Wokem Ol Kristin Fasin Long Ol Pikinini Blong Yumi

MAMA blong Wanda we man blong hem i lego hem finis, i stap traehad blong wokem ol Kristin fasin long pikinini gel blong hem. Wok ya blong hem i kasem traem taem pikinini gel ya blong hem Wanda i gat 12 yia blong hem. Long taem ya Wanda, wetem yangfala brata mo sista blong hem, oli mas livim mama blong olgeta blong go laef wetem papa blong hem. Papa blong hem i no wan Kristin. ?Wanem fasin Wanda i save gat taem mama blong hem i no moa stap wetem hem?

Olgeta Kristin papa mama oli fesem samting olsem taem ol pikinini blong olgeta oli mas mekem prapa disisin blong olgeta nomo. Samting ya i traem bilif blong olgeta pikinini wanwan. Ol pikinini ya maet oli mas aot long Kristin papa mama blong olgeta olsem Wanda. No taem ol fren blong olgeta long skul oli fosem olgeta blong mekem i rong. Mo tu taem oli fesem ol bigbigfala traem. Ol Kristin papa mama oli stap hop mo prea nomo se ol pikinini blong olgeta bambae oli save gat ol gudfala Kristin fasin we i naf blong winim ol traem ya.

?Olsem wanem ol papa mama oli save wokem ol gudfala Kristin fasin insaed long pikinini blong olgeta? Bifo we yumi traem faenemaot wanem i hapen long Wanda, yumi luk ansa we Baebol i givim long yumi. Stampa ansa yumi save faenem long ol tok blong aposol Pol long ol Kristin man long Korin se: “From we God i putum Jisas Kraes, we hem i olsem faondesen blong haos ya we haos i stap stanap long hem. Mo i no gat sam narafala faondesen bakegen we man i save putum. Blong wokem haos ya, sam man oli save wok, olsem we oli stap yusum gol mo selva mo ol gudfala ston, we oli stap longtaem. Mo sam man oli save wok olsem we oli yusum ol pos blong bus wetem waelken mo natanggura, we oli save stap smoltaem nomo. Be [i gat dei we, NW] bambae i save soemaot ol wok blong ol man, wanem i gud mo wanem i nogud. From we . . . bambae i gat faea, mo faea ya bambae i save traem wok blong olgeta man, i soemaot i klia we wok blong man i gud no i nogud.”​—⁠1 Korin 3:​11-13.

Faondesen

?From wanem Pol i raetem ol tok ya? From we hem i bin statem wan plan blong wokem ol Kristin fasin long Korin, be plan ya i fesem ol trabol. I tru ya, Pol i statem plan ya, i no blong wokem ol fasin ya long ol prapa pikinini blong hem. Be long olgeta we oli kam Kristin from we hem i prij long olgeta. Mo hem i tingbaot olgeta ya olsem ol pikinini blong hem long saed blong speret, taswe ol papa mama oli save lanem gudfala samting from.​—⁠1 Korin 4:⁠15.

Pol hem i kam long Korin bifo finis mo hem i stanemap wan Kristin kongregesen long ples ya. Olgeta we oli lesin long tok blong hem long taem ya oli mekem bigfala jenis long laef blong olgeta. Sam long olgeta ya fastaem oli man blong mekem nogud long saed blong seks, sam oli man blong stil oli man blong wosip long narafala god, mo oli man blong drong. (1 Korin 6:​9-11) Be oli jenisim tingting blong olgeta from we Pol i wokem wan gudfala faondesen. ?Faondesen ya i wanem? “From we God i putum Jisas Kraes, we hem i olsem faondesen blong haos ya we haos i stap stanap long hem. Mo i no gat sam narafala faondesen bakegen we man i save putum.”​—⁠1 Korin 3:11.

Taem Pol i stap tijim ol nyufala Kristin long Korin, ?olsem wanem hem i putum faondesen ya? Hem i talem long yumi se: “Taem mi mi kam long yufala, mi kam blong talemaot plan ya blong God we fastaem i blong haed. Be mi no kam blong talemaot long ol flas tok mo long ol waes tok blong man, no gat. Taem mi stap wetem yufala, mi putum tingting blong mi i strong long wan samting nomo. Mi save talem wan samting nomo, Jisas Kraes, mo antap bakegen, Jisas Kraes ya we i ded long [pos, NW].” (1 Korin 2:​1, 2; Ol Wok 18:⁠5) Pol i no stap pulum tingting blong ol man long hem wan, mo hem i no flasem trutok wetem ol waes tok blong ol man. No gat, hem i stap pulum tingting blong ol man long Jisas Kraes mo olsem wanem God i stap yusum man ya Jisas.

Jisas Kraes hem i nambawan strongfala faondesen blong wokem ol Kristin fasin. Hem i givim laef blong hem olsem wan ransom sakrafaes. Mo naoia Jisas hem i King long heven mo bambae i no longtaem hem i save finisim ol enemi blong God long Amageden. Mo bambae hem i lukaot long stret fasin blong God taem hem i rul long wan taosen yia. Mo from we hem i Hae Pris blong God, bambae hem i mekem olgeta man oli stretgud olgeta. I no gat narafala faondesen olsem hem.

Taswe, blong wokem ol Kristin fasin long ol pikinini blong yumi, yumi save folem eksampel ya blong Pol mo meksua se ol pikinini oli laekem ol impoten poen ya. Stat long taem we oli bebi yet, yumi mas tijim ol pikinini blong yumi blong laekem Jisas from ol samting we hem i mekem long yumi finis mo we hem i stap mekem long yumi naoia yet.​—⁠1 Pita 1:⁠8.

Haos

Nating se Pol hem i putum wan gudfala faondesen, wok blong hem i kasem sam trabol afta we hem i livim olgeta. (1 Korin 3:10) I sem mak nomo long ol problem we plante papa mama oli stap fesem tede. Oli lanem ol pikinini blong olgeta long ol Kristin bilif nao oli ting se ol pikinini i luksave trutok. Be taem ol pikinini ya oli stap gruap, sloslou oli stat blong lego bilif ya. ?From wanem i olsem? From we i dipen long ol samting we ol papa mama i yusum blong tijim ol pikinini. Hemia i olsem ol ‘materiol,’ hemia ol kaen samting we man i yusum blong wokem haos.

Pol i talem se ol fasin ya, oli save wokem long ol gudfala samting olsem gol selva no ol sas ston. No oli save bildim wetem ol samting we i no sas olsem pos blong bus, waelken mo natanggura. (1 Korin 3:12) Sipos wan man blong wokem haos i yusum gol, selva mo ol sas ston blong bildim haos, haos ya i wan strongfala haos mo hem i gat bigfala praes. Be sipos man blong wokem haos i yusum pos blong bus, waelken mo natanggura, hem i stap bildim wan haos we hem i no save stap longtaem mo hem i no gat gudfala praes.

Long Korin i luk olsem we oli no yusum ol strong materiol long saed blong speret. Olgeta we oli wok long faondesen we Pol i putum finis oli no bildim wan strongfala haos. Ol man Korin oli stat blong lukluk i go long ol man mo oli no joen gud tugeta. Oli gat fasin blong jelas mo oli stap agensem olgeta nomo. (1 Korin 1:​10-12; 3⁠:​1-4) Sipos oli yusum ol gudfala strong materiol, bambae fasin olsem i no save kamaot.

Hemia ol fasin we i nidim blong wokem ol Kristin fasin. ?Wanem ol fasin ya? Aposol Pita i tokbaot wan, se: “Oraet, long sem fasin, bilif blong yufala we long fes blong God i gud moa long gol, be hem tu i gat ol samting blong traem hem.” (1 Pita 1:​6, 7) King Solomon i tokbaot tu narafala fasin bakegen, hemia: waes fasin mo fasin luksave. Sipos man i gat tufala fasin ya “hemia i gud moa bitim we hem i gat selva.” (Proveb 3:​13-15) Mo tu, King Deved i talem long yumi bakegen se fasin fraet gud long Jeova mo fasin tangkyu from ol loa blong hem, “man i wantem olgeta moa, i winim we hem i wantem gol.”​—⁠Ol Sam 19:​9, 10.

Ol fasin ya mo sam narafala bakegen we oli olsem ol sas samting blong yusum blong wokem ol Kristin fasin long ol pikinini blong yumi, blong oli winim ol traem. ?Olsem wanem yumi save gud se yumi yusum ol gudfala materiol ya? Sipos yumi tingbaot oltaem ol hat blong ol pikinini blong yumi mo hat blong yumi wanwan.

Wan Gudfala Wok

Blong mekem wok ya hat blong papa mama i impoten tumas. Yumi luk long loa we Jeova i givim long ol papa mama long taem blong ol man Isrel bifo, se: “Mo ol tok ya we mi mi stap talem long yu tede bambae yu mas fasem olgeta long hat blong yu.” Afta hem i gohed blong talem se: “Mo bambae yu mas tijim pikinini blong yu long hem.” (Dutronome 6:​6, 7) Nao bifo we yumi save bildimap ol Kristin fasin long ol narafala man, yumi mas bildimap long yumi fastaem. Ol pikinini blong yumi oli mas luk ol samting we yumi stap talem mo ol fasin blong yumi, sipos oli soemaot se yumi gat ol stret materiol, no no gat.​—⁠Kolosi 3:​9, 10.

Biaen ol tijing blong yumi oli mas kasem hat blong olgeta. Jisas, we i nambawan man blong wokem Kristin fasin, hem i kasem hat blong ol man taem hem i stap yusum ol pija tok mo ol kwestin. (Matyu 17:​24-27; Mak 13⁠:34) Ol papa mama oli faenem se rod ya i save wok gud. Oli yusum ol pija tok blong mekem trutok i kasem hat blong ol yangfala pikinini blong olgeta, mo tu oli askem ol kwestin blong faenemaot wanem i stap insaed long tingting blong pikinini blong ol we oli bigwan lelebet.​—⁠Proveb 20:⁠5.

Taem Moses hem i stap traem mekem ol man Isrel blong laekem Jeova mo stap holemstrong long hem, hem i se: “Holem ol loa blong Jeova mo ol rul blong hem . . . blong yu harem gud from.” (Dutronome 10:13) Sem mak, ol papa mama oli no mas talemaot ol loa blong Jeova nomo, be oli mas eksplenem long ol pikinini from wanem ol loa ya blong God oli gud. Oli save pulum olgeta blong luksave from wanem i nogud blong gyaman, gat ol rabis fasin, mo kampani wetem ol nogud fren.

Jisas i talem olsem: “Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:⁠3) Sipos ol pikinini oli save Jeova taem oli yang yet mo oli lanem blong talemaot ol trabol blong olgeta long hem, mo oli luksave olsem wanem Jeova i ansa long prea blong olgeta, long taem ya nao oli stap wokem wan impoten Kristin fasin, hemia fasin fren gud wetem God.

Faea

Pol i save se taem wok long Korin i no gohed gud, fasin blong wol olsem fasin seraot mo fasin jelas i save kamaot from. Taswe Pol i talem se: “Mo faea ya bambae i save traem wok blong olgeta man, i soemaot i klia we wok blong man i gud no i nogud.”​—⁠1 Korin 3:⁠13.

?Faea ya i wanem? Hemia olkaen traem we Setan i stap mekem long wan Kristin. Maet ol man oli pusum yumi blong mekem samting we i no stret, no ol slak fasin blong yumi oli pulum yumi blong mekem i no stret, no fasin blong wantem ol flas samting. Maet ol man oli kilim yumi, no ating bilif blong yumi i stat blong kam slak. Ol traem olsem oli mas kam. “From . . . bambae i gat faea, mo faea ya bambae i save traem wok blong olgeta man, i soemaot i klia we wok blong man i gud no i nogud.” Ol papa mama we oli waes taem oli stap wokem Kristin fasin long ol pikinini blong olgeta oli stap tingbaot se ol pikinini blong olgeta bambae oli mas kasem ol traem. Mo oli save gud se wetem help blong Jeova ol pikinini blong olgeta oli save winim ol traem ya. Sipos ol papa mama oli gat tingting ya bambae oli save kasem bigfala blesing from.

Kasem Pei From

Pol i talem se: “Sipos taem faea i bonem, be biaen bambae samting ya we man i wokem i stap stanap yet, man ya bambae i kasem pei blong hem.” (1 Korin 3:14) Aposol Pol hem i kasem pei from wok blong hem. Long olgeta Kristin long taon ya blong Tesalonaeka we bifo hem i stap mekem wok ya long hem, hem i raetem se: “Be yufala i luk. Tingting blong mifala i stap strong, se taem Jisas, Masta blong yumi bambae i kamtru, bambae hem i glad long mifala. ?Be tingting blong mifala i stap strong olsem from wanem? From yufala ya nao. Long Dei ya, bambae yufala i save mekem mifala i harem gud. Bambae yufala i olsem praes blong flasem mifala. Bambae mifala i save tok flas from yufala. Yufala ya nao i save flasem mifala, yufala i save mekem mifala i harem gud.”​—⁠1 Tesalonaeka 2:​19, 20.

Mama blong Wanda hem i kasem pei. Wanda i stap hem wan taem hem i gat 12 yia. Long naet hem i krae gogo kasem taem hem i slip. Nao hem i tingbaot advaes blong mama blong hem se hem i mas talemaot ol trabol blong hem long Jeova long prea. Hem i prea mo afta hem i tingbaot blong lukluk long telefon buk blong luk sipos i gat ol Wetnes blong Jeova i stap kolosap. Nao hem i faenemaot se i gat wan famle we i stap kolosap nomo long haos blong papa blong hem. Wanda i talem se: “!Mi mi glad tumas!”

Famle ya i leftemap tingting blong Wanda, mekem se Wanda i tekem yangfala brata mo sista blong hem long ol miting bakegen. Wanda i talem olsem: “Hemia wok blong mi blong mekem mifala i rere blong go long miting.” Mo tu i gohed blong talem se: “Mi nao mi mas wasem ol klos blong mifala, komem hea blong mifala, mo tu mekem sua se mifala i klin mo rere blong go long miting.” Hem i hadwok long wan yangfala gel olsem, be hem i mekem. Wan taem, papa blong hem i wantem stopem olgeta blong no go long miting. Be ol pikinini oli askem hem gogo hem i letem olgeta oli go long miting.

Biaen, ol pikinini ya oli joen bakegen wetem mama blong olgeta. Nao taem Wanda i kasem 15 yia blong hem, hem i tekem baptaes, mo hem i stap talem se hem i wantem kam wan misinari biaen. I tru, wok blong mama blong Wanda i pasem wan traem. Hem i harem gud tumas blong luk pei we hem i kasem from pikinini gel blong hem, hem wan i stanap strong from trutok. I gud blong ol Kristin papa mama oli mekem sem mak taem oli stap wokem ol Kristin fasin long ol pikinini blong olgeta.

[Bokis blong pija long pej 31]

Olsem store ya hem i soemaot, ol papa mama oli traehad blong bildim Kristin fasin insaed long pikinini blong olgeta. Be ol pikinini tu, olgeta wanwan oli mas wok strong blong gat ol fasin ya. Ol pikinini ya i olsem ol narafala Kristin man nomo, olgeta oli mas mekem wan wok blong bildimap olgeta. (Efesas 4:​22-24) Nating se ol papa mama oli gat wan gud jans ya blong givhan, be ol man wanwan oli mas mekem prapa jus blong olgeta blong folem Jeova.