Stadi 9

Wokem Wan Plan

1-4. ?Olsem wanem blong jusum stampa tok mo ol stampa poen blong tok?

¹ Luk, man blong raetem Gospel i talem long fren blong hem Teofilas, i se: “Yu yu wan hae man tru, nao from we mi mi stap luklukgud longtaem finis long olgeta samting ya, i stat long stat blong hem, mi mi ting se i gud mi raetem store blong hem we evri tok blong hem oli stret, blong yu yu luk.” (Luk 1:3) Afta we Luk i bin stadigud mo hivimap ol trufala store long samting we hem i wantem tokbaot, hem i raetemdaon folem wan plan we man i save kasem save long hem taem hem i ridim. I gud yumi stap folem fasin ya taem yumi mekemrere ol tok blong yumi. I min se yumi mekem wan plan.

² Jusum ol stampa poen. Taem yumi toktok, olsem storeyan long Tok blong God, yumi wantem givim ol save i go long tingting blong narafala man, taswe ol save ya we yumi wantem tokbaot oli mas klia long tingting blong yumi fastaem. Afta we yu kasem ol save we yu nidim long tok blong yu, naoia yu mas jusumaot wanem samting yu wantem ol man we oli lesin long tok blong yu oli mas kasem save long hem taem yu finisim tok blong yu. Putum tingting ya long wan fultoktok. Sipos hem i tokbaot bigfala poen long tok blong yu mo sipos i stret wetem tingting ya we yu wantem ol man we oli lesin long tok blong yu oli mas tingbaot, hemia nao stampa tok blong yu. I gud blong raetemdaon blong yu save luk bakegen taem yu stap mekemrere tok blong yu.

³ Naoia yu save jusum ol impoten poen blong sapotem stampa tok blong yu. Ol poen ya oli mas stap olsem ol stampa poen long tok blong yu. Sipos yu mekemrere tok blong yu long ol pis pepa, yu save putumgud olgeta long tebel fored long yu. Nao jusum sam narafala tingting we yu nidim blong sapotem ol stampa poen ya, raetemdaon ol tingting ya long prapa ples blong olgeta wanwan, aninit long stampa poen we i stret long olgeta. Taem yu jusum mo putum ol defren stampa poen mo ol smosmol poen long plan blong yu, maet yu save luk se sam long ol poen ya oli no rili mekem stampa tok i kamaot klia. Sipos i olsem, yu no mas yusum olgeta. I gud blong mekem olsem bitim we yu mekem tok blong yu i fasfas wetem ol samting we oli no laenap wetem tok blong yu mo oli no impoten tumas. Traem putum ol tingting ya long stret oda blong olgeta. Taem yu folem rod ya, i isi blong luk ol samting we oli save spolem tok blong i rongud mo yu save stretem olgeta. Yu save luk se evri stampa poen oli folfolemgud olgeta, mekem se oli bildimap tingting blong stampa tok blong yu. Mo taem ol smol poen oli sapotemgud ol stampa poen we oli stap antap, tok blong yu bambae i givim wan tingting we i stret nomo.

⁴ Ol poen we yu mekemrere oli olsem bodi blong tok blong yu. Naoia bambae yu nidim fastok blong statem mo lastok blong finisim tok blong yu. Tingbaot olsem wanem blong statem tok blong yu. Lastok i mas laenap wetem tok we yu mekemrere finis mo yu mas jusum lastok we bambae i pusum tingting blong ol man we oli stap lesin blong i laenap wetem bigfala tingting long tok blong yu. Naoia yu save raetem tok blong yu i go long wan pepa. I gat defren rod blong mekem olsem.

5, 6. ?Wanem mining blong plan blong tok we yu raetem ol stampa poen? ?Plan we yu raetem ol fultoktok?

⁵ Ol defren rod blong wokem plan. Tu rod blong wokem plan we ol man oli savegud se, raetem ol stampa poen mo raetem fultoktok. Samtaem oli yusum tufala ya wantaem. Taem yu yusum ol stampa poen blong mekemrere wan plan blong tok, fastaem raetem stampa tok long ples antap. Nao yu save raetem ol stampa poen aninit long stampa tok ya, evri stampa poen i stat long lefsaed blong pepa ya. Ol smosmol poen blong ol stampa poen ya yu save raetem i go long raetsaed lelebet, aninit long ol stampa poen we oli stret long hem. Sipos i gat ol narafala poen blong sapotem ol smosmol poen ya, yu save raetem olgeta aninit long ol smosmol poen ya be i go long raetsaed lelebet. Naoia yu lukluk kwiktaem long pepa blong yu, mo yu luksave wanem impoten poen oli givim tingting we yu wantem ol man oli kasem. Samting ya i givhan bigwan taem yu givim tok from we yu save yusum voes blong yu blong makem ol poen ya, mo talem bakegen ol tok we i karem bigfala tingting blong ol man oli no save fogetem. Yu save mekem olsem wetem ol narafala stampa poen taem yu stap tokbaot olgeta. Bigfala samting long plan olsem se ol poen oli mas sot.

⁶ Narafala rod blong mekemrere plan blong tok hem i blong raetem fultoktok. Long fasin ya blong wokem plan blong tok, ol defren tingting blong yu oli stap long ol fultoktok, be ol fultoktok ya oli sot nomo mekem se evri fultoktok i karem bigfala poen blong wan haf blong tok. Sam long ol fultoktok ya, oli save stap aninit long ol narafala fultoktok blong mekem ol stampa poen oli klia. Taem man i givim tok samtaem hem i ridim fultoktok mo biaen hem i eksplenem long prapa tok blong hem. Tufala rod ya blong wokem plan blong tok oli gud. Rod ya blong yusum fultoktok, mo evri tingting long hem, i gud moa long ol tok we oli mekemrere sam wik bifo no oli stap mekem tok ya bakegen mo bakegen, be i no evri manis, olsem ol pablik tok.

7, 8. Blong givim wan tok, ?wanem samting yu mas mekem wetem plan blong yu?

⁷ Yu save yusum wan long ol tufala rod ya blong wokem faswan plan blong tok blong yu, hemia raetem ol fultoktok no raetem ol stampa poen, mo yu save putum hamas poen yu wantem insaed long hem. Long rod ya bambae yu save talem ol gudfala poen we yu wantem se ol man oli kasem save long ol. Be biaen, taem oli givim tok, sam man oli laekem blong yusum wan plan we i sot nomo. Taem yu mekemrere tok blong yu, yu save gat tufala plan ya i stap fored long yu. Ridim plan ya we i sot nomo gogo yu rimemba olgeta poen long faswan plan blong yu. Taem yu save tingbaot ol poen ya long tingting blong yu, naoia yu naf blong givim tok blong yu.

⁸ Hemia ol rod blong wokem plan blong tok. Naoia i gud yumi lukluk moa long ol smol samting, olsem tri haf blong tok.

9-12. (a) ?From wanem i mas gat fastok long wan tok? (b) Talem wan eksampel long wan fastok.

⁹ Fastok. Fastok i blong wekemap tingting blong ol man we oli lesin. Ol fastok blong yu oli mas pulum intres blong ol man long tok blong yu mo oli save givhan long olgeta blong luksave from wanem tok ya i impoten long olgeta. Yu mas jusumgud faswan fultoktok. Hem i impoten blong i save mekem ol man oli glad blong lesin long yu mo tok ya blong yu i no save strong tumas no i olsem wan rao.

¹⁰ I gat plante rod blong mekem fastok. Maet yu save yusum pijatok, no maet yu save talem sam tok we ol man oli savegud long hem. Maet yu save tokbaot wan trabol we i mas gat rod blong stretem. Yu save talem histri blong samting we yu wantem tokbaot olsem fastok. Maet yu save askem ol kwestin. Maet yu save talem ol impoten poen blong tok blong yu fastaem.

¹¹ I impoten se fastok i laenapgud wetem tok. Taswe wan gud pijatok hem i naf, sipos man we i givim tok i save yusum bakegen taem hem i stap gohed long tok blong hem. Samting ya bambae i givhan blong mekem ol man oli intres moa long tok blong yu mo i isi blong tingbaot, mo tu hem i mekem se ol poen long tok oli joengud, i dipen sipos pijatok ya i gud.

¹² Intres blong ol man we oli stap lesin i dipen olsem wanem man i talem fastok blong hem. Voes blong man we i givim tok i no mas seksek, hem i no mas fraet, mo hem i mas savegud tok blong hem. From samting ya sam man we oli stap givim tok oli faenem se i gud blong raetem wan no tu fas fultoktok long tok blong olgeta, blong statemgud tok blong olgeta.

13-16. (a) Eksplenem olsem wanem blong wokem bodi blong tok. (b) ?Olsem wanem ‘taem’ i save jenisim bodi blong tok?

¹³ Bodi blong tok. I gat plante rod blong wokem bodi blong tok. Maet yu wantem tokbaot ol smol poen fastaem mo biaen yu save go long ol bigfala poen, mo ol poen we oli impoten moa oli kam laswan. Maet yu save talem ol poen folem taem we oli stap hapen, olsem tok we oli raetem long Ol Wok 7:2-53. Wan narafala rod i blong seraotem tok i go long ol haf we oli laenap wetem stampa tok blong hem. Eksampel, sipos stampa tok se “Wan Ransom Blong Pemaot Ded” maet yu save wok aninit long ol bigfala poen ya se “Olsem Wanem Ded i Kamaot,” “Ol Man Oli No Save Mekem Wan Ransom,” “?Hu Nomo i Save Mekem, Mo From Wanem?” mo “Ol Blesing We Oli Kamaot From Ransom.”

¹⁴ Samtaem maet yu faenem se i isi blong seraotem tok blong yu long ol defren haf, olsem Pol i mekem, fastaem hem i givim advaes long kongregesen, biaen long ol waef, afta long ol hasban mo biaen bakegen i go long ol pikinini. (Lukluk Efesas japta 5 mo 6.) No maet yu faenemaot se yu save tokbaot wan samting fastaem, mo biaen, frut we i kamaot, no fastaem yu save tokbaot wan trabol mo biaen yu talemaot rod blong stretem trabol ya. Samtaem yu save yusum tufala no moa long ol rod ya blong mekem tok blong yu i gud.

¹⁵ Wan rod we plante man oli yusum blong mekem tok, hemia: Storeyan long ol samting we oli kamaot, yu no nidim blong talem wetaem oli bin hapen. Samtaem fasin blong storeyan i mekem tok i moa gud. Samtaem yu save mekem tok blong yu i moa gud sipos yu ansa long wan kwestin we ol man oli stap askem, olsem yu soemaot risen from wanem i olsem i olsem.

¹⁶ Tingbaot taem, yu no putum plante samting tumas long plan blong tok blong yu. Gudfala tok i save lusum mining blong hem sipos i no gat inaf taem blong tokbaot. Mo tu, man i no mas talemaot evri samting we hem i save long wan taem. Maet wan man i yusum narafala rod blong tokbaot sem stampa tok ya samtaem bakegen. Givim naf taem long evri stampa poen long tok blong yu mo tekemaot sam poen blong mekem tok i stret long taem blong hem. Namba blong ol poen long tok blong yu i no impoten be gudfala tok i impoten.

17-20. ?From wanem ol lastok oli impoten, mo olsem wanem yu save mekem?

¹⁷ En blong tok. Lashaf blong eni tok yu mas tingbaot blong mekem i reregud. En blong tok hem i blong tekem evri poen long tok blong yu oli kam olsem wan nomo mo givimaot long fasin we i save pulum tingting blong ol man we oli lesin mo pusum olgeta blong mekem laef blong olgeta i laenap wetem save ya. Hem i mas sot mo hem i mas klia.

¹⁸ I gat plante rod blong mekem olsem, i dipen nomo long stampa tok we yu wok long hem. Maet yu save talem kwiktaem ol stampa poen long tok blong yu long prapa oda blong olgeta, nao i isi blong luk wanem lastok i mas joen wetem olgeta. No maet lastok blong yu i soemaot long ol man olsem wanem tok ya i givhan long man blong mekem i wok, soemaot olsem wanem tok ya i save givhan long olgeta, mo wanem samting man i mas mekem. Long sam narafala tok mo olsem ol tok we yumi mekem long ol haos wanwan taem yumi prij, i gud blong oli gat lastok we i pulum tingting blong man. Hem i save leftemap tingting blong man blong haos, blong hem i tekem buk, no hem i save agri blong stadi Baebol long haos blong hem.

¹⁹ Mo tu, lastok i save mekem we tok blong yu i kasem bigfala mak blong hem, we i givim impoten poen we i mas stap long tingting blong ol man we oli lesin. Blong mekem tok blong yu i gud, i stret tu blong joenem lastok blong yu wetem fastok blong yu. Maet yu save talem bakegen pijatok no wan tok we yu yusum blong statem fastok blong yu. Lastok samtaem i pulum man blong mekem disisin. Tok we Josua i talem bifo hem i ded i wan gudfala eksampel long saed blong ol lastok olsem.—Jos. 24:14, 15.

²⁰ I luk olsem se, wan gudfala plan blong tok i mas wekemap tingting blong ol man long fastok blong hem. Ol stampa poen oli mas stap long stret oda, mo oli mas laenap wetem stampa tok. Lastok blong hem i save pulum ol man blong oli mekem ol advaes ya blong Baebol i wok long laef blong olgeta. Ol samting ya oli mas reregud fastaem, taem yu wokem plan blong tok. Gudhan blong mekem plan blong tok i save givhan long yu blong no westem taem blong yu, mo hem i mekem se tok blong yu i gat mining mo i save mekem ol gudfala save i stap longtaem long tingting blong ol man we oli stap lesin long yu.