?Ol Witnes Blong Jehova Oli Wan Krangke Grup Blong Skul Blong Amerika?

Hedkwota blong mifala i stap long Amerika. Be, mifala i no wan krangke grup blong skul blong Amerika. Hemia from ol risen ya:

• Sam man oli talem se wan krangke grup blong skul, hem i wan grup we i kamaot long wan narafala skul. Ol Witnes blong Jehova oli no wan krangke grup we i kamaot long wan narafala skul, nogat. Mifala i bilif se mifala i folem skul blong ol Kristin bifo, hemia long taem blong ol aposol.

• Ol Witnes blong Jehova oli mekem wok blong prij long bitim 230 kantri. Nomata se mifala i stap long ol defdefren ples mo laef blong mifala i no sem mak, be mifala i sapotem Jehova God mo Jisas Kraes. Mifala i no sapotem gavman blong Amerika, no wan narafala gavman blong man.—Jon 15:19; 17:15, 16.

• Olgeta tok we mifala i tijim ol man long hem oli kamaot long Baebol. Oli no kamaot long wan bigman blong skul long Amerika.​—1 Tesalonaeka 2:13.

• Mifala i biaen long Jisas Kraes, mifala i no biaen long eni lida blong wol ya.​—Matiu 23:8-10.