?Yu Yu Save Trastem Ol Advaes Blong Baebol?
‘?Man ya i stap tok tru no i stap giaman long mi?’ Maet yu tingting olsem taem wan man i stap toktok long yu blong traem pulum yu blong pem wan sekenhan trak, no taem wan man blong politik i stap kampen blong traem winim eleksen. Maet yu gat tingting se yu no wantem westem taem mo mane blong yu long olting mo ol save we i no givhan long yu.
LONG sem fasin, maet yu askem se: ‘?I gat sam save long Baebol we i save givhan long mi? ?Sipos mi ridim mo stadi long Baebol, bambae mi westem taem blong mi?’ Blong ansa long tufala kwestin ya, yu mas tingbaot wan vas blong Baebol, we i talem se: “Frut we i kamaot taem man i folem waestok, i soemaot sipos waestok ya i tru no nogat.” (Matiu 11:19, Phillips) Yes, frut we i kamaot taem man i folem sam advaes no “waestok,” i soemaot sipos advaes ya i gud no nogat. Ridim tok blong samfala we oli bin tekem taem blong stadi Baebol. Ol tok blong olgeta oli save givhan long yu blong luksave sipos i gud we yu ridim mo stadi long spesel buk ya no nogat.
Ol Kwestin Long Saed Blong Ded Mo Laef Afta Ded
Karen i stap long Yunaeted Stet. Stat taem hem i pikinini nomo, hem i bilif se wan gudfala man we i ded, i go stret long heven. Be taem Mama blong hem i ded, bilif ya i no mekem Karen i haremgud. Hem i stap tingting se: ‘?Naoia we mama blong mi i stap long heven, fes mo bodi blong hem i sem mak no i defren? ?Sipos mi bambae mi go long heven, bambae mi luksave hem olsem wanem? ?Taem bambae mi ded, bambae mi go long sem ples olsem hem no long wan defren ples?’
Karen i stat blong stadi Baebol wetem ol Witnes blong Jeova. Hem i kasem save se ol dedman oli no stap long heven, be oli stap slip nomo. Prija 9:5 i talem se: “Oli no moa save wan samting.” ?Be bambae hem i luk mama blong hem bakegen?
Ol klia tok blong Baebol oli leftemap tingting blong Karen mo mekem hem i haremgud. Baebol i talem se: “I nogud yufala i sapraes long samting ya, from we i gat taem i stap kam we ol dedman bambae oli harem voes blong [Kraes], nao bambae oli aot long beregraon blong olgeta.” (Jon 5:28, 29) Karen i kasem save se God ya we i Stamba blong Baebol, bambae i yusum Pikinini blong hem blong mekem ol dedman oli laef bakegen long wol ya. Karen i talem se: “Ol tijing blong Baebol long saed blong ded mo laef bakegen, oli klia mo oli mekem yumi haremgud.”
?Wanem Fasin Blong Wosip We i Stret?
Angela i wan gel Romania. Taem hem i gat 14 yia, wan pasta blong Pentekostal jos i prea long hem blong i kasem tabu spirit, nao gel ya i stat toktok long narafala lanwis. Be papa mama blong Angela, tufala i ting se ol tijing blong Pentekostal oli no stret wetem Baebol. Ale famle ya i no moa go long jos be oli stat blong stadi Baebol wetem ol Witnes blong Jeova.
Fastaem Angela i harem nogud. Be biaen, hem i luksave se ol fasin blong jos we hem i bin joen long hem, oli no stret wetem ol tijing blong Baebol. Angela i ridim Jon 17:3 (Nyutesteman Long Bislama) we i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” Angela i luksave se man i mas kasem save long God fastaem, sipos i wantem we God i glad long hem. Hem i talem se: “I no tru se spirit blong God nao i mekem we mi mi gat spesel fasin ya blong toktok long narafala lanwis, from we long taem ya mi mi no save God nating. Mi mi talem tangkiu long Jeova from we hem i halpem mi blong luksave stret rod blong mekem trufala wosip we Tok blong hem i soemaot.”
Ol Advaes We i Save Jenisim Laef Blong Man
Wan man India we nem blong hem Gabriel i talem se: “Fastaem mi mi man blong faerap long kros. Taem wan man i mekem mi mi kros, mi singaot bigwan, mi saksakem olting olbaot mo mi save kilim narafala tu. Be stadi blong Baebol i givhan long mi blong mi no moa faerap long kros. Naoia, taem i gat trabol i kamaot we i save mekem mi mi kros, mi stap kwaet nomo.”
Gabriel i bin ridim ol vas blong Baebol olsem Ol Proveb 16:32, we i talem se: “Man we i strong blong faet, hem i gud, be man we i save mekem tingting blong hem i longfala, hem i gud moa. Man we i save go mekem faet long ol narafala taon, mo i naf blong winim olgeta, hem i wan strong man, be man we i save blokem ol samting we hem nomo i wantem, hem i strong moa.” Wan narafala man we nem blong hem Dhiraj, hem tu i mas lanem blong no faerap long kros. Hem i talem se: “Semfala vas ya i givhan long mi blong luksave se wan man we i faerap long kros hem i wan slak man, be taem man i naf blong stap kwaet, hem i rili wan strong man.”
Wan man we nem blong hem Philip, i joen long wan grup blong ol stronghed long Saot Afrika. Olgeta ya oli faet, oli stil, mo oli swea. Philip i spenem taem long kalabus from ol trabol we hem i mekem. Nating se i olsem, Philip i wantem tumas blong save God. Hem i stat blong stadi Baebol wetem ol Witnes blong Jeova, nao tingting blong hem i kam strong blong wantem mekem wok blong God. Ale hem i tekem desisen blong stretem ol fasin blong hem. Hem i lego ol nogud fasin we hem i stap mekem mo i no moa joen wetem grup ya we oli mekem trabol. ?Wanem ol trutok blong Baebol we oli pulum hem blong jenisim laef blong hem?
Ol Witnes blong Jeova oli soemaot long hem tok blong Jisas long Jon 6:44: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” Philip i talem se: “Jeova i luk se wan gudfala samting i stap long hat blong mi, mo hem i pulum mi mi kam joen wetem ol man blong hem, nambawan grup ya we oli olsem wan brata nomo.” Mo tu, Philip i tingting dip long sam stori blong Baebol we oli soem se Jeova i save sore long ol man we oli tanem tingting blong olgeta from ol nogud fasin.” Philip i talem se: “Ol stori ya oli givhan long mi blong luk se Jeova i no mekem i strong tumas long ol man we oli tanem tingting from sin blong olgeta.”—2 Samuel 12:1-14; Ol Sam 51.
Wan yangfala man Ostrelia we nem blong hem Wade, hem i wan man blong dring bitim mak, i yusum drag, i plei laki, mo i slip olbaot. Be yangfala ya i no faenem glad long ol fasin ya we hem i mekem. Wan dei, hem i storian wetem ol Witnes blong Jeova mo i agri blong stadi Baebol wetem olgeta. ?Wade i lanem wanem?
Hem i talem se: “Mi mi laekem tumas fasin blong Jisas we hem i kaen long ol narafala, hem i gat sore, mo i lavem ol man mo ol pikinini tu. Moa we mi kasem save long Jisas, moa we mi wantem kam olsem hem. Baebol i tijim mi long ol fasin we mi nidim blong kam wan strong man tru, mo i tijim mi olsem wanem blong jenisim ol fasin blong mi.” ?Be olsem wanem long ol nogud samting we Wade i bin mekem? Hem i gohed se: “Baebol i tijim mi se sipos mi tanem tingting blong mi from ol sin blong mi mo mi jenisim fasin blong mi, God bambae i fogivim mi. Yes, mi save gat laef we i no save finis long paradaes long wol. !Mi save putum tingting blong mi long wan gudfala fiuja!” (Matiu 5:5) Wade i stretem laef blong hem mo naoia hem i stap mekem wosip long Jeova wetem tingting we i klin long fes blong God.
Ol tok we yu jes ridim oli kamaot long ol man we oli bin wantem blong mekem laef blong olgeta i kam moagud. Oli bin stadi Baebol blong luk sipos ol tijing blong hem oli save halpem olgeta blong winim ol trabol blong olgeta, mo blong kasem ansa long ol kwestin we oli gat. Gudfala frut we i kamaot i pruvum long olgeta se oli save trastem ol advaes blong Baebol. Yu tu yu save trastem.
Ol tok we i kamaot long God longtaem finis i talem se: “Man we i stap kasem save, mo we i stap kam waes, hem bambae i save harem gud, from we fasin ya i gud moa, i winim we hem i kasem silva, no gol. Waestok i gud moa, i winim ol gudfala ston ya we praes blong olgeta i antap tumas, we ol man oli stap yusum blong flasem ring mo jen long hem, mo i no gat wan samting nating we yu save wantem samtaem, we i gud moa winim hem. Hem i save givim longfala laef long yu, mo i save givim plante gudgudfala samting tu long yu, mo i save mekem ol man oli ona long yu. Hem i save mekem laef blong yu i ron gud, nao bambae yu stap gud oltaem long laef blong yu. Ol man we oli holem waestok oli glad oltaem nomo, mo hem bambae i mekem olgeta oli gat laef.”—Ol Proveb 3:13-18.
[Bokis/Foto blong pija long pej 25]
BAEBOL I GIVHAN LONG WAN PRESINA
Wan man we nem blong hem Bill, hem i mared mo i glad tumas long mared blong hem. Be bifo we wan yia i pas, hem i go kalabus from sam nogud samting we hem i bin mekem plante yia bifo.
Bill i harem nogud blong stap long kalabus. Be afta we filing ya i pas, hem i mekemap tingting blong hem blong yusum longfala taem long kalabus long wan rod we i save givhan long hem. Hem i se: “Mi ledaon long bed blong mi long kalabus, mi ridim Baebol mo mi stadi long hem.” Mo tu, Bill i mekem samting we hem i lanem i wok long laef blong hem. Hem i gohed se: “Mi soem kaen fasin mo fasin fren long ol narafala presina. Oli luksave se mi mi no wantem mekem ol nogud samting we olgeta oli bin mekem. Oli tokbaot mi olsem: ‘Bill i wantem spenem taem ya long kalabus blong kasem save long God mo Baebol. Bambae hem i no moa mekem trabol long wan man.’
“From we ol narafala presina oli luksave se mi mi no wantem mekem trabol, oli no pulum mi blong joen long ol rao mo trabol we i kamaot. Ol gad tu oli luk se mi no givim hadtaem long olgeta. Taswe oli mekem rod blong mi mi save go wok long ol ples we, klosap fuldei, mi stap longwe long bighaf blong ol narafala presina. Yes, taem mi folem ol tok blong Baebol long laef blong mi, samting ya i protektem gud mi.”
I gat sam miting blong ol Witnes blong Jeova long kalabus, ale Bill i go long ol miting ya mo i talemaot long ol narafala presina ol samting we hem i stap lanem. Taem hem i stap kalabus yet, hem i tekem baptaes olsem wan Witnes blong Jeova. Hem i tingtingbak long taem ya i talem se: “Mi mi westem klosap 50 yia blong laef blong mi, mo mi wantem mekem laef blong mi i kamgud. Mi mi luksave se i gat wan rod nomo blong wan presina i kamgud, hemia blong folem ol tijing blong Baebol. Mo blong kasem stret save blong Baebol, yu mas stadi wetem ol Witnes blong Jeova. Jos ya nomo i tijim trutok blong Baebol. Mi no save talem wan narafala samting moa.”
Naoia, Bill i no moa stap long kalabus. Hem i stap wok strong long wan kongregesen blong ol Witnes blong Jeova long Yunaeted Stet. Hem wetem woman blong hem, tufala i gohed blong stadi long Tok blong God mo folem ol tijing blong Baebol long laef blong tufala. Tufala i laekem tumas tingting we i stap long Aesea 48:17, 18, se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem. Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.”
[Tok blong pija long pej 23]
Karen, Yunaeted Stet
[Tok blong pija long pej 23]
Angela, Romania
[Tok blong pija long pej 24]
Gabriel, India
[Tok blong pija long pej 24]
Dhiraj, India
[Tok blong pija long pej 24]
Philip mo famle blong hem, Saot Afrika
[Tok blong pija long pej 24]
Wade, Ostrelia