PRAES I STAP GO ANTAP

Harem Gud Long Samting We Yu Gat

Man we i harem gud long samting we hem i gat, hem i glad long laef blong hem. Mo sipos situesen blong hem i jenis, hem i rere blong jenisim fasin blong hem blong spenem mane.

?FROM WANEM I IMPOTEN?

Jessica Koehler we i stadi long tingting blong ol man, i faenemaot se man we i harem gud long samting we hem i gat, plante taem hem i gat stret tingting mo i no stap jalus long ol narafala. Yes blong talem stret, ol man we oli glad moa hemia olgeta we oli no gat tumas mane, from we oli no stap wari tumas. Olgeta oli tinghae moa long ol samting we mane i no save pem, olsem glad we oli kasem taem oli joen wetem ol famle mo fren.

“Sipos yumi gat kakae blong yumi mo klos blong yumi, hemia i naf, yumi save harem gud.”—1 Timoti 6:8.

SAMTING WE YU SAVE MEKEM

No skelem laef blong yu wetem narafala. Sipos yu skelem laef blong yu wetem gudfala laef we narafala i gat, bambae yu no moa glad mo yu stat blong jalus. Samtaem, samting we yu luk i no tru. Sam man we yu ting se oli rij, maet oli gat plante kaon. Nicole we i laef long Senegal, i talem se: “Mi no nidim plante samting blong mi glad. Sipos mi harem gud long wanem we mi gat, bambae mi glad nomo nating se narafala i gat moa samting i bitim mi.”

Traem hemia: No lukluk ol advetaesmen o samting we man i postem long sosol media blong soemaot mane mo ol sas samting we hem i gat.

“Man i save gat fulap samting, be ol samting ya oli no save givim laef long hem.”—Luk 12:15.

Gat fasin tangkiu. Man we i gat fasin tangkiu, hem i harem gud long samting we hem i gat, mo i no gat tingting ya se hem i mas kasem sam moa samting. Roberton we i stap long Haiti, i talem se: “Mi tekem taem blong tingbaot kaen fasin we ol narafala oli soemaot long mi mo famle blong mi. Biaen, mi talem tangkiu long olgeta from samting we oli mekem. Mo tu, mi tijim smol boe blong mi we i gat eit yia, blong i talem tangkiu from eni samting we narafala i givim long hem.”

Traem hemia: Evri dei, raetemdaon samting we yu wantem talem tangkiu from. Maet yu gat tangkiu from gudfala helt we yu gat, from wan memba blong famle, wan tru fren, o from naesfala kala blong san we i godaon.

“Man we hat blong hem i glad, i olsem we hem i stap lafet olwe nomo.”—Ol Proveb 15:15.

Samtaem i had blong yumi harem gud long samting we yumi gat. !Be sipos yumi traehad, gudfala frut i save kamaot from! Taem yumi jusum blong harem gud long samting we yumi gat, yumi stap jusum glad. Hemia wan fasin we mane i no save pem.