Televisin—?Hem i Westem Taem Blong Yu?
TINGBAOT sipos wan man i talem long yu se bambae hem i givim milian vatu long yu blong yu no moa luk televisin long ful laef blong yu. ?Bambae yu glad blong mekem olsem? Sam yia i pas, oli askem kwestin ya long plante man mo woman long Amerika. Wan long evri fo long olgeta oli talem se oli no save lego televisin. Oli askem wan narafala kwestin long ol man nomo, se: ?Wanem samting we oli wantem moa long laef blong olgeta? Bighaf blong olgeta oli talem se oli wantem pis mo glad. Be hemia i namba tu samting we oli wantem. !Faswan samting, wan bigfala televisin!
Long olgeta ples blong wol, ol man mo woman oli laekem tumas televisin. Long yia 1931, taem televisin i jes stat, jeaman blong Radio Koporesen blong Amerika i talem se: “Long ol yia we oli kam, bambae televisin i go kasem evri kona blong wol, ale olgeta man bambae oli gat janis blong lukluk.” Ating long taem ya, plante man oli no bilivim tok ya. Be tede, yumi luk se klosap tok ya i kamtru. I gat samwe long wan mo haf taosen milian televisin long wol, mo ol man mo woman we oli stap lukluk televisin oli plante moa bakegen. Nating se yu laekem televisin no yu no laekem, be hem i kam wan bigfala samting long laef blong olgeta man.
Yumi sapraes blong luk hamas aoa ol man mo woman oli pasem long fored blong televisin. I no longtaem i pas, oli kaontem ol aoa ya, nao oli faenemaot se klosap evri man long wol i spenem bitim tri aoa evri dei blong lukluk televisin. Long Not Amerika, wanwan man i lukluk televisin blong fo aoa haf evri dei, mo long Japan, faef aoa. Sipos yumi ademap ol aoa ya, yumi kasem wan bigfala namba. Sipos yumi lukluk televisin blong fo aoa evri dei gogo yumi gat 60 yia, i olsem we yumi westem ten yia blong laef blong yumi long fored blong televisin. ?Sipos yu yu ded taem yu gat 60 yia, bambae yu glad se oli raetem long ston blong gref blong yu: “Gudfala fren blong mifala i slip long ples ya. Hem i bin yusum 10 yia blong laef blong hem blong lukluk televisin”? Ating bambae yu no glad.
?Olsem wanem? ?Ol man mo woman oli stap lukluk televisin from we oli haremgud long hem? Plante taem i no olsem. Plante oli ting se oli spenem tumas taem blong lukluk televisin, mo oli ting se i moagud sipos oli bin yusum taem ya blong mekem wan gudfala samting. Samfala oli go moa, oli talem se ‘televisin i bos long laef blong olgeta.’ I tru se televisin i no save holem wan man olsem fasin blong tekem drag i save holem man. Be i gat sam samting we oli sem mak long saed blong televisin mo ol drag. Ol man we oli tekem drag, oli westem plante taem. Maet oli wantem katem taem ya we oli westem no maet oli wantem lego drag fulwan, be oli no save mekem. Hemia taem we oli mas spenem wetem famle mo ol fren blong olgeta, be oli westem taem ya long ol drag nomo. Taem oli traem lego drag, oli harem nogud tumas long bodi mo tingting blong olgeta. Ol samting ya oli save hapen tu long ol man mo woman we oli stap lukluk televisin tumas.
Waes King Solomon i talem se: “I nogud yu stap dring tumas suga. Samting ya bambae i spolem yu.” (Ol Proveb 25:27) Semfala rul i stret long televisin. I tru se plante samting we yumi save lukluk long televisin oli gud nomo. Be sipos yumi spenem tumas taem blong lukluk televisin, yumi no moa gat taem blong joen wetem famle, ol pikinini oli no gat taem blong rid mo stadi long ol skulwok blong olgeta, mo yumi kam fatfat tu. Sipos yu spenem plante taem blong lukluk televisin, i gud blong tingbaot wanem gudfala samting we yu stap kasem from. Taem blong yumi i sas, yumi no mas westem. I waes tu blong tingbaot wanem kaen stori we yumi stap wajem long televisin. Long ol pej biaen, bambae yumi tokbaot samting ya.