Halpem Ol Man Blong Kam Klosap Long Jeova

“I no gat man i save kam long Papa blong mi, sipos mi mi no tekem hem i kam.”​—JON 14:6.

1. ?Jisas we i laef bakegen, i givim wanem oda long ol disaepol blong hem? ?Mo wanem frut i kamaot taem ol Witnes blong Jeova oli obei long oda ya?

JISAS KRAES i talem long ol man blong hem se, oli ‘mas go long ol man long olgeta ples long wol, blong pulum olgeta oli kam man blong hem. Mo oli mas baptaesem olgeta long nem blong Papa, mo long nem blong Pikinini, mo long nem blong tabu spirit.’ (Matiu 28:​19) Long ol ten yia we oli jes pas, ol Witnes blong Jeova oli halpem bitim tri milyan man blong kam long God. Ale, ol man ya oli tekem baptaes blong soemaot se oli givim laef blong olgeta i go long God blong mekem wok blong hem. !Yumi glad tumas blong halpem olgeta ya blong kam klosap long God!​—Jemes 4:8.

2. ?Wanem samting i kamaot, nating se plante niuwan oli tekem baptaes?

² Long sam kantri, nating se plante niufala disaepol oli tekem baptaes, be namba blong ol pablisa blong Kingdom i no go antap. Namba blong ol man we oli stap ded evri yia i samwe long 1 pesen, taswe ating hemia wan risen we i mekem se namba blong ol pablisa i no stap go antap. Mo tu, long ol yia we oli jes pas, plante man lelebet oli lego Jeova. ?From wanem risen? Stadi ya mo hemia we i kam biaen, bambae i eksplenem wanem we i mas pusum ol man blong kam long Jeova mo wanem ol risen we i mekem se samfala oli lego Jeova.

Stamba Risen Blong Prij

3. (a) ?Olsem wanem wok we ol disaepol blong Jisas oli stap mekem i sem mak long wok we enjel long Revelesen 14:6 i stap mekem? (b) ?Wanem nambawan rod blong mekem ol man oli intres long mesej blong Kingdom, be wanem problem i stap?

³ Naoia we yumi stap long “taem blong en,” ol disaepol blong Jisas oli mas talemaot ‘trufala save’ long saed blong “gud nius blong Kingdom.” (Daniel 12:​4, NW; Matiu 24:​14, NW) Wok blong olgeta i sem mak long wok we wan enjel i stap mekem. Enjel ya i “stap talemaot gud nius ya we i blong stap oltaem nomo, gogo i no save finis. [Hem] i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” (Revelesen 14:⁠6) Long wol ya, ol man oli bisi tumas long ol samting long saed blong bodi. Taswe, beswan rod blong mekem olgeta oli intres long Kingdom blong God mo blong halpem olgeta blong kam klosap long Jeova, hemia taem yumi talemaot hop blong laef we i no save finis long wol ya. I sua se rod ya i wokgud, be i gat sam man oli joen wetem ol man blong God jes from we oli wantem stap long Paradaes. Olgeta ya, oli no rili wokbaot long smol rod ya we i blong go kasem laef.​—Matiu 7:​13, 14.

4. Olsem Jisas mo enjel we i stap flae antap long skae, tufala i soemaot, ?wanem stamba risen blong prij long ol man?

⁴ Jisas i talem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:⁠3) Enjel we i stap flae antap long skae i stap talemaot “gud nius ya we i blong oltaem nomo, gogo i no save finis.” Mo hem i stap talem long ol man long wol se: “Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.” (Revelesen 14:7) Taswe, stamba risen blong talemaot gud nius, i blong halpem ol man blong oli kam long Jeova tru long Jisas Kraes.

Samting We Yumi Mas Mekem Long Wok Blong Jeova

5. ?Pol mo Jisas, tufala i talem wanem blong soemaot se yumi stap mekem wok blong Jeova, i no wok blong yumi?

⁵ Taem aposol Pol i raet i go long ol tabu Kristin, hem i tokbaot ‘wok ya blong pulum ol man oli kam fren blong God.’ Mo hem i talem se, tru long ransom sakrefaes blong Jisas, God i mekem rod blong ol man oli kam fren blong Hem. Pol i talem se, i olsem we “God i stap yusum mifala blong singaot yufala,” mo “long nem blong Kraes, mifala i talem long yufala se, ‘Plis, yufala i kam fren blong God.’ ” !Samting ya i mekem yumi harem gud tumas! Yumi olsem “man blong karem tok blong Kraes.” Nomata we yumi gat hop blong go long heven no blong laef long wol ya, yumi neva mas fogetem se wok ya i blong Jeova, i no blong yumi. (2 Korin 5:​18-​20) Olgeta ya we oli kam long Kraes, God nao i tijim olgeta mo i pulum olgeta oli kam. Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam. Man we Papa blong mi i pulum hem i kam long mi, mi bambae mi mekem hem i laef bakegen long Lasdei. Ol profet bifo oli bin raetem wan tok we i talem se: ‘God bambae i tijim olgeta man.’ Man we i harem tok blong Papa blong mi, mo i lanem tok ya blong hem, hem i save kam long mi.”​—Jon 6:​44, 45.

6. ?Olsem wanem Jeova i stap seksekem olgeta nesen bifo we jajmen blong hem i kamtru? ?Long semtaem, hu ya olgeta we oli faenem sefples long “haos” wosip blong hem?

⁶ Long ol lasdei ya, ?olsem wanem Jeova i pulum ol man mo olsem wanem hem i ‘openem rod long olgeta blong oli bilif’? (Ol Wok 14:27; 2 Timoti 3:1) Wan stamba rod we hem i yusum, hemia taem ol Witnes blong hem oli go talemaot mesej blong hem, se bambae hem i sevem ol man mo i jajem rabis wol ya. (Aesea 43:12; 61:​1, 2) Mesej we oli stap talemaot long olgeta ples long wol i seksekem olgeta nesen​—hemia wan saen we i soemaot se jajmen blong spolem ol samting bambae i kamtru i no longtaem. Long sem taem, ol man we oli “sas” long lukluk blong God, oli stap aot long rabis wol ya, nao oli kam long sefples insaed long “haos” blong trufala wosip. Long rod ya, Jeova i mekem se profet tok blong Hagae i kamtru, se: “Bambae mi mi mekem olgeta nesen oli seksek, nao bambae ol gudgudfala samting blong olgeta nesen oli mas kam insaed. Mo bambae mi mi fulumap haos ya wetem ol gudgudfala samting.”​—Hagae 2:​6, 7, futnot NW; Revelesen 7:​9, 15.

7. ?Olsem wanem Jeova i openem hat blong ol man mo i pulum olgeta oli kam long hem mo Pikinini blong hem?

⁷ Jeova i openem hat blong ol man ya we oli fraet gud long hem​—we oli olsem “ol gudgudfala samting blong olgeta nesen”​—nao oli “bilif long tok” we ol Witnes blong Hem oli stap talemaot. (Hagae 2:​7, Jewish Publication Society; Ol Wok 16:14) Olsem long faswan handred yia, samtaem Jeova i yusum ol enjel blong lidim ol Witnes blong Hem i go long ol gudfala man we oli stap singaot i go long hem blong givhan long olgeta. (Ol Wok 8:​26-​31) Taem ol man ya oli kasem save se Jeova i lavem olgeta tumas, mo i mekem rod blong givhan long olgeta tru long Pikinini blong hem, Jisas Kraes, samting ya i pulum olgeta oli kam long Hem. (1 Jon 4:​9, 10) Yes, “kaen fasin” blong God no ‘trufala lav’ blong hem, i pulum ol man oli kam long Hem mo Pikinini blong hem.​—Jeremaea 31:⁠3, futnot NW.

?Jeova i Pulum Hu i Kam Long Hem?

8. ?Jeova i pulum wanem kaen man?

⁸ Olgeta we oli stap lukaot God, hemia nao ol man we Jeova i pulum olgeta oli kam long Hem mo Pikinini blong hem. (Ol Wok 17:27) Sam long ol man ya, “oli stap harem nogud from ol samting nogud” we Krisendom mo ol man raonabaot long wol oli stap mekem. (Esikel 9:⁠4) Ol man ya we Jeova i pulum olgeta, oli luksave “se oli nidim ol samting long saed blong spirit.” (Matiu 5:⁠3, NW) Yes, hemia ‘ol man long wol ya we tingting blong olgeta i stap daon.’ Olgeta ya bambae oli laef blong olwe long paradaes long wol.​—Sefanaea 2:​3.

9. ?Olsem wanem Jeova i save luk sipos ol man oli “stret blong kasem laef ya we i no save finis,” mo olsem wanem hem i pulum ol man ya?

⁹ Jeova i save wanem we i stap long hat blong man. King Deved i talem long pikinini blong hem, Solomon, se: “Jeova i stap lukluk hat blong olgeta man, mo hem i savegud tingting blong olgeta. Sipos yu lukaot hem, bambae hem i letem yu yu faenem hem.” (1 Kronikel 28:​9, NW) Jeova i stap skelem hat mo tingting blong man. Taswe, hem i save luk sipos wan man bambae i akseptem rod we Hem i mekem blong fogivim sin mo hop ya blong laef we i no save finis long niufala wol blong hem. (2 Pita 3:​13) Jeova i stap yusum ol Witnes blong hem blong talemaot mo tijim Tok blong hem long ol man. Long rod ya, hem i pulum ol man “we oli stret blong kasem laef ya we i no save finis,” oli kam long Hem mo Pikinini blong hem, nao “oli bilif.”​—Ol Wok 13:​48, NW.

10. ?Wanem i soem se, taem Jeova i pulum ol man, hemia i no minim se hem i makemaot finis olgeta we bambae hem i pulum olgeta mo olgeta we bambae hem i no pulum olgeta?

¹⁰ ?Samting ya i minim se Jeova i makemaot finis olgeta we bambae hem i pulum olgeta mo olgeta we bambae hem i no pulum olgeta? !No gat! Fasin ya blong God blong pulum man, i dipen long samting we ol man wanwan oli laekem tumas. God i respektem fasin fri blong yumi. Tede, Jeova i letem olgeta man long wol oli fri blong jus, olsem we hem i bin mekem long ol man Isrel bitim 3,000 yia bifo, taem Moses i talem se: “Tede, mi mi talemaot ol tok ya long yufala blong yufala nomo i jusumaot se yufala i wantem folem ol gudfala fasin, no yufala i wantem folem ol fasin we i nogud. Yufala i mas jusumaot se yufala i wantem laef, no yufala i wantem ded. . . . Naoia mi mi talem stret long yufala se yufala nomo i mas jusumaot. ?Yufala i wantem laef no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? Mi mi singaot heven mo wol, blong tufala ya nao bambae i witnes blong mi, we mi talemaot long yufala se yufala i mas jus. !Mi mi wantem tumas blong yufala i jusumaot laef! Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, bambae yufala wetem ol pikinini blong yufala mo olgeta we bambae oli kamaot biaen long yufala, bambae yufala evriwan i laef, mo bambae yufala i save stap longtaem.”​—Dutronome 30:15-​20.

11. ?Olsem wanem ol man Isrel oli save jusum laef?

¹¹ Makemgud se, blong jusumaot laef, ol man Isrel oli mas ‘lavem Jeova, obei long hem, mo putum tingting blong olgeta i strong long hem.’ Taem oli kasem ol tok ya, oli no go insaed long Promes Lan yet. Oli hivap long Flat Ples blong Moab, oli stap rere blong krosem Jodan Reva mo go insaed long Kenan. I stret nomo blong tingbaot se i no longtaem, bambae oli go insaed long kantri ya we i ‘gud tumas mo i bigfala,’ mo i “fulap wetem melek mo eg blong sugabag.” Be, blong kasem kantri ya, oli mas lavem Jeova, obei long hem, mo putum tingting blong olgeta i stap strong long hem. (Eksodas 3:​8, NW) Moses i mekem poen ya i klia, taem hem i talem se: “Sipos yufala i obei gud long ol tok ya blong hem we mi mi givim long yufala tede, mo yufala i lavem hem, mo yufala i obei long hem, mo yufala i holem olgeta loa blong hem, hem bambae i mekem yufala i gat gudfala laef, mo yufala i kam plante we i plante, mo bambae i blesem yufala taem yufala i go long kantri ya we bambae yufala i holem i blong yufala.”​—Dutronome 30:16.

12. ?Eksampel blong ol man Isrel i mas tijim yumi long wanem samting taem yumi stap prij mo tijim ol man?

¹² Tru long stori ya, ?yumi lanem wanem long saed blong wok blong prij mo blong tijim man, we yumi stap mekem long taem ya blong en? Yumi tingbaot Paradaes we i stap kam mo yumi tokbaot Paradaes ya taem yumi prij. Be yumi mo ol niufala disaepol we yumi pulum oli kam, bambae yumi no save luk Paradaes ya sipos yumi stap mekem wok blong God jes from we yumi wantem kasem wan samting. Olsem ol man Isrel, yumi evriwan i mas lanem blong ‘lavem Jeova, obei long hem, mo putum tingting blong yumi i strong long hem.’ Sipos yumi tingbaot samting ya taem yumi stap mekem Kristin minista wok blong yumi, bambae yumi joen wetem God blong pulum ol man oli kam long hem.

Ol Man We Oli Joen Blong Wok Wetem God

13, 14. (a) Folem 1 Korin 3:​5-9, ?olsem wanem yumi save joen wetem God blong mekem wok blong hem? (b) ?Yumi mas givim ona long hu sipos namba blong ol pablisa i go antap, mo from wanem?

¹³ Blong eksplenem fasin ya blong wok wetem God, Pol i yusum wan pijatok long saed blong garen. Hem i raetem se: “Yufala i luk. ?Apolos i wanem man? ?Mi Pol, mi wanem man? Mitufala i olsem ol man blong wok nomo, we mitufala i tekem yufala i kam bilif long Kraes. Mitufala i stap mekem ol wok ya nomo we Masta blong yumi i givim long mitufala wanwan, blong mitufala i mekem. I olsem we mi mi planem kakae long garen, nao Apolos i klinim [“i putum wota long,” NW] garen ya, be God nomo i stap mekem kakae ya i gru gud. Man we i planem kakae, mo man we i klinim [“i putum wota long,” NW] garen, tufala i olsem nating nomo. Stamba blong wok ya i stap long God, from we hem nomo i stap mekem ol kakae i gru gud. Mi ya we mi olsem man blong planem kakae, mo man ya we i olsem man blong klinim [“putum wota long,” NW] garen, mitufala i sem mak nomo. Bambae God i givim pei long mitufala, stret long ol wok we mitufala i mekem. I olsem we mitufala i stap joen wetem God blong mekem wok blong hem. Mo yufala i olsem garen we God i mekemrere graon blong hem.”​—1 Korin 3:​5-9.

¹⁴ Yes, i olsem we yumi stap joen wetem God blong mekem wok blong hem. Taswe, oltaem yumi mas planem “tok blong Kingdom” long hat blong ol man. Yumi mas visitim mo stadi Baebol wetem olgeta we oli soem intres. Hemia i olsem we yumi stap putum wota long garen. Sipos graon, we i minim hat blong man, i gud, bambae Jeova i mekem sid blong trutok blong Baebol i gru mo i karem plante frut. (Matiu 13:​19, 23, NW) Bambae hem i pulum man ya i kam long Hem mo Pikinini blong hem. Taswe, sipos namba blong ol pablisa blong Kingdom i go antap, hemia i from we Jeova i wok long hat blong ol man ya. Hem nao i mekem sid blong trutok i gru long hat blong ol man ya, mo i pulum olgeta oli kam long hem mo Pikinini blong hem.

Wok Blong Bildimap We Bambae i Stap Yet

15. ?Pol i yusum wanem pijatok blong soem rod blong givhan long ol narafala blong gru long bilif?

¹⁵ Yumi glad tumas taem moa man oli kam pablisa blong Kingdom. Nating se i olsem, yumi wantem tumas blong luk we ol man ya oli gohed blong lavem Jeova, obei long hem, mo putum tingting blong olgeta i strong long hem. Yumi sore tumas taem yumi luk se lav blong samfala i kam kolkol, nao oli lego Jeova. ?I gat rod blong blokem samting ya? Yes, i gat. Long wan narafala pijatok, Pol i soem olsem wanem yumi save halpem ol narafala blong gru long bilif. Hem i raetem se: “God i putum Jisas Kraes, we hem i olsem fandesen we haos ya i stap stanap long hem, mo i no gat narafala fandesen bakegen we man i save putum. Blong wokem haos ya, sam man oli save yusum ol samting we i blong stap longtaem, olsem gol mo silva mo ol gudfala ston we i flas gud. Mo sam man oli save yusum ol samting we oli save stap smoltaem nomo, olsem ol pos blong bus wetem waelken mo natanggura. Be long Lasdei ya we Kraes bambae i mekem kot long olgeta man, fasin blong wok blong ol man bambae i stap long klia ples nomo. Long dei ya, bambae i gat faea, mo faea ya bambae i soemaot ol wok blong olgeta, wanem i gud mo wanem i nogud.”​—1 Korin 3:​11-​13.

16. (a) ?Wanem defren mining blong tufala pijatok we Pol i yusum? (b) ?Olsem wanem samting we yumi bildimap i save mekem yumi harem nogud mo i lus long faea?

¹⁶ Pijatok we Pol i talem long saed blong garen, i soem se, blong garen i gru, i mas gat wan man i planem kakae, wan man i putum wota long hem oltaem, mo i mas gat blesing blong God. Narafala pijatok blong aposol Pol i soem bigfala wok we yumi ol Kristin minista yumi mas mekem blong bildimap narafala. ?Olsem wanem? ?Yumi stap bildimap narafala long wan strongfala fandesen? ?Yumi stap yusum olting we oli save stap longtaem? Pol i givim woning se: ‘Wanwan man i mas lukaot gud long fasin blong wok blong hem.’ (1 Korin 3:​10) Afta we yumi tokbaot hop blong laef blong olwe long Paradaes, blong pulum intres blong man, ?yumi mekem wanem? ?Yumi jes tijim sam stamba vas blong Baebol mo biaen, yumi pusum man ya blong mekem samting we hem i mas mekem blong kasem laef we i no save finis? ?Yumi stap tijim man olsem wanem? ?Yumi jes talem nomo se: ‘Sipos yu wantem laef blong olwe long Paradaes, yu mas stadi, go long ol miting, mo joen long wok blong prij’? Sipos yes, yumi no stap bildimap bilif blong man ya long wan strongfala fandesen. Wanem we yumi stap bildimap i no save stanap strong, mo i no save stanap tru long ol traem we oli olsem faea. Yumi no pulum ol man oli kam long Jeova, wetem tingting ya se sipos oli mekem wok blong Jeova blong sam yia nomo, bambae oli save laef long Paradaes. Hemia i olsem we yumi stap bildimap man wetem “ol pos blong bus wetem waelken mo natanggura.”

Bildimap Fasin Blong Lavem God Mo Kraes

17, 18. (a) ?Man i mas mekem wanem blong stap strong long bilif oltaem? (b) ?Olsem wanem yumi save halpem wan man no woman blong mekem se Kraes i stap long hat blong hem?

¹⁷ Bilif we i strong, hemia bilif we i stanap long fasin fren wetem Jeova God, tru long Jisas Kraes. Yumi evriwan i gat sin. Taswe, tru long Jisas nomo, yumi save gat pis wetem God mo frengud wetem hem. (Rom 5:​10) Tingbaot tok blong Jisas, se: “I no gat man i save kam long Papa blong mi, sipos mi mi no tekem hem i kam.” Blong halpem ol narafala blong bildimap bilif blong olgeta, ‘i no gat narafala fandesen bakegen we man i save putum. Jisas Kraes nomo i fandesen blong yumi.’ ?Samting ya i minim wanem?​—Jon 14:6; 1 Korin 3:​11.

¹⁸ Yes, Jisas Kraes nao i fandesen blong yumi. Fasin blong bildimap Baebol studen long fandesen ya, i minim se yumi tijim hem long fasin we i mekem hem i lavem Jisas moa. Blong mekem olsem, yumi mas tijim hem blong savegud se Jisas i Man we i Pemaot yumi, hem i Hed blong kongregesen, Hae Pris we i gat lav, mo King we i stap rul. (Daniel 7:​13, 14; Matiu 20:28; Kolosi 1:​18-​20; Hibrus 4:​14-​16) Yumi mas mekem se Jisas i stap long hat blong ol Baebol studen. Hemia i minim se yumi givhan long olgeta blong tingbaot Jisas olsem wan trufala man. Taem yumi prea from olgeta ya, i gud yumi mekem olsem Pol, we i prea strong from ol Kristin long Efesas. Hem i raetem se: “Mi bodaon, mi prea long Papa blong yumi. . . . Mi stap askem long hem, blong Kraes i kam, i mekem ples blong hem long tingting blong yufala, from we yufala i stap bilif strong long hem. Mo mi stap askem long hem blong hem i mekem laef blong yufala i stanap long fasin ya blong Kraes blong lavem ol man, olsem we rus blong tri i holemtaet graon, olsem we haos i fas strong long graon we i stanap long hem.”​—Efesas 3:​14-​17.

19. ?Wanem frut i save kamaot sipos yumi bildimap lav blong Kraes long hat blong ol Baebol studen blong yumi, be yumi mas tijim wanem?

¹⁹ I gud yumi folem rod ya blong mekem fasin blong lavem Kraes i gru long hat blong ol Baebol studen. Olsem nao, yumi stap bildimap fasin blong lavem Jeova God tu. Lav, filing mo fasin sore we Jisas i gat, i soemaot ol fasin blong Jeova. (Matiu 11:28-30; Mak 6:​30-​34; Jon 15:​13, 14; Kolosi 1:​15; Hibrus 1:⁠3) Taem ol man oli kasem save long Jisas, oli kasem save long Jeova tu. Long sem fasin, taem oli lavem Jisas, bambae oli lavem Jeova tu.a (1 Jon 4:​14, 16, 19) Yumi mas eksplenem long ol Baebol studen se Jeova i stamba blong evri samting we Jisas Kraes i bin mekem blong givhan long yumi. From samting ya, yumi mas talem tangkiu long Jeova, presem hem, mo wosipim hem, olsem “God blong sevem man.”​—Ol Sam 68:​19, 20; Aesea 12:​2-5; Jon 3:​16; 5:​19.

20. (a) ?Olsem wanem yumi save halpem ol man blong kam klosap long God mo Pikinini blong hem? (b) ?Bambae yumi tokbaot wanem long haf we i kam biaen?

²⁰ Yes, yumi stap joen wetem God blong mekem wok blong hem. I gud we yumi halpem ol man blong kam klosap long God mo Pikinini blong hem. Yumi mas halpem olgeta blong mekem se lav mo bilif i gru long hat blong olgeta. Olsem nao, bambae Jeova i kam olsem wan trufala man long tingting blong olgeta. (Jon 7:​28) Tru long Kraes, bambae oli naf blong wokem wan gudfala fasin fren wetem God, mo bambae oli lavem hem mo holemstrong long hem. Bambae lav i pusum olgeta, nao oli gohed nomo blong mekem wok blong God. Long rod ya, oli soemaot bilif long ol nambawan promes blong Jeova se bambae oli kamtru long stret taem blong hem. (Ol Krae 3:​24-​26; Hibrus 11:⁠6) Be taem yumi stap halpem ol narafala blong oli gru long bilif, hop, mo lav, yumi mas bildimap bilif blong yumi wan. Long rod ya, bambae yumi naf blong fesem ol hadtaem, olsem sip we i naf blong fesem bigfala win. Bambae yumi tokbaot poen ya long haf we i kam biaen.

[Futnot]

Rod Blong Tingting Bak

◻ ?Wanem rod we plante taem yumi folem blong pulum ol man blong intres long mesej blong Kingdom, mo yumi mas lukaotgud blong no mekem wanem?

◻ ?Wanem kaen man we Jeova i pulum olgeta oli kam long hem mo Pikinini blong hem?

◻ ?Ol man Isrel bifo, oli mas mekem wanem blong oli save go insaed long Promes Lan? ?Samting ya i tijim yumi long wanem?

◻ ?Yumi gat wanem wok blong halpem ol man blong kam klosap long Jeova mo Pikinini blong hem?

[Tok Blong Pija Long Pej 10]

Yumi mas talemaot hop blong laef we i no save finis long Paradaes. Be stamba mak blong yumi i blong pulum ol man oli kam long Jeova

[Tok Blong Pija Long Pej 13]

Yumi save mekem gudfala visit sipos yumi reregud fastaem