Ol Yangfala Oli Askem

?Mi Mi Rong Sipos Samtaem Mi Wantem Stap Mi Wan?

Putum mak ya ✔ klosap long tok we yu stap talem taem ol samting ya i hapen.

1. Yu stap long rum blong yu, doa i sat. Nao brata no sista blong yu i resis i kam insaed we i no kilim doa nating.

◯ ‘I oraet nomo . . . Mi mi stap mekem sem samting nomo long ol brata sista blong mi.’

◯ ‘!Hem i no gat respek nating! Tingbaot sipos mi stap jenis, ?olsem wanem nao?’

2. Yu stap toktok long telefon long wan fren blong yu. Mama blong yu i stap klosap, i stap lesin long evri tok we yu talem.

◯ ‘I oraet nomo . . . Mi mi no stap haedem wan samting.’

◯ ‘!Mi mi no laekem nating! !Mi harem olsem se hem i stap spae long mi!’

3. Yu jes kamtru long haos, nao papa mama blong yu tufala i askem fulap kwestin long yu: “?Yu yu go wea? ?Yu mekem wanem? ?Hu i go wetem yu?”

◯ ‘I oraet nomo . . . Oltaem mi mi talem evri samting long tufala.’

◯ ‘!Tufala i mekem mi mi harem nogud! !Tufala i no trastem mi nating!’

TAEM yu yu pikinini, ating yu no wantem stap yu wan nating. Sipos smol brata no sista blong yu i resis i kam long rum blong yu, ating yu yu glad nomo. Sipos papa mama blong yu tufala i askem wan kwestin long yu, yu yu ansa wantaem nomo. Taem yu yu smol, evriwan oli save evri samting long saed blong laef blong yu. Be naoia i gat sam taem we yu yu no wantem se narafala i save bisnes blong yu. Yangfala Corey we i gat 14 yia blong hem, i talem se: “I gat sam samting we mi mi no wantem talemaot, mi wantem kipim i blong mi nomo.”a

?From wanem fasin blong yu i jenis? ?From wanem samtaem yu wantem stap yu wan? Wan risen, hemia from we yu yu stap gruap moa. Ol jenis we oli kamaot long bodi blong yu taem yu yangfala, oli save mekem se yu wari long tingting blong ol narafala long saed blong yu. Samtaem yu wari long tingting blong famle blong yu tu. Mo tu, taem yu stap gruap moa, yu harem se samtaem yu mas stap yu wan blong tingting gud long plante samting. Hemia i gud, from i soemaot se yu stat blong yusum “tingting” blong yu. Baebol i toktok gud long saed blong yangfala we i gat fasin ya blong tingting gud. (Ol Proveb 1:1, 4; Dutronome 32:29, NW) Jisas tu i go long “wan ples we i no gat man long hem,” blong hem i save tingting dip.—Matiu 14:13.

Be yu yu stap yet aninit long han blong papa mama blong yu. Taswe tufala i gat raet blong save samting we i hapen long laef blong yu. (Efesas 6:1) Yes, tufala i gat nid blong save samting ya. Be yu tu yu gat wan nid, hemia se yu mas gruap moa. Ale, ol nid ya we oli defdefren oli save mekem rao i kamaot. ?Olsem wanem blong winim trabol ya? Bambae yumi tokbaot tufala samting we i save mekem problem i kamaot.

Yu Wantem Stap Yu Wan

I gat plante risen from wanem yu wantem stap yu wan. Ating yu wantem “spel smol.” (Mak 6:31) Taem yu wantem prea, maet yu mekem olsem Jisas i talem long ol disaepol blong hem se, “yu go yu wan insaed long rum blong yu, yu satem doa, nao yu prea long Papa ya blong yu.” (Matiu 6:6; Mak 1:35) !Trabol se, taem yu satem doa blong rum blong yu (sipos yu gat wan rum blong yu), maet papa mama blong yu tufala i no tingbaot se yu stap prea! Mo ol brata sista blong yu tu, maet oli no kasem save se yu jes wantem stap yu wan.

?Yu save mekem wanem? I nogud blong statem wan rao. I moagud we yu mekem samting ya:

● Long saed blong ol brata sista blong yu, yu save putumap sam rul we oli no strong tumas. Ale oli save respektem ol rul ya blong givim smol taem long yu blong yu stap yu wan. Sipos i gat nid, yu save askem long papa mama blong yu blong givhan long yu blong putumap ol rul ya.

● Long saed blong papa mama blong yu, yu mas traem kasem save long tingting blong tufala. Rebeka we i gat 16 yia blong hem, i talem se: “Sam samtaem, papa mama blong mi tufala i jekemap mi. Be blong talem stret, sipos mi mi wan mama, mi tu bambae mi jekemap yangfala blong mi. !Antap moa, long taem blong yumi, we i gat plante tumas samting blong pulum ol yangfala!” ?Yu yu olsem Rebeka? ?Yu yu kasem save long wari blong papa mama blong yu?—Ol Proveb 19:11.

● Traem tingting gud long kwestin ya: ‘?Sam fasin we mi stap mekem, oli save pulum papa mama blong mi blong ting se mi stap mekem samting we i no stret, taem doa blong rum blong mi i sat? ?Mi mi haedem plante tumas samting long saed blong laef blong mi, mekem se tufala i mas spae long mi blong save wanem we mi stap mekem?’ Klosap oltaem, sipos yu yu tokbaot ol samting we yu stap mekem wetem papa mama blong yu, bambae tufala i trastem yu moa. Olsem nao, bambae tufala i no spae long yu.b

Plan we yu save folem. Long spes daon, raetem wanem we yu save talem blong statem storian ya wetem papa mama blong yu.

․․․․․

Yu Gat Sam Narafala Fren

Taem yu yu kam yangfala, i stret nomo we yu gat sam fren afsaed long famle blong yu. I stret tu we papa mama blong yu tufala i wantem save hu ya ol fren ya, mo wanem samting we yu stap mekem wetem olgeta. Long tingting blong tufala, hemia haf blong wok blong tufala. Be maet yu yu ting se tufala i bitim mak, tufala i stap wari tumas. Amy we i gat 16 yia blong hem, i talem se: “Mi jes wantem nomo se mi wan mi save yusum mobaelfon mo imel blong mi. Mi no wantem we papa mama tufala i stap askem long mi evri ten minit, se mi mi stap toktok long hu.”

?Yu save mekem wanem? I nogud we yu letem ol fren blong yu oli blokem fasin fren we yu yu gat wetem papa mama blong yu. Traem mekem samting ya:

● Talemaot klia long papa mama blong yu hu ya ol fren blong yu, mo meksua se tufala i mitim olgeta. Tingbaot se, yu yu no laekem taem papa mama blong yu tufala i spae long yu blong faenemaot ol fren blong yu. Be sipos yu haedem ol fren blong yu, tufala i mas mekem olsem. Papa mama blong yu tufala i save se ol fren oli gat bigfala paoa long yu. (1 Korin 15:33) Sipos tufala i savegud hu ol fren we yu yu stap spenem taem wetem olgeta, bambae tufala i harem gud moa blong letem yu yu jusum ol fren blong yu.

● Toktok wetem respek long papa mama blong yu, long saed blong bisnes ya. Yu no mas rao long tufala se tufala i stap pusum nus blong tufala long bisnes blong yu. I moagud we yu talem samting olsem: “Mi mi harem se yutufala i stap mekem polis long mi, taem yutufala i jekemap mo stretem evri toktok we mi talem long ol fren blong mi. Fasin ya i mekem i had long mi blong storian gud wetem olgeta.” Nao maet samtaem papa mama blong yu tufala i letem yu yu stap yu wan, blong storian wetem ol fren blong yu.—Ol Proveb 16:23.

● Yu no mas giaman long yu wan bakegen. ?I tru se yu wantem stap yu wan? ?No yu wantem nomo blong haedem evri samting long laef blong yu? Brittany we i gat 22 yia blong hem, i talem se: “Sipos yu stap yet wetem papa mama blong yu, mo tufala i stap wari, yu mas gat tingting olsemia, ‘Sipos mi no stap mekem wan nogud samting, i no nid blong mi haedem evri samting we mi mekem.’ Be sipos yu harem se yu mas haedem, ale wan samting i rong nao.”

Plan we yu save folem. Long spes daon, raetem wanem we yu save talem blong statem storian ya wetem papa mama blong yu.

․․․․․

?Bambae Yu Yu Mekem Olsem Wanem?

Naoia yu yu gat janis blong tingbaot sam taem we yu laekem blong stap yu wan, mo rod blong winim ol wari long saed ya.

Faswan samting: Luksave problem.

?Long wanem taem yu yu wantem stap yu wan?

․․․․․

Seken samting: Tingbaot papa mama blong yu.

?Yu ting se wanem nao wari we tufala i gat sipos yu yu stap yu wan long taem ya?

․․․․․

Namba tri samting: Faenem rod blong winim.

(a) Tingbaot wan no tu samting we yu stap mekem, we maet oli givim wari long papa mama blong yu. Raetem long spes ya.

․․․․․

(b) Folem laswan ansa blong yu, ?wanem sam jenis we yu save mekem?

․․․․․

(c) ?Yu yu laekem we papa mama blong yu tufala i mekem wanem, blong givhan long yu long ol wari blong yu?

․․․․․

Namba fo samting: Storian long saed ya.

Jusum wan stret taem blong storian wetem papa mama blong yu, long ol samting we yu raetem antap.

[Ol futnot]

SAM SAMTING BLONG TINGBAOT

● ?From wanem papa mama blong yu tufala i gat raet blong save long ol samting long laef blong yu?

● ?Sipos yu lanem blong storian gud wetem papa mama blong yu naoia, olsem wanem samting ya i save givhan long yu blong toktok gud wetem ol narafala man long laef blong yu biaen?

[Bokis/Foto blong pija long pej 23]

SAMTING WE OL NARAFALA YANGFALA OLI TALEM

“I gud we ol yangfala oli tokbaot evri samting we i hapen long laef blong olgeta wetem papa mama blong olgeta. Olsem nao, i no nid blong papa mama i ridim ol imel mo mesej long mobaelfon blong olgeta.”

“Mi no save harem nogud sipos papa mama tufala i ridim ol imel blong mi. Long sam ples, ol bos oli gat raet blong ridim ol imel blong ol wokman blong olgeta. Taswe, ?from wanem ol papa mama oli no save ridim ol imel blong ol pikinini blong olgeta?”

“Papa mama blong yu tufala i no wantem we yu kasem trabol. Taswe, samtaem i luk olsem se tufala i pusum nus blong tufala long bisnes blong yu. Yu yu luk se i no stret. Be blong talem stret, sipos mi mi wan mama, ating bambae mi mekem sem samting.”

[Ol foto]

Eden

Kevin

Alana

[Bokis blong pija long pej 25]

ADVAES I GO LONG OL PAPA MAMA

● Boe blong yu i stap long rum blong hem, doa i sat. ?Olsem wanem? ?I stret we yu no kilim doa nating, be yu openem nomo, yu go insaed?

● Gel blong yu i hareap blong aot long haos blong go long skul. Hem i lego mobaelfon blong hem i stap. ?I stret we yu ridim ol mesej we oli stap long fon ya?

I no isi blong ansa long tufala kwestin ya. I tru, yu yu gat raet blong save wanem i stap hapen long laef blong yangfala blong yu. Mo i wok blong yu nao blong lukaotgud long hem mo mekem se hem i stap sef. Be yu no save stap klosap long pikinini blong yu oltaem, blong jekemap evri samting we hem i mekem. ?Ale, olsem wanem yu save lukaotgud long hem be yu no bitim mak?

Faswan samting, yu mas luksave se sipos yangfala blong yu i wantem stap hem wan, hemia i no min se evri taem hem i stap mekem wan samting we i nogud. Hemia fasin blong plante yangfala taem oli stap gruap moa. Oli wantem mekem samting olgeta nomo, olsem faenem ol fren, mo yusum ‘tingting blong olgeta’ blong faenem rod blong stretem wan problem. Taem oli mekem samting ya, oli olsem wan smol pijin we i traem blong flae hem wan, i no moa dipen long mama blong hem. (Rom 12:1, 2, NW) Taem ol yangfala oli stap olgeta nomo, oli lanem tu blong tingting gud mo skelem samting. Hemia wan impoten fasin we oli mas gat, blong mekem ol gudfala desisen long ol yia we oli kam. (1 Korin 13:11) Mo tu, i givim janis long olgeta blong tingting dip, bifo we oli ansa long ol had kwestin.—Ol Proveb 15:28.

Seken samting, yu mas luksave se sipos yu traem blong bos long evri samting long laef blong yangfala blong yu, hem i save kam kros mo mekem stronghed. (Efesas 6:4; Kolosi 3:21) ?Hemia i min se yu no mas jekemap yangfala blong yu nating? I no olsem, from we yu yu papa no mama blong hem. Be yu mas halpem yangfala blong yu blong trenem gud tingting blong hem, nao tingting ya bambae i lidimgud hem mo stikim hem taem hem i gorong. (Dutronome 6:6, 7; Ol Proveb 22:6) Long en blong bisnes ya, bambae yu mekem i gud moa long yangfala blong yu sipos yu givim advaes mo lidim hem, i bitim we yu mekem polis long hem.

Namba tri samting, storian wetem yangfala blong yu long bisnes ya. Lesin long ol wari blong hem. Ating i gat sam taem we yu save lego prapa tingting blong yu, blong folem tingting blong hem. (Filipae 4:5) Mekem yangfala blong yu i save se samtaem bambae yu letem hem i stap hem wan, sipos hem i no mekem wan samting we i spolem fasin ya blong yu blong trastem hem. Talem long hem wanem bambae i hapen sipos i no lesin long yu, nao sipos i no obei, folem tok ya we yu talem finis. Yes, samtaem yu save letem yangfala blong yu i stap hem wan, be yu no lego wok blong yu olsem papa mama blong lukaotgud long hem.

[Tok blong pija long pej 24]

Fasin we papa mama i trastem yu i olsem pei—yu mas wokhad fastaem, nao tufala i givim pei ya long yu biaen