Baebol i Talem Wanem

?Man We i Gat Tingting Daon i Slak No i Strong?

OL MAN blong wol oli talem se i gud blong folem fasin blong ol man we oli flas mo we oli wantem win oltaem. Oli talem se ol man we oli gat tingting daon oli slak, oli man blong sem mo oli kwik tumas blong obei long narafala. ?Olsem wanem? ?Man we i gat tingting daon hem i slak? ?Man we i flas hem i strong? ?Baebol i talem wanem?

Fastaem, Baebol i tokbaot gud saed blong sam fasin blong flas, no praod. Eksampol, Baebol i talem se ol Kristin oli mas praod se Jeova i God blong olgeta mo se Hem i save olgeta. (Ol Sam 47:4; Jeremaea 9:24; 2 Tesalonaeka 1:3, 4) Ol papa mo mama oli save praod from pikinini blong olgeta taem oli soemaot gudfala eksampol long saed blong Kristin fasin mo oli no fraet blong stanap strong long saed blong trufala wosip. (Ol Proveb 27:11) Be, fasin flas, no praod, i gat nogud saed blong hem tu.

Fasin Flas Mo Tingting Daon

Wan mining blong fasin flas hemia se man i tinghae bitim mak long hem wan. Kaen fasin flas ya i pulum man blong gat tingting ya se hem i impoten moa mo i hae moa maet from we hem i naes, from kala blong skin blong hem, from we hem i gat hae posisen, from we hem i gat gudhan blong mekem samting, no from we hem i gat mane. (Jemes 4:13-16) Baebol i tokbaot ol man we “oli praod tumas.” (2 Timoti 3:4) Tingting we oli gat long saed blong olgeta wan i hae bitim mak, we i no gat gudfala risen nating blong leftemap olgeta olsem.

Defren olgeta, ol man we oli gat tingting daon, oli gat gud tingting long saed blong olgeta wan mo oli luk olgeta olsem we ol narafala oli luk olgeta. Oli luksave se oli sinman mo oli nating nomo taem oli skelem olgeta wetem God. (1 Pita 5:6) Antap moa, oli luksave se narafala i gat gudfala fasin moa i bitim olgeta mo oli glad blong luk samting ya. (Filipae 2:3) Taswe, oli no ting se oli moa gud long narafala mo oli no jalus taem narafala i mekem wan gud samting. (Galesia 5:26) From samting ya, man we i gat tingting daon, hem i gat gudfala fasin fren wetem ol narafala mo samting ya i mekem se evriwan oli haremgud long filing blong olgeta mo oli stap gud.

Tingbaot eksampol blong Jisas. Bifo we hem i kam long wol, hem i wan spirit man long heven we i gat paoa. Mo taem hem i stap long wol, hem i wan man we i stretgud olgeta, i no gat sin long hem. (Jon 17:5; 1 Pita 2:21, 22) Hem i naf blong mekem plante samting, hem i waes mo i gat save. Nating se i olsem, neva hem i wantem soem hem long ol man, be, oltaem hem i gat tingting daon. (Filipae 2:6) Mo tu, hem i wasem leg blong ol aposol blong hem; mo i soem intres long ol smol pikinini. (Luk 18:15, 16; Jon 13:4, 5) Tru ya, Jisas i singaot wan pikinini i kam stanap long saed blong hem nao i talem se: “Man we i mekem tingting blong hem i stap daon olsem pikinini ya, hem i hae moa, i winim olgeta narafala man we God i King blong olgeta.” (Matiu 18:2-4) Yes, long lukluk blong Jisas mo Papa blong hem, man we i gat tingting daon i hae moa long man we i flas.—Jemes 4:10.

Man We i Gat Tingting Daon Hem i Strong

Jisas i givim gudfala eksampol long fasin blong gat tingting daon. Hem i no wan man blong sem no wan man we i kwik tumas blong obei long narafala. Hem i gat strong tingting blong talemaot trutok mo hem i no fraet nating long ol man. (Matiu 23:1-33; Jon 8:13, 44-47; 19:10, 11) Taswe, sam man we oli agensem hem be biaen oli respektem hem. (Mak 12:13, 17; 15:5) Be Jisas i neva traem blong bos long narafala. Defren olgeta, hem i gat tingting daon, kaen fasin mo lav, nao samting ya i pulum ol man oli kam long hem. Hemia wan samting we flas man i no save mekem. (Matiu 11:28-30; Jon 13:1; 2 Korin 5:14, 15) Tede tu, plante milian man oli stap tru mo oli obei long Jisas from we oli gat lav mo bigfala respek long hem.—Revelesen 7:9, 10.

Baebol i leftemap fasin ya blong gat tingting daon from we man we i gat fasin ya bambae i akseptem ol advaes mo narafala i glad blong tijim man olsem. (Luk 10:21; Kolosi 3:10, 12) Mo tu, olsem Apolos, ol Kristin bifo oli glad blong jenisim tingting blong olgeta blong i laenap wetem ol niufala save we oli i talem. (Ol Wok 18:24-26) Oli no fraet tu blong askem kwestin. Defren olgeta, wan flas man bambae i no mekem olsem from hem i fraet se ol man bambae oli talem se hem i no save samting.

Tingbaot eksampol blong haeman blong Itiopia long faswan handred yia we i stap ridim wan haf blong Tok blong God. Kristin disaepol ya Filip i askem long hem se: “?Olsem wanem? ?Yu yu save mining blong tok ya we yu stap ridim?” Haeman ya i ansa se: “?Bambae mi mi save olsem wanem? I no gat man blong i talemaot mining blong hem long mi.” !Hemia nao tingting daon! Traem tingbaot. Man ya i wan man we ol man ples blong hem oli luk hem olsem wan impoten man. Be, from we hem i gat tingting daon olsem, hem i kasem dip save long saed blong Tok blong God.—Ol Wok 8:26-38.

Man Itiopia ya i defren olgeta long ol tija blong loa blong ol man Jiu mo ol Farisi we oli tinghae long olgeta se olgeta nao oli ol man blong skul long taem blong olgeta. (Matiu 23:5-7) Bitim we oli lesin long Jisas mo ol man blong hem, oli tok nogud mo oli traem blong faenem poen long olgeta. Taswe, fasin flas blong olgeta i mekem se oli stap long tudak long saed blong spirit.—Jon 7:32, 47-49; Ol Wok 5:29-33.

?Yu Yu Olsem Graon We i Sofsof No i Strong?

Baebol i tokbaot Jeova olsem man blong wokem graonpot mo ol man olsem graon. (Aesea 64:8) Tingting daon i mekem wan man i kam olsem graon we i sofsof we i stap long han blong God blong i save mekem hem i kam wan naesfala graonpot. Be, olgeta we oli flas oli olsem graon we i drae, i strong mo i isi blong brok. Wan eksampol long saed blong fasin flas hemia flas Fero blong Ijip we i no wantem obei long Jeova nao i ded. (Eksodas 5:2; 9:17; Ol Sam 136:15) Ded blong Fero i soemaot se tok blong proveb ya i tru nomo se: “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.”—Ol Proveb 16:18.

Ol samting we yumi tokbaot long haf ya oli soemaot se ol man blong God oli mas traehad blong sakemaot ol fasin blong flas. Samtaem, ol aposol blong Jisas oli stap rao se hu i hae moa long olgeta. (Luk 22:24-27) Nating se i olsem, oli no letem flas fasin i winim olgeta. Defren olgeta, oli lesin long Jisas mo biaen oli jenisim tingting blong olgeta.

Solomon i raetem se: “Man we i obei long Hae God, mo i mekem tingting blong hem i stap daon, hem bambae i kam rijman. Bambae hem i gat longfala laef, mo ol man bambae oli ona long hem.” (Ol Proveb 22:4) !Yumi gat plante risen blong wokem tingting daon! Tingting daon i no jes wan fasin we i strong mo we i gud be hem i wan fasin we i halpem yumi blong mekem ol samting we God i save glad long hem mo yumi save kasem laef we i no save finis tu.—2 Samuel 22:28; Jemes 4:10.

?YU YU BIN TINGBAOT?

◼ ?Olsem wanem? ?Olgeta kaen fasin flas, no praod, oli nogud? —2 Tesalonaeka 1:3, 4.

◼ ?Olsem wanem tingting daon i leftemap fasin blong lanem samting? —Ol Wok 8:26-38.

◼ ?Ol man blong God oli nidim blong wokem fasin ya tingting daon?—Luk 22:24-27.

◼ ?Wanem fiuja blong ol man we oli gat tingting daon?—Ol Proveb 22:4.

[Tok blong pija long pej 30]

Ol pikinini oli no fraet blong kam long Jisas from we hem i gat tingting daon