?Wanem Fiuja Blong Wol Ya?

LONGTAEM bifo, Baebol i talem se ol gudfala fasin bambae oli lus, mo yumi luk se tok ya i kamtru tede. Baebol i talem se: “Long [“ol las dei,” NW ], laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. . . . Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man . . . oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, mo oli praod tumas. Bambae oli man we oli wantem tumas ol samting we oli stap harem gud long hem, i winim we oli stap lavem God. Long fes blong ol man, bambae olgeta oli stap folem fasin blong Kristin man, be oli no wantem paoa blong God nating long laef blong olgeta.”—2 Timoti 3:1-5.

Maet yu yu agri se profet tok ya blong Baebol i stret long wol blong yumi tede. !Be oli raetem profet tok ya klosap 2,000 yia bifo! Fastok blong hem bakegen hemia: “Long ol las dei.” ?Wanem mining blong tok ya “ol las dei”?

?“Ol Las Dei” Blong Wanem?

Plante taem yumi harem tok ya “ol las dei.” Tok ya i stap long nem blong plante handred buk long Inglis. Tingbaot buk ya we oli raetem i no longtaem, The Last Days of Innocence—America at War, 1917-1918. Fastok blong buk ya i talem se “ol las dei” we buk ya i tokbaot, hemia wan spesel taem, wan taem we ol gudfala fasin oli lus bigwan.

Fastok ya i gohed se: “Long 1914, Yunaeted Stet i jenis moa kwik i bitim olgeta taem bifo.” Tru ya, long yia 1914 faet i kamaot long fulwol. Samting ya i neva bin hapen bifo. Buk ya i talem se: “Hemia wan faet we fulwol i joen long hem, i no wan ami agensem narafala ami, be hem i wan kantri agensem narafala kantri.” Faet ya i kamaot long stat blong wan taem we Baebol i kolem “ol las dei.”

Baebol i tijim se bifo we en blong wol i kam, bambae i gat spesel taem ya “ol las dei.” Baebol i talem se wol i finis wan taem bifo: ‘God i yusum wota we i ron bigwan blong spolem wol ya we i stap bifo.’ ?Samting ya i hapen wetaem, mo wanem wol ya we i finis? Wol ya, hemia ‘ol man we oli no obei long God’ long taem blong Noa. Bambae i sem mak taem God i spolem wol blong naoia bakegen. Be ol man we oli mekem wok blong God, bambae oli stap laef olsem Noa mo famle blong hem.—2 Pita 2:5; 3:6; Jenesis 7:21-24; 1 Jon 2:17.

Samting We Jisas i Talem Long Saed Blong En Blong Wol

Jisas Kraes tu i tokbaot “taem blong Noa” we “bigfala wota i ron, i tekemaot olgeta [rabis man].” Hem i tokbaot ol samting we oli hapen long wol jes bifo we God i mekem bigfala wota i ron, mo i talem se ol semfala samting bambae oli kamaot bakegen jes bifo we “en blong fasin blong laef blong wol ya i kam.” (Matiu 24:3, 37-39, NW ) Sam narafala Baebol oli yusum tok ya “en blong wol” no “wol ya i finis.”—The Jerusalem Bible, Baebol long Bislama.

Jisas i talem se laef blong ol man bambae i olsem wanem jes bifo we wol ya i finis. Long saed blong ol faet, hem i talem se: “Ol man bambae oli mekem faet long ol narafala man. Mo ol kantri bambae oli mekem faet long ol narafala kantri.” Ol man we oli stadi long histri, oli luk se samting ya i stat long 1914. Taswe, fastok blong buk ya we yumi tokbaot antap, i talem se 1914 i makem faswan taem we “fulwol i joen long [faet], i no wan ami agensem narafala ami, be hem i wan kantri agensem narafala kantri.”

Jisas i talem wan narafala samting long profet tok blong hem, i se: “Ol man bambae oli gat hadtaem blong kasem kakae. Mo olbaot long wol, bambae graon i seksek. Be ol samting ya, i olsem we woman i stat harem we bak blong hem i soa blong i bonem pikinini.” Hem i talem tu se “bambae ol fasin nogud oli kam bigwan moa.” (Matiu 24:7-14) Yumi luk se samting ya i kamtru long taem blong yumi. !Yes, ol gudfala fasin oli stap lus hareap, mo hemia i laenap wetem profet tok blong Baebol!

?Long taem blong yumi we rabis fasin i fulap, yumi mas folem wanem fasin blong laef? Makemgud tok we aposol Pol i raetem long ol Kristin long Rom long saed blong ol rabis fasin. Hem i tokbaot ‘rabis tingting blong ol man mo woman we i blong sem nomo,’ i se: “Ol woman, oli stap tanem stret fasin blong woman wetem man, nao oli stap mekem ol fasin we i no stret. Mo long sem fasin, ol man tu oli lego ol stret fasin blong man wetem woman, nao oli stap wantem tumas ol narafala man. Nao ol man oli stap mekem ol fasin ya wetem ol narafala man, we i blong sem nomo.”—Rom 1:26, 27.

Ol man blong raetem histri oli talem se long taem blong ol faswan Kristin, fasin blong ol man i stap kam nogud finis. Be “ol smosmol grup blong Kristin oli onagud long God mo oli holem klin fasin. Gudfala fasin blong olgeta i stikim ol hiten man we oli stap ronem ol samting we oli save harem gud long hem nomo.” Samting ya i mas mekem yumi tingting se: ‘?Olsem wanem long mi mo ol fren we mi mi jusum? ?Mifala i gat gudfala fasin? ?Mifala i defren long ol man we oli mekem rabis fasin?’—1 Pita 4:3, 4.

Faet Blong Yumi

Nating we ol man raonabaot long yumi oli mekem rabis fasin, be Baebol i talem se: “Bambae tingting blong yufala i klin gud, mo i no gat man we i gat poen agens long yufala. Bambae yufala i olsem ol pikinini blong God we yufala i stret gud olgeta . . . [long medel blong] ol man ya we oli gat ol krangke fasin, mo oli agens long evri samting.” Blong gat gudfala fasin olsem, yumi mas holemtaet “tok ya blong laef.” (Filipae 2:15, 16) Vas ya i talem long ol Kristin, olsem wanem oli save blokem ol rabis fasin mo stap klin. Oli mas holemtaet ol tijing blong Baebol mo oli mas luksave se beswan fasin blong laef i blong folem ol stret rul blong Baebol.

“Rabis god blong wol ya,” Setan, hem i stap traehad blong pulum evri man oli kam long saed blong hem. (2 Korin 4:4) Baebol i talem se hem i stap “tanem fasin blong hem, blong mekem ol man oli luk hem olsem we hem i wan enjel blong laet.” Ol man blong Setan oli gat sem fasin olsem hem. (2 Korin 11:14, 15) Oli promes blong mekem ol man oli fri mo mekem olgeta oli haremgud. Be olsem Baebol i talem, “oli olsem slef nomo blong ol fasin ya we i stap spolem olgeta.”—2 Pita 2:19.

Yu no mastik long samting ya. Olgeta we oli no wantem folem ol rul blong stret fasin we God i putum, bambae oli mas harem nogud. Man blong raetem Ol Sam long Baebol i talem se: ‘Ol man nogud, God i no save sevem olgeta, from we oli no save obei long ol tijing blong hem.’ (Ol Sam 119:155; Ol Proveb 5:22, 23) ?Yu yu bilivim tok ya? Sipos yes, yu no mas letem ol toktok blong wol long saed blong fasin olbaot i kam spolem hat mo tingting blong yu.

Plante man we oli no waes, oli talem se: ‘Sipos samting we mi mi mekem i no agensem loa blong kantri, hem i oraet nomo.’ Tok ya i no stret. Papa blong yumi long heven we i lavem yumi, i talem ol tok blong lidim yu blong mekem gudfala fasin. Tok ya i no blong mekem yu yu les long laef no blong mekem yu yu kalabus, be i blong lukaotgud long yu. God i ‘stap tijim yu blong givhan long yu.’ Hem i wantem se yu yu gat wan hapi laef we i fri long trabol. Olsem Baebol i talem, sipos yu mekem wok blong God, ‘bambae [samting ya] i givhan long yu long laef ya, mo bakegen, long laef we bambae i kamtru biaen.’ Laef we bambae i kamtru biaen, hemia “laef ya we i prapa wan,” laef we i no save finis long niufala wol we God i promes blong mekem.—Aesea 48:17, 18; 1 Timoti 4:8; 6:19.

Taswe, i gud blong tingbaot ol blesing we man i save kasem taem i folem ol tijing blong Baebol, mo ol trabol soa we man i save kasem taem i no folem ol tijing ya. !Tru ya, beswan fasin blong laef, i blong lesin long God mo kasem blesing blong hem! Hem i mekem promes ya se: “Man we i stap lesin long mi, bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.”—Ol Proveb 1:33.

Olgeta Man Blong Wol Bambae Oli Gat Gudfala Fasin

Baebol i talem se, taem wol ya i finis, bambae “ol man nogud oli lus.” Mo hem i talem tu se: “Ol stret man we yu save trastem olgeta, bambae oli save stap gud long ples ya blong yumi.” (Ol Sam 37:10, 11; Ol Proveb 2:20-22) Taswe bambae i no moa gat ol rabis fasin long wol ya. Mo bambae i no moa gat ol man we oli no wantem lesin long ol gudfala tijing blong God. Sloslo, ol man we oli lavem God bambae oli mekem wol ya i kam wan paradaes, olsem paradaes ya we God i putum faswan man mo woman long hem.—Jenesis 2:7-9.

!Tingbaot olsem wanem bambae yu save haremgud blong stap long wol ya taem hem i kam klin mo ol man oli mekem i kam wan naesfala paradaes bakegen! Samfala we bambae oli kasem blesing ya blong luk paradaes, hemia ol milian man we bambae oli laef bakegen long ded. Yumi haremgud long promes ya blong God se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Ol Sam 37:29; Revelesen 21:3, 4.

[Tok blong makem poen long pej 9]

Taem wol blong bifo i finis, sam man we oli onagud long God oli laef tru long taem ya

[Tok blong pija long pej 10]

Afta we ol rabis fasin oli finis, bambae wol ya i kam wan paradaes