli boring o harem se oli stap olgeta nomo, mo oli no harem se oli boring tu taem oli stap wetem ol narafala!
Rul long Baebol: “Wanem samting we yumi stap mekem, yumi mas strong long hem long fulpaoa blong yumi.”—Prija 9:10.
“I no longtaem i pas mi stat blong lanem lanwis Mandarin Jaenis. Taem mi praktis evridei mi luksave se mi no rili gat fasin ya blong lanem samting evridei. Naoia mi laekem blong gat wan projek we mi save wok long hem. Samting olsem i mekem tingting blong mi i wok mo i givhan long mi blong yusum gud taem blong mi.”—Melinda.
Tingbaot mak we yu wantem kasem. Sipos yu tingbaot mak we yu wantem kasem long wan samting we yu stap mekem, bambae yu laekem moa blong mekem samting ya. Yu no save harem se ol wok blong skul oli boring sipos yu tingbaot ol mak we yu wantem kasem.
Rul long Baebol: “I no gat samting we i gud moa bitim we wan man i . . . haremgud from ol hadwok blong hem.”—Prija 2:24, NW.
“Klosap taem mi finis skul, mi stadi 8 aoa evri dei blong kajap. ?I boring? Nogat from we tingting blong mi i strong long samting ya. Mi putum tingting i stap long mak we mi wantem kasem biaen, hemia graduesen. Hemia nao samting we i pulum mi blong stadi.”—Hannah.
Mas akseptem ol samting we yu no save jenisim. Samtaem sam samting we yu glad tumas blong mekem bambae yu faenem se sam pat blong hem oli save mekem yu boring tu. Mo samtaem ol besfren blong yu tu oli save kanselem ol plan blong yufala, nao yu no gat samting blong mekem. Bitim we yu stap harem nogud from samting ya mo letem i winim yu, i gud we yu traem blong gat stret tingting.
Rul long Baebol: “Olgeta we oli stap glad oltaem, i olsem we oli lafet olwe.”—Ol Proveb 15:15.
“Wan fren i talem long mi se mi mas lanem blong haremgud taem mi stap mi wan. Hem i se fasin ya we yu lanem blong haremgud taem yu stap wetem ol narafala mo taem yu stap yu wan hem i fasin we evri man i mas gat.”—Ivy.