?God i Makemaot Laef Blong Yu Finis?
“ALA NÒ DON.” Hemia wan tok long lanwis Bambara blong Mali, long Wes Afrika, we i minim se, “Hemia wok blong God.” Ol tok olsem oli kamaot plante taem long Mali. Long lanwis Wolof, i gat wan tok se, “Yallah mo ko def” (God i mekem samting ya). Mo long lanwis blong laen ya Dogon, oli talem se, “Ama biray” (God i stampa blong samting ya).
Long sam narafala kantri, oli gat ol tok tu we i kolosap sem mak. Taem wan man i ded no wan trabol i kamaot, plante taem yumi harem ol tok olsem se, “Hem i taem blong hem” mo “God i wantem olsem.” Long Wes Afrika, ol man oli raetem ol tok long ol sevis bas no hangem saen insaed long ol stoa se, “Man i mekem plan, be God i jenisim.” Plante man, oli no tinghevi long tok ya. Be, plante taem tok ya i soemaot bilif we i stap dip insaed long samfala se, i gat wan plan i stap finis blong laef blong yumi.
?Wanem ya bilif se olgeta samting oli stap hapen folem wan plan we i stap finis? The World Book Encyclopedia i eksplenem se, “hemia wan bilif se i gat sam paoa we man i no naf blong kontrolem, we oli stap makemaot stret taem blong ol samting oli hapen.” ?Ol “paoa” ya oli wanem? Plante taosen yia bifo, ol man Babilon oli bilif se ol samting we i kamaot long laef blong wan man, i dipen bigwan long ol sta we oli stap long skae taem hem i bon. (Skelem wetem Aesea 47:13.) Ol man Gris oli bilif se i gat tri strongfala woman god we oli stap tantanem, makem, mo katem rop we i olsem samting blong kontrolem laef blong ol man. !Be, ol man blong hae save long Krisendom, oli ol faswan man blong leftemap tingting ya, se God nao i stap makemaot laef blong ol man!
Eksampel, “Sen” Augustine i sakemaot ol “gyaman mo nogud tingting” blong ol man we oli talemaot fyuja from ol sta. Be, hem i talem se “sipos wan man i bilif se God i stap, be hem i no bilif se God i save ol samting we bambae oli kamaot long fyuja, man ya i krangke.” Hem i talem se, sipos God i rili gat olgeta paoa, hem i mas “save olgeta samting bifo we oli kamtru,” hemia i min se “hem i makemaot evri samting fastaem.” Be, Augustine i bilif strong se, nating we God i save olgeta samting bifo we oli kamaot, ol man oli gat jans yet blong jusum mo mekem prapa disisen blong olgeta.—The City of God, Buk 5, Japta 7-9.
Plante handred yia biaen, Jean Calvin, wan Protestan we i stadi dip long saed blong skul, i ademap sam moa tingting blong hem. !Hem i talem se i gat sam man we “[God] i makemaot finis se bambae oli pikinini blong kingdom long heven,” mo sam narafala, hem i makemaot se bambae oli “kasem panis from kros blong hem”!
Tede, long plante ples blong wol, ol man oli bilif strong se God i makemaot fyuja blong ol wanwan man finis. Tingbaot store blong Ousmane, wan yangfala man long Wes Afrika. Hem i wan long ol beswan studen long skul blong hem. !Be long tes blong kasem stefeket blong hem, hem i no pas! Samting ya i minim se hem i mas skul wan moa yia bakegen, mo antap long hemia, hem i harem nogud mo i sem long fored blong ol famle mo fren blong hem. Wan fren i traem mekem Ousmane i haremgud bakegen, hem i talem se God i wantem olsem. Mama blong Ousmane tu i talem se hem i no pas from we hemia nao samting we God i makemaot finis.
Fastaem, Ousmane i agri long ol tok blong olgeta blong soemaot sore. Hem i ting se, sipos God i no wantem we hem i pas, ale i no gat wan samting we hem i save mekem blong jenisim. Be, papa blong hem i no agri. Hem i talem se i fol blong Ousmane we hem i no pasem tes blong hem—i no fol blong God. Ousmane i no pas from we hem i no stadi plante.
Samting ya i mekem se Ousmane i no moa save nao sipos God i makemaot laef blong ol man. Taswe hem i wantem faenemaot moa long saed ya. I gud we yu tu yu mekem sem mak, mo traem tingtinggud long ol tok we i kam biaen.