Ripot Long Wok Blong Kingdom

Fasin Blong Stanap Strong Long Skul i Karem Blesing

BAEBOL i talem se: “Olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap.” (Aesea 54:13) Yumi save talem se, “olgeta pikinini blong yu,” hemia olgeta man blong God long wol, wetem ol yangfala tu. Tede, ol Kristin papa mo mama oli mekem sua se ol pikinini blong olgeta oli kasem ‘tijing blong Jeova,’ long haos blong olgeta mo long ol Kristin miting.

Be, taem ol yangfala Kristin oli go long skul, oli fesem ol bigfala traem. Plante taem, oli mas soem se oli strong blong stanap long ol samting we oli bin lanem long Baebol. Taem oli mekem olsem, risal we i kamaot i givhan long ol studen mo ol tija tu, olsem store ya we i kamaot long Maekronesia i soem.

Long wes blong Pasifik, long smol aelan ya Tol, wan aelan blong Juk, ol tija oli talem long ol skul pikinini blong rere blong joen long lafet blong Halowin. Ol studen we oli Wetnes, oli savegud se taem ol man oli mekem lafet ya, oli flasem ples mo putum ol klos olsem ol gos, ol devel, mo ol kleva​—⁠ol samting we oli joen wetem wok blong ol rabis speret. Tingting blong ol pikinini ya i save jajem olgeta sipos oli joen long lafet olsem, taswe oli no joen.a

From ol samting we ol studen ya oli stap lanem long Baebol long haos blong olgeta mo long Kristin kongregesen,b oli save se God i no glad long ol kastom ya, nating sipos oli mekem blong pleplei nomo. Blong givhan blong eksplenem klia from wanem oli gat strong tingting olsem, ol pikinini ya oli askem Barak, wan Wetnes we hem i wan misinari long aelan ya, blong i kam toktok long ol tija blong olgeta.

Afta we ol tija oli lesin long tok blong misinari ya, oli mekem plan blong holem wan narafala miting, blong Barak i save toktok wetem olgeta tija evriwan long skul. Long miting ya, Barak i talem plante pruf blong soem se Halowin i olsem wanem. Hem i tekem ol save ya long ol buk blong Watch Tower, mo long sam narafala buk bakegen. Ol tija mo olgeta bigman blong skul, oli sapraes tumas long samting we oli lanem long saed blong stampa mo histri blong lafet ya, mo olsem wanem hem i joen wetem ol skul. Ale, oli mekem disisen blong holem wan miting blong luk olsem wanem blong stretem bisnes ya.

Sam dei biaen, oli talemaot wan disisen we i mekem evriwan i sek. Olgeta samting we oli stap mekem blong rere from Halowin oli mas stop. Long yia ya, bambae skul i no mekem lafet blong Halowin. !Hemia wan nambawan frut we i kamaot from strong tingting we ol yangfala Wetnes ya oli gat, blong mekem samting we i stret long skul! Ol yangfala oli no mas fraet no sem blong soemaot se oli stanap strong long ol trutok blong Baebol.

Raon long wol, ol Wetnes blong Jeova oli tijim ol pikinini blong olgeta blong wok strong long skul. Ol yangfala Wetnes oli kasem trening tu blong folem ol rul blong Baebol long laef blong olgeta, mo blong serem hop mo bilif blong olgeta wetem ol narafala studen taem oli gat jans. Nating sipos risal we i kamaot i no gudwan tumas mo i no kamaot wantaem nomo olsem hemia, fasin blong mekem samting we i stret i save givim strong tingting long olgeta mo mekem oli haremgud. Samting we i moa impoten se, oli save sua se Papa blong olgeta long heven i glad, mo bambae i blesem olgeta from we oli obeigud long hem.

[Ol futnot]