Risen From Wanem Samfala Oli No Wantem Kilim Pikinini i Ded Long Bel
VICTORIA, we yumi bin tokbaot long faswan haf, i talem long boefren blong hem, Bill, se bambae hem i no kilim i ded pikinini we i stap long bel blong hem. Victoria i talem se: “Mi mi harem se i gat wan laef insaed long bel blong mi. Mi kasem save se sipos mi gohed blong stap wetem Bill, bambae hem i no givhan long mi blong holemstrong tingting ya, taswe mi lego hem.”
Biaen, Bill i jenisim tingting blong hem mo i askem Victoria blong maredem hem. Nating se i olsem, tufala i luk se i had blong lukaot long smol boe blong tufala we i jes bon. Victoria i eksplenem se: “Mitufala i no gat mane, mifala i gat smol klos nomo, mo sam narafala smosmol samting bakegen. Bill i wok long wan wok we i no karem bigfala mane, mo mifala i stap nomo long ol rabis renhaos we oli no sas, be nating, mifala i gohed nomo.”
Plante narafala tu oli faenem se laef blong olgeta i had from we oli gat wan pikinini we oli no plan from. Nating se i olsem, olgeta tu oli no wantem kilim pikinini ya taem i stap yet long bel. ?Wanem i givhan long olgeta blong holemstrong tingting ya mo winim wari we i kamaot taem oli gat wan pikinini we oli no plan from mo we oli no wantem tu? Samting we i givhan long olgeta, hemia waes we i kamaot long Baebol.
No Hareap—Mekem Ol Plan We Oli Save Wokgud
Baebol i talem waes tok ya: “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.”—Ol Proveb 21:5.
Wan mama we nem blong hem Connie, i gat tri boe blong hem, mo wan long olgeta i handikap. Taswe, taem Connie i gat bel bakegen, hem i harem nogud tumas. Hem i talem se: “Mifala i no wantem nating blong lukaot long wan moa pikinini, taswe mifala i tingbaot blong kilim pikinini ya i ded long bel.” Be bifo we Connie i hareap blong mekem wan desisen, hem i tokbaot problem blong hem long Kay, wan woman we i wok wetem hem. Kay i givhan long Connie blong luksave se bebi we i stap long bel blong hem i wan laef samting, mo samting ya i mekem se Connie i jenisim tingting blong hem.
Be Connie i nidim wan narafala blong givhan long hem blong mekem wan plan. Wan anti blong Connie i stap long sem eria, ale Kay i talem long Connie blong go askem long anti ya sipos i wantem givhan long hem. Taem Connie i askem long anti blong hem, anti ya i glad blong givhan. Mo tu, hasban blong Connie i mekem sam moa wok antap long wok we hem i gat finis, mo oli muv i go long wan renhaos we i no sas tumas. Long rod ya, tufala i naf blong lukaot long bebi ya.
Kay i givhan long Connie tu blong lukaotem sam kampani we oli stap givhan long ol mama we oli gat pikinini we oli no plan from. Long plante kantri, i gat sam kampani olsem we oli givhan long ol niufala mama we oli nidim help. Blong faenemaot se ol kampani olsem oli stap long weples, yu save lukluk long Intenet mo long buk blong telefon. Maet wan woman i mas rili traehad blong faenem help, be “man we i gat gudfala plan mo i stap wok strong long hem,” hem nao i save win.
Yu Mas Luksave Se Hemia Wan Laef Samting
Baebol i talem se: “Man we i waes i save luksave rod blong hem blong i wokbaot long hem, be man we i no gat hed i stap wokbaot long tudak nomo.”—Prija 2:14.
Wan woman we i rili waes, i no satem ae blong hem long ol samting we i tru, mo hem i no “wokbaot long tudak nomo.” Hem i yusum fasin “luksave,” we i givhan long hem blong tingting gud, nao hem i naf blong skelemgud ol frut we bambae hem i kasem folem desisen we hem i mekem. Long rod ya, wan woman we i waes i defren olgeta long wan woman we i satem ae blong hem long ol trufala samting we oli stap hapen long bel blong hem. Wan woman we i waes bambae i sore long bebi blong hem we i laef i stap long bel blong hem, mo hemia bambae i pusum hem blong mekem ol samting blong lukaot gud long bebi ya.
Stephanie, wan yangfala gel we i gat bel tu manis, i stap tingting blong kilim bebi blong hem long bel, be biaen, hem i luk bebi ya long wan spesel mesin we ol dokta oli yusum blong lukluk insaed long bel blong woman. Stephanie i talem se: “Taem mi luk bebi ya, mi krae we mi krae. Mi tingbaot se, ?from wanem mi wantem kilim i ded wan samting we i laef i stap?”
Wan narafala yangfala woman we i no mared be i gat bel, nem blong hem Denise, hem tu i kasem save se hem i gat bel long wan bebi we i rili laef i stap. Taem boefren blong Denise i givim mane long hem mo i talem long hem blong “aotem samting ya,” Denise i ansa se: “?Kilim bebi blong mi i ded? !Bambae mi neva mekem samting ya!” Ale, hem i no folem tingting blong boefren blong hem.
Samting We Fraet Long Man i Save Pusum Yumi Blong Mekem
Sipos narafala i traem fosem hemia we i gat bel blong i kilim pikinini blong hem long bel, i waes blong tingting gud long waestok ya blong Baebol: “Fasin ya we man i fraet tumas long ol narafala man, hem i olsem trap nomo, mo i nogud yu yu foldaon long hem. Sipos yu stap trastem Hae God, bambae yu save stap gud oltaem.”—Ol Proveb 29:25.
Taem Monica i gat 17 yia blong hem, boefren blong hem i givim bel long hem taem hem i rere blong go long wan kos blong lanem bisnes. Mama blong Monica i wan wido we i gat faef pikinini blong hem, mo hem i harem nogud bitim mak long samting we i hapen long Monica. Hem i wantem se gel ya i lanem wan bisnes, ale bambae hem i no moa pua olsem mama blong hem. Mama blong Monica i no moa save se bambae hem i mekem wanem, ale hem i traem fosem Monica blong i kilim pikinini ya long bel blong hem. Monica i eksplenem se: “Taem dokta i askem long mi sipos mi rili wantem kilim pikinini ya, mi talem se, ‘!Nogat!’”
Mama blong Monica i fraet mo tingting blong hem i fasfas taem hem i luk se Monica bambae i no moa gat wan gudfala laef long fiuja mo taem hem i tingbaot ol wari we bambae i kamaot from bebi ya, ale hem i talem long Monica blong i aot long haos blong hem. Monica i go stap wetem wan anti blong hem. Sam wik i pas, ale tingting blong mama blong hem i godaon nao i letem hem i kambak long haos. Biaen hem i bonem bebi blong hem, mo mama blong hem i givhan long hem blong lukaot long niufala bebi ya, Leon. Taem ol yia oli pas, mama blong hem i laekem tumas smol boe ya.
Wan dokta i traem fosem wan mared woman we nem blong hem Robin, blong i kilim pikinini blong hem long bel. Robin i talem se: “Dokta blong mi i tritim mi from wan sik we mi kasem long kidni blong mi, be hem i no jekem fastaem sipos mi mi gat bel. Biaen nomo, hem i jes faenemaot se mi mi gat bel. Dokta ya i talem long mi se bebi ya bambae i bon be hed blong hem bambae i krangke.” Ale dokta ya i traem fosem Robin blong i kilim pikinini ya long bel blong hem. Robin i talem se: “Mi mi eksplenem long hem tingting blong Baebol long saed blong laef. Mi talem long hem se bambae mi no save kilim pikinini ya i ded.”
I stret nomo we dokta ya i wari long saed blong pikinini blong Robin, be taem Robin i bonem pikinini ya, laef blong hem i no stap long denja.a Robin i talem se: “Taem smol gel blong mi i bon mo oli mekem ol tes long hem, oli faenemaot se hem i gat wan sik blong ol masel mo nev long bodi blong hem (cerebral palsy) be sik ya i smol nomo, mo samting ya i mekem se samtaem bren blong hem i wok slo. Be ol narafala haf blong bodi blong hem oli wokgud. Naoia hem i gat 15 yia blong hem, mo hem i stap kamgud moa oltaem long fasin blong hem blong rid. Hem i gat wan impoten ples long laef blong mi, mo plante taem evri dei mi talem tangkiu long Jeova from hem.”
Fasin Blong Frengud Wetem God i Gat Bigfala Paoa
Baebol i talem se: “Yu [“Jeova,” NW] yu fren blong olgeta we oli stap obei long yu.”—Ol Sam 25:14.
Olgeta we oli no wantem kilim pikinini taem i stap yet long bel, oli tingbaot God we i wokem olgeta mo filing blong hem long saed blong bisnes ya. Mo samting ya i gat bigfala paoa long desisen blong olgeta. Bigfala samting we oli tinghevi long hem, hemia se oli wantem stap oltaem olsem wan fren blong God, mo mekem ol samting we Hem i wantem. Tingting ya i gat bigfala paoa long Victoria, we yumi tokbaot hem finis. Hem i talem se: “Mi mi bilif se God nao i stamba blong laef, mo mi mi no gat raet blong tekemaot laef ya we hem i givim.”
Taem Victoria i stat blong stadi strong long Baebol, hem i kam klosap moa long God. Hem i talem se: “Taem mi mekem desisen blong no kilim bebi blong mi, mi filim se mi stap klosap moa long God, mo mi wantem blong mekem hem i glad long olgeta haf blong laef blong mi. Taem mi prea blong askem Hem blong lidim mi, evri samting i go gud.”
Taem yumi frengud wetem God ya we i Stamba blong laef, respek we yumi gat long pikinini ya we i laef long bel blong mama, i kam dip moa. (Ol Sam 36:9) Mo tu, God i save givim “paoa ya we i bigwan tumas” blong givhan long wan woman mo famle blong hem, blong oli naf blong lukaot long bebi we oli no plan from. (2 Korin 4:7) Taem olgeta ya we oli respektem tingting blong God long saed blong laef, oli tingtingbak, ?wanem tingting blong olgeta long desisen we oli mekem?
Oli No Tingtingbak Wetem Sore
Ol papa mama ya oli no filim se oli mekem wan samting we i rong, mo filing blong harem nogud from we oli lusum wan samting we i impoten tumas i no stap wetem olgeta. !Taem ol yia oli pas, oli luksave se ol pikinini ya oli rili ol “presen,” oli no ol trabol we i spolem laef blong olgeta! (Ol Sam 127:3) !Connie we yumi tokbaot antap, i luksave samting ya tu aoa nomo afta we i bonem bebi blong hem! Hem i glad tumas mo i ring long fren blong hem long wok, Kay, blong talem se hem i haremgud tumas blong tingbaot wok ya we bambae hem i mekem blong lukaot long smol gel blong hem. Connie i talem bakegen wetem glad se: “I tru tumas se God i blesem olgeta we oli mekem olsem we Hem i wantem.”
?Taem yumi mekem ol samting folem tingting we God i gat long saed blong laef, from wanem samting ya i givhan long yumi? From we God i Stamba blong laef, taswe Hem i raetem ol loa mo ol rul blong hem long Baebol “blong [oli] save givhan long [yumi].”—Dutronome 10:13.
Long saed blong Victoria mo Bill, we stori blong tufala i stap long stat blong haf ya wetem faswan haf, tufala i talem se desisen we tufala i mekem blong no kilim bebi blong tufala long bel, i jenisim laef blong tufala. Tufala i eksplenem se: “Mitufala i stap tekem ol strong drag mo sipos mitufala i bin gohed, maet mitufala i ded finis. Be from we mitufala i respektem laef blong bebi blong mitufala we i no bon yet, samting ya i mekem se mitufala i stat blong tingbaot laef blong mitufala. Ol Witnes blong Jeova oli givhan long mitufala blong jenisim fasin blong mitufala.”
Naoia, boe blong tufala we nem blong hem Lance, i gat klosap 34 yia mo hem i mared bitim 12 yia finis. Lance i eksplenem se: “Stat taem mi mi pikinini nomo, papa mama blong mi, tufala i tijim mi blong mekem ol desisen folem ol tok blong Baebol. Samting ya i givhan long mi, long waef blong mi, mo long pikinini blong mitufala, gogo mifala i harem se glad blong mifala i fulwan.” Papa blong Lance we bifo i wantem se Victoria i kilim hem i ded long bel blong hem, i talem se: “Mitufala i seksek taem mitufala i kasem save se klosap nomo mitufala i lusum nambawan pikinini boe ya.”
Tingbaot Monica bakegen, we i no bin wantem kilim pikinini long bel blong hem, nating se mama blong hem i traem fosem hem blong mekem olsem. Hem i talem se: “Tu wik afta we boe blong mi i bon, ol Witnes blong Jeova oli kam storian long mi mo mi lanem olsem wanem blong mekem laef blong mi i laenap wetem ol loa blong God. I no longtaem afta, mi stat blong tijim boe blong mi, Leon, long gudfala fasin ya blong obei long God, mo long ol yia biaen, hem i lanem blong lavem God. Naoia, Leon i wan seket elda blong ol Witnes blong Jeova.”
Leon i tingtingbak long ol samting we mama blong hem i bin mekem, i se: “Taem mi save se hem i lavem mi tumas nao hem i letem mi mi laef i stap nomata we mama blong hem i traem fosem hem blong kilim mi, samting ya i mekem se mi mi wantem yusum laef blong mi long beswan rod, blong soemaot tangkiu long God from nambawan presen ya, laef.”
Plante we oli kasem save long tingting we God i gat long saed blong laef, oli no tingtingbak wetem sore long desisen ya blong lukaot gud long laef blong pikinini blong olgeta, we tede oli laekem tumas. Wetem wan hat we i fulap long tangkiu, oli save talem se: “!Mifala i no kilim pikinini blong mifala i ded long bel!”
[Futnot]
a Sipos wan mama i stap bonem bebi blong hem, ale oli mas jusum se dokta i mas sevem laef blong mama no laef blong bebi, i stap long mama mo papa ya nomo blong mekem desisen ya. Be long plante kantri we ol hospital oli yusum ol niufala rod, problem ya i no hapen plante taem.
[Tok blong pija long pej 7]
Taem Stephanie i luk bebi long bel blong hem we i gat tu manis nomo, long spesel mesin ya, samting ya i givhan long hem blong mekem wan gudfala desisen
(Mifala nomo i droem laen i goraon, blong makemaot bebi)
[Tok blong pija long pej 8]
Victoria mo Lance
[Tok blong pija long pej 8, 9]
Victoria mo Bill tede, wetem Lance mo famle blong hem