?God i Makemaot Finis Fyuja Blong Yu?

TRAEM tingbaot sipos yu kasem akseden. Maet sam man i ded be yu yu sef. ?Bambae yu yu harem se hemia i no stret taem blong yu ded yet? ?No yu yu harem gud from we yu jes stap long stret ples mo long stret taem?

Waes man Solomon i talem se: “Mi mi tanraon blong luk aninit long san, se olgeta we oli spid oli no winim resis, mo olgeta we oli strong oli no winim faet, mo olgeta we oli waes oli no gat kakae tu, mo olgeta we oli gat fasin luksave oli no rij tu, mo olgeta we oli gat save, ol man oli no tinghae long olgeta. From we ol taem mo ol samting we oli no tingbaot, oli stap kam long olgeta evriwan.” (Eklesiastis 9:11) !Plante samting we yumi no tingbaot oli stap hapen! Ating wan gudfala man blong resis i kasem kil, nao wan man we i no stap spid tumas i win long resis. Ating wan stret man i kasem trabol mo bisnes blong hem i brokdaon, be narafala bisnesman we fasin blong hem i kruked i kam rij. Be Solomon i no talem se God i makem finis ol samting ya, mo i mekem olgeta i kamtru. No gat. Ol samting ya oli kamaot nomo from we “ol taem mo ol samting we oli no tingbaot oli stap kam long olgeta evriwan.”

Jisas Kraes i mekem wan tok we i sem mak nomo. Ol man we oli stap lesin long hem oli save gud samting we hem i stap tokbaot. Hem i talem se: “?Olsem wanem long ol eitin man ya long Saeloam, we haos ya we i hae i foldaon long olgeta, i kilim olgeta oli ded? ?Yufala i ting se samting ya i soemaot we olgeta ya oli nogud moa, oli winim ol narafala man long Jerusalem?” (Luk 13:4) Jisas i no talem se hemia i prapa taem blong oli mas ded long hem, no hem i wil blong God no hem i bilif se ol man ya oli moa nogud bitim ol narafala man. Akseden ya we oli ded long hem i narafala eksampel blong soemaot se ol taem mo ol samting we yumi no tingbaot oli stap kamaot long enikaen man.

Baebol i no soemaot nating tingting ya se God i stap makemaot taem we yumi mas ded long hem. I tru we long Eklesiastis 3:​1, 2 i talem se: “Blong evri samting i gat wan taem we i stret long hem. Yes, i gat wan taem blong evri samting aninit long heven: Wan taem blong bon mo wan taem blong ded. Wan taem blong planem sid mo wan taem blong pulumaot samting ya we oli planem.” Solomon i stap talem se oltaem nomo i gat sam man oli laef mo sam man oli ded, from we yumi sinman. Yumi stap bon, mo taem yumi kasem mak blong yumi hemia 70 no 80 yia, ale biaen yumi save ded. Be stret taem blong ded blong yumi, God i no makemaot. Long sem fasin, hem i no makemaot stret taem blong wan man blong wokem garen i planem sid mo stret taem blong i pulumaot samting we hem i planem finis.

Biaen Salomon i soemaot se ol man i save ded taem oli no olfala yet. Hem i se: “Yu no mas kam rabis bitim mak, mo yu no mas kam krangke. ?From wanem bambae yu ded taem yu no kasem prapa taem blong yu yet?” (Eklesiastis 7:​17) Sipos God i makemaot finis stret taem blong yumi ded long hem, tok ya i no save gat mining. Be Baebol i no talem se God i makem finis taem blong ded blong yumi. Bifo, God i tok strong long ol man Isrel we oli tanem baksaed long hem finis from we oli akseptem hiten bilif ya. Long Aesea 65:​11, hem i se: “Yufala ya i livim Jeova finis, yufala i fogetem tabu hil ya blong mi, yufala i stanemap wan tebel blong god blong Laki mo yufala i stap fulumap waen we i meks finis long god ya we yufala i ting se i save makemaot taem blong laef mo ded blong yufala.”

!Taswe i krangke blong tokbaot ol akseden se oli kamaot from i mas olsem, no from we God i makemaot taem blong olgeta finis! Baebol i talem se: “God i stampa blong fasin ya blong laekem tumas ol man.” Ol man we oli talem se God nomo i stap mekem ol trabol oli kam long laef blong ol man, oli agensem trutok ya.​—⁠1 Jon 4:8.

Plan Blong God Long Fyuja

From we God i no makemaot ol samting we i mas hapen long laef blong yumi wanwan, ?i min se hem i no wantem sevem yumi? ?I min se laef blong yumi i no gat mining, i olbaot nomo? No gat. God i makem finis wan gudfala fyuja blong ol man. Baebol i tokbaot wan “nyufala wol, we stret fasin nomo bambae i stap long hem.”​—⁠2 Pita 3:13.

Blong mekem promes ya i kamtru, bambae God i mekem wan samting long ol man. Ating yu no save, be yu stap prea from samting ya. Hemia taem yu stap talem se: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.” (Matyu 6:​10, NW) Kingdom ya i wan tru gavman we i stanap finis long heven. Taem yu prea se bambae hem i kam, yu stap askem se Kingdom ya bambae i tekem ples blong olgeta gavman naoia. Mo hem nomo bambae i rulum wol.​—⁠Daniel 2:⁠44.

Lukaotgud Long Fyuja Blong Yu

Laef blong yu long fyuja bambae i save jenis bigwan. Hemia i no from laki no akseden, be i dipen long jus blong yu. Tingbaot trabol we i kamaot from haos blong Saeloam. Jisas i yusum trabol ya blong tijim yumi long wan impoten lesen. Ol man we oli ded from haos i foldaon long olgeta, oli no save ronwe long trabol ya. Be ol man we oli stap lesin long Jisas oli save ronwe long panis we God i save givim long olgeta. Taswe Jisas i givim woning long olgeta, i se: “Be sipos yufala i no tanem tingting blong yufala from ol sin blong yufala, bambae yufala tu i mas lus, olsem olgeta ya.” (Luk 13:​4, 5) I klia nomo se olgeta ya oli save jusum prapa fyuja blong olgeta.

I sem mak, jans ya i kamaot long yumi tu tede. Hemia blong yumi wanwan i save mekem sam samting blong sevem laef blong yumi. (Filipae 2:12) “God ya, hem i wantem sevem olgeta man, mo i wantem olgeta man bambae oli faenem trutok.” (1 Timote 2:⁠4) I tru, yumi bon wetem sam fasin blong papa mama blong yumi, mo ol man raonabaot long yumi oli save gat paoa long sam fasin blong laef blong yumi tu. Be nating se i olsem, God i letem yumi fri blong jusum olsem wanem blong yusum laef blong yumi. (Matyu 7:​13, 14) Yumi save mekem samting we i stret, no samting we i no stret. Yumi save mekem Jeova i glad long yumi, blong kasem laef, no yumi save agensem hem, blong kasem ded.

Plante oli jusum blong no dipen long God. Oli laef blong ronem ol flas samting, oli wantem harem gud long bodi, mo oli wantem kasem haenem. Be Jisas i givim wan woning, se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stampa blong prapa laef blong man i no stap long ol samting ya.” (Luk 12:15) ?Laef blong yumi i dipen long wanem? Long 1 Jon 2:​15-17, Baebol i talem se: “I nogud yufala i stap laekem ol fasin blong wol mo ol samting we oli stap long hem. . . . Ol fasin ya we i stap long wol oli olsemia. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo. Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”

Yu Mas Jusum Laef

?Olsem wanem yu save gud se yu stap mekem wil blong God? Jisas i talem se: “Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:⁠3) Sipos yu kasem stret save long Baebol, yu save gat bilif. “Be sipos man i no bilif long God, hem i no save mekem God i harem gud. From we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:⁠6) Save ya we yu mas gat i rere finis. Ol Wetnes blong Jeova oli halpem plante milyan man finis blong kasem save ya taem oli stap mekem stadi wetem olgeta long Baebol.a

Blong mekem God i harem gud long yu, yu mas mekem sam jenis long laef blong yu. Maet yu gat sam nogud fasin we yu mas winim, no maet yu gat sam fasin blong sem we yu mas stopem fastaem. Yu no mas ting se i hadwok long yu blong jenis, no gat. Tingting ya se yu no save jenis nating i nogud. Hem i kamaot long gyaman bilif ya se God i makemaot finis olgeta samting long laef blong man. Be i no olsem. Jeova i save halpem enikaen man nomo blong i save ‘jenisim tingting blong hem’ mo kasem “nyufala laef.” (Rom 12:2; Efesas 4:​22-24) God i luk, taem yu stap traehad blong mekem hem i harem gud long yu. Mo hem i rere blong blesem olgeta we oli stap mekem wil blong hem.

I tru tumas, taem yu lanem Baebol, samting ya bambae i no save winim olgeta trabol blong yu. Ol man blong wok blong God oli save kasem akseden mo ol nogud trabol long laef blong olgeta, olsem ol narafala man nomo. Be God i givim waes long yumi olsem wanem blong winim ol trabol ya. (Jemes 1:⁠5) Yu save harem gud taem yu save se yu stap fren gud wetem God. Proveb 16:20 i se: “Man we i stap trastem Jeova i save harem gud.”

Long Paradaes aninit long Kingdom blong God, bambae yumi no save wari from ol akseden mo ol trabol. God bambae i finisim olgeta samting we oli stap mekem man i harem nogud naoia. Promes blong Baebol i se: “Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Revelesen 21:⁠4) Plante man we oli ded from akseden oli save stanap blong kasem laef bakegen.​—⁠Jon 5:​28, 29.

?Bambae yu yu kasem gudfala fyuja ya? Taem ol man Isrel kolosap oli go insaed long Promes Lan, Moses i talem long olgeta, se: “Mi mi putum laef mo ded long fored blong yu, blesing mo trabol. Mo yu mas jusum laef, blong yu save stap laef, yu mo ol pikinini blong yu. Blong mekem olsem, yu mas laekem Jeova, God blong yu, yu mas lesin long voes blong hem, mo yu mas stap kolosap long hem. From we hem i olsem laef blong yu mo hem i olsem plante dei blong yu.”​—⁠Dutronome 30:​19, 20.

Hemia nao, yumi no stap kalabus aninit long han blong wan God we i no gat sore, mo i makem finis olgeta samting long laef blong yumi, no gat. Yu yu fri blong jusum wan gudfala fyuja mo hapi taem blong olwe. I stap long yu nomo. !Yes, i gud yu jusum laef!

[Futnot]

[Tok blong makem poen long pej 5]

God i tok strong long ol man Isrel we oli tanem baksaed long hem, blong oli folem hiten bilif ya se i gat taem blong ol trabol we oli kasem yumi, mo yumi no gat rod blong sef.