Stadi 36
Lastok i Stret Mo Long Blong Tok i Stret
1-3. ?Olsem wanem yu save mekem lastok i joen wetem stampa tok?
1 Plante taem ol man oli tingbaot ol tok we yu talem laswan. Taswe i impoten blong yu mekem reregud lastok blong yu. Lastok i mas pulum tingting i go long ol poen we yu wantem ol man oli tingbaot mo i pulum stampa tok i kam long en blong hem. From fasin blong mekem rere mo givim tok, samting ya i mas pusum ol man we oli stap lesin blong oli mekem wan samting. Hemia nao samting we mifala i wantem yu blong tingtinggud long hem, taem yu kam long poen ya “Lastok i stret, i naf” we i stap long Pepa Blong Givim Advaes.
2 Lastok i stret wetem stampa blong tok. Blong save olsem wanem blong joenem lastok long stampa blong wan tok, i gud blong lukluk bakegen long Stadi 27. I no nid blong talem bakegen stampa blong tok long lastok blong yu, nating se sam studen, olsem olgeta ya we oli nyuwan, oli faenem se samting ya i givhan; be lastok blong yu i mas pulum tingting i go long hem. Nao, folem stampa tok ya, talem sam samting we ol man oli save mekem.
3 Sipos lastok i no joen nating long stampa tok, bambae tok i no joengud fulwan mo pulum tufala en i kam tugeta. Nating sipos yu talem ol bigfala poen bakegen blong finisim tok, no yu talem bakegen ol stampa poen, bambae yu wantem ademap wan no tu fultoktok blong finisim tok, blong talem bigfala tingting no stampa blong tok ya.
4-9. ?From wanem lastok blong yu i mas soem long ol man we oli stap lesin samting we oli mas mekem?
4 Lastok i soem ol samting we ol man oli mas mekem. Taem yu toktok yu wantem pulum ol man blong mekem no luksave sam samting, nao from samting ya ol laswan tingting blong tok i mas soem ol poen ya. Bigfala tingting biaen long lastok i blong soem long ol man we oli stap lesin blong samting we oli mas mekem mo leftemap tingting blong olgeta blong oli mekem.
5 From risen ya, antap moa long fasin blong mekem stampa tingting long tok i klia, lastok i mas rili kamaot long hat, i soem strong bilif, gat paoa blong pusum ol man blong mekem wan samting. Plante taem bambae ol sot fultoktok oli gud moa blong givim paoa long lastok. Be, nating se fultoktok i olsem wanem, yu mas givim gudfala risen from wanem oli mas mekem samting we yu talem, mo tu ol blesing we bambae oli kasem sipos oli mekem olsem.
6 Lastok i mas folem stret oda blong samting we yu bin talem finis long tok blong yu. Olsemia nao, samting we yu talem long lastok blong yu i blong pulum ol man we oli stap lesin blong oli mekem ol samting we yu talem finis long bodi blong tok blong yu. Lastok blong yu bambae i mekem i klia mo makemgud samting ya we oli mas mekem, long rod ya bambae oli mekem ol samting we yu talem long tok blong yu mo paoa blong lastok blong yu nao bambae i pulum olgeta.
7 Long minista wok long ol haos wanwan plante taem ol lastok oli no gat tumas paoa. Samting ya i kamaot taem yumi no soem klia long man blong haos wanem rod yumi ting se i gud blong hem i folem, long saed blong tekem ol buk mo magasin, agri long wan visit bakegen no samting we i olsem.
8 Mo tu ol lastok blong yumi long ol tok long Tiokratik Skul bambae oli no gat paoa sipos yumi talem nomo ol bigfala poen bakegen mo oli no pulum man we oli stap lesin blong mekem wan samting. Yu mas soem olsem wanem tok ya i stret long man, no long sam rod yu mas soem se tok ya i impoten long ol man we oli stap lesin.
9 Sam man blong givim tok oli faenem se i gud blong finisim wan tok we stampa blong hem i kamaot long Baebol wetem wan sot toktok we i kavremap ol poen blong ful tok, oli yusum ol stampa vas mo stampa blong tok. Taem yu mekem smol toktok blong kavremap ol poen blong tok mo tu taem yu tokbaot sam vas olsem we bambae yu mekem long doa blong man, olsemia nao bambae yu mekem ol poen blong tok oli klia, be i no hemia nomo, bambae yu givim sam samting long ol man we oli stap lesin long yu blong oli save tingbaot afta we yu finisim tok blong yu mo bambae oli yusum bakegen blong talem ol bigfala poen long tok. Hemia nao stampa risen blong lastok, mo rod ya hem i stret mo tu hem i save mekem se tok ya i karem frut.
10-14. Talem sam advaes long saed blong poen ya se long blong tok i stret.
10 Lastok, longfala blong hem i stret. Longfala blong lastok i no mas dipen long hamas taem i stap yet long tok blong yu, nating se plante taem samting ya i kamaot. Lastok, longfala blong hem i stret sipos hem i mekem se tok ya i karem frut mo i kasem mak blong hem. Taswe, frut we i kamaot hem nao i soem sipos longfala blong lastok i stret. Hemia samting we man blong givim advaes long yu bambae i mekem taem yu wok long poen ya “Long blong tok i stret,” we i stap long Pepa Blong Givim Advaes.
11 Blong skelem longfala blong ol lastok wetem bodi blong tok, tingbaot sot toktok long en blong ful buk blong Eklesiastis, we i stap long Eklesiastis 12:13, 14, mo skelem wetem ol tok we Jisas i stap talem antap long hil taem hem i prij mo lastok blong hem long Matyu 7:24-27. Hemia tufala defren rod blong lastok mo long blong tufala, mo tufala evriwan i kasem mak blong tufala.
12 Lastok i mas mekem ol man we oli stap lesin oli harem save se hemia i lastok. Toktok we yu talem oli mas soem se en blong tok i kolosap, be jun we i karem tu i mas soem se hemia en blong tok. Samting we yu talem mo fasin we yu yusum blong talem i mas finisim tok blong yu. Hem i no mas pulum ol narafala samting we i no nidim. Sipos yu no save joenem gud tok blong yu blong finisim mo holemtaet intres blong ol man yet tru long lastok tu, yu mas wokem bakegen. Lastok ya i longfala tumas.
13 Sipos yu yu wan nyufala man blong givim tok, plante taem i gud moa blong yu mekem lastok blong yu i sot moa bitim we i longfala olsem yu ting se hem i nidim. Mekem i isi blong man i kasem save, i go stret wetem tingting we i positif. I nogud yu mekem i go i go olsem se i no gat en long hem.
14 Sipos yu givim wan tok we ol defren man oli mekem ol defren haf blong hem, no sipos yu mekem wan tok long miting blong Kingdom Wok Blong Yumi, nao lastok blong yu i mas joen wetem fastok blong nekiswan tok we bambae i kamaot mo from samting ya hem i mas sot moa. Nating se i olsem, evri tok wanwan oli mas gat lastok blong olgeta we i stret wetem risen blong tok ya. Sipos i mekem olsem, nao long blong lastok i stret.
15-18. Sipos yu no lukaot gud long taem, ?wanem bambae i kamaot from?
15 Taem. I no se long blong lastok i impoten nomo; yu mas tingbaot tu, taem we yu mas yusum blong tokbaot ol defren haf blong tok. From samting ya poen ya “Long blong tok i stret” i stap hem wan long Pepa Blong Givim Advaes.
16 Yu no mas ting nating long poen ya. Sipos yu mekem rere gud tok ya, bambae long blong hem tu i stret, be sipos man we i givim tok, i wantem yusum evri poen long tok blong hem, bambae hem i ron sot long taem, nao hem i no rili kasem mak we hem i stap tingting long hem. Samting ya i kamaot from we tingting blong ol man we oli stap lesin i no moa stap kwaet mo oli stap lukluk hanwaj blong olgeta mo oli no rili lesingud long samting we hem i stap talem. Olsemia nao, lastok we i mas soem ol impoten samting blong mekem se tok ya i kasem mak blong hem, hemia olsem wanem ol poen long tok oli save wok mo pusum ol man blong mekem i wok, bambae i lusum paoa blong hem. Nating sipos man we i givim tok i talem lastok, be plante taem bambae ol man we oli lesin oli no lanem wan samting long hem, from hem i bitim taem blong hem.
17 I no se ol man we oli stap lesin, olgeta ya nomo oli wari taem man we i givim tok i bitim taem blong hem, be man ya we i givim tok, hem tu i wari. Sipos hem i luk se taem blong hem i sot mo hem i gat plante samting blong talem, bambae hem i save traem blong talem plante samting wantaem, samting ya bambae i spolem tok blong hem. Plante taem samting ya i kamaot from se man i fraet. Mo tu, sipos man we i givim tok i faenem se hem i no gat inaf poen blong talem long taem ya we oli givim long hem, nao blong traem mekem tok blong hem i longfala moa maet hem i save mekem tok ya blong hem i no moa folem oda mo toktok olbaot nomo.
18 I tru se elda we i lukaot long skul bambae i givim saen long studen sipos taem i finis, be i save spolem tingting blong studen mo ol man we oli stap lesin, taem wan tok i mas finis bifo we hem i kam long en blong tok blong hem. Man blong givim tok i mas intres long tok blong hem, mekem se hem i wantem givim. Ol man we oli stap lesin bambae oli harem olsem se oli mestem wan samting sipos oli no harem lastok. Man we oltaem i stap bitim taem long ol tok blong hem, i soem se hem i no stap tingbaot ol narafala no i soem se hem i no stap mekem rere tok blong hem.
19, 20. ?From wanem long blong tok i impoten tumas long Miting Blong Kingdom Wok Blong Yumi mo long ol asembli?
19 Taem i gat ol defren man blong givim tok long wan miting, i impoten tumas blong oli mekem long blong tok i stret. Eksampel, maet i gat faef defren haf long Miting Blong Kingdom Wok Blong Yumi. Sipos evri man we oli givim tok oli bitim taem blong olgeta long wan menet, samting ya bambae i mekem miting i let long faef menet. Be evriwan oli bitim taem blong olgeta smol nomo. Be, frut blong samting ya se sam man bambae oli goaot bifo miting i finis blong kasem bas i go long haos, no wan hasban no waef we i no bilif i kam blong tekem waef no hasban long miting i save kam kros taem hem i wet. Fasin ya i save spolem ol samting.
20 Trabol tu i save kamaot sipos wan man we i givim tok we i gat ol defren haf long hem, i no fulumap taem we oli givim long hem. Eksampel, sipos wan brata we i gat tate menet tok blong mekem long program blong wan asembli i finisim tok blong hem afta long twante menet, samting ya i save spolem program sipos nekis man blong givim tok i no rere blong stat kwiktaem olsem.
21-24. Talem sam problem long saed blong taem mo risen from wanem ol problem ya oli kamaot.
21 I tru, wan risen we i mekem se man i bitim taem blong hem se hem i gat tumas samting blong talem long tok blong hem. Hemia samting we yu mas stretem taem yu stap mekem rere tok blong yu. Sipos yu mekem i gud long ol faswan poen we oli stap long Pepa Blong Givim Advaes kam kasem hemia, bambae yu no gat trabol wetem poen ya se long blong tok i stret. Sipos yu save finis olsem wanem blong luksave ol bigfala poen long tok blong yu mo yu mekem rere wan gudfala plan blong tok, bambae yu faenem se long blong tok i stret nomo. Poen ya se long blong tok i stret i stap kolosap long en long pepa blong givim advaes from hem i dipen bigwan long ol faswan poen we yumi bin tokbaot finis.
22 Plante taem trabol long saed blong taem se man i stap bitim taem. Wan man blong givim tok we i mekem rere gud tok blong hem, oltaem hem i gat plante gudfala samting blong talem, be hem i mas lukaotgud blong hem i no bitim taem we hem i gat.
23 Be, ol nyuwan no olgeta ya we oli no gat plante ekspiryens blong givim tok, samtaem oli no stap kasem mak we oli mas finisim tok long hem. Bambae oli mas lanem blong yusumgud taem we i stap yet. Fastaem maet oli faenem i had blong mekem long blong tok i stret long taem we oli gat, be oli mas traehad blong mekem i kam kolosap long taem. Nating se i olsem, sipos studen i mekem rere mo i givim wan gudfala tok we i joengud, hem i no slak long poen ya se long blong tok i stret, be sipos bigfala taem i stap yet ale hemia i wan slak fasin long poen ya.
24 Blong luksave sipos long blong tok i stret no no gat bambae yu mas luk olsem wanem tok i gat paoa long ol man we oli stap lesin. Taem elda we i lukaot long skul i givim saen se taem i finis, studen i fri blong hem i finisim fultoktok blong hem. Sipos hem i save yusum fultoktok ya blong finisim gud tok blong hem blong mekem olgeta we oli lesin oli harem wan tok we i finis gud, long rod ya long blong tok i oraet nomo.
25-29. ?Olsem wanem man i save mekem se long blong tok blong hem i stret?
25 ?Olsem wanem blong mekem long blong tok i stret? Hem i dipen bigwan long fasin blong mekem tok i rere. I impoten blong mekem rere tok, i no ol poen we oli stap insaed long tok nomo, be fasin blong givim tu. Sipos yu mekem rere gud, oltaem long blong tok bambae i stret nomo.
26 Taem yu mekem plan blong tok blong yu, soemaot klia ol bigfala poen blong yu. Aninit long evri bigfala poen ya yu save gat sam smol poen blong tokbaot. I tru sam long olgeta bambae oli impoten moa bitim ol narafala. Yu mas save weswan oli impoten long tok we bambae yu givim mo weswan yu save karemaot sipos i gat nid. Nao sipos long taem ya we yu stap givim tok blong yu, yu luk se taem i sot, bambae i isi nomo blong talem ol bigfala poen mo livim ol smosmol poen.
27 Hemia wan samting we oltaem yumi stap mekem long wok blong prij. Taem yumi go long doa blong ol man, sipos oli stap mo oli lesin bambae yumi toktok wetem olgeta long sam menet. Be yumi rere tu blong talem sem toktok maet long wan no tu menet nomo, sipos i nidim. ?Olsem wanem yumi mekem? Long tingting blong yumi, yumi gat wan stampa poen no ol poen mo ol narafala impoten toktok we yumi mas yusum blong sapotem ol poen ya. Mo tu yumi gat long tingting blong yumi, ol smosmol poen we oli no impoten tumas we yumi save yusum blong mekem storeyan i go moa, be yumi save se taem yumi no nidim olgeta, ale yumi no yusum olgeta. Yumi save yusum sem rod ya taem yumi givim tok long platfom.
28 I gud we man blong givim tok i raetem long haf blong pepa blong hem hamas samting hem i mas tokbaot, taem stret haf long taem blong hem i finis, no sipos hem i wan tok we i longfala, maet hem i wantem seraotem tok blong hem long fo haf. Nao taem hem i bitim ol mak ya long plan blong hem, hem i mas lukluk klok mo luk olsem wanem long taem blong hem. Sipos hem i luk se hem i sot long taem, nao hem i mas stat blong tekemaot ol haf we oli no impoten tumas bitim we hem i wet gogo kasem las menet blong mekem olsem mo mekem lastok i fasfas mo spolem mesej blong tok. Be, fasin blong lukluk hanwaj oltaem hem i save pulum tingting blong ol man, sipos hem i mekem long fasin we oli luksave, no sipos hem i talem long ol man we oli lesin se saye taem blong hem i finis mo hem i mas hareap long tok blong hem. Yu mas mekem samting ya long fasin we i no pulum tingting blong ol man we oli lesin.
29 Blong mekem long blong tok i stret yu mas mekem long blong fastok i stret, evri impoten poen oli mas gat prapa taem blong olgeta, nao i save gat naf taem blong mekem lastok. I no se yu tingbaot long blong tok blong yu nomo taem yu luk se taem blong yu i finis be yu gat samting yet blong talem. Sipos yu stap lukaotgud long taem blong yu stat long stat blong tok, bambae yu save mekem wan gudfala tok we olgeta haf blong hem oli stret.