?Wael Animol We i Red We i Red Long Revelesen Japta 17 i Minim Wanem?

Ansa we Baebol i givim

Wael animol ya we i red we i red, we Revelesen japta 17 i tokbaot, i pija blong wan oganaesesen we mak blong hem i blong yunaetem mo representem olgeta nesen blong wol. Fastaem hem i stap olsem Ligofnesen mo naoia hem i Yunaeted Nesen.

?Olsem wanem blong luksave wael animol ya we i red we i red?

1. Wan politik paoa. Wael animol ya we i red we i red we i gat “seven hed” i representem “seven bigfala hil” mo “seven king,” o ol man we oli rul antap long ol narafala. (Revelesen 17:9, 10) Plante taem Baebol i yusum ol tok olsem, “bigfala hil” mo “wael animol” blong minim ol gavman.—Jeremaea 51:24, 25; Daniel 2:44, 45; 7:17, 23.

2. Pija blong politik sistem blong wol. Wael animol ya we i red we i red i sem mak long wael animol we i gat seven hed long Revelesen japta 13, we i representem politik sistem blong fulwol. Tugeta animol ya oli gat seven hed, ten hon, mo long hed blong olgeta oli gat ol nem we oli tok nogud long God. (Revelesen 13:1; 17:3) Ol samting we oli sem mak long tufala animol ya oli no jes hapen nomo olsem. Wael animol ya we i red we i red, i pija blong politik sistem blong fulwol.—Revelesen 13:15.

3. Hem i kasem paoa long ol narafala rula. Wael animol ya we i red we i red “i kamaot” o i kasem paoa blong rul long ol narafala rula.—Revelesen 17:11, 17.

4. Hem i joen wetem relijen. Bigfala Babilon, hemia olgeta giaman skul long wol, i sidaon long animol ya we i red we i red. Hemia i soemaot se ol relijen oli gat paoa long wael animol ya.—Revelesen 17:3-5.

5. Hem i no ona long God. Bodi blong wael animol ya i fulap wetem “ol nem [we] oli tok nogud long God.”—Revelesen 17:3.

6. Blong smoltaem, bambae hem i no stap. Wael animol ya we i red we i red bambae i stap “long abys”a blong smoltaem, be afta bambae i kamaot bakegen.—Revelesen 17:8.

Profet tok blong Baebol i kamtru

Luk olsem wanem Yunaeted Nesen mo hemia we i stap bifo long hem, Ligofnesen, oli mekem profet tok blong Baebol i kamtru long saed blong wael animol ya we i red we i red.

1. Wan politik paoa. Yunaeted Nesen i sapotem politik sistem taem i protektem “rul blong olgeta Memba blong hem.”b

2. Pija blong politik sistem blong wol. Long 2011, Yunaeted Nesen i gat 193 memba. Mo i luk olsem we hem i representem bighaf blong ol nesen mo ol man long wol.

3. Hem i kasem paoa long ol narafala rula. Yunaeted Nesen i stanap mo i kasem paoa tru long ol narafala nesen we oli putumap hem.

4. Hem i joen wetem relijen. Olgeta relijen long wol oli sapotem Ligofnesen mo Yunaeted Nesen.c

5. Hem i no ona long God. Oli stanemap Yunaeted Nesen blong i “givim pis mo seftaem long olgeta ples long wol.”d Nating we i luk olsem se hemia i wan gudfala plan, be Yunaeted Nesen i no givim ona i go long God nating, taem oli talem se hem i save mekem samting we Kingdom blong God nomo i save mekem.—Ol Sam 46:9; Daniel 2:44.

6. Blong smoltaem, bambae hem i no stap. Ligofnesen, we oli stanemap smoltaem afta long Wol Wo I blong mekem se i gat pis, i no naf blong stopem ol faet mo raorao we i stap hapen long olgeta ples long wol. Taem Wol Wo II i stat long 1939, Ligofnesen i no moa stap. Long 1945, afta we Wol Wo II i finis, Yunaeted Nesen i stanap. Ol plan, ol samting we hem i mekem, mo mak blong hem, oli klosap sem mak olsem hemia blong Ligofnesen.