?From Wanem Mi Mi No Mekem Lafet Blong Halowin?

LAS YIA, ol man Kanada oli stap bisi blong rere from lafet blong Halowin, hemia wan lafet we, long sam kantri, oli mekem evri yia. Lafet ya i gat wok blong rabis spirit insaed long hem. Be Michael we i gat 14 yia blong hem, i stap tingbaot narafala samting. Long wan pepa blong skul, hem i raetem se:

‘Tunaet, hem i naet bifo long lafet blong Halowin. Taem mi lukluk afsaed long windo, mi luk we ol man raonabaot long mifala oli flasem yad blong olgeta wetem ol ston blong beregraon mo ol giaman bun blong ol dedman, mo oli putum wan kaen laet long ol windo blong olgeta.a Ol papa mama oli stap finisim ol klos blong ol pikinini blong olgeta, mo ol pikinini oli stap drim long ol loli we bambae oli kasem tumora.

‘Famle blong mi i defren. Mifala i no flasem yad blong mifala, mo ol windo blong mifala oli no gat ol laet ya long olgeta. Ol man oli askem long mi from wanem mi no wantem joen long lafet ya blong Halowin. Ol Witnes blong Jeova oli no joen long lafet ya, from we stamba blong lafet ya mo mining blong hem, i no stret.b

‘Be maet yu sapraes se mi mi laekem taem blong Halowin, mo maet yu askem se, “?From wanem yu yu laekem?” Mi laekem from we hem i mekem se mi tingting dip. Mi tingbaot from wanem mi jusum blong no mekem sam samting. Evri man i mas faenemaot sipos stamba blong ol kastom i stret no i no stret. Mi mi ting se mi mas skelemgud stamba blong lafet ya. Tingbaot olsem wanem plante man bambae oli no glad sipos ol man raonabaot long olgeta oli putum klos blong ol Nasi. ?From wanem oli no glad? From we ol Nasi nao oli bin werem ol yunifom ya, mo oli bin mekem ol nogud fasin. Taswe, taem ol man oli luk ol yunifom ya oli tingbaot ol fasin blong ol Nasi we oli nogud nating. Sem mak long lafet blong Halowin. Mi mi ting se ol fasin we i kamaot long ol devel, mo ol rabis spirit, wetem ol kleva, oli nogud nating, mo mi mi no wantem joen long olgeta. I gud blong tingbaot ol jus we yumi mekem, mo from wanem yumi jusum olsem. I gud tu we yumi no jes folem tingting blong ol man raonabaot long yumi, be yumi mekem ol jus blong yumi folem ol rul we oli stap long Baebol. Hemia nao from wanem mi mi laekem taem ya blong yia. Mi mi no sem blong stap defren long ol narafala, mi mi glad nomo blong gohed blong holem strong long bilif blong mi.’

[Futnot]