Stadi 14

Yu Waes Be Yu Strong Tu

1. ?From wanem yumi mas waes?

¹ Taem Jisas i sanem ol disaepol blong hem blong oli go prij, hem i mekem i klia se oli mas waes long tok blong olgeta mo long ol samting we oli mekem. Nating se hem i promes se bambae hem i stap wetem olgeta, be olgeta oli no mas mekem sam trabol we i no rili nid blong oli kamaot. (Mat. 10:16) Long medel blong kampani blong ol Kristin tu, oli mas gat fasin luksave long tok blong olgeta mo long ol samting we oli stap mekem, blong oli no save spolem tingting blong ol narafala from we oli no stap tingtinggud fastaem. (Prov. 12:8, 18) Taswe i gat nid blong wokgud moa long fasin waes.

2. ?Wanem mining blong tok ya waes?

² Mining blong tok ya waes i olsem “fasin blong luksave wanem samting i stret blong talem mo mekem wetem narafala man,” mo “fasin blong toktok wetem ol narafala we yu no mekem olgeta oli kros.” Blong gat waes i min se man i kaen inaf long toktok mo fasin blong hem blong i no save spolem ol narafala man. Yumi no wantem spolem tingting blong ol narafala from toktok mo ol samting we yumi stap mekem. Be, samting ya i no min se bambae yumi neva mekem narafala man i kros from ol tok blong Baebol i agensem sam man. (Rom 9:33; 2 Kor. 2:15, 16) From samting ya taem yumi waes long fasin blong yumi, yumi mas strong tu from trutok blong God.

3. Eksplenem olsem wanem frut blong tabu speret i stampa blong fasin ya.

³ Long laef blong yumi evri dei sipos yumi stap soemaot frut blong tabu speret blong God bambae i no hadwok long yumi blong yumi waes. Frut ya hem i stampa, no faondesen, blong fasin waes. (Gal. 5:22, 23) Eksampel, wan man we i gat lav i no wantem spolem ol narafala man, be hem i rili wantem givhan long olgeta. Wan man we i soemaot fasin kaen bambae hem i tingbaot blong i mekem i gud long ol narafala man. Wan man we i stap bos long tingting blong hem mo i stap kwaet taem ol samting blong traem oli traem hem, hem i save givhan long ol narafala man blong oli luksave tingting blong hem. Be wan man we i no stap bos long tingting blong hem no hem i stronghed, hem i save tok olbaot nomo mo hem i save mekem ol man we hem i stap toktok wetem olgeta oli kros. (Prov. 15:18) Ol tok mo ol fasin blong yumi bambae oli mas pulum ol man we tingting blong olgeta i stret, be i no blong ronem olgeta.

4-8. (a) ?Olsem wanem yumi save soemaot waes fasin long wok blong yumi long ol haos wanwan? (b) ?Fasin waes i min se yumi save agensem trutok? ?Hem i minim wanem?

⁴ Yusum fasin waes long wok blong prij. Yu save soemaot waes long wok blong prij long ol haos wanwan, taem yu stat blong tokbaot ol samting we man blong haos i wari long hem mo soemaot olsem wanem Kingdom blong God bambae hem i givhan. Tokbaot ol stret fasin we man ya i laekem, ol kwestin we hem i luksave mo stret long ol samting hem i wantem se oli mas kamgud moa. Fasin blong daonem no tok strong long hem from ol tingting long skul blong hem bambae i mekem se hem i no wantem toktok. Taswe, i nogud blong tokbaot ol samting we oli save mekem man i kros, be i gud blong tokbaot ol samting we ol man oli stap akseptem olgeta olsem we oli stret. Sipos i nid blong tokbaot samting we i defren long tingting blong man blong haos, fastaem yu mas faenem sam poen we yu agri wetem hem mo yu save tokbaot poen ya wetem hem. Sipos yu save putum long tingting blong man blong haos trufala hop long Kingdom mo ol blesing blong hem, ol narafala samting bambae oli kam klia long stret taem, taem hem i stap luksave kaengud fasin blong God.

⁵ Man we i waes i traehad blong leftemap tingting blong man we i toktok wetem hem blong tufala i storeyan mo hem i save talemaot tingting blong hem. Pol i traehad blong gat tingting olsem ol man we hem i stap toktok long olgeta, long rod ya hem i save yusum ol gudfala toktok we i gat paoa blong sapotem gud nyus. (1 Kor. 9:20-22) Yumi mas mekem olsem hem. Sipos yumi sore mo tingbaot fasin blong laef blong ol narafala man, luksave from wanem oli stap olsem, from wanem oli bilif no oli stap toktok olsem, bambae i givhan long yumi blong toktok wetem olgeta long fasin we i waes, mo long fasin sore. Maet olgeta oli stap laef long fasin we i defren, oli gat ol defren ekspiryens, no oli stap folem ol rul we oli defren mekem se tingting blong olgeta i defren. Taem yu luksave sam samting long tingting blong narafala man, yu save mekem tok blong yu long saed blong gud nyus i stret, be yu no talem ol samting we oli save mekem man i kros from we yu no save tingting blong hem mo luksave from wanem hem i tingting olsem.

⁶ Fasin blong luksave tingting blong narafala man i no min se yu agri wetem hem long samting we i no stret. Fasin waes i no min se yu lego long ol trutok, no gat. Oltaem yu mas strong long samting we i stret. Sipos man i no mekem olsem, hem i save faenemaot se hem i no waes, be hem i stap agensem trutok. Maet hem i save faenemaot se hem i fraet long man bitim we hem i laekem stret fasin. Be, fasin waes i no min se man i agensem trutok, impoten samting se long stret taem, i min se man i mas faenem stret taem blong talemaot samting we hem i wantem. Samtaem i waes blong fogetem sam samting we man blong haos i talem. Maet i gud blong livim sam samting, go kasem man i naf blong haremsave ol samting ya. Olsem Jisas i talem long ol disaepol blong hem, se: “Mi mi gat plante narafala samting yet blong talem long yufala. Be naoia yufala i no save kasem olgeta, oli strong tumas yet long yufala.” (Jon 16:12) Taswe maet yumi no save agri wetem man we yumi toktok wetem hem, be yumi no mas kwik blong poenemaot ol rong tingting blong hem. Sipos yumi mekem olsem, maet yumi satem tingting blong hem nomo mo yumi blokem storeyan blong i gohed.

⁷ Taem wan man blong haos, i storeyan, i tokbaot plante samting long Baebol we hem i ting se oli rong, i hadwok long wan sot taem blong stretem evri samting. Samtaem i gud blong livim plante long olgeta samting ya mo tokbaot poen we yufala i stap tokbaot nomo. Mo tu man blong haos i save pulum yu long ol rao blong wol. Yu mas waes blong yu no joen long samting ya, yusum Baebol blong givim ansa long ol trabol blong wol. Long fasin ya yu stap folem eksampel blong Jisas.—Mat. 22:15-22.

⁸ Sipos yu mitim man blong haos we i kros, yu mas waes mo yu mas holemstrong tu. Yu no mas agensem trutok from we yu wantem mekem man blong haos i kwaet. Be, traem luksave from wanem man ya i harem olsem, maet yu save askem from wanem hem i ting olsem. Sipos hem i toktok, maet yu save talem se, yu tu yu wantem talem long hem from wanem yu yu gat tingting olsem. Be nating se yu traehad blong mekem storeyan i gohed olsem wanem, waes fasin nomo bambae i givim gudfala frut. Tingbaot advaes long Proveb 15:1 se: “Wan ansa, taem hem i kwaet, i save mekem kros i godaon. Be wan tok we i stikim man i save mekem kros i kam antap.” Be, sipos sam man oli soem se oli no wantem skelem ol samting, i gud blong lego olgeta.—Mat. 7:6.

9, 10. ?Yumi nidim waes taem yumi toktok wetem ol Kristin brata blong yumi?

⁹ Waes wetem ol Kristin brata. Yumi no mas waes nomo taem yumi toktok wetem ol man we oli no save Jeova yet, be yumi mas waes tu taem yumi stap wetem ol brata blong yumi long saed blong speret. Samtaem ol brata mo ol sista we oli waesgud long wok blong prij maet oli foget se oli mas waes tu taem oli stap wetem ol brata blong olgeta. Kaen long toktok mo fasin oli impoten tumas insaed long ogenaesesen blong Jeova blong mekem lav mo fasin joengud mo fasin frengud evri dei oli kam strong moa. Pol i talem se: “Yumi mas mekem i gud long olgeta man. Antap moa, yumi mas mekem olsem long olgeta ya we oli bilif long Kraes, nao oli brata blong yumi.”—Gal. 6:10.

¹⁰ Yumi intres long ol brata blong yumi, antap moa ol intres long ol samting long saed blong speret, from we yumi evriwan yumi stap long ogenaesesen blong Jeova. (Fil. 2:2, 4) Man we i waes i luksave se hem i stap intres long ol brata blong hem be hem i no mas traem lukluk i go insaed long prapa bisnes blong olgeta, maet i askem ol kwestin blong sem we hem i no gat raet blong askem. Fasin waes bambae i givhan long yumi blong yumi no save kam “insaed long ol bisnes blong narafala man.”—1 Pita 4:15.

11. ?Olsem wanem Baebol i soemaot se ol elda oli mas waes insaed long kongregesen?

¹¹ Waes fasin i impoten moa long ol elda we oli stap lukaot long sam trabol insaed long kongregesen. Taem aposol Pol i givim ol oda long Timote long saed blong olsem wanem hem i save stretem olgeta we oli slak insaed long Kristin kongregesen, Pol i makem se hem i mas kwaet mo i kaen long olgeta, i se: “Man blong wok blong Masta blong yumi, hem bambae i no man blong faet. Hem i mas wan man blong mekem i gud long olgeta man, . . . we tingting blong hem i longfala. Hem i mas wan man we i save stretem ol man we oli agens long hem, long fasin we i kwaet nomo. . . . Long fasin ya, bambae oli save kasem stret tingting blong olgeta bakegen. Nao bambae oli save ronwe long trap blong Setan.” (2 Tim. 2:24-26) Sem mak aposol Pol i givim advaes se oli mas “mekem long kwaet fasin” taem oli storeyan long wan brata we i stap wokbaot long rod blong go lus bifo we i luksave. (Gal. 6:1) Taem ol elda oli givim advaes long ol man olsem, oli mas waes, be long semtaem oli mas holemstrong long ol rul blong stret fasin.

12, 13. ?From wanem i impoten blong yumi waes long toktok blong yumi insaed long famle?

¹² Fasin waes blong toktok wetem ol narafala man, yumi mas mekem tu taem yumi stap wetem famle. I no gat risen blong tok strong no blong yumi no kaen long olgeta we oli famle blong yumi from we yumi savegud olgeta. Yumi mas toktokgud wetem olgeta ya tu. Bambae oli harem nogud sipos yumi tok strong, no jikim olgeta no talem ol tok we oli strong tumas long olgeta. ?Mo sipos ol narafala memba blong famle oli no man blong Jeova, samting ya i min se yumi save lego fasin waes taem yumi toktok wetem olgeta? No gat, from we maet fasin waes long toktok blong yumi wetem ol man we oli no bilif i save mekem se oli akseptem trufala wosip samtaem.—1 Pita 3:1, 2.

¹³ Fasin blong yusum waes blong tiokratik i mekem plante gudfala frut i kamaot, nating se yumi stap wetem ol man long pablik, ol brata sista blong yumi long saed blong speret, no ol famle blong yumi. Fasin ya i mekem se olgeta we oli harem tok blong yumi oli save haremgud, olsem Proveb 16:24 i soemaot se: “Ol gudfala toktok oli olsem wan hani, i swit long man we i harem mo i save mekem man we bun blong hem i soa i kamgud bakegen.” From ol samting ya, wokem waes fasin blong toktok, wetem wan strong tingting blong mekem i gud long evri man we yu stap toktok long olgeta.