Ol Yangfala Oli Askem

?Bambae Mitufala i Stop Blong Fren?

“Mitufala i stap fren tri manis finis, mo mitufala tugeta i harem se mitufala i stret long mitufala. Mitufala i stap tokbaot se bambae mitufala i spenem laef blong mitufala tugeta, olsem se samting ya i sua finis blong kamtru.”—Jessica.a

“!Mi mi drim long boe ya gogo tu yia biaen, hem i jes stat blong laekem mi! Mi mi laekem blong gat wan boefren we i olfala moa long mi mo we i lukaotgud long mi.”—Carol.

Afta we sam taem i pas, Jessica i lego boefren blong hem, mo Carol tu i mekem sem mak. ?From wanem? ?Tufala i krangke blong lego ol boe ya we i luk olsem se oli gud nomo?

YUTUFALA i stap fren klosap wan yia finis. Fastaem yu yu sua se hemia nao boe ya we yu yu wantem spenem laef blong yu wetem.b Samtaem, yu gat ol semfala filing ya we yu bin gat taem yutufala i jes stat blong fren. Be naoia tingting blong yu i hafhaf long saed blong hem. ?Olsem wanem? ?Bambae yu yu no tinghevi long ol filing ya? ?Olsem wanem blong save sipos yu mas stop blong fren wetem boe ya?

Fastaem, yu mas rere blong fesem trutok ya: Taem yu frenem wan boe, mo yu no wantem tinghae long ol saen we oli soem se i gat denja long fasin fren ya, hemia i sem mak olsem we trak blong yu i stap soemaot sam saen blong denja, be yu yu no wantem save long olgeta. Sipos yu mekem olsem, problem bambae i no gowe; be bambae i kam moawas. ?Wanem sam saen long fasin fren blong wan boe mo gel, we oli soem se i gat denja, mo we i gud yu lesin long olgeta?

Ol samting oli hapen kwiktaem tumas. Taem wan boe mo gel tufala i fren mo kwiktaem nomo ol filing blong tufala oli gru, hemia i save mekem problem i kamaot. Carol i tingtingbak long samting we i hapen long hem, mo i talem se: “Mitufala i stap sanem e-mail long mitufala, mitufala i yusum kompiuta mo telefon blong storian tugeta. Taem mitufala i yusum ol samting ya blong toktok, oli gat moa paoa i bitim we sipos mi stanap long fored blong boe ya mo toktok long hem. !Hemia from we i isi nomo blong mitufala i pulum filing blong mitufala mo samting ya i save hapen kwiktaem nomo!” Yutufala i mas tekem taem blong yutufala i savsave gud yutufala. Fasin fren blong wan boe mo gel, i no mas olsem wan rabis gras we i gru kwiktaem ale biaen i drae. Defren olgeta, hem i mas olsem wan sas flaoa we i tekem taem blong gru gud.

Hem i tok agensem mi mo i daonem mi. Wan gel, nem blong hem Ana, i talem se: “Boefren blong mi i stap daonem mi oltaem, be mi wantem tumas blong stap wetem hem.” Hem i talem bakegen se: “!Mi mi letem hem i mekem sam samting long mi we mi neva ting se bambae mi mi letem wan man i mekem olsem long mi samtaem!” Baebol i agensem ol “tok nogud.” (Efesas 4:31) Boe mo gel we tufala i fren mo tufala i laeklaekem tufala, tufala i no mas yusum ol tok blong daonem narawan, nating sipos tufala i talem long fasin we i slo mo i kwaet nomo.—Ol Proveb 12:18.

Hem i kwik blong faerap long kros. Ol Proveb 17:27 (NW) i talem se :”Man we i gat fasin luksave, hem i no save kros kwik.” Erin i faenemaot se boefren blong hem i gat problem long saed ya. Hem i talem se: “Taem mitufala i no agri long wan samting, ale hem i pusum mi we klosap mi foldaon. Samtaem hem i givim kil long bodi blong mi.” Baebol i talem long ol Kristin se: “Yufala i mas lego olgeta fasin blong kros, yufala i no mas holem kros, mo yufala i no mas kros kwik.” (Efesas 4:31) Sipos wan man i no save bos long hem wan, man ya i no rere yet blong frenem wan gel.—2 Timoti 3:1, 3, 5.

Hem i no wantem ol man oli save se mitufala i fren. Angela i talem se: “Boefren blong mi i no wantem ol narafala oli save se mitufala i stap fren. !Hem i kros taem papa blong mi i faenemaot long saed blong mitufala!” I tru, maet i save gat wan gudfala risen blong wan boe mo gel tufala i haedem sam samting long saed blong fasin fren blong tufala. Be fasin ya blong haedem long ol man we oli gat raet blong save se tufala i fren, i save mekem trabol i kamaot.

Hem i no gat tingting blong mared. Ol Kristin oli gat tingting ya se taem boe mo gel i fren tugeta, hemia i blong givhan long tufala blong tufala i luksave sipos tufala i wantem mared. I tru, hemia i no minim se yu mas mekem ol plan blong mared taem yu jes stat blong frenem wan boe, nogat. Blong talem stret, plante oli no maredem faswan boe no gel we oli bin frenem. Long sem taem, sipos wan man i no rere yet blong mekem ol wok insaed long mared, man ya i no mas frenem wan gel.

Plante taem mitufala i stop blong fren, afta mitufala i fren bakegen. Ol Proveb 17:17 i talem se: “Fren blong yu, oltaem hem i stap soemaot we hem i lavem yu.” Bambae yutufala i no agri oltaem long sem samting. Be sipos fasin fren blong wan boe mo gel i gohed, afta i stop, afta i gohed bakegen mo i stop bakegen, hemia i soemaot se i gat wan bigfala samting we i no stret, mo tufala i mas lukluk long samting ya. Ana i kasem save long samting ya mo i talem se: “!Plante taem mi mo boefren blong mi, mitufala i stop blong fren, mo long ol taem ya, hat blong mi i harem nogud tumas! Mi stap gohed blong stretem fasin fren blong mitufala, be i moagud sipos mi no fren nating wetem boe ya.”

Hem i pulum mi blong slip wetem hem. “Sipos yu laekem mi, bambae yu slip wetem mi.” “Fasin fren blong yumitu i mas go moa.” “Hemia i no seks from we yumitu no rili slip tugeta.” Ol boe oli yusum ol toktok olsem blong trikim ol gel, taem oli wantem pulum olgeta blong oli slip wetem olgeta. Jemes 3:17 i talem se: “Fasin blong man we i kasem waes we i kam long heven, . . . laef blong hem i klin gud.” I stret nomo we yu yu gat wan boefren we ol fasin blong hem oli klin mo we i respektem tingting we yu yu gat long saed blong seks. !Yu no mas agri sipos narafala i traem jenisim tingting blong yu long saed ya!

Ol narafala oli bin givim woning long mi long saed blong hem. Baebol i talem se: “Man we i stap holem ol gudfala advaes we ol man oli givim long hem, bambae laef blong hem i save gohed gud, be man we i tanem baksaed long ol advaes olsem, ol plan blong hem bambae oli foldaon.” (Ol Proveb 15:22) Jessica i talem se: “Sipos ol famle mo fren blong yu oli gat sam tingting long saed blong boe ya, bambae yu no save gohed olsem nomo we yu no tingbaot tingting blong olgeta. Mo i sem mak, sipos yu tu yu tingting se i no stret blong yu fren wetem hem, bambae yu no gohed olsem se evri samting i oraet nomo. Sipos yu no wantem harem ol samting we ol narafala oli talem long saed blong boe ya, yu stap mekem i had long yu wan bakegen.”

Ol samting we yumi tokbaot antap, oli sam saen we oli soemaot se fasin fren blong wan boe mo gel i stap long denja.c Sipos yu stap frenem wan boe, ?wan long ol saen ya blong denja we yumi tokbaot antap, i stap insaed long fasin fren blong yutufala? Long haf we i kam biaen, raetemdaon eni wari we yu yu gat.

․․․․․

?Olsem Wanem Blong Stop Blong Fren Wetem Boe Ya?

Naoia, sipos yu tingting se i moagud we yutufala i stop blong fren, ?bambae yu mekem olsem wanem? I gat plante rod blong stopem fasin fren, be i gud we yu tingbaot ol poen we oli stap daon.

Yu no mas fraet. Wan gel, we nem blong hem Trina, i talem se: “Mi mi kasem mak ya we mi dipen bigwan long boefren blong mi, ale mi fraet blong lego hem.” Sipos wan gel i mas stopem fasin fren blong hem wetem wan boe, gel ya i no mas fraet. Hem i wan gudfala samting blong talemaot klia ol filing blong yu. (Ol Proveb 22:3) Fasin ya i givhan long yu blong yu talemaot klia long boe we i frenem yu, wanem fasin we bambae yu agri long hem, mo wanem fasin we bambae yu no agri long hem. Mo fasin ya blong talemaot klia ol filing blong yu bambae i givhan long yu biaen tu, taem bambae yu mared.

Yu mas mekem i stret long narafala. Tingbaot sipos i boefren blong yu nao we i wantem stopem fasin fren blong yutufala. ?Bambae yu yu wantem se hem i talemaot samting ya olsem wanem long yu? (Matiu 7:12) Taswe, sipos yu yu stopem fasin fren blong yutufala, i stret we yu mekem moa i bitim we yu jes raetem long wan e-mail no yu sanem mesej long mobael fon se: “!Mi no moa wantem fren wetem yu!”

Jusum wan ples we i stret. ?Bambae yu toktok long hem stret no bambae yu talem long hem long telefon? ?Bambae yu raetem wan leta long hem no bambae yu storian stret wetem hem? Ol samting ya i dipen long ples we yutufala i stap long hem, se i klosap no yutufala i stap longlongwe long yutufala. Yu no mas mitim hem long wan ples we i no sef, mo long wan ples we i no waes se yutufala i stap yutufala nomo, from we ol filing blong yutufala oli save pulum yutufala blong mekem samting we i no stret.—1 Tesalonaeka 4:3.

Tok tru. Yu mas talemaot stret from wanem yu harem se yutufala i mas stop blong fren. Sipos yu harem se boefren blong yu i no soem gudfala fasin long yu, yu mas talemaot samting ya. Yu mas talemaot filing blong yu. Yu no mas talem se: “Yu yu daonem mi oltaem nomo.” I gud yu talem se: “Mi mi harem olsem se yu daonem mi taem yu . . . ”

Yu mas rere blong lesin tu. ?Olsem wanem? ?I gat wan samting long fasin fren blong yutufala we yu no kasem save gud long hem? Yu no mas letem boefren blong yu i trikim yu wetem ol swit tok blong hem, be long sem taem, yu mas gat stret tingting, mo yu mas tingting gud long evri samting. Baebol i waes taem i talem long ol Kristin blong oli ‘mas rere oltaem blong lesin, be oli no mas hareap blong toktok.’—Jemes 1:19.

[Ol futnot]

SAM SAMTING BLONG TINGBAOT

◼ Raetem long lis daon ol fasin we yu yu luk se boe we yu yu frenem, i mas gat. ․․․․․

◼ ?Wanem ol fasin we yu yu ting se yu no save agri long olgeta? ․․․․

[Bokis blong pija long pej 30]

MAN WE YU JUSUM BLONG FREN WETEM, I MAS . . .

□ gat sem bilif olsem yu.—1 Korin 7:39.

□ respektem tingting blong yu long saed blong seks.—1 Korin 6:18.

□ tingbaot yu mo ol narafala.—Filipae 2:4.

□ gat gud nem long fored blong ol narafala.—Filipae 2:20.

[Bokis blong pija long pej 30]

YU MAS LUKAOT GUD SIPOS BOEFREN BLONG YU . . .

□ i fosem yu oltaem blong folem tingting blong hem.

□ i mekem yu yu harem oltaem se yu rong, yu krangke, no se yu yu gud blong nating nomo.

□ i traem blokem yu, blong yu no joen wetem ol fren mo famle blong yu.

□ i jekem oltaem weples yu yu stap long hem.

□ i talem se yu yu stap pulum filing blong ol narafala boe, nating se i no gat wan samting i pruvum se tok blong hem i tru.

□ i talem ol tok blong mekem yu yu fraet mo blong traem fosem yu blong mekem samting we hem i wantem.

[Tok blong pija long pej 29]

Taem wan gel i no wantem save long ol saen we oli soemaot se i gat denja long fasin fren blong hem wetem wan boe, hemia i sem mak olsem se hem i no wantem save long ol saen we trak i mekem blong givim woning se i gat denja

JEKEM OEL