Ol Yangfala Oli Askem

Hem i No Moa Wantem Fren Wetem Mi. ?Olsem Wanem Mi Save Haremgud Bakegen?

“Mi mo boe ya mitufala i savsave mitufala faef yia finis, mo mitufala i stap fren blong sikis manis. Taem hem i no moa wantem fren wetem mi, hem i no save kam talemaot stret long mi. Mi luk nomo we hem i no moa toktok long mi. Mi no save mekem wan samting. Mi harem nogud bitim mak. Oltaem mi stap askem se: ‘?Mi mi mekem wanem samting we i rong?’ ”—Rachel.a

TAEM boefren no gelfren blong yu i no moa frenem yu, samting ya i save spolem glad blong yu mo mekem yu yu harem nogud bitim mak gogo yu save krae from. Tingbaot Jeff mo Susan, we tufala i stap fren blong tu yia. Long tufala yia ya, ol filing we tufala i gat long tufala oli stap kam bigwan moa. Stat long moning kasem long sapa, Jeff i yusum mobaelfon blong sanem ol mesej long Susan, mo i talemaot ol filing blong hem. Sam samtaem hem i givim presen long Susan blong soemaot se hem i stap tingbaot hem. Susan i talem se: “Jeff i lesin long mi mo i traehad blong kasem save long mi. Hem i mekem mi mi harem se mi spesel.”

I no longtaem afta, Jeff mo Susan tufala i tokbaot mared mo weples bambae tufala i stap long hem taem tufala i kam hasban mo waef. Mo Jeff i askem saes blong fingga blong Susan, blong hem i save pem wan ring blong hem. !Be biaen, wantaem nomo, Jeff i stopem fasin fren blong tufala! Samting ya i mekem Susan i sek nogud mo i spolemgud hem. Susan i gohed blong mekem ol wok we hem i mas mekem evridei, be hem i harem se evri filing blong hem oli ded. Hem i talem se: “Mi harem we bodi blong mi mo tingting blong mi oli taed bitim mak.”b

?From Wanem Yu Harem Nogud Tumas?

Sipos samting we i hapen long Susan, i hapen long yu finis, maet yu stap askem se: ‘?Bambae mi mi naf blong winim samting ya mo kamgud bakegen samtaem?’ (Ol Sam 38:6) I stret nomo we tingting blong yu i trabol olsem. Taem boefren no gelfren blong yu i no moa wantem fren wetem yu, bambae yu gotru long wan hadtaem we i had tumas blong winim. Samfala oli talem stret se taem wan boe i no moa fren wetem wan gel, gel ya i save gat filing olsem se wan haf blong hem i lus. Taem yu stap harem nogud, maet bambae yu luk se yu stap gotru long ol step ya daon, no maet sam narafala step bakegen:

Yu no wantem akseptem. ‘No, fasin fren blong mitufala i no save stop olsem. Wan no tu dei i pas fastaem, afta bambae hem i jenisim tingting blong hem.’

Yu kros. ‘?Olsem wanem hem i save mekem samting ya long mi? !Mi mi no wantem luk hem!’

Tingting blong yu i foldaon. ‘Ol man oli no laekem mi. Bambae i no gat wan we i save laekem mi samtaem.’

Yu akseptem. ‘Bambae mi oraet bakegen. Mi harem nogud we mitufala i no moa fren, be mi stat blong kamgud nao.’

Wan gudfala nius se, yu yu naf blong kasem step ya we yu akseptem samting we i hapen long yu. Hamas taem we bambae i pas bifo we yu kasem step ya i dipen long plante samting, olsem yutufala i bin stap fren hamas manis finis, mo filing we yutufala i gat long yutufala i gru kasem wanem mak. ?Be bifo we yu kasem laswan step ya, olsem wanem yu save winim filing ya we yu harem nogud?

Gohed Long Laef Blong Yu

Maet yu bin harem sam man oli talem se, ‘Taem i mas pas bifo we ol trabol soa oli kamgud bakegen.’ Sipos boefren blong yu i jes stopem fasin fren blong yutufala, maet yu harem se toktok ya i no tru. Hemia i from we ‘taem’ i wan smol haf nomo blong ol samting we i save stretem trabol soa ya. Tingbaot pijatok ya: Sipos yu katem yu, i tru se taem i mas pas blong mekem se skin blong yu i kamgud bakegen. Be long taem ya we yu jes katem yu, yu harem se skin blong yu i soa tumas. Yu yu mas mekem se blad i no moa ron mo mekem se yu no moa harem i soa. Mo tu, yu mas blokem doti blong i no kasem ples we yu katem, nao i kam wan bigfala soa. Samting ya i tru tu long saed blong trabol soa we yu kasem long filing blong yu. Naoia, yu harem se hat blong yu i soa tumas. Be i gat sam step we yu save folem blong mekem se soa ya i godaon, mo mekem se tingting blong yu i no kam konkon. Taem we i pas, bambae i mekem wok blong hem, ?be olsem wanem yu yu save mekem wok blong yu? Traem mekem ol samting ya.

◼ Yu no blokem filing ya blong harem nogud. I no rong blong krae. Baebol i talem se i gat “taem blong man i harem nogud” mo “taem blong man i krae.” (Prija 3:1, 4) Sipos yu krae, hemia i no min se yu yu wan slak man no woman. Tingbaot Deved, wan strong man blong faet we i no fraet nating. Hem tu i bin harem nogud tumas long filing blong hem, mo wan taem hem i talem se: “Evri naet mi stap krae gogo bed blong mi i wetwet long wota blong ae blong mi. Oltaem pilo blong mi i wetwet gud long wota blong ae blong mi.”—Ol Sam 6:6.

◼ Lukaot gud long helt blong yu. Taem yu harem nogud tumas long filing blong yu, from we boefren blong yu i no moa fren wetem yu, yu save lusum plante paoa. Taswe i gud we yu mekem eksasaes mo yu kakae gud blong kasembak paoa. Baebol i talem se: “Sipos yu stap mekem bodi blong yu i strong, hemia i gud.”—1 Timoti 4:8.

?Wanem samting long saed blong helt blong yu we yu mas luklukgud long hem?

․․․․․

․․․․․

․․․․․

◼ Stap bisi. Yu mas gohed blong mekem ol samting we yu yu intres long olgeta. Mo naoia, i bitim ol narafala taem bifo, yu no mas stap yu wan. (Ol Proveb 18:1) Sipos yu joen wetem olgeta we oli kea long yu, hemia bambae i givhan long yu blong putum tingting blong yu i strong long ol gudfala samting.

?Wanem ol mak we yu save putum, blong mekem se yu stap bisi?

․․․․․

․․․․․

․․․․․

◼ Prea mo talemaot ol filing blong yu long God. Maet hemia i wan samting we i had long yu blong mekem. Samfala we boefren no gelfren blong olgeta i lego olgeta, oli harem olsem se God tu i lego olgeta. Oli tingting se: “!Mi mi prea we mi prea se bambae mi faenem wan we mi save frenem, be naoia, luk wanem i hapen!” (Ol Sam 10:1) ?Olsem wanem? ?I stret blong lukluk God olsem wan man long heven we i stap jusum boefren no gelfren blong yumi nomo? Nogat. Mo i no fol blong hem sipos wan i no moa laekem narafala. Save we yumi gat long saed blong Jeova, hemia se: ‘Oltaem hem i stap tingbaot yu.’ (1 Pita 5:7) Taswe, i gud we yu prea, mo talemaot ol filing blong yu long Hem. Baebol i talem se: “I gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.”—Filipae 4:6, 7.

?Wanem samting stret we yu save prea long Jeova from, taem yu stap traem blong winim trabol we yu kasem long filing blong yu?

․․․․․

․․․․․

․․․․․

Lukluk i Go Fored

Afta we yu kamgud bakegen long filing blong yu, i gud we yu lukluk gud long wanem samting we i hapen long fasin fren ya we i jes finis. Taem yu rere blong mekem olsem, raetemdaon ansa blong yu long ol kwestin daon, olsem nao maet yu faenemaot se samting ya i save givhan long yu.

◼ ?Boefren blong yu i talemaot risen from wanem hem i no moa wantem fren wetem yu? Sipos yes, raetem risen ya long lis daon, nomata sipos yu harem se hemia i no wan stret risen blong lego yu.

․․․․․

․․․․․

․․․․․

◼ ?Wanem sam narafala risen we yu ting se oli joen wetem desisen we boefren blong yu i mekem?

․․․․․

․․․․․

․․․․․

◼ ?Taem yu tingtingbak long samting we i hapen, yu ting se i gat wan samting we sipos yu bin mekem, bambae i givhan long boefren blong yu blong i no lego yu? Sipos yes, ?wanem samting ya?

․․․․․

․․․․․

․․․․․

◼ ?Samting we i hapen long yu, i soemaot sam samting we yu save mekem blong fren moa wetem Jeova, mo soemaot moa ol Kristin fasin?

․․․․․

․․․․․

․․․․․

◼ ?Sipos yu frenem wan boe bakegen, wanem samting we yu yu wantem mekem we i defren?

․․․․․

․․․․․

․․․․․

․․․․․

I tru, fasin fren we yu bin gat, i no finis olsem we yu yu wantem. Be tingbaot samting ya: Long medel blong wan hariken, i isi blong tingting nomo long ol blak klaod mo bigfala ren we i stap foldaon. Be biaen, ren ya i stop mo skae i kam klia. Ol yangfala we oli talem ol toktok long stat blong haf ya, oli faenemaot se afta we sam taem i pas, oli naf blong gohed long laef blong olgeta. !Yu save gat strong tingting se hemia bambae i tru tu long saed blong yu!

[Ol futnot]

SAM SAMTING BLONG TINGBAOT

◼ ?Wanem samting we yu lanem long saed blong yu wan, long fasin fren ya we i jes finis?

◼ ?Wanem samting we yu yu lanem long saed blong ol boe?

◼ ?Hu olgeta we yu save toktok wetem olgeta, sipos yu harem nogud tumas from we boefren blong yu i lego yu?

[Bokis blong pija long pej 30]

WAN TINGTING

Susan we yumi tokbaot antap, i mekem wan lis blong ol vas blong Baebol, mo i kipimgud lis ya i stap klosap long hem. Taem hem i harem se i no moa save bos long ol filing blong hem, hem i ridim ol vas ya. Maet yu tu yu save mekem i sem mak wetem sam vas blong Baebol we oli stap long haf ya.

[Tok blong pija long pej 29]

Taem boefren blong yu i lego yu, hemia i olsem we yu katem yu. Yu harem i soa, be sipos yu letem taem i pas, ale soa ya i save kamgud bakegen