KWESTIN 3
?Olsem Wanem Blong Toktok Gud Wetem Papa Mo Mama?
?BAMBAE YU YU MEKEM WANEM?
Yu traem tingbaot stori ya: Long wan Wenesde naet, Jeff we i gat 17 yia, i finisim ol wok we papa mo mama blong hem tufala i talem, mo i rere blong spel smol. Hem i onem TV, mo i sidaon rilaks long wan jea.
Stret long taem ya, papa blong hem i kam insaed long haos mo hem i no glad blong luk we Jeff i mekem olsem.
Hem i se: “!Hei Jeff! ?From wanem yu stap westem taem long TV ya? Yu sud halpem smol brata blong yu wetem hom wok blong hem. !Yu neva mekem samting we mifala i talem!”
Jeff i stap toktok smosmol se: “Oltaem yu stap talem sem samting.”
Papa blong hem i talem se: “?Boe yu talem wanem?”
Jeff i mekem olsem se hem i les blong toktok, mo i talem se: “Mi no talem wan samting.”
Papa blong hem i kros tumas, nao i talem se: “!Yu stap kwaet taem mi toktok!”
Sipos yu yu Jeff, ?bambae yu mekem wanem blong i no gat rao olsem?
!STOP MO TINGTING!
Fasin blong toktok wetem papa mo mama blong yu, i olsem we yu draevem wan trak. Sipos i gat wan samting i blokem rod, bambae yu save faenem wan rod blong kamaot.
EKSAMPOL:
Wan gel we nem blong hem Lea i talem se: “Mi harem se i had blong toktok wetem papa blong mi. Samtaem mi stap toktok long hem, be hem i no lesin long mi, mo hem i talem se ‘?sori, yu stap toktok long mi ya?’”
I GAT 3 ROD BLONG LEA I FOLEM.
Singaot strong long papa blong hem.
Lea i singaot strong se, “!Yu traem lesin! !Samting ya i rili impoten!”
No moa toktok long papa blong hem.
Tingting blong Lea i foldaon mo hem i no wantem tokbaot problem ya.
Wet mo tokbaot long wan stret taem.
Lea i wet mo biaen hem storian wetem papa blong hem, no hem i raetem wan leta long papa blong hem.
?Yu yu wantem se Lea bambae i folem weswan long ol rod ya?
YU TRAEM TINGBAOT: I gat plante samting we oli mekem tingting blong papa blong Lea i fasfas, mo hem i no luksave samting ya. Taswe, sipos Lea i jusum Rod Namba 1, blong singaot strong long papa blong hem, maet papa blong hem i no kasem save from wanem Lea i mekem olsem. Rod ya i no save mekem papa blong Lea i glad long hem, mo tu i no soem respek. (Efesas 6:2) Sipos i olsem, i min se rod ya i no save givhan long wan man.
I gat rod we yu save folem blong toktok wetem papa mo mama blong yu, nating se i gat wan samting i blokem rod.
I luk olsem se i isi nomo blong folem Rod Namba 2. Be i no waes nating blong folem rod ya. ?From wanem? From we sipos Lea i wantem se problem blong hem i kamgud, hem i mas toktok wetem papa blong hem, blong givhan long hem. Sipos hem i stap kwaet, bambae problem ya i neva kamgud.
Rod Namba 3, i soemaot se Lea i no letem wan samting i blokem hem blong toktok wetem papa blong hem. Hem i jusum wan defren taem blong tokbaot problem ya. Mo sipos hem i raetem wan leta, bambae hem i harem gud kwiktaem nomo.
Sipos Lea i raetem wan leta, maet bambae hem i save talemaot stret samting we hem i wantem talem long papa blong hem. Mo sipos papa blong hem i ridim leta ya, bambae hem i luksave se Lea i rili nidim help. Rod Namba 3, i save givhan long Lea, mo long papa blong hem tu. Nating sipos Lea i toktok fes tu fes wetem papa blong hem, no sipos hem i raetem wan leta, be rod ya i laenap wetem wanem we Baebol i talem, hemia blong “folem fasin we i save mekem pis.”—Rom 14:19.
?Wanem sam narafala rod we Lea i save folem?
Yu traem tingbaot wan rod. Mo yu tingbaot from wanem rod ya i impoten.
YU NO MEKEM TINGTING I FASFAS
Yu mas tingbaot se, samtaem samting we yu talem, i defren long tingting blong papa mo mama.
EKSAMPOL:
Papa mo mama i askem yu from wanem yu yu no glad. Yu ansa se, “Mi no wantem talem long yutufala.”
Tingting we papa mo mama i gat, hemia se: “Yu no trastem tufala. Mo bae yu tokbaot problem ya long ol fren blong yu, be i no long tufala.”
Yu traem tingbaot sipos yu kasem wan bigfala problem, nao papa mo mama blong yu, tufala i wantem givhan long yu. Be yu talem long tufala se: “Yutufala i no wari, mi mi naf blong handelem problem ya.”
?Wanem tingting we papa mo mama i save gat?
?Wanem ansa we yu save talem we i gud moa?