Ol Yangfala Oli Askem

?Olsem Wanem Mi Save Toktok Wetem Papa Mama Blong Mi?

“!Mi rili traehad blong talemaot filing blong mi long papa mama blong mi, be ol wod oli no kamaot stret! Papa mama i katem toktok blong mi bifo we mi finisim. !I no isi long mi blong talemaot tingting blong mi olsem, be tufala i no lesin nating!”​—Rosa.a

TAEM yu smol yet, oltaem yu go luk papa mama blong yu fastaem blong kasem advaes. Mo tu, yu talemaot enikaen nius long tufala, nomata se i smol no i bigwan. I isi nomo blong yu talemaot ol tingting mo filing blong yu long tufala, mo yu trastem ol advaes blong tufala.

Be naoia, maet yu harem olsem se tufala i no moa kasem save long yu. Wan gel we nem blong hem Edie, i talem se: “Wan naet long taem blong kakae, mi stat blong krae mo mi talemaot ol filing blong mi. Papa mama blong mi, tufala i lesin, be i luk olsem we tufala i no kasem save.” ?Wanem i kamaot from? “!Mi jes go long rum blong mi mo mi krae moa!”

Sam narafala oli harem se oli no wantem talemaot ol tingting blong olgeta long papa mo mama blong olgeta. Wan boe we nem blong hem Christopher, i talem se: “Mi tokbaot plante samting long papa mama blong mi. Be mi no wantem we tufala i save evri samting we i stap long tingting blong mi.”

?Olsem wanem? ?I oraet blong no talemaot evri tingting mo filing blong yu? Yes, hemia i oraet, sipos i no blong haedem sam nogud samting we yu stap mekem. (Ol Proveb 3:32) Be nomata we tufala i no kasem save long yu, no yu yu no wantem talemaot tingting blong yu long tufala, i gat wan samting we yu mas tingbaot: I impoten we yu storian wetem papa mama blong yu, mo i impoten we tufala i save ol samting long saed blong yu.

!Gohed Blong Storian!

Fasin blong storian wetem papa mama blong yu i olsem we yu draevem wan trak. Sipos yu draev gogo yu kasem wan ples we oli blokem rod, yu no stop long ples ya, be yu faenem wan narafala rod blong pas long hem. Tingbaot sam eksampol.

Bambae yumi tokbaot wanwan rod blong luk se wanem

Samting we i blokem yu—Namba 1: Yu wantem toktok, be i luk olsem se papa mama i no stap lesin. Wan gel we nem blong hem Leah i talem se: “Mi faenem se i had blong storian wetem papa blong mi. Samtaem mi stap toktok long hem, be biaen, hem i talem se, ‘?Sore, yu stap toktok long mi?’”

KWESTIN: ?Olsem wanem sipos Leah i rili wantem tokbaot wan problem blong hem? I gat tri rod we Leah i save jusum.

Rod A Rod B Rod C

?Yu yu ting se Leah i mas jusum weswan long ol rod ya? ․․․․․

i hapen long en blong olgeta. Papa blong Leah i stap tingting long wan samting, mo hem i no luksave se Leah i harem nogud. Taswe, sipos Leah i jusum Rod A, bambae papa blong hem i no save from wanem hem i singaot strong long hem. Rod ya i no save mekem we papa blong hem i lesin long hem, mo i no soemaot respek mo ona tu long papa mama blong hem. (Efesas 6:2) Taswe, Leah i no save win long rod ya.

Maet Rod B i wan rod we i moa isi, be i no waes blong folem rod ya. ?From wanem? From we “ol plan blong man oli save foldaon sipos oli no toktok gud tugeta fastaem. Be taem i gat fulap man blong givim advaes, bambae ol plan oli kamtru.” (Ol Proveb 15:22, NW) Sipos Leah i wantem winim ol problem blong hem, hem i mas toktok wetem papa mama blong hem. Mo sipos tufala i wantem givhan long Leah, tufala i mas save wanem i stap hapen long laef blong hem. Be gudfala frut ya i no save kamaot sipos hem i no moa toktok long tufala.

Be sipos Leah i jusum Rod C, i olsem we hem i no letem samting we i blokem hem, i stopem hem olgeta. Hem i traem blong tokbaot problem blong hem long wan narafala taem. Maet hem i jusum blong raetem wan leta long papa blong hem. Samting ya i save mekem hem i harem gud kwiktaem. Sipos hem i raetem leta, hem i save jusumgud ol tok we hem i wantem talem long papa blong hem, mo taem papa blong hem i ridim leta ya, hem i stap lesin long ol tok ya blong hem. Ale, bambae hem i kasem save long samting we Leah i stap traem blong talem long hem, nao bambae hem i kasem save moa long problem blong Leah. Taswe, rod C ya i save givhan long Leah mo long papa blong hem tu.

?Wanem sam narafala rod we Leah i save jusum? Traem luk sipos yu save tingbaot wan rod, mo raetemdaon ol tok blong yu. Biaen, raetem wanem i save hapen long en blong rod ya.

․․․․․

Samting we i blokem yu—Namba 2: Papa mama blong yu, tufala i wantem storian, be yu yu no wantem. Wan gel we nem blong hem Sarah i talem se: “Mi mi no laekem nating taem papa mama blong mi tufala i askem plante kwestin long mi afta we mi gat wan rabis dei long skul. Mi wantem fogetem samting we i hapen long skul, be tufala i stat blong askem ol kwestin olsem: ‘?Olsem wanem long dei blong yu? ?I gat sam problem we yu bin fesem?’” I stret nomo we papa mama blong Sarah tufala i askem ol kwestin ya. Be hem i harem nogud mo i talem se: “I had blong tokbaot skul taem mi taed mo mi wari.”

KWESTIN: ?Sarah i save mekem wanem long taem olsem? Olsem yumi talem finis, i gat tri rod we hem i save jusum.

Rod A Rod B Rod C

Yu yu ting se Sarah i mas jusum weswan long ol rod ya? ․․․․․

Bakegen, bambae yumi tokbaot wanwan rod blong luk wanem i save hapen long en blong hem.

Bifo we Sarah i jusum Rod A, hem i wari tumas mo hem i no wantem toktok. Afta we hem i jusum rod ya, bambae hem i wari yet, be antap long samting ya, bambae hem i harem nogud tu, from we hem i kros mo i singaot strong long papa mama blong hem.​—Ol Proveb 29:11.

Long taem olsem, papa mama blong Sarah bambae tufala i no glad long samting we Sarah i mekem. Mo sipos Sarah i no moa wantem toktok long tufala, bambae tufala i harem nogud tu. Tufala i save ting se Sarah i stap haedem wan samting. Maet bambae tufala i traehad moa blong mekem se Sarah i talemaot wanem we i stap long tingting blong hem, mo samting ya bambae i mekem Sarah i kros moa. Long en blong rod ya, olgeta evriwan oli harem nogud.

I klia se Rod B i gud moa long Rod A. Bambae Sarah mo papa mama blong hem oli gohed blong toktok tugeta. Be tok we oli talem bambae i no kamaot long hat blong olgeta. Taswe Sarah mo papa mama blong hem oli no save kasem samting we oli wantem, hemia blong oli storian gud tugeta, mo talemaot evri samting we i stap long hat blong olgeta.

Be sipos Sarah i folem Rod C, bambae hem i harem gud from we oli no tokbaot “skul” fastaem. Papa mama blong hem tufala i glad from we Sarah i traehad blong storian long tufala, taswe tufala tu i harem gud. I klia se oli save win long rod ya, from we olgeta evriwan oli mekem advaes long Filipae 2:4 i wok, we i talem se: “Yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo.”

[Futnot]

SAM SAMTING BLONG TINGBAOT

◼ ?Blong gat wan gudfala storian, from wanem yu mas jusum stret taem blong toktok?​—Ol Proveb 25:11, NW

◼ ?From wanem i no blong nating we yu traehad blong storian wetem papa mama blong yu?​—Job 12:12, NW.

[Bokis/Foto blong pija long pej 18]

?OL TINGTING WE OLI FASFAS?

?Yu yu harem se i had long yu blong toktok wetem papa mama blong yu? Maet yu toktok, be tufala i kasem rong mining blong tok blong yu.

Taem yu talem se . . .

“Mi no wantem tokbaot samting ya.”

Papa mo mama blong yu tufala i ting se yu talem . . .

“Bambae mi talem ol tingting mo filing blong mi long ol fren blong mi, be yutufala i no impoten tumas long laef blong mi. Bambae mi no talemaot evri samting long yutufala.”

Taem yu talem se . . .

“Bambae yutufala i no kasem save.”

Papa mo mama blong yu tufala i ting se yu talem . . .

“Yutufala i olfala tumas, mo yutufala i no kasem save long ol samting blong tede. Yutufala i no save kasem save long laef blong mi, taswe lego nomo.”

[Bokis/Foto blong pija long pej 21]

SAMTING WE OL NARAFALA YANGFALA OLI TALEM

“!Mi toktok long papa mama blong mi long saed blong wan problem we mi kasem long skul, mo mi sapraes blong luk we tufala i rere blong lesin long mi! !Tufala i givhan long mi, nao mi winim problem ya isi nomo!”​—Natalie.

“I no isi oltaem blong storian wetem papa mama blong yu. Be taem yu talemaot ol tingting mo filing blong yu long tufala, yu harem se yu karemaot wan hevi samting long tingting blong yu.”​—Devenye.

[Bokis blong pija long pej 21]

ADVAES I GO LONG OL PAPA MO MAMA

Sipos yu yu wan papa no wan mama we i wari long pikinini blong yu, ating yu wantem save sipos pikinini blong yu i faenem i had blong storian wetem yu. Tingbaot samting we sam yangfala oli talem long Wekap! blong eksplenem from wanem oli no talemaot tingting blong olgeta long papa mama blong olgeta. Biaen, tingting long ol kwestin we oli stap daon, mo jekem ol vas.

“Mi faenem i had blong storian wetem Papa, from we hem i gat plante samting finis blong tingbaot, ol samting long saed blong wok blong hem mo long kongregesen. I no gat wan stret taem we mi save storian wetem hem.”—Andrew.

‘?Fasin blong mi i givim tingting long ol yangfala blong mi se mi mi bisi tumas blong storian wetem olgeta? Sipos yes, ?mi save mekem wanem blong oli luk se mi glad blong storian wetem olgeta? ?Mi save makemaot wanem taem blong mi save storian wetem ol pikinini blong mi?’​—Dutronome 6:7.

“Mi go luk mama blong mi mo mi krae from wan rao we i hapen long skul. Mi wantem we Mama i leftemap tingting blong mi, be hem i mekem i defren olgeta, hem i tok long mi. Stat long taem ya, mi no moa tokbaot ol impoten samting long hem.”—Kenji.

‘?Mi mi mekem wanem taem ol pikinini blong mi oli talemaot wan problem blong olgeta long mi? ?Nating sipos mi mas stretem olgeta, be mi mi lanem blong stap kwaet fastaem mo lesin wetem sore, bifo we mi givim advaes?’​—Jemes 1:19.

“Ol papa mama oli talem se bambae oli glad sipos mifala i toktok long olgeta. Be i luk olsem se evri taem oli kam kros. Samting ya i mekem se mifala ol yangfala i harem nogud.”—Rachel.

‘?Sipos pikinini blong mi i talem wan samting we i mekem mi mi kros, olsem wanem mi save blokem kros ya?’​—Ol Proveb 10:19.

“Plante taem, taem mi talemaot wan sikret blong mi long Mama, hem i girap, i talemaot long ol fren blong hem. Longtaem nao, mi no moa trastem hem.”—Chantelle.

‘?Mi mi tingbaot filing blong pikinini blong mi, no mi talemaot olbaot ol sikret we hem i talem long mi?’​—Ol Proveb 25:9.

“I gat plante samting we mi mi wantem tokbaot wetem papa mama blong mi. Be mi wantem nomo we tufala i givhan long mi blong statem storian ya.”—Courtney.

‘?Mi mi save statem wan storian wetem yangfala blong mi? ?Wanem taem nao i stret blong storian?’​—Prija 3:7.

[Tok blong pija long pej 19]

!No letem samting we i blokem rod i stopem yu olgeta​—yu save faenem rod blong toktok long papa mama blong yu!