Kwestin Blong Olgeta We Oli Ridim Magasin Ya . . .

?Olsem Wanem? ?Bambae Man i Les Long Laef Sipos Hem i Laef Gogo i No Save Finis?

▪ Baebol i tokbaot promes ya se yumi save laef gogo i no save finis long Paradaes long wol. (Ol Sam 37:29; Luk 23:43, NW) ?Olsem wanem? ?Sipos yumi laef olwe long wan wol we evri samting i stret gud olgeta, bambae yumi les long hem?

Hemia i wan gudfala kwestin. Stadi we ol man oli mekem i soemaot se taem man i no gat samting blong mekem nao hem i kam les we i les, samting ya i save mekem se hem i tingting tumas, tingting blong hem i foldaon, mo maet hem i mekem ol samting we oli save spolem laef blong hem. Olgeta we oli harem se oli laef blong nating no oli taed blong mekem sem samting evri dei, oli save gat problem ya we oli les long laef. ?Olsem wanem? ?Taem ol man oli stap long Paradaes, bambae oli harem se oli laef blong nating nomo? ?Bambae oli stap mekem sem samting evri dei?

Fastaem, i gud yumi tingbaot se olgeta tok blong Baebol oli kamaot long Jehova God, mo hem nao i mekem promes ya blong laef we i no save finis. (Jon 3:16; 2 Timoti 3:16) Stamba fasin blong God hemia lav. (1 Jon 4:8) Jehova i lavem yumi bigwan, mo hem i givim long yumi ol nambawan samting we yumi stap harem gud long olgeta naoia.—Jemes 1:17.

God ya we i Mekem yumi, hem i save se sipos yumi wantem glad long laef, yumi mas mekem wok we i karem gudfala frut. (Ol Sam 139:14-16; Prija 3:12) Long Paradaes, bambae ol man oli no harem se oli wok blong nating. Ol wok we oli mekem bambae i givhan gud long olgeta mo famle blong olgeta. (Aesea 65:22-24) ?Sipos yu yu mekem wok we yu intres long hem mo yu wok had long hem fultaem, yu ting se bambae yu les long laef?

I gud blong tingbaot tu se, bambae Jehova God i no letem ol man olbaot i stap long Paradaes. Hem i givim nambawan presen ya blong laef we i no save finis, long olgeta nomo we oli folem fasin blong Pikinini blong hem Jisas. (Jon 17:3) Taem Jisas i stap long wol, hem i laekem tumas blong mekem samting we Papa blong hem i wantem. Long ol tok blong hem mo long ol fasin blong hem, hem i tijim ol man blong hem se, bambae oli glad moa taem oli givim presen i go long narafala i winim we oli kasem presen. (Ol Wok 20:35) Taem wol i kam Paradaes, bambae olgeta man oli folem tufala loa ya we i hae moa long ol narafala loa, hemia se oli lavem God mo oli lavem ol man raonabaot long olgeta. (Matiu 22:36-40) !Yu traem tingbaot sipos ol man raonabaot long yu oli gat fasin blong tingbaot narafala, oli lavem yu, mo oli laekem wok we oli mekem! ?Yu ting se bambae yu les long laef taem yu stap wetem ol man we oli gat fasin olsem?

?Wanem narafala samting we bambae man i mekem taem hem i laef long Paradaes? Evri dei bambae yumi save lanem wan niufala samting long saed blong God ya we i Mekem yumi. Ol man we oli stadi long ol samting raonabaot long yumi, oli lanem plante nambawan samting finis long saed blong ol samting we Jehova i mekem. (Rom 1:20) Nating se i olsem, yumi kasem save smol nomo long saed blong ol wok blong Jehova. Plante taosen yia bifo, gudfala man ya Job i tingbaot ol samting we hem i save long saed blong ol wok blong God, mo hem i talem wan samting we i tru yet long taem blong yumi. Hem i se: “Hemia ol smosmol samting nomo we i stap soemaot paoa blong [God]. Ol tok ya blong ol wok blong hem, yumi harem olsem tok blong man we i stap tok smosmol nomo. Be paoa blong hem i bigwan tumas, i no gat man i save makem.”—Job 26:14.

Nomata yumi laef blong olwe, bambae yumi neva save evri samting long saed blong Jehova God mo ol wok blong hem. Baebol i talem se God i putum tingting ya blong laef we i no save finis, i stap long hat blong yumi. Be i talem tu se yumi “no save faenemaot olgeta wok we tru God i mekem, long stat blong olgeta i go kasem en blong olgeta.” (Prija 3:10, 11, NW) ?Olsem wanem? ?Yu ting se bambae yu les long ol niufala samting we yu lanem long saed blong God ya we i Mekem yu?

Naoia tu, ol man we oli bisi long wok we i blong givhan long narafala mo long wok we i leftemap nem blong God, oli no les long laef. Yumi save gat strong tingting se, sipos yumi bisi long ol wok olsem bambae yumi tu yumi neva les long laef, nating se yumi laef olwe.

[Foto Credit Lines long pej 20]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)