?Baebol i Tijim Bilif Ya Se God i Makemaot Laef Blong Yumi Finis?

!GYAMAN TOK! !TOK WE I DAONEM MAN! Taem wan haeman blong wan velej no taon i faenemaot se wan man i talem gyaman tok we i spolem nem blong hem, hem i harem se i mas stretem samting ya. Maet hem i putum man ya long kot from gyaman tok we hem i talem no raetem.

Oraet, bilif ya se God i makemaot laef blong ol man, hem i wan bigfala gyaman tok we i spolem nem blong God ya we i gat Olgeta Paoa. Bilif ya i talem se God nao i mekem olgeta trabol mo akseden we oli stap spolem laef blong ol man. Sipos yu bilif se God i makemaot finis laef blong ol man, maet long tingting blong yu, King ya blong Heven mo Wol i gat wan plan blong olgeta samting we oli mas hapen long ol man. Maet i olsem se, ‘!Tede, Jon bambae i kasem kil long wan akseden long trak, Fatou bambae i kasem sik ya malaria, wan hariken bambae i spolem haos blong Mamadou!’ ?Sipos God i olsem, bambae yu wantem wosip long hem?

Be, sam man we oli bilif se God i makemaot laef blong ol man finis, oli askem se: ‘?Sipos God i no stampa blong ol trabol we yumi kasem, hu nao i stampa blong olgeta trabol ya?’ Ousmane, yangfala man ya we yumi bin tokbaot fastaem, i tingbaot kwestin ya tu. Trufala ansa long kwestin ya i kam klia. Hem i luk ol tijing blong Baebol, we oli soem se tok ya i gyaman. (2 Timote 3:​16) Ale, bambae yumi tingbaot samting we Baebol i talem long saed ya.

?Fol Blong Hu?

Plante taem, ol man oli talem se wora we i ron bigwan, ol hariken, graon i seksek, hemia ol wok blong God. Be, Baebol i no talem se God i stampa blong ol trabol ya. Tingbaot wan trabol we i bin kamaot plante handred yia bifo, long Medel Is. Baebol i talem se i gat wan man nomo i laef tru long trabol ya. Mo man ya i givim ripot se: “Faea we i kamaot stret long God [plante taem, Hibru tok ya i minim laetning] i foldaon long heven, mo i kasem ol sipsip mo ol wokman, i kakae olgeta.”​—Job 1:​16.

Maet man ya we i fraet bigwan i ting se God nao i mekem faea ya i kamaot, be Baebol i soemaot se God i no stampa blong samting ya. Yu save ridim Job 1:​7-​12, mo bambae yu luk se laetning ya i no kamaot long God, be hem i kamaot long Enemi blong God​—!Devel Setan! I no minim se Setan i stampa blong ol wanwan trabol we oli stap kamaot. Be, i klia se, i no gat wan risen blong talem se God nao i gat fol from ol trabol ya.

Samting we i tru se, plante taem i fol blong ol man nomo taem wan samting i go rong. Taem wan yangfala i no wokgud long skul, taem wan man i kasem trabol long wok, no taem yumi no save joengud wetem ol narafala, plante taem hemia from we yumi no traehad inaf, no yumi no trenem yumi long rod ya, no maet from we yumi no tingbaot narafala. Long sem fasin, ol sik, ol akseden, mo ded, oli save kamaot from man i no lukaotgud, no from we i mekem wan krangke samting. Tingbaot, sipos wan man i fasem strap blong trak blong hem taem hem i ron long trak, samting ya nomo i save givhan long hem blong i no ded long wan akseden long trak. Sipos God i rili makemaot laef blong ol man, wan strap blong trak i no save givhan nating long wan man olsem. Taem ol man oli tekem meresin blong winim sik no oli gat fasin we i klingud oltaem, samting ya tu i save mekem namba blong ol man we oli ded blong nating nomo, i godaon bigwan. Mo tu, sam bigfala hariken, graon i seksek, mo sam narafala disasta olsem we ol man oli talem se oli “wok blong God,” oli rili wok blong man nomo. Oli kamaot from fasin blong man blong no lukaotgud long wol ya.​—Skelem wetem Revelesen 11:18.

“Ol Taem Mo Ol Samting We Man i No Save Long Hem”

Tru tumas, i gat plante nogud samting oli kamaot we man i no save wanem samting i stampa blong olgeta. Be, makem tok blong Baebol long Eklesiastis 9:​11: “Mi mi tanraon blong lukluk ol samting aninit long san. Ol samting ya oli olsem: Ol man we oli spid oli no winim resis. Ol man we oli strong oli no winim faet. Ol man we oli waes oli no kasem kakae. Ol man we oli gat hed oli no rij. Ol man we oli gat save, man i no tinghae long olgeta. From we ol taem mo ol samting we man i no save long hem, oli hapen long evriwan.” Taswe i no gat risen blong bilif se Man we i Wokem Olgeta Samting nao hem i stampa blong olgeta akseden, no se taem man i kasem kil long wan akseden, hemia i olsem panis blong hem.

Jisas Kraes i tok agensem tingting ya se God i makemaot laef blong ol man finis. Jisas i tokbaot wan trabol we ol man we oli stap lesin long hem oli savegud long hem. Hem i askem se: “?Olsem wanem long ol eitin man ya long Saeloam, we haos ya we i hae i foldaon long olgeta, i kilim olgeta oli ded? ?Yufala i ting se samting ya i soemaot we olgeta ya oli nogud moa, oli winim ol narafala man long Jerusalem? Mi mi talem long yufala, i no olsem.” (Luk 13:​4, 5) Jisas i soemaot klia se, trabol ya i no kamaot long God, be hemia nao “ol taem mo ol samting we man i no save long hem.”

Ol Trabol We Oli Kamaot From Sin

?Olsem wanem nao, long ded mo olgeta sik we oli stap kamaot? Baebol i talem klia wanem samting i hapen long ol man, i se: “Olgeta man oli ded from Adam.” (1 Korin 15:​22, NW) Ded i spolem man stat long taem we faswan papa blong yumi Adam, i no moa obei long God. Olsem we God i bin givim woning finis, Adam i mekem se olgeta pikinini blong hem oli kasem ded. (Jenesis 2:​17; Rom 5:​12) Ale, yumi save se olgeta sik oli kamaot from bubu blong yumi ya, Adam. Mo tu, ol slak fasin we yumi bon wetem, oli stampa blong plante trabol we oli mekem yumi harem nogud long laef.​—Ol Sam 51:5.

Tingbaot problem blong fasin pua. Bilif se God nao i makemaot laef blong ol man, i mekem se plante puaman we oli harem nogud, oli no traehad blong jenisim had laef we oli gat. Oli bilif se, ‘Hemia nao laef we God i makemaot finis blong yumi.’ Be, Baebol i soemaot se fol i stap long sin blong man, i no from se God i makemaot laef blong man. Samfala oli kam pua taem oli ‘kasem frut blong sid we oli planem fastaem,’ from we maet oli les man no oli no skelemgud mo yusumgud ol mane mo olting we oli gat. (Galesia 6:7; Proveb 6:​10, 11) Plante milyan man oli pua from we i gat sam haeman we oli griri tumas oli stap mekem i strong tumas long olgeta. (Skelem wetem Jemes 2:⁠6.) Baebol i talem se: “Man i rulum ol man blong spolem olgeta nomo.” (Eklesiastis 8:9) I no gat pruf i stap blong soemaot se fasin pua i kamaot long God no i kamaot from we Hem i stap makemaot laef blong ol man.

Bilif Se God i Makemaot Laef Blong Man—Ol Nogud Samting We Oli Kamaot From

Wan narafala samting we i soem se i nogud blong bilif we God i makemaot laef blong man finis, hemia se bilif ya i spolem fasin blong ol man. Jisas Kraes i talem se: “Gudfala tri, hem i save karem gudfala frut nomo, mo rabis tri, hem i save karem rabis frut nomo.” (Matyu 7:​17) I gud yumi tingbaot wan “frut” blong bilif ya se God i makemaot laef blong ol man finis, hemia se bilif ya i spolem fasin we man i mas gat blong lukaotgud long ol wok blong hem.

I impoten blong gat strong tingting blong mekemgud olgeta wok blong yumi. Hemia wan samting we i pusum ol papa mama blong traehad blong kasem ol samting we famle blong olgeta i nidim. Samting ya i pusum ol man blong wok tu, blong oli mekemgud wok blong olgeta, mo ol man blong wokem samting blong oli wokem samting we i nambawan mo i beswan. Sipos man i bilif se God i makemaot laef blong hem finis, samting ya i save mekem se hem i lusum strong tingting ya blong mekemgud ol wok blong hem. Eksampel, tingbaot se trak blong wan man i gat problem wetem stia blong hem. Sipos hem i gat strong tingting blong mekemgud wok blong hem, bambae hem i fiksimap trak ya, from we hem i tingbaot laef blong hem mo laef blong ol man we oli ron long trak wetem hem. Be, wan man we i bilif se God i makemaot laef blong man finis, bambae hem i no tingbaot se stia blong trak blong hem i save mekem wan akseden i kamaot. !Bambae hem i gat tingting ya nomo se sipos wan trabol i kamaot, hemia ‘samting we God i wantem’!

Yes, bilif ya se God i makemaot laef blong ol man finis, i save pulum man isi nomo, blong oli no lukaotgud, oli les, oli no wantem karem blem from ol mastik blong olgeta, mo plante narafala nogud samting bakegen.

?Wan Fenis We i Blokem Fasin Blong Frengud Wetem God?

Samting we i moa nogud se, bilif ya i save mekem man i no moa luksave se hem i gat wan wok, no samting we hem i mas mekem, long fored blong God. (Eklesiastis 12:13) Man blong raetem Ol Sam i talem se olgeta man oli mas ‘testem mo luk we Jeova i gud.’ (Ol Sam 34:8) God i talem sam samting we ol man oli mas folem blong kasem blesing from gudfala fasin blong hem.​—Ol Sam 15:​1-5.

Wan long ol samting ya, hemia fasin blong tanem tingting from ol sin. (Ol Wok 3:​19; 17:30) Fasin ya i minim tu se yumi luksave ol mastik blong yumi mo yumi traehad blong jenisim olgeta. From we yumi sinman, yumi evriwan i gat plante samting we yumi nidim blong tanem tingting blong yumi from. Be, sipos wan man i bilif se trabol we hem i kasem i kamaot from we God i makemaot laef blong hem finis, i hadwok blong man ya i tanem tingting blong hem from ol sin blong hem, mo blong luksave se hem i gat fol from ol mastik we hem i mekem.

Man blong raetem Ol Sam i tokbaot God, i se: “Oltaem yu yu laekem mi tumas, mo fasin ya, mi mi wantem moa, i winim we mi wantem stap laef.” (Ol Sam 63:3) Be, bilif ya se God i makemaot laef blong man finis, i mekem plante milyan man oli ting se God i stampa blong olgeta trabol we oli kasem. From samting ya, plante man oli tingting nogud long God. I olsem se oli satem doa we i save lidim olgeta blong frengud wetem Man ya we i Wokem Olgeta Samting. Yes, ?olsem wanem yu save laekem wan man we yu ting se hem nao i stampa blong olgeta trabol mo traem blong yu? Taswe, bilif ya se God i makemaot laef blong ol man finis, hem i olsem wan fenis we i seraotem God mo ol man.

Kam Fri Long Bilif Ya We i Save Bos Long Yumi

Yangfala Ousmane, we yumi bin tokbaot fastaem, i stap kalabus long bilif ya se God i makemaot laef blong ol man finis. Be, taem ol Wetnes blong Jeova oli halpem hem blong skelem tingting blong hem wetem Baebol, samting ya i pusum Ousmane blong sakemaot bilif ya. From samting ya, hem i haremgud moa, mo hem i gat wan nyufala gudfala tingting long saed blong laef. Samting we i impoten moa, hem i save Jeova God olsem wan God we i “gat sore mo gladhat, hem i slou blong kam kros, mo hem i fulap long kaen fasin mo trutok.”​—Eksodas 34:⁠6.

Mo tu, Ousmane i luksave se God i gat wan stampa tingting long saed blong fyuja, be hem i no mekem wan plan blong ol wanwan samting we oli hapen long laef blong yumi.a Seken Pita 3:​13 (NW) i talem se: “Stret long promes we God i mekem finis, yumi stap wet long nyufala heven mo nyufala wol, we stret fasin nomo bambae i stap long hem.” Ol Wetnes blong Jeova oli halpem plante milyan man blong kasem hop ya blong laef foreva long “nyufala wol” ya we God i promes long hem. Oli wantem halpem yu tu.

Taem stret save blong yu long saed blong Baebol i kam bigwan moa, bambae yu luksave se fyuja blong yu i no dipen long ol samting we wan paoa i makemaot finis mo we yu no save kontrolem. Ol tok blong Moses we i go long ol man Isrel bifo, oli stret nomo, taem hem i talem se: “Mi putum laef mo ded i stap long fes blong yu. Yes, ol tok blong blesem yu mo ol tok blong panisim yu. Mo yu mas jusum laef, blong bambae yu save stap laef, yu mo ol pikinini blong yu. Blong mekem olsem, yu mas laekem Jeova, we i God blong yu, mo yu mas lesin long voes blong hem, mo yu mas stap fasgud long hem.” (Dutronome 30:19, 20) Yes, yu gat jans blong jusumaot wanem kaen fyuja nao we yu wantem kasem. Samting ya i no stap long han blong wan paoa we i makemaot laef blong yu finis.

[Futnot]

[Tok blong pija long pej 7]

Ol trabol ya oli no ‘wok blong God’

[Credit Lines]

U.S. Coast Guard photo

WHO

UN PHOTO 186208/M. Grafman