Ol Akseden—?God i Makem Finis No Oli Kamaot Olbaot?

KRISTINA i wan naesfala yang gel. Hem i wokbaot krosem wan bigfala rod long Sao Polo, Brasil. Rod ya plante trak i stap pas long hem. Be Kristina i no luk wan bas we i stap kam. Draeva i traehad blong stopem bas be i let finis. Bas i bangem Kristina mo i kilim hem i ded.

Oli mekem ripot long nogud akseden ya long fas pej blong nyuspepa blong Brasil (O Estado de S. Paulo, Julae 29, 1990). Hemia i wan long ol 50,0000 akseden we man i stap ded long hem evri yia long Brasil. Plante taosen man moa oli no save wokbaot bakegen from ol akseden olsem. Be sam narafala oli laef, oli no karem kil nating. ?From wanem yangfala gel ya i ded? ?God i makem dei ya finis blong hem i ded long hem?

Plante man i ting olsem. Oli bilif se God i stap kontrolem laef blong ol man, mo i makemaot finis ol impoten taem, olsem taem blong ded blong olgeta. Taswe oli stap tok olsem se: “I no gat man i save jenisim taem blong wan samting we i mas hapen,” “Hem i taem blong hem,” no oli se, “Wanem samting we i mas kamtru bambae i kamtru.” ?Ol tok olsem, oli tru? ?Wan paoa i stap kontrolem laef blong yumi?

Bilif ya se olgeta samting i stap hapen from we hem i taem blong ol, hem i wan bilif blong ol man Gris mo ol man Rom bifo. Be tede tingting ya i stap yet long plante skul. Skul blong ol man Moslem i holemtaet ol tok blong Koran, se: “Man i mas ded long dei we Ala [God] i makemaot finis. Sipos i no taem blong hem yet, be hem i no save ded nating.” Bilif ya i stap tu long ol skul blong Krisendom. John Calvin i sapotem bilif ya taem hem i tijim doktrin ya se God i makemaot finis ol samting we bambae i hapen long laef blong man. Taswe oltaem ol haeman blong skul oli stap talem long ol famle blong dedman se akseden olsem “i wil blong God.”

Tingting ya se God i stap mekem ol akseden i kamaot, i no tru. Hem i no laenap wetem stret tingting mo ol ekspiryens mo ol risen blong ol akseden. Tingbaot ol akseden long trak. Plante taem, ol man oli faenemaot ol prapa risen blong ol akseden ya. Taswe i klia se ol akseden ya oli no kamaot long God. Mo taem oli kaontem ol akseden, oli luk tu se sipos ol man oli keful gud​—⁠oli putum strap blong jea​—⁠bambae oli no save ded long ol nogud akseden ya. ?Wanem tingting blong yu? ?Sipos God i wantem blong wan man i ded long wan akseden, yu ting se man ya i save keful gud, nao i save sevem laef blong hem? No gat. Be from we ol man we oli keful oli save sevem laef blong ol, yumi save gud se akseden i no wil blong God.

Man we i bilif se i no save ded sipos i no taem blong hem yet, hem i save kasem trabol. Maet man olsem i bitim ol mak blong spid mo i no kea long ol saen blong rod mo i stap draev taem hem i drong long alkol no drag. Antap moa, sam man oli stap talem se i fol blong God taem akseden i kasem olgeta. Oli kros, mo oli no moa gat hop long laef, mo oli bilif se God i no kea long olgeta. Samtaem, oli no moa save bilif long hem nating. Wan man, nem blong hem Emerson, i talem se: “Bilif ya se God i no kea mo i makem finis ded blong ol man, i mekem man i harem nogud i bitim mak.” Tok ya i stret nomo.

?Be Baebol i talem wanem long saed blong ol nogud akseden? ?Baebol i tijim yumi se ol samting ya i kamaot from God i makemaot olgeta finis? Mo tu, ?olsem wanem blong kasem sef? ?Yumi gat jus long bisnes ya, no no gat?

[Tok blong makem poen long pej 4]

“Bilif ya se God i no kea mo i makem finis ded blong man, i mekem man i harem nogud i bitim mak.”—Ralph Waldo Emerson