Ol Kwestin We Plante Man Oli Askem

?From wanem sam man oli tok agens long ol Witnes blong Jeova?

Plante man oli no gat stret save long saed blong ol Witnes blong Jeova. Sam narafala oli no glad long wok blong prij we ol Witnes oli mekem. Be ol Witnes oli mekem wok ya from we oli lavem ol man raonabaot long olgeta, oli save se ‘olgeta man we oli singaot long God long nem blong hem, hem bambae i sevem olgeta.’—Rom 10:13.

?Ol Witnes blong Jeova oli Kristin? ?Oli wan grup we i seraot long wan narafala jos?

Ol Witnes blong Jeova oli Kristin from we ol tijing blong olgeta oli stanap long Baebol nomo. Oli no haf blong Protestan jos sem mak olsem we oli no haf blong Katolik jos. Oli luksave se sam tijing blong ol jos ya oli no laenap wetem wanem we Baebol i talem. Baebol i tijim se God i stamba blong fasin ya blong lavem man. Taswe, tijing ya se God i mekem man i harem nogud blong olwe long hel faea, i no laenap wetem wanem we Baebol i talem. Hemia i sem mak long tijing ya se taem man i ded, spirit blong hem i laef yet samples.—Prija 9:5, 10; Rom 6:23.a

Narafala samting we i soemaot se ol Witnes blong Jeova oli Kristin, hemia se oli folem fasin blong Jisas Kraes evri dei long laef blong olgeta. Jisas Kraes mo ol faswan Kristin oli no joen long politik. Be oli talemaot Kingdom blong God long ol man. (Luk 4:43; Jon 15:19; 17:14) Ol Witnes blong Jeova oli folem eksampol blong olgeta. Oli no joen long politik. Defren olgeta, oli storian wetem ol man, plante taem oli toktok wetem ol man wanwan mo oli traem pulum olgeta blong tingting. Oli yusum ol save we i pruvum se samting we oli talem i tru, olsem ol faswan Kristin oli mekem.—Ol Wok 19:8.

Ol Witnes blong Jeova oli no wan krangke grup we i agensem ol narafala jos long komuniti, mo oli no wan grup we i seraot long wan narafala jos.

?Ol Witnes oli mekem wanem long ol miting blong olgeta?

Eni man we i wantem i save kam long ol miting blong ol Witnes. Long ol miting ya, oli stadi long Baebol, mo plante taem olgeta we oli stap lesin oli save toktok tu blong talemaot bilif blong olgeta. Evri wik oli mekem miting blong Tiokratik Skul. Miting ya i givhan long ol memba blong kongregesen blong kam moa gud long fasin blong olgeta blong tijim man, blong rid, mo blong lukaot moa save. Long wan narafala miting, i gat wan tok blong 30 minit, we i stanap long Baebol mo i tokbaot wan samting we i pulum intres blong ol man we oli no Witnes. Biaen oli yusum magasin ya Wajtaoa blong stadi long Baebol. Long stat mo long en blong ol miting ya, oli singim wan singsing mo mekem wan prea. Oli no askem mane mo oli no pasem wan plet i goraon blong man i sakem mane long hem.—2 Korin 8:12.

?Olsem wanem ol Witnes blong Jeova oli kasem mane blong sapotem wok blong olgeta?

Oli kasem mane blong sapotem wok blong olgeta from we ol man oli givim ol presen mane long gladhat blong olgeta. Ol Witnes oli no askem mane blong baptaesem man, blong mekem mared, blong mekem tok taem wan man i ded, mo blong ol narafala wok we i joen wetem wosip. Oli no pem wan stret amaon blong mane olsem wan taet i go long ogenaesesen blong olgeta. Eni man we i wantem givim presen mane, hem i save putum mane long bokis blong presen mane long Haos Kingdom, long wan fasin we i no pulum ae blong man. Ol buk long saed blong Baebol we ol Witnes blong Jeova oli yusum, olgeta nomo oli printim. Samting ya i mekem se i no sas tumas blong wokem ol buk ya. Mo ol Haos Kingdom mo branj ofis blong olgeta we oli no flas tumas, ol volontia nomo oli wokem olgeta.

?Ol Witnes blong Jeova oli go luk dokta taem oli sik?

Yes. Oli wantem se olgeta mo famle blong olgeta oli kasem beswan tritmen. Antap long samting ya, i gat plante Witnes we oli wok olsem nes, dokta, man blong hospital we i go kwik blong givhan taem i gat aksiden, mo dokta blong katem man. Be ol Witnes blong Jeova oli no agri we dokta i putum blad i go long bodi blong olgeta. Baebol i talem se, “bambae yufala i no kakae blad.” (Ol Wok 15:28, 29) I gat plante dokta we oli ting se tritmen we i no gat blad long hem i beswan, mo oltaem namba blong ol dokta ya i stap kam antap moa. Hemia from we tritmen we i no gat blad long hem, i givhan long man blong blokem plante problem long saed blong helt we oli save kamaot from blad.

[Futnot]

[Bokis/Foto blong pija long pej 7]

WAN TAON WE OL MAN BLONG HEM OLI GAT RESPEK

Taon ya Bejucal de Ocampo long saot blong Meksiko, i defren lelebet long ol narafala taon. Niuspepa ya Excélsior i talem se: “Bighaf blong ol man we oli stap long taon ya oli Witnes blong Jeova. Long taon ya, yu haremsave se ol man oli gat respek long ol jos mo long gavman. . . . Ol man oli lego fasin blong dring bitim mak mo smok, blong oli singsing mo ridim Baebol. Mo oli gat respek long gavman.”

Nating se i gat ol defdefren jos long taon ya, niuspepa ya i talem se, “i no gat trabol mo raorao i kamaot long saed blong ol jos.” Mo niuspepa ya i talem tu se: “I no gat fasin blong no laekem narafala, mo nating se ol man oli stap long ol defren jos, samting ya i no blokem olgeta blong talem halo long ol narafala. . . . Wanwan famle i fri blong joen long jos we hem i wantem, mo samting ya i no blokem ol famle blong joen gud. I no gat man we i ting se i narakaen we ol Witnes blong Jeova oli plante long Bejucal.” Antap long samting ya, wan man we i no Witnes mo i stap tij long sekendri skul long taon ya, i talem se ol pikinini blong ol Witnes oli ‘putum ol klos we oli stret, oli kasem ol gudfala mak long skul, mo oli lesin gud long klas.’