Baebol i Talem Wanem

?God i Makemaot Finis Evri Samting Long Laef Blong Yu?

Wan dei, tu man i stap ron long trak blong go long wok. Wan tingting i kasem tufala se bambae tufala i sotkat long wan rod we wan long tufala i bin stap long hem bifo. Taem tufala i stap ron i go long rod ya, tufala i luk faea i stap kamaot long ol windo blong wan haos. Tufala i stopem trak blong tufala mo tekemaot wan lada we tufala i gat long trak, nao tufala i sevem wan mama wetem faef pikinini blong hem. Wan niuspepa i talem se: “Ating God i makemaot finis se bambae tufala i mekem olsem.”

PLANTE man oli ting se evri samting we i hapen long olgeta, nating se i gud no i nogud, be wan paoa we i hae moa long olgeta i makemaot finis se bambae i hapen. John Calvin, wan man we i traem jenisim plante tingting blong jos long ol yia 1500, i raetem se: “God i mekem plan longtaem finis long evri samting we bambae i hapen, mo tru long plan ya hem i makemaot wanem we hem i wantem long saed blong evri man. Hem i no mekem olgeta man oli sem mak, be hem i makemaot se sam bambae oli kasem laef we i no save finis mo sam bambae oli kasem jajmen blong olwe.”

?Olsem wanem? ?God i rili makemaot finis evri samting we bambae yumi mekem, mo wanem bambae i hapen long yumi long fiuja? ?Baebol i tijim wanem?

?Bilif Ya i Laenap Wetem Stret Tingting?

Samfala we oli bilif se God i makemaot evri samting finis, oli tingting olsem se: God i save evri samting, wetem ol samting we bambae i hapen long fiuja tu. Hem i save olsem wanem ol wanwan man bambae oli yusum laef blong olgeta, mo hem i save stret taem we man bambae i ded mo olsem wanem bambae i ded. Taswe, taem man i mekem desisen, jus we hem i mekem i folem samting we God i luk mo i makemaot finis. Sipos i no hapen olsem, i min se God i no save evri samting. ?Olsem wanem? ?Tingting ya i stret? Tingbaot wanem bambae i kamaot sipos bilif ya i tru.

Sipos wan paoa i makemaot finis wanem samting bambae i hapen long yu long fiuja, i blong nating nomo we yu traem lukaotgud long yu. Sipos yu jusum blong smok sigaret no yu no smok, be samting ya bambae i no gat paoa long helt blong yu. Taem yu stap ron long trak, sipos yu taetem strap blong yu, be samting ya bambae i no mekem se yu moa sef. Olkaen tingting olsem oli no stret. Ol stadi we ol man oli mekem oli soemaot se namba blong ol man we oli ded taem oli no lukaotgud, i plante moa bitim olgeta we oli lukaotgud. Man we i no lukaotgud i save mestem mo i save ded from.

Tingbaot wan narafala samting. Sipos God i jusum blong save fastaem evri samting we bambae i hapen, hemia i min se bifo we hem i wokem Adam mo Iv hem i save finis se bambae tufala i brekem loa blong hem. God i talem long Adam se bambae hem i ded sipos i kakae frut blong ‘tri ya we i save mekem hem i save ol fasin we i gud mo ol fasin we i nogud.’ ?Be God i save finis long taem ya se Adam bambae i kakae frut ya? (Jenesis 2:16, 17) God i talem long faswan man mo woman se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya.” ?Taem God i talem olsem, hem i save finis se nambawan laef ya long paradaes bambae i no save kamtru? Nogat.—Jenesis 1:28.

Sipos yumi tingting gud, bambae yumi luksave we bilif ya se God i save fastaem evri desisen we ol man bambae oli tekem, i no laenap wetem stret tingting. Sipos God i save evri samting ya fastaem, i min se hem i stamba blong evri samting we i hapen, olsem ol faet, ol fasin nogud, mo ol trabol we i mekem man i safa. ?God i rili stamba blong ol nogud samting ya? God i givim wan klia ansa taem i tokbaot hem wan.

“Yufala Nomo i Mas Jusumaot”

Baebol i talem se “God i stamba blong fasin ya blong lavem man” mo hem “i laekem ol fasin we i stret.” Oltaem hem i talem long ol man se ‘oli mas tanem baksaed long fasin we i no stret, be oli mas glad long fasin we i stret.’ (1 Jon 4:8; Ol Sam 37:28; Amos 5:15) Plante taem hem i pulum ol man blong hem blong jusum rod we i stret. Tingbaot taem ya we Jeova i bin mekem wan kontrak wetem neson blong Isrel. Hem i talem long Moses blong i talem long olgeta se: “?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? Mi mi singaot heven mo wol, blong tufala ya nao bambae i witnes blong mi, we mi talem long yufala se yufala i mas jus. !Mi mi wantem tumas blong yufala i jusumaot laef!” (Dutronome 30:19) ?Olsem wanem? ?God i makemaot fastaem samting we ol wanwan man Isrel oli jusum blong mekem? I klia se nogat.

Josua, lida blong ol man blong God longtaem bifo, i talem long ol manples blong hem se: “Naoia yufala i mas jusumaot wanem god we yufala i wantem. . . . Be mi, wetem ol famle blong mi, bambae mifala i biaen long Hae God nomo.” (Josua 24:15) Profet blong God, Jeremaea, hem tu i talem se: “Mi mi talem stret long yu, se yu mas obei long tok ya blong Hae God. Sipos yu obei long hem, bambae yu save stap gud, mo laef blong yu bambae i sef.” (Jeremaea 38:20) ?Sipos God i pulum ol man blong mekem samting we i stret mo kasem blesing from, be hem i makemaot finis se bambae oli no mekem i stret, yu ting se God i gat lav mo stret fasin? Nogat. Bambae i olsem we hem i gat tu fes.

Ale, taem ol gudfala samting no ol nogud samting oli hapen long laef blong yu, yu no mas ting se God i makemaot ol samting ya finis. Plante taem ‘samting we i kamaot we yumi no tingbaot,’ hem i frut blong wan desisen we narafala man i tekem, maet wan desisen we i waes no wan desisen we i no waes. (Prija 9:11, NW ) Yes, God i no makemaot fiuja blong yu. Laef we i no save finis long fiuja, i dipen long ol desisen blong yu nomo.

?WANEM TINGTING BLONG YU?

◼ ?God i makemaot fastaem finis se Adam mo Iv bambae tufala i mekem sin?—Jenesis 1:28; 2:16, 17.

◼ ?Wanem ol fasin blong God we oli soemaot se hem i no save makemaot ol samting long laef blong man?—Ol Sam 37:28; 1 Jon 4:8.

◼ ?Wanem wok we yu yu gat?—Josua 24:15.

[Tok blong makem poen long pej 19]

Namba blong ol man we oli ded taem oli no lukaotgud, i plante moa bitim olgeta we oli lukaotgud