Japta 34

Wan Bigfala Tok Haed i Kam Klia

1. (a) ?Taem Jon i luk rabis woman blong rod i sidaon long wael anamol we i nogud, hem i tingting wanem? ?From wanem? (b) ?Grup we i olsem Jon tede, oli mekem wanem taem oli luk we ol profet tok blong vison ya i stap kamtru naoia?

?TAEM Jon i luk woman blong rod ya i sidaon long anamol we i nogud, hem i tingting wanem? Hem wan i ansa se: “Nao taem mi luk woman ya, mi sapraes tumas.” (Revelesen 17:6b) Samting we hem i luk i bitim ol samting we man nomo i save tingbaot. !Long fored blong hem, long drae ples, wan rabis woman blong rod i stap sidaon long wan wael anamol we i red we i red, i nogud olgeta! (Revelesen 17:3) Grup olsem Jon tede, olgeta tu oli sapraes tumas long ol samting we oli stap kamtru naoia stret long profet tok long vison ya. Sipos ol man blong wol oli save luksave mining blong hem, bambae oli talem se, ‘!Mifala i no save bilivim!’ Mo sipos ol rula blong wol oli save luksave mining blong hem, bambae oli talem se, ‘!I bitim tingting blong mifala!’ Be long laswan handred yia, vison ya i no moa wan vison nomo, hem i rili tru. Ol man blong God oli mekem plante samting finis blong joen long vison ya, mo samting ya i mekem tingting blong olgeta i strong moa se ol narafala haf blong hem bambae oli kamtru fulwan.

2. (a) ?Enjel i luk we Jon i sapraes tumas, nao hem i talem wanem long hem? (b) ?Jeova i mekem grup ya we i olsem Jon oli luksave wanem? ?Olsem wanem hem i mekem olsem?

² Enjel i luk we Jon i sapraes tumas. Jon i gohed i se: “Nao enjel ya i talem long mi, i se ‘?Yu yu sapraes tumas olsem from wanem? Bambae mi mi talemaot long yu ol tok haed blong woman ya, mo blong anamol ya we hem i stap sidaon long hem, we i gat seven hed blong hem mo ten hon blong hem.’ ” (Revelesen 17:7) !Yes, enjel ya bambae i soemaot mining blong tok haed ya! Ae blong Jon i opengud, nao enjel i eksplenem long hem ol haf blong vison ya mo ol bigfala samting we kolosap nao bambae oli kamtru. Sem mak long grup olsem Jon tede, oli stap luklukgud, oli wok aninit long han blong ol enjel, mo oli luksave mining blong profet tok ya. ‘Paoa blong talemaot mining blong drim, hem i stap long God nomo.’ Olsem gudfala man blong bilif bifo Josef, mifala i bilif tu se tok ya i tru. (Jenesis 40:8; ridim Daniel 2:29, 30.) I olsem we ol man blong God oli stap long medel blong ol samting ya we oli stap kamtru. Jeova i stap mekem olgeta oli luksave mining blong vison mo olsem wanem hem i gat paoa long laef blong olgeta. (Ol Sam 25:14) Long stret taem, hem i soemaot long olgeta mining blong tok haed long saed blong woman mo wael anamol.—Ol Sam 32:8.

3, 4. (a) ?Long 1942, presiden blong Sosaeti i givim wanem pablik tok? ?Hem i talemaot se wael anamol we i red we i red i minim hu? (b) ?Presiden Knorr i eksplenem wanem tok we enjel i talem long Jon?

³ Long Septemba 18 kasem 20, 1942, taem Namba Tu Bigfala Faet Blong Wol i stap gohed strong, ol Wetnes blong Jeova long Amerika oli mekem Nyu Wol Tiokratik Asembli. Oli mekem long taon ya, Klivlan, Ohaeo, be ol tok blong hem oli pas long telefon, oli go long bitim 50 narafala taon. 129,699 man oli harem ol tok ya. Taem ya i had from faet i stap gohed. Be nating, long sam narafala ples long wol we oli save mekem, oli joen long asembli mo oli talem bakegen ol tok ya. Long taem ya, plante long ol man blong Jeova oli ting se bigfala faet ya bambae i kam bigwan gogo hem i finis long faet blong God, Amageden. Taswe nem blong pablik tok i olsem: “Pis—?Hem i Save Stap Longtaem?” Plante man oli intres blong harem tok ya. Plante man oli ting se, ?Olsem wanem nyufala presiden blong Watch Tower Sosaeti, N. H. Knorr, i save tokbaot pis, taem ol nesen oli stap faet mo i luk olsem se bambae oli gohed nomo?a Risen from wanem hem i save mekem olsem se grup we i olsem Jon oli “strong moa blong holem ol trutok ya” long ol profet tok blong Baebol.—Hibrus 2:1; 2 Pita 1:19.

⁴ ?Tok ya “Pis—?Hem i Save Stap Longtaem?” hem i talemaot mining blong profet tok ya? Presiden Knorr hem i talemaot klia se wael anamol we i red we i red long Revelesen 17:3, hemia Ligofnesen. Mo hem i stap tokbaot trabol we ogenaesesen ya bambae i kasem long fyuja. Tok blong hem i stanap long tok we enjel i talem long Jon se: “Anamol ya we yu luk, fastaem hem i laef, be hem i no moa laef naoia. Bambae i no longtaem, hem i kamaot long bigfala hol ya we i godaon we i godaon olgeta, nao i go blong lus olgeta.—Revelesen 17:8a.

⁵ “Anamol ya . . . fastaem hem i laef.” Yes, long Janewari 10, 1920, hem i laef, taem Ligofnesen i stanap. 63 nesen oli joen long Ligofnesen. Be afta, Japan, Jemani, mo Itali oli aot long hem, mo Rasia tu i aot long Ligofnesen. Long Septemba 1939, strong rula blong Nasi gavman blong Jemani i statem Namba Tu Bigfala Faet Blong Wol.b Ligofnesen i no mekem pis i kamaot long wol. Taswe long taem ya i olsem hem i go long wan hol we i godaon we i godaon. Hem i no moa gat paoa. Long 1942, hem i ded olgeta. !I no bifo long taem ya mo i no afta long taem ya, be stret long impoten taem ya, Jeova i talemaot ful mining blong vison ya long ol man blong hem! Long Nyu Wol Tiokratik Asembli, Presiden Knorr i talemaot, stret long profet tok ya, se “anamol ya . . . hem i no moa laef naoia.” Biaen hem i askem wan kwestin se: “?Bambae Ligofnesen i stap blong olwe long bigfala hol ya?” Hem i talemaot Revelesen 17:8 blong ansa long kwestin ya, nao hem i se: “Ogenaesesen ya bambae i kamaot long hol ya.” !Mo tok blong hem i kamaot tru—profet tok blong Jeova i tru!

Hem i Kamaot Long Bigfala Hol

6. (a) ?Wetaem wael anamol we i red we i red i kamaot long bigfala hol wetaem? ?Hem i tekem wanem nyufala nem? (b) ?Olsem wanem Yunaeted Nesen hem i rili olsem wael anamol we i red we i red, taem hem i kamaot long bigfala hol?

⁶ Yes, i tru wael anamol ya we i red we i red hem i kamaot long bigfala hol ya. Long Jun 26, 1945, i gat bigfala selebresen long San Fransisko, Amerika, from we 50 nesen oli vot blong akseptem kontrak blong ogenaesesen ya, Yunaeted Nesen. Ogenaesesen ya i mas “holem pis mo seftaem long olgeta kantri long wol.” Plante samting long saed blong Yunaeted Nesen mo Ligofnesen oli sem mak. The World Book Encyclopedia i talem se: “Long plante fasin, Yunaeted Nesen i sem mak long Ligofnesen, we i stanap afta long Faswan Bigfala Faet Blong Wol . . . Plante nesen we oli givhan blong stanemap Yunaeted Nesen, oli bin givhan blong stanemap Ligofnesen bifo. Olsem Ligofnesen, oli stanemap Yunaeted Nesen blong holem pis long olgeta nesen. Yunaeted Nesen i stap folem fasin blong Ligofnesen tu.” Taswe Yunaeted Nesen hem i rili olsem wael anamol we i red we i red, we i kamaot long bigfala hol. Hem i gat bitim 190 nesen i joen long hem, hem i moa long Ligofnesen we i gat 63 nomo. Mo hem i mekem wok we i bigwan moa long Ligofnesen.

7. (a) ?Olsem wanem ol man long wol oli sapraes long wael anamol ya we i red we i red we i kamaot long bigfala hol? (b) ?Yunaeted Nesen i no save mekem wanem? ?Sekretari-jenerol blong hem i talem wanem long saed ya?

⁷ Taem Yunaeted Nesen i jes stanap, ol man oli ting se bambae hem i mekem sam bigfala samting long wol. Hemia i stret long tok blong enjel se: “Yu save, i gat wan buk i stap we i gat nem blong ol man we oli gat laef i stap long hem, we ol nem ya oli stap long hem bifo olgeta, taem wol i no stap yet. Be ol man blong wol we nem blong olgeta oli no go long buk ya fastaem, bambae oli sapraes tumas taem oli luk anamol ya, from we fastaem hem i laef, mo naoia i no moa laef, be bambae i save kamtru bakegen.” (Revelesen 17:8b) Ol man blong olgeta ples long wol oli laekem nyufala bigfala aedol ya, we hedkwota blong hem i stap long Is Reva long Nyu Yok. Be wan samting, Yunaeted Nesen i no mekem trufala pis mo seftaem i kamaot long wol. Long taem blong yumi we ol man oli stap bildimap ol rabis nyuklia bom, ol nesen oli save holem pis long wol from wan samting nomo: ol nesen oli save se sipos oli yusum ol tul blong faet blong olgeta, bambae olgeta man long wol oli save ded (MAD—“mutual assured destruction”). Mo oli stap hivimap moa tul blong faet, i bitim mak. Yunaeted Nesen i traehad long ol 40 yia we oli pas, be long 1985, sekretari-jenerol blong hem, Javier Pérez de Cuellar, i harem nogud, i se: “Yumi stap long taem blong ol krangke man, mo mifala i no save olsem wanem blong winim.”

8, 9. (a) ?From wanem Yunaeted Nesen i no save winim ol trabol long wol? ?I no longtaem wanem bambae i hapen, stret long tok blong God? (b) ?From wanem ol man we oli stanemap Yunaeted Nesen mo ol man we oli laekem hem, nem blong olgeta i no save stap long “buk blong laef” blong God? (c) ?Kingdom blong Jeova bambae i mekem wanem i kamaot long wol?

⁸ Yunaeted Nesen i no save winim ol trabol long wol. ?From wanem? From we Bigfala Man we i givim laef long ol man, hem i no givim laef long Yunaeted Nesen. Laef blong hem bambae i sot, from we God i talem finis se “nao i go blong lus olgeta.” Ol man we oli stanemap Yunaeted Nesen mo oli laekem hem, nem blong olgeta i no stap long buk blong laef blong God. Oli sinman, we oli save ded, mo oli stap laf long nem blong God, taswe oli no save yusum Yunaeted Nesen blong mekem samting we Jeova God i talem finis se bambae hem i mekem. Bambae hem i no mekem from ol man, no gat, bambae hem i yusum Kingdom blong Kraes blong hem nomo.—Daniel 7:27; Revelesen 11:15.

⁹ Yunaeted Nesen hem i rili olsem wan gyaman Kingdom blong Mesaea blong God. Trufala Kingdom blong God, Prins blong Pis, Jisas Kraes bambae i rul long hem. Rul blong prins ya bambae i no finis samtaem. (Aesea 9:6, 7) Nating sipos Yunaeted Nesen i save fiksimap sam trabol mo mekem pis blong smoltaem, be ol faet bambae oli kamaot bakegen. Hemia fasin blong ol sinman. Nem blong olgeta i no ‘stap long buk blong laef, we ol nem ya oli stap long hem bifo olgeta, taem wol i no stap yet.’ Kingdom blong Jeova from Kraes bambae i mekem pis i kamaot long wol blong olwe. Be i no hemia nomo. From blad blong Jisas, bambae hem i givim laef bakegen long ol dedman tu, olgeta we oli stret man mo olgeta we oli no stret, we God i tingbaot olgeta bakegen. (Jon 5:28, 29; Ol Wok 24:15) Hemia i minim ol man we oli bin stanap strong nating we Setan mo laen blong hem oli agensem olgeta, mo ol narafala tu we oli mas soemaot yet se oli wantem obei long God. I klia se buk blong laef blong God i no save gat ol nem blong ol man we oli stap sapotem Bigfala Babilon long hem, mo nem blong ol man we oli stap mekem wosip long wael anamol.—Eksodas 32:33; Ol Sam 86:8-10; Jon 17:3; Revelesen 16:2; 17:5.

Pis Mo Seftaem—Wan Gyaman Hop

10, 11. (a) ?Long 1986, Yunaeted Nesen i talemaot wanem? ?Ol man oli mekem wanem biaen? (b) ?Hamas “famle blong ol skul” oli mekem miting long Asisi, Itali, blong prea from pis? ?God i stap ansa long ol prea olsemia? Plis eksplenem.

¹⁰ Blong traem givim hop long ol man, Yunaeted Nesen i talemaot se 1986 hem i “Intenasnal Yia Blong Pis.” Stampa tok blong yia ya se: “Holemtaet Pis Mo Givim Gudfala Fyuja Long Ol Man.” Oli singaot ol nesen we oli stap faet blong lego ol tul blong faet, sipos i no blong oltaem, be blong wan yia nomo. ?Ol nesen ya oli mekem wanem? Ripot blong Intenasnal Pis Institut, i talem se long 1986 nomo, bitim faef milyan soldia oli ded long ol faet. Oli mekem sam spesel selva mane mo sam stam blong tingbaot yia ya. Be bighaf blong ol nesen long wol oli no lukaot pis long yia ya. Ol skul oli wantem se Yunaeted Nesen i tinghae long ol, taswe oli talemaot yia ya long plante defren rod. Long Janewari 1, 1986, Pop Jon Pol 2 i presem Yunaeted Nesen from wok blong hem, mo hem i dediketem nyufala yia ya long pis. Long Oktoba 27, hem i pulum plante lida blong ol skul oli kam long Asisi, Itali, nao oli mekem miting blong prea from pis.

¹¹ ?God i stap ansa long ol prea olsem long saed blong pis? Traem tingbaot, ?ol lida blong ol skul ya oli stap prea long wanem God? Sipos yu askem kwestin ya long olgeta, ol grup wanwan oli givim defren ansa. ?Olsem wanem, i gat plante milyan god we oli save harem mo ansa long ol prea we ol man oli mekem long ol defren fasin? Plante blong ol man long miting ya oli mekem wosip long ‘Triniti’ god blong Krisendom.c Ol man Buda, wetem ol man Hindu, mo sam narafala oli stap prea long fulap defren kaen god. I gat 12 defren “famle blong ol skul” we oli joen long miting ya. Sam lida blong olgeta: Ajbisop blong Kanterberi we hem i lida blong Anglikan skul, Dalai Lama we hem i lida blong skul Buda, wan man we hem i lida blong Rasian Otodoks skul, presiden blong Asosiesen blong Sinto Sraen long Tokyo, sam lida blong sam skul long Afrika we oli bilif se ol speret oli stap kontrolem laef blong man, mo tufala Amerikan Indian we oli werem kastom klos. Grup ya i gat fulap kala long hem, i mekem wan naesfala pija long televisin. Wan grup i prea gogo 12 haoa i pas, i no spel. (Ridim Luk 20:45-47.) ?Be olsem wanem, olgeta prea ya oli go antap long ol klaod we oli stap long skae long dei ya? No gat. ?From wanem? From ol risen ya:

12. ?From wanem God i no ansa long ol prea blong ol lida blong ol skul blong wol blong givim pis?

¹² Ol man ya oli defren olgeta long ol man we oli ‘wokbaot long nem blong Jeova.’ Ol man long ol skul ya oli no stap prea long Jeova, God ya we i laef, we nem blong hem i stap samwe long 7,000 taem long olfala hanraet blong Baebol. (Maeka 4:5; Aesea 42:8, 12)d Long miting blong olgeta, ol man ya oli no prea long God tru long nem blong Jisas. Bighaf blong olgeta oli no bilif long Jisas Kraes. (Jon 14:13; 15:16) I no gat wan long olgeta we oli stap mekem ol samting we God i wantem blong yumi mekem long taem ya, hemia blong talemaot long olgeta ples blong wol Kingdom blong God we i stap kam. Wil blong God i no blong talemaot se Yunaeted Nesen hem i hop blong ol man long fyuja. (Matyu 7:21-23; 24:14; Mak 13:10) Bighaf blong ol skul ya oli joen long ol faet long taem bifo, we fulap blad i ron, mo long tu bigfala faet blong wol long laswan handred yia nomo. God i talem long ol man olsem se: “Nating se yufala i stap mekem plante prea, be mi mi no save lesin. Blad i fulap long han blong yufala.”—Aesea 1:15; 59:1-3.

13. (a) ?Taem ol lida blong ol skul long wol oli joen wetem Yunaeted Nesen blong traem kasem pis, hemia i gat wanem bigfala mining? (b) ?Bambae oli gohed blong talemaot pis gogo wanem profet tok i kamtru?

¹³ Mo tu, fasin blong ol lida blong ol skul blong joen wetem Yunaeted Nesen blong traem mekem pis, hem i gat wan impoten mining. Ol lida ya oli wantem pulum Yunaeted Nesen mo yusum hem blong winim samting blong olgeta nomo. Samting ya i tru moa long taem blong yumi, from we naoia fulap man oli stap livim skul blong olgeta. Olsem ol lida long Isrel bifo we oli no stap obei long God, oli stap singaot se: “ ‘!I gat pis! !I gat pis!’ be i no gat pis nating.” (Jeremaea 6:14) Bambae oli gohed blong talemaot pis, krae blong olgeta bambae i kam antap gogo profet tok ya blong aposol Pol i kamtru: “Dei blong Jeova i kam stret olsem man blong stil i kam long naet. Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini. Mo olgeta bambae oli no save ronwe nating.”—1 Tesalonaeka 5:2, 3, NW.

14. ?Olsem wanem tok ya “!Pis mo seftaem!” bambae i kamaot? ?Yumi mas mekem wanem blong tok ya i no trikim yumi?

¹⁴ ?Bambae oli talemaot “!Pis mo seftaem!” olsem wanem? Profet tok ya i talem se bambae tok ya i kasem bigfala mak blong hem jes bifo we God bambae i spolem olgeta we oli stap talemaot tok ya. Taswe, bambae oli talemaot tok ya i bigfala moa i bitim ol tok we ol lida blong wol oli talemaot finis long saed blong pis. I klia se bambae oli talemaot tok ya long olgeta ples long wol. Be pis ya we bambae oli stap talem, hem i wan gyaman pis nomo. Nating we bambae oli stap talem ol gudfala tok ya, be evri samting long wol bambae i stap sem mak nomo, i no jenis. Bambae ol man oli tingbaot olgeta nomo, oli no laekem narafala man, fasin blong kilim man, ol famle bambae oli stap seraot, rabis fasin long saed blong seks, ol sik, soasore, mo ded, olgeta fasin ya bambae oli stap yet. Taswe tok ya we bambae oli talemaot i save trikim olgeta we tingting blong olgeta i no stap wekap long ol profet tok blong Baebol. Be i no nid blong trikim yu, sipos yu stap wekapgud long mining blong ol samting we i stap kamaot long wol, mo yu harem ol woning blong ol profet tok blong Baebol.—Mak 13:32-37; Luk 21:34-36.

[Ol Futnot]

5. (a) ?Olsem wanem “anamol ya . . . fastaem hem i laef”? ?Mo olsem wanem “hem i no moa laef naoia”? (b) ?Olsem wanem Presiden Knorr i ansa long kwestin ya: “?Bambae Ligofnesen i stap long hol ya blong olwe?”

[Bokis blong pija long pej 250]

Oli Tokbaot “Pis,” Be Oli Mekem Narafala Samting

Yunaeted Nesen i makemaot 1986 se hem i Intenasnal Yia Blong Pis. Be ol nesen oli gohed blong hivimap ol rabis tul blong faet. World Military and Social Expenditures 1986 i talemaot sam poen long yumi:

Long 1986 olgeta ami long wol oli spenem 900 taosen milyan dola (samwe 96,426,000,000,000 vatu) long ol faet.

Mane we ol man long wol oli spenem long wan haoa nomo long ol faet, hem i naf blong pem meresin blong 3.5 milyan man we oli ded evri yia from ol sik we meresin i save blokem olgeta.

Wan long evri faef man long wol i pua. Mane we ol nesen oli spenem long tu dei nomo long ol tul blong faet, i save pem kakae blong olgeta hanggri man ya blong wan yia.

Paoa blong olgeta nyuklia bom long wol i 160,000,000 taem antap long nyuklia paoa we i faerap long Jernobil.

Naoia i gat wan nyuklia bom we paoa blong hem i 500 taem antap long paoa blong bom we i bosta long Irosima long 1945.

Paoa blong olgeta nyuklia bom we ol man oli holem tede long wol i sem mak long bitim wan milyan bom olsem hemia we i bosta long Irosima. Paoa blong olgeta i 2,700 taem antap long olgeta bom we oli bosta long Namba Tu Bigfala Faet Blong Wol, taem 38 milyan man i ded.

Naoia i gat plante moa faet oli kamaot, mo i gat moa man oli ded long olgeta. Long yia 1700 kasem 1800, i gat 4.4 milyan man i ded long ol faet. Yia 1800 kasem 1900, i gat 8.3 milyan man i ded long ol faet. Mo biaen long yia 1900, long ol 86 yia we i pas finis, i gat 98.8 milyan man i ded long ol faet. I stat long yia 1700 kam kasem naoia, namba blong ol man we oli ded long ol faet i kam antap sikis taem moa kwik i bitim namba blong ol nyufala bebi we oli bon long wol. Long laswan handred yia, i gat ten taem moa man i ded long ol faet i bitim ol yia bitwin 1800 mo 1900.

[Tok Blong Pija Long Pej 247]

Stret long profet tok long saed blong wael anamol we i red we i red, Ligofnesen i go long wan bigfala hol long Namba Tu Bigfala Faet Blong Wol, mo hem i kamaot long hol ya taem Yunaeted Nesen i stanap

[Tok Blong Pija Long Pej 249]

Blong sapotem “Yia Blong Pis” we Yunaeted Nesen i makemaot, ol man ya long ol defren skul blong wol oli joen blong prea long Asisi, Itali. Be i no gat wan long olgeta we i prea long God ya we i laef, Jeova