Yusum Wan Plan

PLANTE man oli fraet taem oli tingbaot se oli mas yusum plan nomo blong mekem tok blong olgeta. Oli harem gud moa blong raetemdaon evri wod, no blong lanem evri wod baehat.

Yu traem tingbaot. Evri dei yu toktok, be yu no raetem evri wod we yu talem. Yu storian wetem ol famle mo ol fren. Yu toktok long ol man long wok blong prij. Mo taem yu prea wetem fulhat blong yu, yu no raetemdaon, nating se yu prea yu wan no yu prea long bihaf blong wan grup.

Taem yu mekem wan tok we yu raetem evri wod blong hem, ?yu ting se tok ya bambae i gud moa long wan tok we yu mekem folem plan? I tru, sipos yu raetem evri wod, ating yu no save mestem, from we yu ridim evri wod we i stap. Mo ating bambae yu jusum gud ol wod. Be maet ol tok blong yu i no kasem hat blong olgeta we oli lesin. Taem yu ridim wan tok we i longfala, klosap oltaem spid mo tiun blong voes i jenis, i kam defren long prapa voes blong yu. Sipos yu stap lukluk pepa blong yu moa i bitim we yu lukluk ol man, ating plante man bambae oli no lesin gud. Ol man oli lesin gud taem oli harem se yu stap tingbaot olgeta, mo taem yu mekem ol save we yu tokbaot i laenap wetem laef blong olgeta. Sipos yu wantem we tok blong yu i pulum ol man blong oli tekem aksen, i moa gud yu yusum ol prapa tok blong yu i bitim we yu ridimaot ol tok long wan pepa.

Tiokratik Skul i save givhan long yu blong yu toktok gud evri dei long laef blong yu. Taem yu mitim wan fren, yu no ridim ol tok blong yu long wan pepa, blong mekem se yu yusum ol wod we oli stret. Long wok blong prij tu, yu no karem wan pepa mo ridimaot evri wod, from we yu fraet se bambae yu fogetem sam save we yu wantem serem wetem ol man. Taswe, long ol tok blong yu long Tiokratik Skul we yu mekem olsem se yu prij long ol defren kaen man, yu mas lanem blong toktok long prapa fasin blong yu. Sipos yu rere gud, bambae yu luk se wan plan long tingting blong yu no long pepa, hem i naf blong mekem yu yu tingbaot bakegen ol bigfala tingting we yu wantem tokbaot. ?Be yu mas mekem wanem blong yu no fraet blong yusum wan plan?

Ol Tingting Blong Yu Oli No Olbaot. Blong yusum wan plan, ol tingting blong yu oli no mas olbaot, be wan i mas folem gud narawan. Hemia i no min se yu jusum evri wod we bambae yu yusum, be i min se yu tingting fastaem, nao biaen yu toktok.

I gat sam man we, long toktok blong olgeta evri dei, oli no tingting bifo we oli toktok. Oli hareap blong talem samting, be biaen oli harem nogud long samting we oli talem. Sam narafala oli stat blong tokbaot wan samting, nao oli go long narafala samting, mo oli gohed olsem gogo oli joenem plante defren tingting. Yu save winim tufala fasin ya sipos yu tingting fastaem mo yu mekem wan smol plan long tingting blong yu, nao biaen yu toktok. Fastaem, i gud yu tingbaot bigfala samting we yu wantem tijim ol man long hem. Nao yu tingbaot ol samting we yu mas mekem blong yu givim tijing ya long olgeta. Ale naoia yu stat blong toktok.

?Olsem wanem? ?Yu yu stap mekemrere blong go long wok blong prij? Sipos yes, i no ol samting long basket blong yu nomo we oli mas stap long stret ples blong olgeta, be ol samting long tingting blong yu tu. Sipos yu ting se bambae yu yusum wan fastok long Kingdom Wok Blong Yumi, i gud yu ridim fastok ya bakegen mo bakegen blong kasem gud bigfala tingting long hem. Nao yu save talem bigfala tingting ya long wan no tu sot toktok nomo. Yu save jenisim sam wod blong mekem olgeta oli stret wetem prapa fasin blong yu mo ples blong yu. Bambae yu luk se i gud blong gat wan plan long tingting blong yu. ?Wanem i save stap long plan ya? (1) Blong stat, yu talem wan samting we ol man long ples blong yu oli wari long hem. Nao yu askem tingting blong man blong haos. (2) I gud yu rerem sam save long poen ya, wetem wan no tu vas we oli tokbaot promes blong God blong stretem trabol ya. Sipos yu gat janis, yu tokbaot se Jehova bambae i yusum Kingdom blong hem, no gavman blong hem long heven, blong mekem samting ya. (3) Yu pulum man ya blong i tekem aksen folem ol save we yutufala i tokbaot. Maet yu soem wan buk long hem no yu askem sipos hem i wantem stadi Baebol. Nao yu putum wan stret taem blong yu kambak.

Taem yu storian long wok blong prij, ating yu nidim wan plan long tingting blong yu nomo. Sipos yu wantem raetem wan smol plan blong lukluk long hem bifo we yu go long fas haos, i gud yu raetem sam wod nomo blong statem storian blong yu, wetem wan no tu vas, mo smol tok blong finisim storian, hemia nomo. Sipos yu rerem wan plan olsem mo yu folem, bambae yu no stat long wan poen nao yu go long narafala poen gogo yu joenem plante tingting. Bambae yu givim wan klia tingting long ol man, we i isi blong oli tingting bak long hem.

Sipos ol man we yufala i stap prij long olgeta oli askem sem kwestin oltaem, no oli talem sem toktok oltaem blong traem blokem yufala, i gud yu lukaot save long saed ya. Blong ansa long olgeta, yu nidim tu no tri stamba poen nomo, wetem sam vas we oli sapotem ol poen ya. “Bible Topics for Discussion” we i stap long Baebol ya New World Translation, mo ol smol stamba tok long buk ya Reasoning From the Scriptures mo Statem Wan Storian Long Baebol Mo Gohed Long Hem, oli save givhan long yu blong yu wokem wan plan we i stret. Maet yu faenem sam tok we i kamaot long wan buk, no tok blong wan man we i stret long storian blong yu, ale yu save joenem i go. Yu save wokem wan smol plan, mo yu raetem tok we i kamaot long buk ya long wan narafala pepa, nao yu putum tufala pepa ya oli stap wetem olting we yu yusum long wok blong prij. Nao taem wan man i askem kwestin ya no i talem tok ya blong blokem yu, yu talem long hem se yu glad blong eksplenem bilif blong yu. (1 Pita 3:15) Ale yu ansa long hem folem plan ya we yu wokem finis.

Taem yu prea wetem famle blong yu, no long miting blong prij, no long kongregesen, long taem ya tu i impoten we ol tingting blong yu oli no olbaot be wan i mas folem gud narawan. Long Luk 11:2-4, Jisas i talem wan isi plan blong folem blong mekem ol gudfala prea. Taem oli openem haos blong God long Jerusalem, Solomon i mekem wan longfala prea. Be i klia se hem i tingting fastaem long samting we hem i talem. Long prea ya, hem i tokbaot Jehova fastaem mo promes we Hem i mekem wetem Deved. Biaen, hem i tokbaot haos prea. Afta, hem i tokbaot ol defren kaen man mo sam samting we i hapen long laef blong olgeta. (1 King 8:22-53) Ol eksampol olsem oli save givhan long yumi.

Yu Mekem Wan Plan We i Isi Blong Folem. Sipos yu stap mekem plan blong wan pablik tok, ?bambae yu mas putum hamas save long plan ya?

I gud yu tingbaot se, wan plan i blong givhan long yu blong yu rimemba ol tingting long tok blong yu. I gud yu raetemdaon fastok blong yu. Be afta, yu mas tingbaot ol tingting long tok blong yu, i no ol wod. Sipos yu raetemdaon ol tingting ya, yu mas raetem ol sot toktok nomo. Ol stamba poen we yu wantem tokbaot oli mas klia long plan blong yu. I gud yu raetem olgeta long ol bigfala raeting. Sipos no, yu putum wan laen aninit long olgeta no yu makem olgeta long kala. Aninit long ol stamba poen ya wanwan, yu raetem ol tingting we oli joen wetem poen ya. Long plan ya, yu raetem ol vas we yu wantem ridim. I moa gud yu ridim ol vas ya stret long Baebol. Yu raetem ol pijatok we yu wantem yusum. Maet yu faenem sam impoten tok we i kamaot long wan buk no sam tok we wan man i talem, we i stret long tok blong yu. Save we i stap long plan blong yu i mas naf blong givhan long yu blong yu tokbaot sam spesel poen. Plan ya bambae i isi moa blong folem sipos raeting i klia, i no fasfas.

Samfala oli yusum plan we i no gat plante save long hem. Maet oli raetem sam stamba wod nomo, mo sam vas we bambae oli talem baehat, mo maet oli droem sam pija blong mekem se oli tingbaot bakegen ol impoten poen. Wan isi plan olsem i save givhan long brata blong i talemaot ol poen we wan i folem gud narawan, mo i talemaot long fasin we i olsem storian nomo. Ol advaes long haf ya i blong givhan long yu blong yu mekem olsem.

Pej 39 kasem pej 42 blong buk ya i tokbaot “Raetem Plan Blong Tok.” I gud yu ridim ol save ya taem yu stap wok long poen ya “Yusum Wan Plan.”

?Wanem Stret Rod Blong Yusum Wan Plan? Bigfala tingting blong yu i no blong rerem wan plan blong tok nomo. Yu yu wantem yusum plan ya blong mekem wan gudfala tok.

Fastaem yu mas rerem gud tok blong yu. Yu lukluk nem blong tok ya, yu ridim ol bigfala poen, mo yu tingbaot olsem wanem ol bigfala poen wanwan oli joen wetem nem blong tok. Yu save raetem hamas minit we bambae yu toktok long evri bigfala poen. Nao yu gobak long fas bigfala poen, mo yu stadi long hem. Yu tingting bakegen long ol save we i pruvum poen ya, ol vas, ol pijatok, mo ol eksampol we bambae yu yusum. Yu tingting bakegen mo bakegen long ol save ya gogo poen ya i klia gud long tingting blong yu. Nao yu mekem sem samting long ol narafala bigfala poen. Yu save tingbaot wanem samting we bambae yu katemaot sipos yu luk se taem i sot. Nao yu lukluk bakegen long olgeta haf blong tok blong yu. Yu mas tingbaot moa ol tingting insaed long tok ya, i no ol wod. Yu no mas lanem olgeta haf blong tok blong yu baehat.

Taem yu givim tok ya, i gud yu lukluk plante taem long ol man we oli stap lesin. Taem yu ridim wan vas finis, yu no nid blong lukluk plan blong tok blong yu. Bambae yu naf blong yusum ol tok blong Baebol nomo blong eksplenem vas ya mo blong pulum ol man blong oli tingting gud long vas ya. Long sem fasin, taem yu yusum wan pijatok, yu no mas ridim long pepa blong yu. Be yu save tokbaot pijatok ya olsem we yu stap storian long ol fren blong yu nomo. Mo taem yu stap toktok, yu no mas lukluk pepa blong yu evritaem we yu finisim wan ful toktok. Tok blong yu i mas kamaot long hat blong yu. Olsem nao, bambae tok ya i kasem hat blong olgeta we oli stap lesin.

Taem yu lanem finis blong yusum wan plan, yu yu tekem wan impoten step blong kam wan man blong toktok gud long fored blong ol narafala.