Talemaot Gud Nius Wetem Strong Tingting, Be Long Kaen Mo Waes Fasin
1 Taem ol haeman oli talem long Pita mo Jon blong no moa prij, tufala i talem se: “Be mifala, bambae mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” (Wok 4:20) ?Wanem i mekem se oli gat strong tingting mo no fraet blong toktok? “Oli prea finis,” mo ‘tabu spirit i kam fulap long olgeta, nao oli stat talemaot tok blong God we oli no fraet nating.’ (Wok 4:31) Yumi tu, bambae yumi no fraet blong prij sipos yumi mekem olsem olgeta.
2 ?Be olsem wanem yumi save gat strong tingting blong toktok mo long semtaem yumi tok wetem kaen mo waes fasin? Wan diksonari i talem mining blong kaen mo waes fasin i se, hemia ‘fasin blong haremsave samting we i stret blong mekem no talem, blong narafala i no harem nogud long yumi.’ Taswe, i gud we fastaem, yumi tokbaot ol samting we man blong haos i intres long hem. Samting ya i save givhan long yumi blong toktok long fasin we i kaen mo i waes. Mo tu, sipos yumi lanem olsem wanem blong pulum ol man blong tingting gud, samting ya i save givhan long yumi blong toktok long kaen mo waes fasin.—Lukluk g99 22/2 pej 4, 5 (Franis mo Inglis); yb88 pej 47.
3 Skelemgud Tufala Fasin Ya: Blong karem frut long wok blong prij, i impoten blong soemaot tufala fasin ya evriwan, hemia fasin no fraet blong toktok mo fasin blong toktok we i kaen mo i waes. Tingbaot olsem wanem yu save ansa long man we i askem kwestin ya: ‘?I tru se i gat sam gudfala samting long evri skul?’ Wan klia ansa we i kaen mo i waes, i stap long pej 323 (Fr. 311) blong Reasoning buk. Maet wan man i askem long yumi from wanem yumi stap gobak oltaem blong luk ol man we oli no Witnes blong Jeova mo we oli gat skul blong olgeta finis. Ale, yumi save tok long fasin we yumi no fraet be yumi kaen mo waes, sipos yumi folem samting we Reasoning buk i talem long pej 206 (Fr. 400). Samfala oli wantem save from wanem ol Witnes blong Jeova oli no joen long ol wok blong mekem vilej no taon i kam antap moa. I gat plante gudfala poen long pej 207 mo 208 (Fr. 402, 403) we bambae oli givhan long yumi blong ansa long fasin we yumi no fraet be yumi kaen mo waes.—1 Pita 3:15.
4 Plante eksampol oli soemaot se sipos yumi prea long Jeova mo dipen long hem, tabu spirit bambae i givhan long yumi, nao bambae i mekem tingting blong yumi i strong we yumi no fraet blong toktok, mo we yumi toktok long kaen mo waes fasin.—Wok 5:29.