Yusum Gud Pija, Map, Mo Narafala Samting We Man i Save Luk

TAEM yu stap tijim ol narafala, ?from wanem i gud blong yusum pija, map, mo ol narafala samting we oli save luk? From we hemia i save mekem se tijing we yu givim long olgeta i gat moa paoa. Jehova God mo Jisas Kraes tufala i yusum ol samting we man i save luk, mo yu save lanem fasin ya blong tufala. Taem man i harem ol tok mo long semtaem hem i luk wan samting, hem i yusum ae mo sora blong hem wantaem blong lanem samting. From samting ya, maet hem i wantem gohed blong lesin long yu, mo tu, ol tok we yu talem i gat moa paoa long hem. Taem yu stap talemaot gud nius, ?yu save mekem wanem blong yusum ol samting we man i save luk? ?Yu save mekem olsem wanem blong yusum gud olgeta?

Tu Nambawan Tija, Tufala i Yusum Samting We Man i Save Luk. Jehova i yusum samting we man i save luk mo i save tingbaot longtaem, blong tijim ol man long ol impoten samting. Wan naet, hem i tekem Ebraham i go afsaed, nao i talem long hem se: “Yu lukluk i go antap long skae, yu traem kaontem ol sta. Ol pikinini we bambae oli kamaot biaen long yu, bambae oli plante olsem ol sta ya.” (Jen. 15:5) Long tingting blong ol man, promes ya i no save kamtru. Be Ebraham i tinghevi long ol tok ya mo hem i trastem Jehova. Long wan narafala taem, Jehova i sanem Jeremaea i go long haos blong wan man blong wokem graonpot. Hem i talem long Jeremaea se i mas wajem man ya taem i stap wokem graonpot long wil blong hem. !Jehova i wantem tijim Jeremaea se God we i Mekem olgeta samting i gat bigfala paoa antap long ol samting ya! !Tru ya, samting we Jeremaea i luk i mas mekem se tijing ya i stap strong long tingting blong hem! (Jer. 18:1-6) Yu traem tingbaot Jona. Jehova i yusum wan kasroel tri blong tijim Jona se hem i mas gat sore. ?Yu ting se Jona i save fogetem tijing ya? Ating hem i no save fogetem. (Jona 4:6-11) Jehova i talem long sam profet blong hem se oli mas yusum sam samting we man i save luk, blong mekem ol aksen we oli talemaot long profet tok blong olgeta. (1 King 11:29-32; Jer. 27:1-8; Esik. 4:1-17) Haos tapolen mo haos blong God we ol man oli luk long taem bifo, tufala i olsem pija we i givhan long yumi blong kasem save long ol samting long heven. (Hib. 9:9, 23, 24) Mo tu, God i mekem se plante man oli luk wan vison we i givim impoten save long olgeta.—Esik. 1:4-28; 8:2-18; Wok 10:9-16; 16:9, 10; Rev. 1:1.

Taem Jisas i tijim ol man, hem tu i yusum ol samting we man i save luk. Wan taem, ol Farisi mo ol sapota blong Herod oli traem faenem rod blong mekem Jisas i foldaon long ol tok blong hem. Nao Jisas i askem long olgeta blong oli givim wan mane long hem. Ale hem i soem pija blong Sisa we i stap long mane ya. Nao hem i eksplenem se, ol samting blong Sisa yumi mas givimbak long Sisa, be ol samting blong God yumi mas givimbak long God. (Mat. 22:19-21) Long wan narafala taem, Jisas i wantem tijim ol man se oli mas yusum olgeta samting we oli gat blong ona long God. Ale hem i tokbaot wan wido woman we i pua, we i stap sakem tu smol mane i go long bokis blong presen mane long haos blong God. Nating se mane ya i smol, be hemia olgeta samting we wido ya i gat. (Luk 21:1-4) Long wan narafala taem bakegen, hem i singaot wan pikinini i kam, mo hem i talem se man i no mas wantem kam hae moa long narafala, be i mas mekem tingting blong hem i stap daon olsem pikinini ya. (Mat. 18:2-6) Mo tu, Jisas i wasem leg blong ol disaepol blong hem. Long rod ya, oli luk fasin blong man we tingting blong hem i stap daon.—Jon 13:14.

Rod Blong Yusum Samting We Man i Save Luk. I tru, yumi no save mekem olsem Jehova we i givim vison long sam man blong talemaot tok blong hem long olgeta, nogat. Be i gat plante pija long ol buk blong ol Witnes blong Jehova we oli save pulum tingting blong man. Yu save yusum olgeta blong givhan long ol man we oli wantem save moa. Ol pija blong Paradaes long wol we Tok blong God i mekem promes long hem, oli save givim klia tingting long man. Taem yu mekem Baebol stadi long wan man, maet yu pulum hem blong lukluk wan pija we i joen wetem samting we yutufala i stap stadi long hem. Mo yu save askem long hem blong i talem wanem samting we hem i luk long pija ya. I gud yu tingbaot se taem Jehova i givim wan vison long profet Amos, hem i askem se: “Amos. ?Yu save samting ya?” (Amos 7:7, 8; 8:1, 2) Yu tu yu save askem kwestin olsem taem yu soem pija long wan man blong tijim hem.

Taem yu eksplenem ol profet tok olsem Daniel 4:16 we i tokbaot “seven yia,” mo Daniel 9:24 we i tokbaot “seventi wik,” i gud yu raetemdaon ol namba, no yu droem wan laen blong makem ol impoten yia long hem. Hemia i save mekem i moa isi blong man i kasem save long ol profet tok ya. Long plante buk we yumi stadi long olgeta, i gat ol samting olsem we man i save luk.

Long Baebol stadi blong famle, maet yufala i tokbaot ol samting blong bifo, olsem haos tapolen, haos blong God long Jerusalem, mo haos blong God we Esikel i luk long vison blong hem. Bambae yufala i luk se i moa isi blong kasem save long ol samting ya sipos yufala i yusum wan pija no yufala i droem wan pija. Yufala i save faenem ol pija ya long buk ya Insight on the Scriptures, mo long appendix blong Baebol ya New World Translation of the Holy Scriptures—With References, mo long plante Wajtaoa.

Taem yu mo famle blong yu, yufala i ridim Baebol, i gud yufala i yusum ol map. Yufala i save luk long map, blong folem rod we Ebraham i wokbaot long hem taem hem i aot long Uru i go kasem Haran, mo biaen, taem hem i go long Betel. Yufala i save lukluk gud long rod we neson blong Isrel i folem, taem i aot long Ijip, i wokbaot i go long Promes Lan. Yufala i save faenem ol ples we God i givim long ol laen blong Isrel. Yufala i save luk bigfala ples we Solomon i rul antap long hem. Yufala i save luk ol ples we Elaeja i pas long olgeta, taem we Jesebel i wantem kilim hem i ded, nao hem i aot long Jisrehel i ronwe i go long draeples narasaed long Bereseba. (1 King 18:46 kasem 1 King 19:4) Yufala i save faenem ol taon we Jisas i prij long olgeta. Yufala i save folem rod we Pol i wokbaot long hem, olsem buk blong Ol Wok i talem.

Taem yu mekem Baebol stadi long wan man nao yu wantem eksplenem wok blong kongregesen, i gud yu yusum ol samting we hem i save luk. Maet yu soem smol pepa ya we i gat program blong asembli long hem, nao yu eksplenem ol defren save we i kamaot long asembli. Plante man oli glad tumas taem yumi tekem olgeta oli go luk Haos Kingdom, no oli go visitim branj ofis blong ol Witnes blong Jehova. Hemia wan gudfala rod blong stretem enikaen rong tingting we maet oli gat long wok blong yumi mo from wanem yumi mekem wok ya. Taem yu tekem wan man i go luk Haos Kingdom, yu save tokbaot olsem wanem Haos Kingdom i defren long ol narafala jos haos. Yu save talem se Haos Kingdom i no wan ples we i flas, be hem i wan ples we i stret nomo blong ol man oli kam long hem blong kasem tijing. Yu save soem ol samting we oli joen wetem wok blong prij, olsem ples blong ol buk, ol map blong teritori, mo ol bokis blong presen mane (mo yu save tokbaot se oli no olsem ol plet we ol man blong jos oli pasem i goraon blong man i sakem mane).

Yu save yusum ol DVD we Hed Kampani i wokem. Ol DVD ya oli mekem bilif long Baebol i kam strong moa, oli givhan long ol man we oli stadi Baebol blong oli save gud wok blong ol Witnes blong Jehova, mo oli pulum ol man blong oli folem ol rul blong Baebol long laef blong olgeta.

Yu Save Yusum Ol Samting We Man i Luk Blong Tijim Ol Bigfala Grup. Ol samting we man i save luk oli givhan gud blong tijim ol bigfala grup tu, sipos yu rere gud fastaem mo yu yusum gud ol samting ya. Slef we i stret mo waes i mekemrere ol defren samting olsem, we yumi save yusum blong tijim ol man.

Klosap oltaem, i gat sam pija long ol haf blong Wajtaoa we yumi stadi long olgeta. Brata we i lidim stadi ya i save yusum ol pija blong mekem ol impoten poen oli kamaot klia. Long Baebol Stadi Blong Kongregesen, i gat ol pija long buk we yumi stadi long hem, mo brata we i lidim stadi ya i save yusum olgeta long sem fasin.

Long sam pablik tok, i stret blong yusum samting we man i save luk, blong soemaot sam poen. Be oltaem, i gud yu pulum tingting blong ol man i go moa long Baebol, we i stap long han blong bighaf blong olgeta. Sipos yu yusum wan pija no yu raetem wan plan blong ol bigfala poen long tok blong yu, yu mas jekem fastaem se ol man we oli sidaon biaen oli save luk mo ridim samting ya. Be yu no mas yusum ol samting ya plante tumas.

Taem yumi yusum wan samting we ol man oli save luk long wan tok blong yumi no long taem ya we yumi tijim olgeta, yumi no mekem samting ya olsem wan pleplei we i pulum man blong laf. Taem yumi yusum samting we man i save luk long fasin we i stret, ol poen we yumi wantem mekem i kamaot klia, oli gat moa paoa long tingting blong hem. Ol samting we man i save luk oli mekem wan gudfala wok taem oli mekem ol tok blong yumi i klia, i moa isi blong man i kasem save long hem, mo taem oli pruvum se tok blong yumi i stret. Sipos yu yusum gud wan samting we man i save luk, hem i save tingbaot samting ya blong plante yia, mo tu, hem i tingbaot samting we hem i lanem.

Fasin blong harem samting mo fasin blong lukluk samting, tufala tugeta i givhan bigwan long yumi blong lanem samting. Tufala nambawan Tija ya, Jehova mo Jisas, tufala i yusum ol samting we man i save harem mo i save luk. Yu mas tingbaot se, ?tufala i yusum ol samting ya olsem wanem? Nao yu traehad blong folem fasin blong tufala taem yu tijim ol narafala.