Graon i Seksek Bigwan Long Haiti—Wan Taem Blong Soemaot Bilif Mo Lav

Long Tusde namba 12 Jenuware, 2010, long 4:53 long aftenun, Evelyn i harem noes olsem enjin blong wan bigfala plen. Be noes ya i kamaot long graon. Nao wantaem nomo graon i seksek. Hem i harem noes blong simen we i stap brok raonabaot long hem, mo ol haos oli stap folfoldaon. Taem graon i no moa seksek, Evelyn i wokbaot i go stanap long wan hae ples blong luk wanem i hapen. Olbaot raon long hem, hem i harem ol man oli stap krae bigwan. Hem i lukluk i godaon long Port-au-Prince, we hem i kaptel blong Haiti. Wan bigfala smok i kavremap taon ya from das blong olgeta simen haos we oli foldaon.

LONG sam seken nomo ol haos blong ol man, ol haos blong gavman, ol bang, ol hospital, mo ol skul oli foldaon. Bitim 220,000 man, woman, pikinini, olfala, haeman, mo puaman, oli ded. Samwe long 300,000 man oli kasem kil.

Plante long olgeta we oli no ded long etkwek ya, oli no save wanem blong mekem. Oli sidaon nomo klosap long haos blong olgeta we i foldaon i stap, oli no toktok. Sam long olgeta oli hareap blong traem karemaot ol hip brikis ya we i brokbrok, blong sevem ol famle mo fren blong olgeta we oli fas i stap aninit. Oli no gat tul, be oli yusum han blong olgeta nomo blong mekem olsem. I no longtaem, tudak i kam. From we i no gat lektrik, ol man we oli stap traehad blong sevem olgeta we oli fas i stap, oli mas wok wetem toslaet mo kandel nomo.

Long taon blong Jacmel, smol Ralphendy we i gat 11 yia blong hem, i fas i stap aninit long wan haos we haf simen blong hem i foldaon. Long taon ya, i gat wan tim blong ol man we oli wok blong sevem ol narafala man. Tim ya i wok had plante aoa blong traem karemaot hem. Be wanwan taem graon i seksek yet. Ale, ol man ya oli aot long haos ya hareap from we oli fraet se narafala haf blong haos ya i save foldaon antap long olgeta. Phillipe we hem i wan misinari blong ol Witnes blong Jehova, i harem nogud. Hem i no wantem lego Ralphendy i stap olsem. Hem i se: “Mi no save lego Ralphendy i stap aninit long ol simen ya blong i ded.”

Ale Phillipe i go wetem tri narafala man, oli traem pastru long ol haf blong haos ya we oli brobrok. Oli go kasem ples we Ralphendy i stap long hem. Tufala leg blong hem i fas i stap aninit long simen blong haos ya we i foldaon. Stat long medel naet, fofala man ya oli wok blong karemaot ol samting we oli foldaon long leg blong Ralphendy. Be oli lukaotgud. Taem graon i seksek smol, oli harem we simen antap i muv mo i mekem noes. Long 5 klok moning oli pulumaot Ralphendy. Hemia 12 aoa afta we graon i seksek bigwan.

Sore tumas we ol man oli no save sevem evri man olsem we oli sevem Ralphendy. Long taon ya Léogâne, etkwek i spolem ol ples. Roger mo fasbon boe blong hem, Clid, tufala i sef taem haos blong olgeta i foldaon. Be smol boe blong hem, Clarence, i ded. Woman blong Roger, nem blong hem Clana, hem i fas i stap aninit long haos. Hem i laef yet mo i save toktok, be hed blong hem i fas i stap aninit long siling blong haos we i foldaon. Roger mo wan fren blong hem, tufala i traehad blong karemaot Clana. Oli harem Clana i stap krae long olgeta se, “!Hareap! !Mi harem we paoa blong mi i finis! !Mi no save pulumgud win!” Tri aoa i pas, nao wan tim blong man i kam, we wok blong olgeta i blong sevem ol man. Be taem oli karemaot Clana, hem i ded finis.

Wenesde 13 Jenuware. Namba 2 Dei

Taem san i girap long nekis dei, ol man oli luksave se etkwek ya i spolem ples bigwan. Bighaf blong taon blong Port-au-Prince i lus. Taem nius blong etkwek ya i kasem ol narafala kantri, ol ogenaesesen mo ol man raon long wol oli stat mekem plan blong givhan. Tri handred kilometa longwe, hemia long Dominikan Ripablik, ol Witnes blong Jehova we oli wok olsem volontia long ofis blong olgeta, oli harem graon i seksek tu. Taem ol Witnes ya oli harem nius se etkwek i strong moa klosap long taon blong Port-au-Prince, oli mekem plan kwiktaem blong givhan long ol man long taon ya. Samwe long 1.2 milian man oli stap long Port-au-Prince. Fulnamba blong ol man long Haiti i bitim 9 milian.

Las taem we graon i bin seksek bigwan long Haiti, hemia 150 yia i pas finis. Taswe ol man long Haiti oli fogetem etkwek finis. Oli no moa wokem haos we i save stanap strong taem graon i seksek. Oli wokem haos we i save stanap strong long taem blong hariken mo long taem we bigfala wota i ron. Hemia i min se oli wokem evri haf blong ol haos blong olgeta long simen. Taswe, taem graon i seksek bigwan, we paoa blong hem i kasem 7.0, ol simen wol mo simen siling ya oli no naf nating blong stanap strong. Ol Witnes blong Jehova long Haiti, oli bildim ofis blong olgeta, we oli finisim long yia 1987. Oli wokem ofis ya blong i save stanap strong taem graon i seksek. Taswe, nating se hem i stap long is saed nomo blong Port-au-Prince, hem i no foldaon mo i gat smol samting nomo long hem we i nogud.

Afta we graon i seksek bigwan, long nekis dei blong hem, ofis blong ol Witnes long Haiti i fulap gud long ol man we oli kam blong askem help. Telefon mo Intenet i no wok. Ale olgeta we oli wok long ofis ya oli mas go tu taem, long boda blong Dominikan Ripablik blong sanem nius i go long narafala kantri. Plante handred man we oli kasem smol kil mo bigfala kil tu, oli kam stap long yad blong ofis blong ol Witnes long Haiti. Plante narafala man bakegen oli go long ol hospital we oli stanap yet long eria ya. Be kwiktaem nomo ol hospital ya oli fulap mo i no moa gat ples blong ol man.

Ol man we oli kasem bigfala kil oli stap ledaon long graon nomo, raon long ol hospital. Oli harem we bodi blong olgeta i soa, oli lusum blad, oli stap krae. Wan long olgeta ya nem blong hem Marla. Hem i fas eit aoa aninit long wan haos we i foldaon. Tufala leg blong hem i ded, hem i no save muvum tufala. Ol man we oli stap raonabaot long haos ya we i foldaon, oli sevem hem mo oli tekem hem i go long wan hospital. Wan dokta we i Witnes blong Jehova, i traem faenem Marla from we oli no save se hem i stap long weswan hospital. Dokta ya nem blong hem Evan mo hem i blong Dominikan Ripablik. Hem i neva luk Marla, i save nem blong hem nomo, be hem i kam lukaotem Marla.

Evan i kamtru long hospital ya 24 aoa afta we graon i seksek bigwan. Ples i tudak finis. Hem i luk we plante ded bodi oli stap ledaon afsaed. Evan i prea mo i stap singaot nem blong Marla. Hem i singaot nem blong hem gogo i harem wan voes we i talem se “!Yes!” Hem i lukluk i godaon, i luk Marla i stap. Hem i stap smael bigwan. Evan i sek, hem i askem se, “?From wanem yu smael?” Marla i ansa se, “From we naoia mi stap wetem brata blong mi.” Tok blong hem i tajem hat blong Evan, nao hem i krae.

Tasde 14 Jenuware. Namba 3 dei

Hedkwota blong ol Witnes blong Jehova long Yunaeted Stet wetem ol branj ofis blong Kanada, Dominikan Ripablik, Franis, Jemani, Guadalup, Matinik, mo sam narafala ples bakegen, oli lukaot long wok blong sanem help i go long Haiti. Oli traem faenem rod we i beswan blong givimaot kakae, wota, meresin mo narafala samting olsem, transpot we i beswan blong yusum, rod we i beswan blong toktok i go long olgeta long Haiti, mo blong sanem mane mo ol man tu. Fulnamba blong ol Witnes blong Jehova we oli kam givhan from we oli gat save long wok blong nes no dokta, i kasem 78 evriwan. Mo i gat plante narafala man bakegen we oli kam blong givhan. Long haf pas 2 long moning, fas trak we i karem ol samting we ol man i nidim, i lego ofis blong Dominikan Ripablik blong go long Haiti. Trak ya i karem 6,804 kilo blong kakae, wota, meresin, mo narafala samting bakegen.

Taem trak ya i kasem Haiti long sem moning ya, ol Witnes long branj ofis blong Haiti oli mekem plan blong givimaot ol samting ya. I gat plante man we oli stap stilim ol kakae, blong oli salem bakegen. Taswe ol Witnes oli mas faenem wan rod blong ol man oli no luksave se oli stap karem ol samting we man i nidim. Plante volontia oli wok long dei mo long naet blong karemaot ol samting ya long ol bokis, mo blong seraotem olgeta oli go long wanwan smol bag we oli save givimaot long wanwan famle mo man. Long ol manis we oli kam biaen, ol Witnes blong Jehova oli seremaot bitim 450,000 kilo blong ol samting, we i fri nomo. Mo oli givim kakae long bitim 400,000 man.

Fraede 15 Jenuware. Namba 4 dei

Long medel dei, i gat 19 Witnes blong Jehova we sam oli dokta, sam oli nes, mo sam narafala we oli gat save long saed blong meresin, oli aot long Dominikan Ripablik mo Guadalup, oli kam long Haiti. Olgeta ya oli stanemap wan klinik blong halpem ol man kwiktaem. Klinik ya i givhan blong tritim plante pikinini, we oli stap long wan haos blong ol pikinini we oli no gat papa mama. Ol Witnes oli givim kakae mo tapolen tu, blong givhan long ol pikinini ya. Étienne, we hem i daerekta blong haos ya blong ol pikinini, i talem se: “Mi mi talem tangkiu tumas long ol Witnes blong Jehova. Mifala i no save se bambae mifala i mekem wanem sipos oli no givim ol samting ya long mifala.”

Wan Smol Gel i Lus Mo Oli Faenem Hem Bakegen

Taem graon i stat blong seksek, Islande we i gat 7 yia blong hem, i lukluk i goaot long windo. Hem i luk ol lektrik pos oli foldaon, ol rop blong lektrik oli brok mo faea i kamaot. Ol wol blong haos ya we hem i stap insaed long hem, oli muvmuv strong mo oli folfoldaon. Leg blong hem i brok mo hem i gat bigfala kil. Taem oli karemaot hem long ol simen ya, papa blong hem, Johnny, i tekem hem i go long wan hospital long Dominikan Ripablik. Nao ol man long hospital ya oli talem se bambae oli tekem Islande i go long wan narafala hospital long Santo Domingo we hem i kaptel blong Dominikan Ripablik. Biaen, Johnny i ringim hospital ya, be oli talem se Islande i no kam kasem olgeta.

Johnny i lukaotem Islande long evri ples gogo 2 dei i pas, be i no faenem hem. Islande i stap long wan narafala hospital. Wan woman volontia we i stap wok long hospital ya, i harem we Islande i stap prea long Jehova. (Ol Sam 83:18, NW) Volontia ya i kam long Islande, i askem long hem se: “?Yu yu laekem Jehova?” Wota i fulap long ae blong Islande, nao hem i ansa se “Yes.” Nao volontia ya i talem se, “Ale yu no wari. Bae Jehova i halpem yu.”

Johnny i askem ol Witnes blong Jehova long ofis blong Dominikan Ripablik, sipos oli save givhan long hem blong traem faenem Islande. Ale, wan Witnes blong Jehova we nem blong hem Melanie, i talem se bambae hem i givhan. Melanie i go long wan hospital, mo i stap askem long olgeta sipos i gat wan gel long ples ya we nem blong hem Islande. Volontia ya we i bin harem Islande i prea, hem i harem wanem we Melanie i askem. Ale hem i soem long olgeta, ples we Islande i stap long hem. I no longtaem, Islande i joen bakegen wetem famle blong hem.

Ol Spesel Dokta Oli Kam

Plante man oli kam long klinik we ol Witnes blong Jehova oli stanemap long ofis blong olgeta long Haiti. Bifo we oli kam, oli no kasem tritmen, no maet oli kasem smol tritmen nomo. Sore tumas we plante long olgeta ya, ol dokta oli mas katemaot han no leg blong olgeta, sipos no, bambae oli ded. Long ol dei jes afta long etkwek, ol dokta oli sot bigwan long ol tul mo meresin we oli nidim tumas blong katem man. Ol man we oli gat kil oli safa bigwan, mo ol dokta tu oli harem nogud tumas from. Wan dokta i talem se: “I gat sam samting we mi luk, mo i gat sam noes we mi harem, we mi wantem tumas se God i mas ravemaot long maen blong mi, from we oli nogud tumas.”

Long namba tu wik afta long etkwek, sam dokta long Yurop we oli Witnes blong Jehova, oli kam long Haiti. Olgeta ya oli gat save, mo oli gat ol tul tu we oli nidim blong katem man we i gat bigfala kil. Tim blong ol dokta ya i katem 53 man we oli gat bigfala kil, mo i givim tritmen long plante taosen man. Wideline i gat 23 yia blong hem. Hem i wan Witnes blong Jehova, mo hem i kam stap long Port-au-Prince wan dei bifo long etkwek. Taem graon i seksek bigwan, simen i foldaon long raethan blong hem, ale ol dokta oli mas katemaot han blong hem. Biaen, ol famle blong hem oli kam from hem long hospital, oli tekem hem i gohom long Port-de-Paix. I tekem seven aoa blong oli go kasem ples ya. Be i no longtaem, Wideline i stat sik. Ol man long hospital blong Port-de-Paix oli ting se bambae hem i ded, ale oli no moa lukaot long hem.

Taem ol dokta we oli Witnes blong Jehova long Port-au-Prince, oli harem nius blong Wideline, oli go from hem. Oli givim tritmen long hem, mo oli tekem hem i kambak long Port-au-Prince blong oli lukaot long hem. Taem ol man long hospital blong Port-de-Paix oli luk we ol Witnes ya oli kam from Wideline, oli klaphan. Ol famle mo fren long kongregesen blong Wideline oli givhan long hem, mo naoia hem i stap lanem olsem wanem blong laef wetem wan han nomo.

Ol Witnes blong Jehova oli rentem sam haos long Dominikan Ripablik. Ol haos ya oli blong ol man oli save stap long olgeta, taem oli kam blong kasem tritmen. Sam grup blong ol Witnes oli wok blong givhan long ol sikman long ol haos ya blong sam aoa mo taem oli finis, narafala grup i tekova. Oli mekem olsem blong i gat man i stap oltaem blong givhan. I gat ol dokta, ol nes, mo plante narafala man bakegen. Olgeta evriwan oli volontia mo oli glad nomo blong lukaot long olgeta we oli nidim tritmen, gogo kasem we oli kamgud bakegen.

Oli Tokbaot Bilif, Wan Gudfala Fiuja, Mo Oli Soemaot We Oli Lavem Ol Man

Long eria we etkwek i strong moa, i gat 56 Haos Kingdom blong ol Witnes blong Jehova. Be i gat 6 Haos Kingdom nomo we etkwek ya i spolem bigwan. Bighaf blong ol Witnes blong Jehova we etkwek i spolem haos blong olgeta, oli stap nomo long ol open ples, no oli go stap long ol Haos Kingdom we etkwek i no spolem. Ol Witnes blong Jehova oli lan finis long fasin ya we plante man i hivap wanples, from we oli stap holem ol asembli plante taem long wan yia. Ale oli mekem ol plan blong evri samting i rongud, olsem we oli stap mekem long taem blong ol asembli ya.

Jean-Claude i wan elda blong ol Witnes blong Jehova. Hem i talem se: “Mifala i gohed nomo blong wok folem program blong kongregesen blong mifala. Samting ya i givhan bigwan long ol yangfala mo ol olfala tu, blong trabol ya i no spolem tingting blong olgeta fulwan.” ?Wanem i kamaot from? Wan man i talem se: “Mi mi glad tumas taem mi luk we yufala Witnes blong Jehova, yufala i gohed blong prij. Sipos mifala i no moa luk yufala, ating bambae mifala i harem se trabol we i kasem mifala i bigwan tumas.”

Ol Witnes blong Jehova oli traem leftemap tingting blong ol man. Wan Witnes i talem se: “Klosap olgeta man we mifala i storian wetem olgeta, oli ting se etkwek ya i wan panis blong God. Mifala i talem gud long olgeta se i no God we i sanem etkwek ya, be hem i wan disasta we i kamaot hem wan nomo. Mifala i ridim Jenesis 18:25 long olgeta. Long vas ya, Ebraham i talem se sipos God i kilim ol man nogud, hem i no save kilim ol stret man tu wetem olgeta. Hemia i no fasin blong God ya. Mo tu, mifala i ridim vas blong Luk 21:11. Jisas i talemaot finis se long taem blong yumi, bambae graon i seksek bigwan. Ale mifala i talem long olgeta se i no longtaem, bambae Jisas i mekem olgeta fren mo famle blong olgeta we oli ded, oli laef bakegen, mo bambae hem i mekem we man i no moa safa. Plante man oli talem tangkiu long mifala from ol save ya we mifala i serem wetem olgeta.”a

Nating se i olsem, trabol i stap yet. Jean-Emmanuel i wan dokta, mo hem i wan Witnes blong Jehova. Hem i talem se: “Fas trabol we i kasem mifala, hemia graon i seksek. Narafala trabol we i stap kasem mifala naoia, hemia ol trabol we oli kamaot from we graon i seksek. Ol man oli laef wanples long ol kamp, oli fasfas tumas. I no gat gudfala toelet, mo ren i mekem ples i sofmad olbaot. From ol samting ya, ol sik oli save kamaot enitaem. Be wan trabol we i nogud moa mo we i haed i stap, hemia trabol we ol man oli gat long tingting blong olgeta from samting we oli pastru long hem.”

Plante wik afta we graon i seksek bigwan, wan Witnes blong Jehova i kam long klinik we ol Witnes oli stanemap, mo i talem long wan nes se hed blong hem i stap soa oltaem, mo hem i no save slip long naet. Hemia samting we i kasem man plante taem afta long wan disasta. Nes we hem tu i wan Witnes, i askem long man ya se: “?Wan samting i bin foldaon long hed blong yu?” Man ya i ansa se: “No i nogat. Woman blong mi we mitufala i mared 17 yia, hem i ded long etkwek ya. Be yumi save finis se ol samting olsem bambae oli mas hapen. Jisas i talem finis se bae i olsem.” Hem i tokbaot trabol ya olsem se i samting nating nomo long hem.

Nes ya i kasem save from wanem hed blong man ya i stap soa mo i no save slip. Hem i talem se: “Yes, i tru, be yu lusum gudfala fren blong yu we yutufala i mas laef tugeta longtaem. Samting ya i nogud we i nogud tumas. Sipos yu harem nogud, yu wantem krae, i stret nomo we yu mekem olsem. Jisas tu i krae taem fren blong hem Lasaros i ded.” Taem nes ya i talem olsem, wantaem nomo man ya i krae we i krae. Hem i harem nogud tumas.

I gat bitim 10,000 Witnes long ples ya, mo 154 oli ded long etkwek ya. Oli talem se bitim 92 pesen blong ol man long Port-au-Prince oli lusum wan memba blong famle long disasta ya, mo sam long olgeta ya oli lusum bitim wan memba blong famle. Blong givhan long olgeta ya we oli stap krae, ol Witnes blong Jehova oli gobak plante taem blong visitim ol man we oli karekil long bodi blong olgeta, mo we oli harem nogud bigwan. Oli givim janis long ol man ya blong oli talemaot long olgeta se oli harem olsem wanem. Ol Witnes we oli lusum wan famle, oli save finis ol promes long Baebol, se ol dedman bambae oli laef bakegen mo wol bambae i kam wan paradaes. Be oli mas tokbaot sore blong olgeta long wan Kristin brata sista blong olgeta. Mo oli mas harem ol tok we i save leftemap tingting blong olgeta mo mekem oli harem gud bakegen.

Stanap Strong Long Ol Trabol Blong Naoia Mo Ol Trabol We Bambae Oli Kam

Aposol Pol i raetem se: “Naoia i gat trifala fasin ya i stap. Man i stap bilif long God, mo man i stap putum tingting blong hem i stap strong long hem, mo man i stap lavem hem mo i stap lavem ol man. Be nambawan long trifala fasin ya, hemia we oltaem, man i stap lavem God mo i stap lavem ol man.” (1 Korin 13:13) Ol gudfala fasin ya nao oli stap givhan long plante Witnes blong Jehova long Haiti, blong oli stanap strong long ol trabol we oli stap long hem naoia. Mo ol gudfala fasin ya oli givhan long olgeta tu, blong oli no fraet long wanem we bambae i kam yet long fiuja. Bilif we i tru, fasin blong joen gud olsem wan famle nomo, mo fasin blong lavem man, hemia nao i pusum ol Witnes long olgeta kantri raon long wol, blong oli wok strong blong givhan long ol man long Haiti. Petra i wan dokta we i Witnes blong Jehova long Jemani. Hem i go long Haiti blong givhan, mo hem i talem se: “Long laef blong mi, mi no luk yet we man i soemaot lav we i bigwan olsem. Mi krae from we mi sore, be mi krae plante moa from we mi glad.”

Wan niuspepa (The Wall Street Journal) i talem se etkwek blong Haiti long yia 2010, “i nogud moa i bitim ol narafala disasta we oli kamaot. Hemia from we, long wan kantri ya nomo, namba blong ol man we oli ded mo namba blong ol samting we etkwek i spolem, i bigwan tumas.” Be ol disasta oli no finis yet. Yes, afta long etkwek blong Haiti, yumi harem nius blong sam narafala bigfala disasta bakegen we oli hapen long wol. ?I gat wan taem we ol disasta ya bambae oli finis? Ol Witnes blong Jehova long Haiti mo long evri ples long wol, oli bilif strong se wan dei, God bambae i mekem promes ya blong hem i kamtru, we i stap long Baebol, se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

[Futnot]

[Tok blong makem poen long pej 15]

“Mi no save lego Ralphendy i stap aninit long ol simen ya blong i ded”

[Tok blong makem poen long pej 19]

“Mi mi glad tumas taem mi luk we yufala Witnes blong Jehova, yufala i gohed blong prij”

[Bokis/Tok blong pija long pej 17]

OLI WOKEM OL HAOS

Long fas manis afta we graon i seksek bigwan long Haiti, ol Witnes blong Jehova we oli save long wok blong bildim haos, oli go jekem ol haos blong ol brata sista, blong luk weswan haos i sef blong ol famle oli save muv i gobak stap long olgeta. Plante long olgeta we oli lusum haos blong olgeta, oli nidim wan ples blong stap long hem go kasem taem we oli faenem wan haos we i strong blong oli muv i go stap long hem.

John, we i wok long branj ofis blong Haiti, i talem se: “Mifala i luk wanem we sam narafala ogenaesesen long wol oli stap mekem blong givhan long ol man we oli lusum haos blong olgeta long taem blong disasta. Ale mifala i droem ol plan blong ol smosmol haos we oli no sas tumas, mo we oli isi nomo blong bildim. Saes blong wanwan haos ya i klosap sem saes nomo blong ol haos we plante man [long Haiti] oli stap long hem. Ol haos ya oli blokem man long ren mo win. Mo oli wokem olgeta long samting we i no hevi, mekem se sipos graon i seksek bakegen, ol famle oli no fraet se haos ya i foldaon antap long olgeta.” Tri wik nomo afta long etkwek, wan grup blong ol volontia we oli blong Haiti mo blong sam narafala kantri blong wol tu, oli stat wokem ol haos ya we oli blong smoltaem nomo.

Ol man we oli stap wokbaot long ol rod, oli singsingaot from glad taem oli luk ol bigfala trak oli pas wetem ol haf blong ol haos ya we bambae oli wokem. Wan man Haiti we i wok long ofis blong kastom, i mekemrere ol pepa, blong ol Witnes blong Jehova oli kasem ol samting blong wokem ol haos ya. Hem i talem se: “Ol Witnes blong Jehova oli stap wetem ol narafala man ya we oli faswan blong kam long [Haiti] blong givhan long ol man. Olgeta ya oli no toktok nomo se bambae oli givhan, be oli mekem samting we oli talem.” Sam manis nomo afta we graon i seksek, ol Witnes oli wokem 1,500 haos finis blong olgeta we oli lusum haos blong olgeta.

[Map blong pija long pej 14]

(Lukluk niuspepa)

HAITI

PORT-AU-PRINCE

Léogâne

Ples we etkwek i strong moa long hem

Jacmel

DOMINIKAN RIPABLIK

[Tok blong pija long pej 16]

Marla

[Tok blong pija long pej 16]

Islande

[Tok blong pija long pej 16]

Wideline

[Tok blong pija long pej 18]

Ol Witnes blong Jehova long Haiti oli go luk ol man we oli harem nogud blong leftemap tingting blong olgeta

[Tok blong pija long pej 18]

Wan dokta i stap lukaot long wan boe we i kam long klinik we ol Witnes blong Jehova oli stanemap