STORI BLONG FRAN PEJ
Kontrolem Ol Fasin We Yu Stap Mekem
TAEM alam blong Osten i ring, hem i wekap. Nating se hem i haf slip yet, be hem i werem klos blong eksasaes mo i go ronron. Hem i stap mekem tri taem long wan wik, mo hem i mekem olsem wan yia finis. Lori i rao wetem man blong hem, nao hem i kros mo i harem nogud tumas, ale hem i girap i go long kijin, i karemaot plastik loli mo i kakae evri loli, olsem we hem i stap mekem oltaem taem hem i kros.
?Wanem samting we i sem mak long saed blong Osten mo Lori? Wan samting i gat bigfala paoa long tufala, nating se tufala i kasem save no nogat: Hemia samting we tufala i stap mekem oltaem.
?Olsem wanem long yu? ?Yu yu wantem mekem sam gudfala samting long laef blong yu mo folem oltaem? Maet yu wantem eksasaes oltaem, no maet yu wantem slip moa, no yu wantem spenem moa taem wetem olgeta we yu lavem olgeta.
No maet yu wantem stopem ol fasin we oli nogud, olsem smok sigaret, kakae tumas rabis kakae, mo spenem tumas taem long Intenet.
I tru se i had blong winim ol fasin we oli nogud. Olsem wan tok we i se, ol fasin we oli nogud, oli olsem wan bed we i hot gud long koltaem. !I isi blong go slip long hem, be i had tumas blong kamaot!
Taswe, ?olsem wanem yu save kontrolem ol fasin we yu mekem oltaem, blong oli givhan long yu be oli no spolem yu? Yu traem tingbaot tri advaes long Baebol we yu save folem.