?Jisas i Bon Wetaem?

Ansa we Baebol i givim

Baebol i no talem stret dei we Jisas Kraes i bon long hem, mo hemia samting we ol buk ya daon oli talem:

• “I no gat man i save stret dei, manis, mo yia we Kraes i bon long hem.”—New Catholic Encyclopedia.

• “Stret dei, manis, mo yia we Kraes i bon long hem, i no gat man i save.”—Encyclopedia of Early Christianity

Baebol i no givim stret ansa blong kwestin ya se, ‘?Jisas i bon wetaem?’ Be hem i tokbaot tu samting we i hapen klosap long taem we hem i bon, we i mekem se plante man oli bilif se Jisas i no bon long 25 Disemba.

I no long koltaem

1. Ol man oli mas rejista. Bifo we Jisas i bon, Sisa Ogastas i putumap wan loa se “Olgeta man long wol oli mas rejistarem nem blong olgeta.” Evri man oli mas rejista long “taon we oli bon long hem,” taswe i tekem moa long wan wik blong ol man oli gobak long ol stret ples blong olgeta. (Luk 2:1-3) Maet Loa ya bambae i givhan blong save hu i mas pem takis mo joen long ami. Be ating i had blong ol man oli mekem trip ya long enitaem long yia, mo sipos Sisa Ogastas i fosem olgeta blong oli wokbaot long koltaem blong go rejista, ating bambae oli harem nogud moa.

2. Ol sipsip. Ol man blong lukaot long sipsip “oli stap long open ples, oli stap lukaot long ol sipsip blong olgeta long naet.” (Luk 2:8) Buk ya Daily Life in the Time of Jesus i talem se long wik “bifo long Pasova [long en blong manis Maj]” kasem long medel blong Novemba, ol sipsip oli stap afsaed long open ples. Buk ya i gohed se: “Taem ples i kolkol, ol sipsip oli stap insaed long wan bigfala haos. Be Gospel i talem se ol man blong lukaot long sipsip oli stap afsaed. Hemia nomo i naf blong soemaot se dei we oli makem long koltaem olsem Krismas dei, hem i no stret.”

Taem ol lif oli stat folfoldaon

Yumi save faenemaot dei we Jisas i bon long hem, sipos yumi kaon i gobak biaen, stat long dei we hem i ded, hemia long Pasova, Nisan 14, long yia 33 K.T. (Jon 19:14-16) Jisas i gat samwe 30 yia, taem hem i statem wok blong prij. Mo hem i prij long wol blong tri yia haf, taswe hem i bon taem ol lif oli stat folfoldaon long yia 2 B.K.T.—Luk 3:23.

?From wanem ol man oli mekem Krismas long 25 Disemba?

I no gat pruf se Jisas Kraes i bon long 25 Disemba, taswe ?from wanem ol man oli stap mekem lafet blong Krismas long dei ya? Buk ya Encyclopædia Britannica i talem se ol lida blong skul oli makem dei ya blong “i laenap wetem hiten lafet we ol man Rom oli mekem long koltaem, blong makem ‘betde blong bigfala san.’” Buk ya The Encyclopedia Americana i talem se, plante lida blong skul oli “wantem pulum ol hiten man oli kam Kristin, taswe oli gohed blong mekem lafet ya.”