Voes i Strong

SIPOS voes blong brata we i givim tok i no strong, maet sam long olgeta we oli lesin oli wantem slip. Long wok blong prij, sipos wan pablisa i toktok wetem voes we i kwaet tumas, maet man blong haos i no save lesin longtaem. Long ol miting, sipos man we i givim ansa i no tok long voes we i strong, ol narafala oli no kasem ol gudfala samting long ansa blong hem. (Hib. 10:24, 25) Be i nogud tu we man i tok long bigfala voes long taem we i no nid blong mekem olsem. Ol man we oli lesin bambae oli harem se hemia i narakaen, maet oli no glad blong lesin, mo maet oli kam kros tu.—Prov. 27:14.

Yu Tingbaot Ol Man We Oli Stap Lesin. ?Hu ol man we yu stap toktok long olgeta? ?Yu stap toktok long wan man nomo, wan famle, wan smol grup long miting blong prij, wan kongregesen, wan bigfala asembli? I klia se long ol defdefren taem ya, voes blong yu bambae i no sem mak, samtaem i mas strong moa i bitim narafala taem.

Long taem bifo, sam man blong God oli mas toktok long fored blong plante man. Taem oli openem haos blong God long Jerusalem, Solomon i toktok long fored blong plante man. Be hem i no gat wan maekrofon. Ale, hem i wokem wan samting we i hae lelebet blong stanap long hem, nao hem i “tok bigwan” blong blesem ol man. (1 King 8:55; 2 Kron. 6:13) Long yia 33 K.T., plante handred yia afta long taem blong Solomon, tabu spirit i kamdaon long olgeta we oli joen wanples blong mekem lafet blong Pentekos. Biaen, plante man oli hivap raon long wan smol grup blong ol Kristin long Jerusalem. Sam long ol man ya oli wantem harem tok blong ol Kristin, mo sam oli stap tok jik nomo. Nao Pita i “stanap . . . [mo] i singaot bigwan” blong mekem se ol man ya oli harem ol tok blong hem. (Wok 2:14) Tok blong hem i gat paoa, mo hem i givim wan gudfala witnes long olgeta.

?Olsem wanem blong save sipos voes blong yu i naf? Yu wajem ol man we oli stap lesin. Sipos yu luk se i hadwok long samfala blong harem ol tok blong yu, yu mas mekem voes blong yu i strong moa.

Nating se yu stap toktok long wan man no long wan grup blong man, i waes blong tingbaot hu ol man ya we oli stap lesin long yu. Sipos sora blong wan man i fas lelebet, maet voes blong yu i mas strong moa. Be sipos yu stap toktok long wan man we maet hem i slo blong kasem save from we hem i olfala, nao yu mekem voes blong yu i strong, ating bambae hem i no glad long yu. Maet hem i ting se yu yu no gat respek. Long sam kantri, sipos man i toktok long voes we i strong tumas, ol man oli ting se hem i kros mo i no gat longfala tingting.

Yu Tingbaot Ol Noes. Taem yu stap prij, ol samting we oli hapen raonabaot long yu oli givhan long yu blong save se voes blong yu i mas strong olsem wanem. Sipos i gat noes blong ol trak, ol pikinini we oli pleplei, ol dog we oli singaot, miusik, mo televisin, ale voes blong yu i mas strong. Be long wan narafala ples we ol haos oli fasfas, sipos voes blong yu i strong tumas, yu save pulum ae blong ol man raonabaot, nao maet man we yu stap storian wetem hem i sem.

I gat plante defren noes we oli save spolem ol tok we ol brata oli givim long kongregesen mo asembli, antap moa taem oli givim wan tok long open ples. Long Latin Amerika, tu misinari i stap givim wan pablik tok long vranda blong haos blong wan man we i laekem trutok. !Long semtaem, i gat noes blong lafet we ol man oli stap mekem long pablik ples klosap, mo tu, wan man faol i stap singsingaot we i no save stop! Taswe taem yu mekem wan tok long open ples, hemia i defren olgeta long wan tok we yu mekem insaed long wan haos.

Sipos i gat noes taem yu stap givim wan tok, maet yu mas spel smol gogo noes ya i finis. Sipos no, maet yu mas toktok long voes we i strong moa. Tingbaot sipos yu stap mekem miting long wan haos we ruf blong hem i kapa, nao wantaem nomo i gat bigfala ren. Ating ol man oli no moa save harem wan samting. Narafala samting we i save hapen se, wan pikinini i krae bigwan, no sam man oli kam let long miting. Ale, yu yu mas lanem blong winim ol noes ya, nao ol man we oli lesin bambae oli no mestem ol gudfala save we yu stap givim long olgeta.

Ol maekrofon mo laodspika oli givhan bigwan, sipos yumi gat ol samting ya. Be, nating se oli givhan, samtaem man i mas mekem voes blong hem i strong yet. Long sam ples we paoa i kat plante taem, brata we i givim tok i mas gohed nomo, nating se maekrofon i no wok.

Yu Tingbaot Wanem We Yu Stap Tokbaot. Samting we yu tokbaot tu i save mekem se yu mas toktok long voes we i strong. Sipos ol save long tok blong yu i gat paoa, yu no mas toktok long voes we i kwaet tumas. Sipos yu stap ridim ol woning no tok panis long Baebol, voes blong yu i mas strong. Be sipos yu stap ridim advaes se yumi mas lavlavem yumi, voes blong yu i mas kwaet. Yu save jenisim voes blong yu blong mekem i strong no i kwaet folem save we yu stap tokbaot. Be yu mas lukaot se yu no mekem samting ya long fasin we i pulum ae blong ol man i kam long yu nomo.

Yu Tingbaot Wanem We Tok Blong Yu i Mas Mekem Long Ol Man. Sipos yu wantem we tok blong yu i pusum ol man blong oli wok strong, maet yu mas toktok long voes we i strong lelebet. Sipos yu wantem jenisim wan rong tingting we man i gat, i nogud yu tok strong tumas mo mekem hem i harem se yu stap daonem hem. Mo sipos yu wantem leftemap tingting blong man, i moa gud yu toktok long voes we i kwaet.

?Wetaem i Stret Blong Mekem Voes i Strong Moa? Taem wan man i bisi, nao yu wantem pulum hem blong i lesin long yu, maet yu mekem voes blong yu i strong moa. Ol papa mama oli save samting ya, taswe oli toktok long voes we i strong taem oli singaot ol pikinini blong olgeta blong oli stopem pleplei blong olgeta mo kam insaed. Long miting blong kongregesen mo long asembli, taem jeaman i wantem singaot ol man blong oli kam sidaon rere, maet hem i toktok long voes we i strong. Taem ol pablisa oli stap prij, nao oli luk wan man we i stap wok long yad no garen blong hem, ating oli mas singaot strong lelebet blong talem halo long hem.

Afta we yu singaot blong talem halo long wan man, i impoten yet we yu toktok long voes we i strong. Sipos yu toktok long voes we i kwaet tumas, yu save givim tingting se yu no rere gud, mo se yu no bilif strong long samting we yu stap talem.

Taem yu talem long wan man se i mas mekem wan samting, yu mas toktok long voes we i strong lelebet blong pulum hem blong obei. (Wok 14:9, 10) Mo tu, yu mas singaot strong long wan man we i stap long denja, olsemia yu save blokem wan trabol. Long taon blong Filipae, wan man blong lukaot long kalabus i wantem kilim hem wan i ded, from we hem i ting se ol presina oli ronwe finis. “Be Pol i singaot bigwan, i talem se, ‘!Ei! !Yu no spolem yu! Mifala evriwan i stap yet.’” Ale, man ya i no kilim hem wan i ded. Biaen, Pol mo Saelas, tufala i prij long man ya wetem olgeta long haos blong hem, nao olgeta evriwan oli bilif long trutok.—Wok 16:27-33.

?Olsem Wanem Blong Mekem Voes i Kam Strong? I had blong samfala oli toktok long voes we i strong. Maet wan man i toktok long voes we i kwaet from we voes blong hem i no gat paoa. Be sipos hem i traehad, hem i save winim problem ya. Yu mas meksua se yu pulum gud win, mo yu stanap stret. Yu mas trenem yu wan blong sidaon mo stanap stret oltaem. Yu stretem tufala solda blong yu, mo yu pulum gud win. Taem yu pulum win yu mas fulumap gud waet leva blong yu. Sipos yu letem win ya i kamaot sloslo, hemia nao samting we i save mekem se yu gat paoa long voes blong yu taem yu toktok.

Sam man oli gat wan voes we i strong tumas. Maet oli lanem blong toktok olsem taem oli wok long open ples no long ples we i gat plante noes. Sipos no, maet oli gruap long wan famle we evriwan oli stap singaot mo katem toktok blong narawan. From samting ya, maet oli ting se wan rod nomo blong mekem man i lesin long olgeta, hemia blong toktok long voes we i strong moa i bitim ol narafala. Be ol man ya oli mas traehad blong folem advaes blong Baebol blong ‘gat sore long ol man, mekem i gud long ol narafala, mekem tingting blong olgeta i stap daon, kam kwaet man, mo mekem tingting blong olgeta i longfala.’ Nao sloslo oli save mekem we voes blong olgeta i no moa strong tumas taem oli storian wetem ol narafala.—Kol. 3:12.

Sipos yu rere gud, mo yu joen oltaem long wok blong prij, mo yu prea long Jehova, ol samting ya oli save givhan long yu blong yu toktok long voes we i naf blong man i harem. Nating se yu givim wan tok long miting no yu toktok wetem wan man long wok blong prij, yu mas tingbaot se tok blong yu i save givhan bigwan long ol man sipos oli harem samting we yu talem.—Prov. 18:21.