?Baebol i Talem Wanem?

?Jisas i Bon Wetaem?

“I NO gat man i save dei we Kraes i bon long hem.” Hemia nao samting we Encyclopedia of Early Christianity i talem. Nating se i olsem, plante milian man long olgeta ples blong wol we oli talem se oli Kristin oli stap mekem lafet long Disemba 25 blong tingbaot dei we Jisas i bon long hem. Be dei ya i no stap long Baebol. ?Olsem wanem? ?Jisas i rili bon long manis Disemba?

Nating we Baebol i no talem stret dei we Jisas i bon long hem, Baebol i soemaot gud se hem i no bon long Disemba. Ol narafala pruf tu we oli no stap long Baebol, oli soemaot from wanem ol man oli jusum Disemba 25 blong mekem lafet blong betde blong Jisas.

?From Wanem Jisas i No Bon Long Disemba?

Gospel blong Luk i talem se Jisas i bon long taon ya Betlehem long kantri blong Juda. “Nao i gat sam man blong ples ya we oli stap afsaed long vilej, oli stap lukaot long ol sipsip blong olgeta, long naet.” (Luk 2:4-8) Hemia nao fasin we oli stap mekem oltaem. Buk ya, Daily Life in the Time of Jesus, i talem se: “Plante taem long wan yia, ol sipsip oli stap afsaed long open ples.” Long manis Disemba, ples i kam kolkol tumas. ?Olsem wanem? ?Ol man blong lukaot long ol sipsip bambae oli stap afsaed long taem ya? Buk ya i talem se: “Taem ples i kolkol, ol sipsip oli stap insaed long wan bigfala haos. Be Gospel i talem se ol man blong lukaot long sipsip oli stap afsaed. Hemia nomo i naf blong soemaot se dei we oli makem long koltaem olsem Krismas dei, hem i no stret.”

I gat wan narafala smol poen tu long Gospel blong Luk we i sapotem tingting ya. Luk i talem se: “Sisa Ogastas, man Rom we i king long olgeta kantri long taem ya, hem i mekem wan loa, se ol man blong hem oli mas mekem wan sensas blong kaontem olgeta man we oli stap aninit long paoa blong hem. Sensas ya, hem i faswan we olgeta oli mekem, mo oli mekem long taem ya we Kwaerinias i hed gavman long Siria. Nao long taem ya, olgeta man oli gobak long stret ples blong olgeta, blong ol man ya oli tekem nem blong olgeta.”—Luk 2:1-3.

Ating Ogastas i givim oda ya blong mekem wan sensas blong save hu i mas pem takis mo joen long ami. Meri mo man blong hem Josef, tufala i obei long oda ya, nating se Meri i kam hevi from we klosap i karem bebi. Tufala i lego Nasaret mo tufala i wokbaot samwe 150 kilometa blong go long Betlehem. Tingbaot samting ya.?Yu ting se Ogastas we i rul long taem ya, bambae i talem long ol man Jiu, we oli no wantem stap aninit long rul blong Rom finis, blong oli wokbaot long wan longfala trip long taem blong kolkol mo ren? Antap long hemia, Ogastas i no wan man blong pusum nus blong hem plante long wok blong lokol gavman.

Plante man blong raetem histri mo olgeta we oli stadi dip long Baebol, olgeta tu oli no bilif se Jisas i bon long Disemba 25. I sua se bambae yu faenem ol save ya long wan insaeklopedia long ples blong yu. Buk ya, Our Sunday Visitor’s Catholic Encyclopedia, i talem se: “Bighaf blong ol man oli agri se Jisas i no bon long Disemba 25.”

?From Wanem Oli Jusum Disemba 25?

Plante handred yia afta we Jisas i ded, ol man oli jusum Disemba 25 olsem dei we Jisas i bon long hem. ?From wanem? Plante man we oli raetem histri, oli ting se taem ya we ol man oli mekem lafet blong Krismas long hem, hem i wan taem we ol hiten man oli stap mekem lafet blong olgeta long hem.

Olsem nao, Encyclopædia Britannica i talem se: “Plante man oli eksplenem se ol man we oli talem se oli Kristin oli jusum dei ya Disemba 25, taem oli tekem bilif ya blong narafala skul, hemia dies solis invicti nati (we i minim ‘betde blong bigfala san we i strong tumas’). Hemia i wan impoten holide blong ol man Rom, we i makem taem we san i bon bakegen no san i kam strong bakegen, i olsem we kol taem i finis, mo hot taem i stat.”

Buk ya The Encyclopedia Americana, i talem se: “Risen from wanem oli jusum Disemba 25 blong mekem lafet blong Krismas i no klia, be plante man oli ting se oli jusum dei ya blong i laenap wetem ol lafet we ol hiten man oli stap mekem long taem we ol dei oli stap kam longfala bakegen, blong makem se ‘san i bon bakegen.’ . . . Long taem ya, ol man Rom oli mekem lafet ya we nem blong hem Saturnalia (wan lafet blong ona long god ya Saturn, god blong garen, mo blong ona long paoa blong san we i stap kam strong bakegen).” Long taem blong ol lafet ya, ol man mo woman oli mekem rabis fasin long saed blong seks, oli mekem bigfala noes mo oli gat gud taem bitim mak. Tede, ol semfala fasin ya oli stap kamaot long taem blong lafet blong Krismas.

?Olsem Wanem Yumi Ona Long Kraes?

Samfala oli talem se, nating we yumi no save stret dei we Jisas i bon long hem, be ol Kristin oli mas mekem lafet blong tingbaot taem we Jisas i bon long hem. Oli ting se sipos oli mekem lafet ya long wan fasin we i no olbaot, hemia wan stret rod blong ona long Kraes.

I tru, taem ya we Jisas i bon long hem i wan impoten samting we Baebol i tokbaot. Baebol i talem se taem Jisas i bon, wantaem nomo i gat fulap enjel oli kamtru, oli presem God, mo oli singsing se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.” (Luk 2:13, 14) Be i gud blong makem se i no gat wan tok blong Baebol we i talem se yumi mas mekem lafet blong tingbaot dei we Jisas i bon long hem. Defren olgeta, Baebol i givim oda se yumi mas mekem memoriol blong tingbaot ded blong Jisas, mo ol Witnes blong Jeova oli mekem samting ya wan taem long wan yia. (Luk 22:19) Hemia wan rod blong givim ona long Jisas.

Jisas i talem wan tok long laswan naet blong hem long wol, i se: “Sipos yufala i stap mekem ol samting we mi mi talem long yufala, yufala i fren blong mi.” (Jon 15:14) Hem i talem tu se: “Sipos yufala i lavem mi, bambae yufala i save obei long ol tok blong mi.” (Jon 14:15) I tru, beswan rod blong ona long Jisas Kraes, i blong lanem mo folem ol tijing blong hem long laef blong yumi.

?YU YU BIN TINGBAOT?

◼ ?From wanem Jisas i no bon long manis Disemba?—Luk 2:1-8.

◼ ?Wanem samting we i moa impoten i winim dei we Jisas i bon long hem?—Prija 7:1.

◼ ?Wanem beswan rod blong ona long Jisas?—Jon 14:15.

[Tok blong makem poen long pej 27]

Baebol i pruvum se Jisas i no bon long manis Disemba

[Tok blong pija long pej 26]

?Ol man blong lukaot long sipsip, bambae oli stap afsaed wetem ol sipsip blong olgeta long taem we sno i folfoldaon?

[Credit Line]

Todd Bolen/Bible Places.com