?Wanem i Hapen Long Ol Man?
“?Weswe ol man oli stap mekem trabol long ol pikinini tede? ?Weswe oli stap spolem ol anamol? ?Wanem i mekem raf fasin i kam antap? . . . ?From wanem ol teroris oli kilim man i ded mo plante man oli tekem drag? . . . Yumi gat evri samting naoia. ?From wanem nao ol man oli mekem ol rabis fasin we i spolem ol fandesen blong sosaete blong yumi man?”
OL KWESTIN ya, praem minista blong Engglan nao i askem stret olgeta. Maet yu tu yu tingbaot sam kwestin we oli kolosap sem mak long ol kwestin ya. ?Be olsem wanem? ?Yu yu faenem sam gudfala ansa?
Praem minista blong Engglan i gohed, i se: “Sam yia i pas, taem we mi yang yet, mi mi hop, mi drim, mo mi wantem mekem plante samting. Long taem ya nao mi stat blong mekem politik mo tingting blong mi i sem mak long ol narafala. Mifala i ting se sipos wan dei mifala i givim haos blong slip long olgeta we oli nidim, gudfala edukesen mo naf mane blong mekem se evriwan i save harem gud, bambae olgeta samting oli save wokgud mo yumi save gat wan fyuja we i stret mo i isi moa. Be mifala i save naoia se ol trabol oli no kamaot long ol samting ya. Ol trabol we mifala i mas agensem oli kamaot from we ol man oli olsem. Hemia stampa fasin blong ol.” (Mifala nomo i putum italics.)
Taem oli bon, olgeta man oli kasem ol fasin we i kamaot long papa mama blong ol. Yumi evriwan i kasem ol fasin ya. Samting ya nao man i kolem stampa fasin blong man. I tru se sipos man i gat fasin we i defren tumas long ol narafala man, hem i save gat trabol wetem olgeta. Long sem fasin, ol nesen oli save gat trabol wetem ol narafala nesen. ?Be olsem wanem stampa fasin ya blong olgeta man i mekem we tede ol man oli gat raf fasin, oli kilim man i ded, oli salem ol drag mo oli mekem ol narafala rabis wok olsem?
?Mo olsem wanem? ?Ol stampa fasin blong man nomo oli mekem we ol trabol oli kamaot mo oli save “spolem ol faondesen blong sosaete blong yumi man”? ?No maet sam narafala samting bakegen oli pulum ol man blong oli mekem nogud? ?From wanem i isi nomo blong ol man oli mekem ol rabis fasin mo oli tingbaot olgeta nomo? ?From wanem ol man we oli save mekem i gud, oli mekem i nogud? Naoia, bambae yumi save ansa long ol kwestin ya.