Lastok i Pulum Man Blong Mekem Samting

MAET yu lukaot ol save finis, mo yu putum ol save ya long stret ples long tok blong yu. Mo tu, maet yu rerem finis wan fastok we i wekemap tingting blong man. Be i gat wan samting yet, hemia lastok we i pulum man blong mekem samting. Yu no mas ting se lastok i no impoten. Ol tok we yu talem laswan, hemia ol tok we ol man oli holem i stap longtaem long tingting blong olgeta. Sipos lastok i no gat paoa, ol tok we yu talem fastaem bambae i no givhan gud long man.

Yu traem tingbaot: Klosap long en blong laef blong Josua, hem i givim wan gudfala tok long ol olfala long neson blong Isrel. Hem i tokbaot ol samting we Jehova i mekem long ol man Isrel, stat long taem blong Ebraham. ?Olsem wanem? ?Josua i talem nomo ol samting ya? Nogat. Hem i traehad wetem fulhat blong hem blong pulum ol man blong oli mekem wan samting. Hem i talem se: “Yufala i mas ona long Hae God long olgeta laef blong yufala, mo yufala i mas stap tru long hem, mo tingting blong yufala i mas stap strong long hem oltaem.” Yu save ridim lastok blong Josua long Baebol, long Josua 24:14, 15.

Aposol Pita tu i givim wan gudfala tok long wan bigfala hip blong man we oli mekem lafet blong Pentekos long Jerusalem, long yia 33 K.T. Yu save ridim tok blong hem long Ol Wok 2:14-36. Fastaem, Pita i talem long olgeta se oli stap luk wan profet tok i kamtru. Hemia profet tok blong Joel, se God bambae i kafsaedem tabu spirit blong hem long ol man. Biaen, hem i tokbaot profet tok ya, se i joen olsem wanem wetem profet tok blong Ol Sam, we i talemaot Mesaea. Profet tok ya blong Ol Sam i talemaot se Jisas Kraes bambae i laef bakegen, mo bambae i go sidaon long raet saed blong God long heven. Long lastok blong Pita, hem i talem bigfala poen we ol man oli mas luksave, se: “Yumi ol laen blong Isrel evriwan, yumi mas savegud se Jisas ya we yufala i nilim hem long [“pos,” NW] hem nao God i mekem hem i Masta blong yumi, mo i Mesaea tu.” Ol man oli askem se: “Ol brata. ?Bambae mifala i mekem olsem wanem?” Pita i ansa se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes.” (Wok 2:37, 38) Long dei ya, tok blong Pita i tajem hat blong samwe long 3,000 man, nao oli bilif long trutok blong Jisas Kraes we hem i talemaot.

Sam Samting Blong Tingbaot. Lastok i mas laenap gud wetem stamba tok. Lastok i mas joen gud wetem ol bigfala poen we yu tokbaot finis. Long lastok, maet yu wantem yusum sam wod we oli kamaot long stamba tok no nem blong tok. Sipos yu wantem talem bakegen stamba tok ya stret, i stap long yu nomo, be i no nid blong mekem olsem.

Taem yu givim wan tok, bigfala tingting blong yu i blong pulum ol man blong oli folem ol save long tok ya. Wan bigfala wok blong lastok, i blong soemaot long ol man wanem we oli mas mekem. Taem yu jusum stamba tok mo ol bigfala poen long tok blong yu, ?yu tingting gud from wanem save ya i stret long ol man we bambae yu toktok long olgeta? ?Yu yu tingbaot wok we tok blong yu i mas mekem? Sipos yes, ale yu save finis wanem samting we yu wantem se ol man oli mekem. Naoia, yu eksplenem wanem samting we oli mas mekem, mo olsem wanem blong mekem.

Yes, lastok blong yu i mas talem long ol man wanem we oli mas mekem. Antap long hemia, lastok i mas pulum olgeta blong oli wantem mekem samting ya. Yu talem from wanem oli mas mekem, mo yu talem sam gudfala frut we i save kamaot. Sipos yu tingting gud long lastok we bambae yu talem mo yu jusum gud ol wod, bambae tok blong yu i gat moa paoa.

Yu mas tingbaot se naoia bambae yu finisim tok blong yu. Lastok blong yu i mas mekem man i luksave samting ya. Mo tu, yu mas toktok long spid we i stret nomo. Yu no mas tok spid go kasem en blong tok, nao yu stop wantaem. Be yu no mas mekem voes blong yu i godaon sloslo tu. Voes blong yu i mas naf yet blong ol man oli save harem, be i no mas bigwan tumas. Ol tok we yu talem laswan, oli mas mekem man i luksave se hemia en blong tok blong yu. Yu talemaot wetem fulhat blong yu, mo yu soemaot se yu bilif strong long samting we yu talem. Taem yu lanem tok blong yu, yu no mas fogetem blong lanem lastok tu.

?Lastok i mas longfala olsem wanem? Yumi no save talem se hem i mas hamas minit stret. Be ol man oli no mas harem se lastok i longfala tumas. Fes blong ol man we oli lesin long yu bambae i soemaot sipos lastok i longfala tumas. Ol man oli glad long lastok we i isi blong kasem save long hem, i go stret long poen, mo i givim gudfala tingting long olgeta. Sipos yu yusum wan smol pijatok long lastok blong yu, bambae i mekem lastok i longfala moa. Nating se i olsem, samting ya i save wok gud sipos yu tingrere long pijatok ya fastaem. Yu traem skelem samting ya: Buk blong Prija i wan bigfala buk lelebet, be lastok blong hem long Prija 12:13, 14, i sot nomo. Bigfala Toktok blong Jisas antap long hil i sot moa long buk blong Prija, be lastok blong hem long Matiu 7:24-27 i longfala lelebet.

Long Wok Blong Prij. Taem yu prij, oltaem yu mas rere blong talem gudfala lastok. Sipos yu lavem ol man, mo yu wantem halpem olgeta, mo sipos yu rere gud fastaem, lastok blong yu i save givhan gud long ol man. Ol advaes ya we yu jes ridim i save wok gud, nating se yu toktok long plante man no long wan man nomo.

Maet yu storian smoltaem nomo wetem wan man. Ating hem i bisi. Yutufala i storian blong wan minit nomo. Maet yu talem samting olsem: “Mi luksave se yu yu bisi. Mi glad blong serem wan tingting nomo we i save mekem yu yu harem gud. Baebol i talem se God i gat wan stamba tingting we i gud tumas, hemia blong mekem wol ya i kam wan ples we ol man oli save laef long hem blong olwe. Yumi save laef long Paradaes ya tu, be yumi mas save samting we God i wantem.” Narafala rod, yu talem long man ya se bambae yu kambak bakegen long wan taem we i stret long hem.

Long wan narafala haos, maet yu no storian longtaem, from we man ya i no wantem gohed blong storian, no maet hem i tok nogud long yu stret. Nating se i olsem, i save gat gudfala frut i kamaot yet. Yu mas folem advaes blong Matiu 10:12, 13 mo Rom 12:17, 18. Sipos yu ansa long kwaet fasin, maet hem i jenisim tingting we hem i gat long ol Witnes blong Jehova. !Hemia wan gudfala frut ya!

Maet yu storian gud wetem wan man long haos blong hem. Sipos i olsem, bifo we yu aot, i gud yu talem bakegen bigfala poen we yu wantem se hem i tingbaot. Yu traem pulum hem tu blong mekem wan samting.

Sipos yu luksave se i gud blong storian bakegen wetem wan man, yu mas talem sam tok we bambae i pulum hem blong wantem storian nekis taem. Yu save stanemap wan kwestin, maet wan kwestin we i kamaot long buk ya Reasoning From the Scriptures, smol buk ya Statem Wan Storian Long Baebol Mo Gohed Long Hem, no wan narafala buk we yumi yusum blong mekem Baebol stadi long ol man. Yu no mas fogetem se bigfala tingting blong yu i blong mekem samting we Jisas i talem long Matiu 28:19, 20.

Maet yu stap mekem Baebol stadi long wan man. ?Long en blong stadi, yu save mekem wanem? Sipos yu talem bakegen stamba tok blong stadi ya, hemia bambae i givhan long hem blong i tingbaot ol save we yutufala i bin tokbaot. Yu save yusum ol kwestin blong tingtingbak, blong mekem se hem i no fogetem ol bigfala poen. Hemia i wok gud sipos yu no hareap tumas long ol kwestin ya. Maet yu askem long hem blong i talem olsem wanem ol save long stadi i givhan long hem. Maet yu askem long hem blong i talem sam rod blong serem save ya wetem ol narafala man. Samting ya i save mekem hem i luksave se hem i mas yusum ol save we hem i lanem.—Prov. 4:7.

Yu mas tingbaot se, lastok i save mekem se tok blong yu i givhan bigwan long ol man.