Baebol—?Hem i Rili Tabu?

?HAMAS man tede oli tingbaot Baebol olsem wan tabu buk, we hem i Tok blong God? Bighaf blong ol man tede oli no bilif. Plante oli ting se Baebol i buk blong bifo, i no stret long laef blong yumi naoia. Mo plante man oli ting se Baebol i no rili tabu. Sam lida blong ol skul blong Krisendoma tu oli tijim ol man se Baebol i fulap long ol kastom store nomo. Oli stanemap kwestin ya: ‘?Ol man tede we oli gat plante waes mo save, oli save bilif long ol store blong bifo long Baebol?’​—⁠The Interpreter’s Dictionary of the Bible, Buk 2, pej 611.

Sam man we oli stadi long bisnes ya oli talem plante toktok tu, nao ol man oli no save sipos Baebol hem i Tok blong God, no no gat. Wan man blong hae save i talem se: “Ol man oli stap talem se Baebol i ‘Tok blong God.’ Be i moa stret blong talem se Baebol hem i Tok blong Isrel, no Tok blong sam hae Kristin man nomo long taem bifo.” (The Bible in the Modern World, we James Barr i raetem) ?Wanem tingting blong yu? ?Baebol hem i Tok blong God? ?Hem i rili tabu?

?Hu i Raetem Baebol?

Moses i wan man Hibru we hem i laef 3,500 yia bifo. Longtaem finis, ol man oli stap talem se Moses i raetem faswan buk blong Baebol, Jenesis. Baebol hem wan i talem se samwe long 40 defren kaen man oli raetem ol narafala buk blong Baebol. From samting ya, Baebol i gat 66 haf no buk blong hem. Be ol man ya oli no ting se olgeta nomo oli stampa blong ol save blong Baebol. No gat. Wan man we i raetem haf blong Baebol i talem se: “Olgeta tok ya blong Baebol oli kamaot long God fastaem.” (2 Timote 3:16) Wan narafala man we i raetemdaon wan narafala haf blong Baebol i talem se: “Tabu Speret i stap givim tok long olgeta, nao oli talemaot tok we i kamaot long God.”​—⁠2 Pita 1:21.

I klia se ol man ya oli man blong raetem nomo ol tok blong Baebol. Oli olsem sekretari, we God i lidim olgeta mo i lukaot long wok blong olgeta. Baebol i talem se kolosap evritaem God i letem ol man ya oli yusum prapa fasin blong toktok blong olgeta. Be God nomo i putum ol save ya long tingting blong ol. (Habakuk 2:⁠2) Taswe insaed long Baebol, i gat plante defren kaen fasin blong talemaot toktok blong God. Be oltaem God i lidim ol man, blong oli raetemdaon ol samting we hem nomo i wantem.

Ol man ya we oli raetemdaon Baebol oli talem se God i givim toktok long olgeta. I tru se hemia nomo i no naf blong pruvum se Baebol i mesej we God i givim long ol man. Be sipos yumi ridim mo skelemgud ol tok long Baebol, yumi save luksave sipos Hae God hem i Stampa blong Baebol, no no gat. ?I gat sam samting insaed long Baebol blong pruvum se God hem i stampa blong ol toktok blong hem? ?Yumi save sua se Baebol hem i tabu?

[Futnot]